ATV

Blog

  • “Ju kam premtuar se nuk do t’ju mungoj gjatë”, Blerona Zeqiri nis rrugëtimin e saj të ri në ATV

    “Ju kam premtuar se nuk do t’ju mungoj gjatë”, Blerona Zeqiri nis rrugëtimin e saj të ri në ATV

    Sezoni i ri televiziv në ATV, vjen me prurje të reja në skemën programore.

    Duke filluar nga java e ardhshme, në ekranin e ATV-së do ta shihni edhe moderatoren e njohur Blerona Zeqiri.

    Këtë njoftim e ka bërë vetë moderatorja, të cilën e ka shpërndarë me anë të një postimi në Instagram ku është fotografuar përkrah drejtorit të ATV-së, Zija Rexhepin.

    “Ju kam premtuar se nuk do t’ju mungoj gjatë. E ku tjetër përpos në mediumin që ka krijuar besueshmëri, profesionalizëm e vlerësim! Mezi po pres të takohemi të hënën në ekranin e ATV-se”, ka shkruar ajo.

    Për më shumë detaje si dhe natyrën e emisionit të cilin Blerona do ta drejtojë në këtë televizion, do të njoftoheni ditëve në vazhdim.

    Rexhepi, ditë më parë, ka paralajmëruar se në vazhdimësi do të ketë prurje të reja, të cilat do ta pasurojnë skemën programore të ATV-së.

    ATV-ja është projekt i “Media Invest”, që funksionon mbi themelet e Kolegjit AAB, i cili nëpërmjet Fakultetit të Komunikimit Masiv dhe Gazetarisë̈, për me shumë se dy dekada me radhë, u ka dhënë mediave në Kosovë profesionistë të spikatur dhe të përkushtuar.

    Për më pak se tri vite që nga themelimi, ATV vazhdon te jetë televizioni më i shikuar në Kosovë.

  • Plagoset një person në “Dardani”, u gjuajt tri herë në drejtim të tij

    Plagoset një person në “Dardani”, u gjuajt tri herë në drejtim të tij

    Përgatiti: Arton Hamiti

    Paraditja e së premtes nuk ishte e qetë për banorët e lagjes “Dardania” të kryeqytetit.

    Teksa po qëndronte në një kafene, të cilën e frekuentonte shpesh, Dëfrim Kuqi u plagos me armë zjarri nga një person tashmë i identifikuar.

    Prapa kamerës, dëshmitarët rrëfyen për incidentin që ndodhi rreth orës 11:00.

    Naser Syla, drejtor i Emergjencës, përmes telefonit konfirmoi se gjendja e të plagosurit është e rëndë. Kurse, televizioni mësoi se 36-vjeçari ka plagë në abdomen dhe në këmbë.

    Ndërkohë, policia e cila iu përgjigj thirrjes menjëherë, është duke i vazhduar hetimet.

    “Policia ka dalë në vendin e ngjarjes dhe i ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Hetuesit policorë në koordinim me prokurorinë, po ndërmarrin veprimet hetimore për arrestimin e personit të dyshuar (i cili është identifikuar) si dhe ndriçimin e plotë të rastit”, tha zëdhënësja e Policisë për Rajonin e Prishtinës, Flora Ahmeti.

    Deri në transmetimin e kësaj kronike, personi i njohur për Policinë, pasi që dyshohet edhe për vepra të tjera penale, nuk është arrestuar.

  • Organizohet forumi për sportin, në kuadër të javës evropiane

    Organizohet forumi për sportin, në kuadër të javës evropiane

    Përgatiti: ATV

    Në bashkëpunim me Ministrinë e Kulturës, Rinisë dhe Sportit, Komiteti Olimpik i Kosovës ka organizuar Forumin për Sportin, në kuadër të Javës Evropiane.

    Në këtë forum temë diskutimi ishin lojërat mesdhetare Prishtina 2030, të cilat do të mbahen në Kosovë.

    Ndërkaq, koordinatori nacional në “Javën Evropiane të sportit”, dha më shumë detaje për rendësinë e kësaj jave.

    Gjatë këtij forumi u tha se kjo është kampanjë e promovuar dhe e organizuar nga Komisioni Evropian.

  • Moszbatimi i marrëveshjes nga Serbia, në favor të hyrje-daljes së terroristëve

    Moszbatimi i marrëveshjes nga Serbia, në favor të hyrje-daljes së terroristëve

    Përgatiti: Fatlum Jashari

    Refuzimi i Serbisë për ta zbatuar marrëveshjen e arritur në Bruksel më 2015, për hapjen e dy pikave të reja kufitare me Kosovën, ia lehtësoi hyrje-daljen në dhe nga Banjska e Zveçanit grupit terrorist të udhëhequr nga Milan Radojicic.

    Marrëveshja ndërmjet dy shteteve parashihte hapjen e pikave kufitare: në Sfircë të Kamenicës, për të lehtësuar qarkullimin e ndërsjellë me Medvegjën; dhe në Izvor për të lehtësuar qarkullimin e ndërsjellë me Novi Pazarin.

    Edhe pse Kosova ndërtoi pikën kufitare në Kapi të Sfricës më 2017, Serbia ende refuzon vendosjen e policëve atje, duke bllokuar funksionalizimin e saj.
    Tetë vjet pas marrëveshjes, si pasojë e refuzimit nga Serbia nuk është hapur as pika kufitare në Izvor.

    Në këto rrethana nuk u bënë investime infrastrukturore – gjë që ende vështirëson punën dhe vë në rrezik Policinë e Kosovës.

    Pikërisht kjo dhe dy rrugët lidhëse me Banjskën dyshohet se u përdorën nga grupi terrorist, i udhëhequr nga Milan Radojicic, që sulmoi Policinë e Kosovës, vrau rreshterin Afrim Bunjaku dhe plagosi dy zyrtarë policorë.

    Pas vetëm dy kilometrash në rrugën dytësore, në skaje të së cilës u panë kamionë, përfundon asfalti dhe vijon terreni i ngushtë malor për rreth 12 kilometra të tjera, para se të lidhet me rrugën parësore 1.5 kilometra nga kufiri.

    Edhe rruga që do të duhej të konsiderohej kryesore, po ashtu mes malesh, me gjatësi rreth 15 kilometra nga Banjska në kufi, është e pashtruar dhe qarkullimi nuk është i mundshëm për të gjitha automjetet.

    Pa asnjë bazë të përhershme dhe pa infrastrukturën e nevojshme rrugore, kjo zonë e thellë në viset kodrinore-malore në mes të rrugëve nacionale për në Jarinjë dhe Bërnjak, përbën terren të vështirë për Policinë e Kosovës.

  • Ish kryeministri Ramush Haradinaj ka dëshmuar, në rastin e njohur si 53 milionëshi

    Ish kryeministri Ramush Haradinaj ka dëshmuar, në rastin e njohur si 53 milionëshi

    Përgatiti: Benita Zeneli

    Ish-kryeministri Ramush Haradinaj ka dëshmuar, në rastin e njohur si 53-milionëshi, ku i dyshuar është ministri i tij i Infrastrukturës, Pal Lekaj.

    Gjatë marrjes në pyetje, në cilësinë e dëshmitarit, Haradinaj ka thënë se vendimi për ndarjen e 53-milionë eurove shtesë, për kompaninë “Bechtel-Enka” për ndërtimin e autostradës “Arbën Xhaferi”, ishte i domosdoshëm duke shtuar se ky vendim arsyetohet me faktin se kjo çështje kishte mbetur në tavolinë dhe duhej t’i jepej epilog.

    “Po, bazuar në procedurat e vendimmarrjes së brendshme për mbylljen e projektit që ka qenë në tavolinë. Arsyeja është se projekti në fjalë, në gjendjen e atëhershme nuk mund të vazhdonte pa e definu konkluzionin për obligimin financiar”, tha Haradinaj.

    Haradinaj, gjithashtu, konfirmoi që Qeveria e drejtuar nga ai e ka votuar obligimin financiar ndaj operatorit dhe se e mbështet gjithë procesin e vendimmarrjes.

    E me dëshminë e Haradinajt, Musa Damati, avokat i ish-ministrit të Infrastrukturës, Pal Lekaj, tha se u dëshmua edhe një herë që klienti i tij është i pafajshëm.

    “Është dëshmuar se vendimi ka qenë vendim në harmoni me legjislacionin në fuqi dhe ka qenë vendim i Qeverisë me vota unanime të kabinetit qeveritar. Unë mendoj se në bazë të provave dhe fakteve është vërtetuar teza e mbrojtjes së në raport me klientin tim nuk ekziston asnjë provë e vetme që mund ta inkriminojë atë me 53-milionëshin”, tha Damati.

    Të akuzuar për keqpërdorim të detyrës zyrtare në rastin e 53 milionë eurove të paguara shtesë, janë Pal Lekaj, ish-ministër i Infrastrukturës, Eset Berisha, ish-këshilltari i Lekajt, Nebi Shatri, ish-sekretar i Përgjithshëm në Ministrinë e Infrastrukturës dhe Besim Tahiri, drejtor i Prokurimit Publik në këtë ministri.

    Ata dyshohet se me qëllim që t’i shkaktojnë dëm buxhetit të Republikës së Kosovës, kanë nënshkruar marrëveshje për shtyrjen e afatit të përfundimit të punimeve edhe për 347 ditë, duke mos e përcaktuar koston financiare.

  • Asnjë film kosovar në garë për “Oscar 2024”

    Asnjë film kosovar në garë për “Oscar 2024”

    Përgatiti: Kastriot Tahiri

    Pas një dekade, për herë të parë, Komiteti Selektues i Qendrës Kinematografike të Kosovës nuk ka propozuar film për nominim për shpërblimet “Oscar 2024”.

    Komisionin i QKK-së u arsyetua se asnjëri prej filmave të realizuar s’ishin të denjë t’ia mësyjnë garës.

    “Komiteti selektues ka konstatuar se veprat në konkurrencë dëshmojnë prezencë të talentit vibrant, kërkues e provokativ në ardhje, por nuk e reflektojnë mjaftueshëm standardin e prurjeve të deritanishme në kinematografi. Si rezultat i kësaj, krahas sukseseve të vazhdueshme të filmave, komiteti ka vendosur unanimisht që në edicionin e Oscars 2024 të mos dërgojë përfaqësues nga Kosova”, thuhet në arsyetimin e QKK-së.

    Me këtë vendim u pajtua regjisori Ismet Sijarina.

    “Unë e konsideroj si vendim të guximshëm, që do të vendosë trende të reja. Kosova ka një trend të mirë të dërgimit të filmave në Oscar. Asnjë projekt i mirë nuk mbetet mbrapa. Kosova nuk ka 30-50 mijë euro për t’i dhënë për një film që nuk premton sukses”, tha Sijarina.

    Vitin e kaluar “Në kërkim të Venerës”, me skenar dhe regji nga Norika Sefa, ishte filmi me të cilin Kosova synoi shpërblimin “Oscar”.

  • SHBA i kërkon Serbisë të tërheqë trupat ushtarake nga kufiri me Kosovën

    SHBA i kërkon Serbisë të tërheqë trupat ushtarake nga kufiri me Kosovën

    Koordinatori për komunikime strategjike në Këshillin e Sigurisë Kombëtare të SHBA-së, John Kirby, shprehu shqetësimin e Uashingtonit, për siç tha, “dislokimin e madh” të trupave të Serbisë përgjatë kufirit me Kosovën.

    “Ne do të monitorojmë dislokimin e madh serb përgjatë kufirit me Kosovën. Ne i bëjmë thirrje Serbisë të tërheqë forcat nga kufiri dhe të vazhdojë të ulë tensionet”, tha Kirby gjatë një bisede me gazetarë më 29 shtator.

    Ai tha se gjatë bisedës që sekretari amerikan i Shtetit, Antony Blinken, zhvilloi më herët gjatë ditës me presidentin serb, Aleksandar Vuçiq, ka kërkuar që Serbia të ulë tensionet.

    Shtetet e Bashkuara kanë dënuar ashpër sulmin ndaj Policisë së Kosovës më 24 shtator në Banjskë të Zveçanit.

    Sekretari amerikan i Shtetit, Antony Blinken, ka kërkuar që autorët e krimit të “mbahen përgjegjës përmes një procesi transparent të hetimit”.

    Vuçiq, ndërkaq, më herët tha se Blinken ka paralajmëruar masa ndaj Serbisë.

    Kosova ka thënë se rreth 30 sulmues të maskuar dhe armatosur kanë sulmuar Policinë në Banjskë, duke vrarë rreshterin Afrim Bunjaku.

    Gjatë përleshjeve të grupit të armatosur me Policinë në manastirin e Banjskës, kanë mbetur të vrarë edhe tre sulmues.

    Kosova e ka cilësuar sulmin si terrorist dhe ka kërkuar një hetim ndërkombëtar për Serbinë, lidhur me rolin e saj në këtë sulm.

    Serbia ka mohuar çdo përfshirje.

    Më 29 shtator, Millan Radoiçiq, që tha se po jep dorëheqje nga Lista Serbe – partia kryesore e serbëve në Kosovë që gëzon mbështetjen e Beogradit – përmes avokatit të tij e pranoi se ka organizuar dhe ka marrë pjesë në sulmin në Banjskë.

    Më herët, autoritetet në Kosovë kanë publikuar dëshmi, sikurse një video të incizuar me dron, ku shihej Radoiçiqi i armatosur dhe i veshur me uniformë në Banjskë.

  • Presidenca i përgjigjet kryeministrit Rama: Policia e Kosovës ka mandat të plotë në të gjithë territorin e Kosovës

    Presidenca i përgjigjet kryeministrit Rama: Policia e Kosovës ka mandat të plotë në të gjithë territorin e Kosovës

    Presidenca e Kosovës, i është përgjigjur kryeministrit të Shqipërisë Edi Rama, pasi ky i fundit kërkoi që KFOR-i të marrë kontrollin e veriut të Kosovës.

    Në përgjigjen e presidencës thuhet se në çdo bisedë dhe takim me partnerët dhe aleatët, presidentja Osmani e ka sqaruar se mandati i KFOR-it, është vetëm si reagues i tretë dhe në mbështetje të Policisë së Kosovës si reagues i parë.

    Reagimi i plotë i Presidencës:

    Presidentja Osmani në çdo bisedë dhe takim me partnerët dhe aleatët e ka sqaruar se mandati i KFOR-it, është vetëm si reagues i tretë dhe në mbështetje të Policisë së Kosovës si reagues i parë dhe institucioni kyç për sundimin e ligjit dhe sigurinë në secilën pjesë të territorit të saj.

    Institucionet e Kosovës kanë kërkuar mbështetje nga NATO-ja, që patrullimet në zonën kufitare t’i përfshijnë edhe ushtarët e NATO-s, përkrah policëve të Kosovës në mënyrë që të parandalohet hyrja e grupeve terroriste dhe sulmet nga Serbia.

    Policia e Kosovës ka mandat të plotë në të gjithë territorin e Kosovës, ndërsa me NATO-n, ka bashkëveprim dhe koordinim të ngushtë, siç e dëshmon edhe reagimi e operacioni policor gjatë sulmit terrorist në Banjskë më 24 shtator 2023.

    Pra, nuk bëhet fjalë për marrjen e kompetencave sovrane të institucioneve të sigurisë së Kosovës nga KFOR-i, por për mbështetjen e institucioneve të Kosovës në ndalimin e agresionit nga Serbia.

    Bekim Kupina, këshilltar për Media i Presidentes

  • BERZH dhe ENEF II financojnë Ujë Rugove me 6 milionë Euro për linjat e reja prodhuese

    BERZH dhe ENEF II financojnë Ujë Rugove me 6 milionë Euro për linjat e reja prodhuese

    Instrumenti inovativ i financimit të gjelbër nga BERZH dhe ENEF II ndihmon prodhuesin kosovar të ujit të ambalazhuar Ujë Rugove me 6 milionë Euro kredi, e lidhur me qëndrueshmërinë për linja të reja prodhuese dhe rritje të konkurrentshmërisë.

    Banka Evropiane për Rindërtim dhe Zhvillim dhe Fondi i Zgjerimit të Ndërmarrjeve II për Ballkanin Perëndimor (ENEF II) janë duke lëshuar një kredi të lidhur me qëndrueshmërinë në vlerë prej 6 milionë Euro për Ujë Rugove, prodhuesi më i madh i ujit të ambalazhuar në Kosovë, për të ndihmuar kompaninë të përmirësojë konkurrentshmërinë dhe të zgjerojë operacionet e saj.

    Mjetet e kredisë do të përdoren nga kompania për blerjen e një objekti të ri dhe instalimin e linjave të reja të prodhimit me kapacitet të lartë për mbushjen e shisheve prej qelqi, kanaçeve të aluminit, pako kartoni dhe fuçive të ujit. Kjo do t’i mundësojë Ujë Rugove të zgjerojë gamën e produkteve të saj duke prezantuar produkte të tilla si ujë i gazuar, ujë me shije dhe çaj.

    Ky projekt paraqet shembullin e parë në Kosovë të një instrumenti financiar të gjelbër, i cili integron standardet klimatike dhe mjedisore, sociale dhe të qeverisjes (ESG), si dhe konsideratat për rreziqet klimatike dhe të ESG-së në strukturën e financimit.

    Kredia ka tre objektiva mjedisore: zvogëlimin e humbjeve gjatë prodhimit të ujit; reduktimin e mbeturinave të ambalazhës; dhe futjen në përdorim të materialeve ambalazhuese në pako dhe etiketa me përmbajtje të plastikës së ricikluar në masë prej së paku 50%.

    Ujë Rugove është gjithashtu e përkushtuar për zbatimin e standardeve më të larta mjedisore, shëndetësore dhe të sigurisë.

    Marrëveshjet financuese u nënshkruan në [Zyrën e EBRD-it në Prishtinë] nga Drejtori Menaxhues i EBRD-it për Financat dhe Zhvillimin e NVM-ve, Claudio Viezzoli, i cili është gjithashtu anëtar i bordit të ENEF II, Shefi i Zyrës së EBRD-it në Kosovë, Sergiy Maslichenko, Drejtoresha Menaxhuese e Ujë Rugove, Shqipe Ramadani-Kelmendi, si dhe Themeluesi dhe Kryesues i Bordit të Ujë Rugove, Visar Kelmendi.

    Sergiy Maslichenko tha: “Ne jemi të kënaqur të mbështesim sektorin e agrobiznesit në Kosovë duke nënshkruar një marrëveshje inovative financimi të lidhur me standardet e ESG-së për këtë projekt me liderin e tregut”.

    Visar Kelmendi, Themelues dhe Kryesues i Bordit të Ujë Rugove, theksoi rëndësinë e kësaj iniciative inovatore të kredive të gjelbra, duke thënë: “Kjo kredi e lidhur me qëndrueshmërinë jo vetëm që shënon një moment kyç për Ujë Rugove por edhe për Kosovën në tërësi. Ky financim tregon përkushtimin tonë të palëkundur për reduktimin e humbjeve të ujit gjatë prodhimit, minimizimin e mbetjeve nga ambalazhi dhe përfshirjen e materialeve të qëndrueshme dhe të ricikluara në ambalazhet tona. Kjo jo vetëm që përputhet me përkushtimin tonë ndaj ruajtjes së mjedisit si dhe ndaj shëndetit dhe sigurisë, por gjithashtu vendos një standard për qëndrueshmërinë në industrinë tonë, duke demonstruar se rritja ekonomike dhe përgjegjësia mjedisore mund të ecin paralelisht.”

    Duke nënshkruar në emër të ENEF II si anëtar i bordit të fondit, Claudio Viezzoli tha: “Ne jemi shumë të kënaqur që kemi Ujë Rugove si kompaninë e dytë investuese të fondit të ri dhe presim me padurim të riprodhojmë këtë instrument financimi të gjelbër me ndërmarrjet e vogla dhe të mesme (NVM) e tjera, në të gjithë rajonin duke i ndihmuar ato në rrugëtimin e tyre drejt ESG dhe rritjes.”

    ENEF II, e cila është pjesë e Kornizës së Investimeve për Ballkanin Perëndimor të Bashkimit Evropian, ofron kapital për zhvillim dhe zgjerim për kompanitë me rritje të lartë të angazhuara për të përmirësuar performancën e tyre në standardet e ESG-së në gjashtë ekonomitë e Ballkanit Perëndimor.

    ENEF II është një fond i ri investimi i krijuar me mbështetjen e Bashkimit Evropian (BE). Ai këshillohet dhe menaxhohet nga ERBD. E dedikuar për NVM-të dhe kompanitë me kapital të mesëm në Ballkanin Perëndimor, ENEF II ka siguruar 57 milionë euro kapital të përkushtuar nga investitorët e saj, të cilët përfshijnë BE-në, Bankën Italiane të zhvillimit Cassa Depositi e Prestiti dhe Bankën Zhvillimore KfW të Gjermanisë. ERBD ka dedikuar 19 milionë euro për fondin, ndërsa KfW dhe BE sigurojnë mbulimin e rrezikut të humbjes së parë.

    Sektori i agrobiznesit të Kosovës ka një potencial të madh për rritje me një nën-sektor si pijet dhe kampionët si Ujë Rugove që ofrojnë produkte cilësore konkurruese në nivel rajonal.

    Deri më tani ERBD ka investuar 629 milionë euro në Kosovë.

  • Kush është Petronijeviq, avokati i Radojçiqit i cili dikur si gjykatës dënoi 150 shqiptarë me 1600 vjet burgim!

    Kush është Petronijeviq, avokati i Radojçiqit i cili dikur si gjykatës dënoi 150 shqiptarë me 1600 vjet burgim!

    Radio Evropa e Lirë raporton se Goran Petronijeviq ka qenë “vëzhgues” në zgjedhjet e mbajtura javë më parë nga autoritetet ruse në territoret e pushtuara ukrainase.

    Përgjatë regjimit të ish-liderit serb, Sllobodan Millosheviq, ai ka qenë gjyqtar në Gjykatën e Pejës në Kosovë.

    Në atë pozitë, në maj të vitit 2000, ai i ka dënuar 150 shqiptarë të Kosovës me një total prej 1.600 vjetëve burgim nën dyshimet për kryerje të terrorizmit.

    Ai është larguar nga pozita e gjyqtarit pas ndryshimeve demokratike të 5 tetorit në Serbi, dhe më pas e ka ushtruar profesionin e avokatit.

    Para gjykatës ndërkombëtare, ai i ka përfaqësuar disa klientë nga Serbia, të akuzuar për krime lufte.

    Më i famshmi është Radovan Karaxhiq, presidenti i parë i Republikës Sërpska në Bosnje e Hercegovinë, i cili është dënuar me burgim të përjetshëm në Gjykatën e Hagës për krime lufte.

    Para Tribunalit në Hagë, ai e ka mbrojtur gjithashtu ish-oficerin e ushtrisë jugosllave, Veselin Shlivançanin, i cili është dënuar për krime lufte në Ovçara afër Vukovarit.

    Në mesin e gushtit, Petronijeviq ka njoftuar për një iniciativë për ta mbrojtur Millorad Dodikun, presidentin e entitetit Republika Sërpska të Bosnje e Hercegovinës.

    Më herët Prokuroria e Bosnjës ka ngritur aktakuzë kundër Dodikut për mosbindje ndaj vendimeve të Përfaqësuesit të Lartë në Bosnje dhe Hercegovinë, Christian Schmidt. /REL