Blog

Lëvizja Vetëvendosje e ka bojkotuar seancë e Kuvendit të thirrur nga AAK-ja në lidhje me nevojën për ngritjen e koeficientit të pagave, raporton Ekonomia Online.

Të pranishëm në këtë seancë nga deputetë e VV-së ishin Visar Korenica dhe Eman Rrahmani.

Fillimisht shefi i Grupit Parlamentar të AAK0së, Besnik Tahiri dhe shefja e grupit parlamentar të VV-së, Mimoza Kusar-Lila, kanë debatuar përket përfundimit të seancës së parë dhe nisjes së seancës së re.

Tahiri ka kërkuar që menjëherë të nisë seanca e jashtëzakonshme, ndërsa Kusari-Lila ka thënë që fillimisht të përfundojnë punimet e seancës që nisi në orën 10:00.

“Me gjithë respektin për kërkesën dhe insistimin e z. Tahirit për me fillu seanca e jashtëzakonshme, asnjë herë në këtë legjislaturë nuk ka qenë praktikë, ose të paktën nuk kemi arritur të fillojmë seancën në kohën kur është caktuar. Kjo seancë ka filluar me 40 minuta vonesë dhe insistojmë që të përmbyllen punimet e seancës së datës 28 shtator dhe 4 tetorit për t’u hapur punimet e seancës së jashtëzakonshme”,.

Ndërsa, Tahiri pyeti nëse VV do të qëndrojë gjatë seancës së jashtëzakonshme.

“Du me pasë një deklarim a do të rrinë në seancë të diskutimit për koeficientin apo jo. Dua ta di a do të rrijë VV në seancë”, tha ai.

Ai tha se janë pajtuar që seanca e jashtëzakonshme të nisë në orën 12:00 dhe jo në orën 10:00 në mënyrë që të kryhen disa votime.

Kësaj kërkese nuk i’u përgjigj Kusari-Lila. Kurse kryetari i Kuvendit, Glauk Konjufca, ka nisur seancën e jashtëzakonshme.

“I jap plotësisht të drejtë z. Tahirit, vazhdojmë me seancën e jashtëzakonshme”.

Kuvendi i Kosovës në vazhdimin e seancës plenare ka shkarkuar kryesuesen dhe tre anëtarët e Bordit të Komisionit të Pavarur për Miniera dhe Minerale (KPMM). Për shkarkimin e këtij bordi nuk janë pajtuar edhe partitë opozitare, të cilat nuk kanë marrë pjesë në votim. Deputetë të opozitës kanë deklaruar se ky bord ishte emëruar nga vet pushteti, por të njëjtit sot po shkarkohen jashtëligjshëm. Shumica parlamentare me votim për secilin veç e veç ka shkarkuar kryesuesen e bordit, Selvete Grajqevci Pllana, Gani Kastrati anëtar, Gani Maliqin anëtar dhe po ashtu Rrezarta Pushkolli Makollin e cila ka qenë anëtare e bordit.

Komisioni për Ekonomi, Industri, Ndërmarrësi dhe Tregti rekomandoi që Kuvendi të shkarkojë anëtarët e Komisionit të Pavarur për Miniera dhe Minerale.

Deputeti i Lëvizjes Vetëvendosje, Armend Muja tha se ka kanë konstatuar që në vazhdimësi, janë licencuar kompani që nuk kanë kryer detyrimet ndaj KPMM-së dhe po ashtu janë proceduar penalisht për shkelje të ligjit.

“Komisioni ka nxjerrë rekomandim që të shkarkohet anëtari i bordit Gani Maliqi, për arsye sepse është konstatuar që gjatë ushtrimit të detyrës ka pasur shkelje të neneve 59 dhe 60 dhe 62 të Ligjit për Komisione të Pavarur për Miniera dhe Minerale dhe qëllimisht apo nga pakujdesia ka shkelur dispozitat e nenit 60 të Ligjit për Komisione të Pavarura për Miniera dhe Minerale. Me datën 25.08.2021, auditori i brendshëm i KPMM-së ka konstatuar është shkelur udhëzimi administrativ 01 2011 për rregullt dhe procedurat e përllogaritjes së rendës minerale në rastin e kompanisë “Ferronikeli”, tha Muja.

Edhe për anëtarët tjerë të këtij bordi, Muja theksoi se rekomandohet shkarkimi, meqë siç tha ai, kanë shkelur ligjin e KPMM-së.

“Rekomandohet të shkarkohet nga bordi i KPMM-së, për arsye se ka bërë shkelje të nenit 59, 60 dhe 62 të Ligjit të KPMM-së. Dhe qëllimisht apo nga pakujdesia ka shkelur dispozitat e nenit 60 të KPMM-së duke dëmtuar buxhetin e Kosovës. Rrezarta Pushkolli ngjashëm rekomandohet që të shkarkohet nga bordi i KPMM-së, për shkak se ka bërë shkelje të nenit 59, 60 dhe 62 të Ligjit të KPMM-së… Selvete Grajqevci po ashtu rekomandohet që të shkarkohet nga bordi i KPMM-së për shkak se ka bërë shkelje të nenit 59 të Ligjit të KPMM-së dhe ka dëmtuar buxhetin e Kosovës dhe ka dështuar të zbatojë pikën 1.4 të nenit 60, pra mandati nuk është ushtruar në përputhje me ligjet dhe aktet tjera nënligjore”, shtoi ai.

Deputeti i Partisë Demokratike të Kosovës, Ferat Shala tha se nuk do votojnë për shkarkimin e këtij bordi, meqë kjo tentativë është e jashtëligjshme.

“Ky bord është zgjedhur në mënyrë të paligjshme dhe me ndërhyrje direkte politike, e kemi thënë kur është zgjedhur. Të përzgjedhurit e kryeministrit Kurti, të intervistuar në zyrën e tij, është zgjedhur jashtëligjshëm dhe sot po e njëjta strukturë politike po i shkarkon jashtëligjshëm prapë. Jashtëligjshëm sepse është ndryshuar ligji mbi të cilën ata janë zgjedhur dhe sot kemi një ligj të ri në funksion të dedikuar vetëm për shkarkim të anëtarëve të juaj që ju i keni zgjedhur. Dhe si rezultat i kësaj tash e një vit, rregullatori i minierave është jashtë funksionit. 255 lëndë presin për të marrë përgjigje që rregullojnë industrinë minerare, nxjerrëse, hulumtuese dhe përpunuese e 250 kompani, me qindra e mijëra punëtorë sot janë në pritje të vendimeve, por që fatkeqësisht tash e një vit ky rregullator nuk është funksional”, u shpreh ai.

Shala shtoi se të gjitha kërkesat e minatorëve të Trepçës i mbështesin fuqishëm, ku bëri thirrje që qeveria të reflektojnë për këtë sektor. Shala tha se këta minatorë që janë në grevë, nuk po i viziton askush.

“Asnjë nga institucionet e shtetit nuk i ka vizituar, askush nuk është merr me ta. Asnjë komunikatë zyrtare, asnjë raport njerëzor dhe human, sepse janë nëntokë nuk e kemi nga shteti. Pse qeveria frikësohet të komunikojë me minatorët, kujt i frikohet apo është e vetëdijshme tashmë që i ka mashtruar thellë dhe keq. I ka mashtruar qeveria sepse ju premtoi Trepçës dhe minatorëve zhvillim, ju premtoi investime, rivitalizim, i premtoi investime në teknologji dhe hulumtime, siguri në punë, ndryshim të ligjit e shumëçka tjetër. Por asnjë nga këto qeveria nuk i përmbajti”, deklaroi Shala.

Edhe deputetja e Lidhjes Demokratike të Kosovës, Valentina Bunjaku Rexhepi tha se nuk do të marrin pjesë në votim për shkarkimin e këtij bordi.

“Ju vet këtë bord e keni emëruar dhe tani vet po e sjellni për ta shkarkuar. Unë jam e bindur që shkarkimi i këtij bordi është për shkak se nuk ju kanë dëgjuar, jo për shkak të defekteve apo gabimeve që i kanë bërë si bord. Ky shkarkim është i jashtëligjshëm dhe sigurisht ai komision ka mbetur pa bord funksional që një kohë të gjatë. Tani do të merr kohë edhe deri te zgjedhja e bordit të ri. Janë njerëz me kredibilitet, janë njerëz profesionist dhe nuk duhet të luhet me identitetin e tyre dhe kjo është kjo keqqeverisja e juaj që vet emëroni dhe vet shkarkoni. U bat horë me borde dhe me njerëz që po i emëroni. Ja po i emëroni familjarë, ja militantë të juaj. Dhe ata që po i emëroni dhe nuk po ju dëgjojnë, po i sjellin dhe po i shkarkoni”, u shpreh deputetja e LDK-së.

Shefi i Grupit Parlamentar të Aleancës për Ardhmërinë e Kosovës, Besnik Tahiri tha se në kohën kur bordi është emëruar nga pushteti aktual, ka pasur lëvdata publike për anëtarët. Edhe ai ka shprehur kundërshtinë për shkarkimin e këtij bordi në seancën e sotme plenare.

“Është pikërisht ky bord që kur është emëruar ka pasur një referencë, një lëvdatë publike për këta persona, të cilët sot janë para kuvendit për shkarkim. Pyetja e parë që do të doja ta shkarkoja për kolegët e mi në LVV është ‘çfarë ka ndryshuar?’. A ka mundësi të tregojë dikush se çfarë ka ndryshuar, veç një sqarimi narrativ që jepet në rekomandimin e komisionit, i cili shumicën e rasteve është referencë, përveç dy tri pikave ku konsiderohet si veprim i paligjshëm. Të gjitha pikat tjera janë detyra dhe përgjegjësi të një anëtari të një bordi. Pushteti, kjo qeveri ka ardhur me një premtim të madh që do të depolitizojë, do të sjellë në krye të agjencioneve ekzekutive dhe kushtetuese, dhe sot vijnë me një kërkesë për shkarkim me arsyen e vetme se diku këta persona nuk kanë arritur t’i përmbushin kërkesat që i ka kjo shumicë, kjo qeveri”, u shpreh ai.

Edhe Tahiri ka komentuar grevën e minatorëve të Trepçës, ku tha se duhet të merren masa nga institucionet.

Në seancën e sotme plenare, në rend të ditës është shqyrtimi i dytë i projektligjit për Pronën Publike, për Prokurorinë Speciale dhe ndryshimin e Kodit Penal të Republikës së Kosovës.

Kryesuesi i Komisionit Qeveritar për Persona të Zhdukur, Andin Hoti, përmes një postimi në rrjetin social “Facebook”, ka njoftuar se janë gjetur mbetje mortore në lagjen Arbanë të Prizrenit, që dyshohen të jenë të personave të zhdukur nga lufta e fundit në Kosovë.

“Pas zhvarrimit do të vazhdohet me procedurat e nevojshme të ekzaminimeve mjekoligjore dhe identifikimit përmes analizës së ADN-së në Komisionin Ndërkombëtar për Persona të Zhdukur”, tha mes tjerash ai.

Postimi i tij i plotë:

NJOFTIM!
(Kemi hasur në mbetje mortore, potencialisht të personave të zhdukur, në Arbanë, Prizren)
——–
Vazhdojnë gërmimet në kërkim të personave të zhdukur me forcë
Pas përfundimit të gërmimeve në Bishtazhin të Gjakovës, në zbatim të Planit të Punës, pas konsultimeve ndërinstitucionale ekipet e Komisionit Qeveritar për Persona të Zhdukur, Institutit të Mjekësisë Ligjore dhe Drejtorisë së Policisë për Hetimin e Krimeve të Luftës , me mbështetjen edhe të ekspertëve të EULEX-it dhe Komitetit Ndërkombëtar të Kryqit të Kuq sot kanë vazhduar me gërmimet në lokacionin e varrezave në lagjen Arbanë të Prizrenit.
Gërmimet e filluara paradite , kanë rezultuar me gjetjen dhe zhvarrosjen e eshtrave (mbetjeve mortore) te minimumi një individi, viktimë e luftës, që potencialisht vazhdon të jetë në Listën e Personave të Zhdukur.
Pas zhvarrimit do të vazhdohet me procedurat e nevojshme të ekzaminimeve mjekoligjore dhe identifikimit përmes analizës së ADN-së në Komisionin Ndërkombëtar për Persona të Zhdukur.

Kryetari i Komunës së Prishtinës, Përparim Rama, ka bërë të ditur se kanë filluar punimet për krijimin e rrugës së re e cila do të lidhë Lakërishtën me Fushë-Kosovën përmes nënkalimit në rrethrrotullimin e Lakërishtës.

Në llogarinë e tij në Facebook, ai ka thënë se krijimi i kësaj rruge do të shkarkojë komunikacionin në rrugët “Tirana” dhe “Bill Klinton”.

“Filluam punimet në krijimin e rrugës së re e cila do të lidhë Lakërishtën me Fushë Kosovën përmes nënkalimit në rrethrrotullimin e Lakërishtës”, ka shkruar ai.

Një aksident ka ndodhur mëngjesin e sotëm në rrugën “Agim Ramadani” në Prishtinë, ku një veturë e ka goditur një këmbësore.

Zëdhënësja e Policisë së Kosovës për rajonin e Prishtinës, Flora Ahmeti ka thënë se këmbësorja ka pësuar lëndime trupore, për çka është dërguar për tretman mjekësor.

“Si pasojë e aksidentit lëndime trupore ka pësuar këmbësorja dhe e njëjta është dërguar për tretman mjekësor”, ka thënë ajo.

Ajo ka bërë të ditur se me rastin po merret njësiti i trafikut.

Këngëtarja Elsa Lila që prej më shumë se dy dekadash jeton në Itali, e cilëson si ngjarjen më të rëndë në jetën e saj arrestimin e para disa muajve në shtetin italian, e dyshuar si pjesë e një grupi të trafikut të drogës.

Elsa Lila qëndroi dy muaj në paraburgim në Itali dhe më pas u provua pafajësia e saj dhe u la e lirë.

Në një intervistë për emisionin Opinion, Elsa Lila tregoi se shkaku i arrestimit të saj ka qenë njohja me 2 prej shqiptarëve që ishin pjesë e rrjetit të drogës, me të cilët ishte takuar në disa raste

“Për mua mbetet kjo mbetet pikëpyetje shumë e madhe nga momenti që jam e pafajshme dhe nuk kam asnjë lidhje. Sistemi i drejtësisë italiane sidomos në rastin e grupazheve është një sistem i mbrapshtë.

Ata në filim bllokojnë grupin i cili dyshohet për diçka dhe më pas ky grup krasitet deri kur mbetet bërthama kryesore dhe ata që nuk kanë lidhje lirohen. Në këtë lloj sistemi grupazhi që mori brenda shumë njerëz qëllova edhe unë.

Unë duke qenë personazh publik në Romë, dy prej shqiptarëve që unë njihja, mesa duket merreshin me aktivitet për të cilat unë nuk isha në dijeni. Telefoni im ka qenë i vetmi objekt i sekuestruar, nga apartamenti im procesverbali ka qenë shumë i varfër.

Më pas pas disa muajsh këto objekte më janë rikthyer pasi nuk përbënin asnjë provë kundër meje pasi ishin pa asnjë lloj lidhje me këtë lloj grupazhi.

Pasi unë gjatë gjithë këtyre 2 muajve në të cilat vuajta jolirinë time dhe zhdukjen nga shoqëria… Hallka që më lidhte ishte njohja.

Për mua është mister i jashtëzakonshëm. Unë isha parë duke ngrënë darka apo dreka me këta persona, isha parë duke i frekuentuar. Këto ishin provat kryesore.

Nëpërmjet avokatit im, i cili u gjet pas arrestimit tim, më është dhënë nga shteti italian, më shpjegoi dhe më tregoi më vonë që ndërkohë atë natë në shtëpitë e gjithë këtyre personazheve të tjerë, në procesverbalet e sekuestrimeve ishin shumë të pasura me elementë të jashtëligjshëm, janë gjetur para, armë, lëndë narkotike. Ndërkohë që në shtëpinë time nuk është gjetur asgjë.

Celulari im nuk ka pasur asnjë lloj marrëdhënie telefonike as me këtë grupazh as me këta persona.

Ishte ngjarja më e rëndë që më ka ndodhur më jetën time dhe që nuk ja uroj askujt sepse ja që ndodhka që të jesh i pafajshëm dhe të përfundosh në një histori absurde. Kush më njeh nga afër e di shumë mirë se si jetoj, i njeh shumë mirë principet e mia, vlerat e mia. Ishte thjesht një absurditet”, tha ajo.

Të shumta kanë qenë edhe pyetjet e publikut në momentin e arrestimit të Elsa Lilës, se me çfarë jetonte këngëtarja shqiptare pasi prej vitesh nuk ishte aktive në muzikë.

Edhe këtyre dyshimeve, Elsa Lila u ka dhënë përgjigje.

“Në atë periudhë kisha AIR BNB timin personal, i cili është një aktivitet që në Romë më lejonte mua që të kisha një jetesë shumë të mirë krahas punëve të tjera artistike që bëja, sepse kam punuar shumë në studio”, u shpreh Lila.

“Pjesëmarrja në grevën e urisë së PS”, Elsa Lila: Nuk e bëra për politikë

Elsa Lila ka treguar më shumë edhe mbi marrëdhënien e saj me politikën në Shqipëri dhe pjesëmarrjen e saj në grevën e urisë nga Partia Socialiste ne vitin 2010. Ajo tha se nuk e bëri për politikë dhe se ajo ka qenë një nga eksperiencat e saj më të mrekullueshme

Në vitin 2010 ju u përfshitë në grevën e urisë së Partisë Socialiste për çështjen e zgjedhjeve të 2009. Cne kjo lidhje dhe çfarë raporti keni sot më Ramën dhe Partinë Socialiste?

Elsa Lila: Pjesëmarrja ime në atë grevë urie ka qenë spontane. Kthehesha nga Vlora nuk dija çfarë ndodhte në Tiranë atëherë. Shoh tendat, informohem çfarë po ndodhte dhe më tregojnë që po ndodhte ky lloj aksioni i PS. Pyes nëse kishte gra më thanë që kishte 6 gra dhe pyes nëse kishte artistë dhe më thanë që jo. Disa artistë kishin fimros një peticion kundra grevës së urisë, dhe unë si një shpirt i lirë mendova që të jap kontributin tim si artiste duke e menduar të drejtë atë kauzë dhe kërkova që të futem dhe u gjenda aty me 204 pjesmarës të tjerë. Ka qenë një nga eksperiencat më të mrekullueshme.

Po ju e dinit çfarë kishte ndodhur me votat apo thjesht patë protestën dhe ju bashkuat?

Elsa Lila: Unë besova atë version informacioni.

Keni raporte me politikën?

Elsa Lila: Dhe në atë kohë nuk e bëra për politikë, nuk jam marrë ndonjëherë me politik edhe këtë e kam demonstruar pas asaj greve urie.

Gjithashtu këngëtarja foli edhe për marrëdhënien me vajzën e saj dhe bashkëshortin ku u shpreh se kanë një marrëdhënie shumë të mirë.

Ndër të tjera lidhur me situatat e vështira në jetën e saj Elsa Lila shprehet:

“Po t’i përmbledhim nga ky këndvështrim duket më keq se familja Kenedi, por unë nuk e shoh kështu sepse e shoh jetën time nga brenda pasi në këtë miks ka pasur momente brilante të cilat balancojnë momentet e vështira. Jeta ime ka qenë e vështirë, por ka qenë edhe e bukur. Unë besoj se të gjitha këto vështirësi që unë kam përjetuar, reflektohen shumë qartë në muzikën time dhe kjo është një nga armët e mia më të forta. Ka qenë terapia ime kjo”.