Blog

Në varrezat e Mitrovicës Veriore aktualisht është duke u zhvilluar një hetim me urdhër të prokurorit të Prokurorisë në Mitrovicë.

Zëvendëskomandanti i Policisë së Kosovës në rajonin veri, Veton Elshani, ka konfirmuar se hetimi është duke u zhvilluar nga Departamenti i Mjekësisë Ligjore nga Prishtina, ndërsa në vendngjarje janë të pranishme edhe organizata të shumta ndërkombëtare.

Hetimet janë duke u kryer nga hetues, antropologë, patologë dhe ekspertë të mjekësisë ligjore të Departamentit të Mjekësisë Ligjore nga Prishtina.

“Hetimi është duke u zhvilluar me urdhër të prokurorit të Prokurorisë së Mitrovicës. Krahas kësaj lokacioni hetimi do të bëhet edhe në vende të tjera, pasi aty thuhet se mbetjet e gjetura këtu janë bartur atje”, tha Elshani.

Ndërkohë, hetuesit dhe një ekip i njësisë mjeko-ligjore filluan gjithashtu një hetim pranë lumit Ibër, në një vendgrumbullim të egër, ku u hodhën rrënoja, që besohet se janë pjesë e dheut të marrë nga varrezat e vjetra.

Çmimet e naftës u rritën të mërkurën përpara takimit të Rezervës Federale të SHBA-së dhe mes shqetësimeve në rritje të furnizimit me karburant nga sulmet e zgjeruara ajrore dhe tokësore të Izraelit në Rripin e Gazës.

Nafta e papërpunuar standarde ndërkombëtare Brent u tregtua me 85.72 dollarë për fuçi në orën 07:34 GMT, një rritje prej 0.82% nga çmimi i mbylljes prej 85.02 dollarë për fuçi në seancën e mëparshme tregtare të martën.

Standardi amerikan ‘West Texas Intermediate’ (WTI) tregtohej në të njëjtën kohë me 81.11 dollarë për fuçi, 0.11% më shumë nga mbyllja e së martës prej 81.02 dollarë për fuçi.

Të martën, sulmet ajrore izraelite goditën kampin e refugjatëve Jabalia në Gazën veriore, duke lënë qindra të vdekur dhe të plagosur, duke thelluar shqetësimet se rrugët e furnizimit me naftë mund të ndërpriten.

Megjithatë, rritjet e çmimeve u zbutën ndërsa investitorët presin vendimet e politikës monetare të Fed të mërkurën vonë dhe vërejtjet e kryetarit të Fed, Jerome Powell pas takimit, të cilat pritet të mbajnë normën e politikës së lartë për më gjatë se sa ishte parashikuar. /AA

Kryetari i Partisë Demokratike të Kosovës, Memli Krasniqi ka reaguar pas shtyerjes së procesit të regjistrimit të popullsisë, i cili ishte paraparë të fillojë sot.

Kreu i PDK-së përmes një postimi në Facebook ka thënë se kryeministri Kurti po e pamundëson këtë, sepse është i vetëdijshëm për numrin e madh të qytetarëve që e janë larguar nga Kosova.

“Sot është dashur të filloj regjistrimi i popullsisë në Kosovë, edhe pse me vonesë të madhe. Por, siç e kam thënë publikisht me 5 korrik, me 24 gusht dhe shumë herë të tjera deri sot, regjistrimin e popullsisë po e pamundëson Kryeministri Kurti. Përveç që e ka politizuar skajshëm me ndërhyrje partiake Agjencinë e Statistikave të Kosovës, si dhe ka humbur kontrollin faktik në pjesën veriore të vendit, Kryeministri i di mirë shifrat e larta të qytetarëve që e kanë lëshuar Kosovën, prandaj po frikësohet nga zyrtarizimi i tyre”, ka shkruar ai.

Krasniqi theksoi se me këtë veprim Qeveria Kurti po bën shkelje ligjore.

“Përtej paaftësisë qeverisëse, ky (mos)veprim i Qeverisë është edhe shkelje ligjore!”, ka theksuar ai.

Sot, Bullgaria shënon Ditën Kombëtare të Zgjimit duke përkujtuar shkrimtarët, studiuesit, arsimtarët dhe luftëtarët e lirisë. Kjo ditë shënohet nga bullgarët në mbarë botën.

Presidenti Rumen Radev, i cili është komandant i përgjithshëm i Forcave të Armatosura, ka vizituar gardën e nderit dhe ka mbajtur fjalim me rastin e shënimit të Ditës Kombëtare të Zgjimit. “Për më shumë se një shekull, 1 Nëntori na ka kujtuar shembullin e ndritshëm të përfaqësuesve më të denjë të kombit tonë”, tha ai.

Flamuri kombëtar u ngrit para ndërtesës së Administratës së Presidentit më herët gjatë ditës.

Në hapjen e mbledhjes së përjavshme të qeverisë, kryeministri uroi bullgarët për Ditën Kombëtare të Zgjimit. “Kjo është një festë që na bashkon përmes emrave të Ivanit të Rilës, Kirilit dhe Metodit, Patriarkut Euthymius, heronjve tanë të Rilindjes dhe Çlirimit”, tha Denkov.

Duke iu drejtuar kombit në Ditën Kombëtare të Zgjimit, ministri i Arsimit dhe Shkencës Galin Tsokov tha se Bullgaria është ndoshta i vetmi vend në botë që ka një ditë kushtuar shkrimtarëve, studiuesve, arsimtarëve dhe luftëtarëve të lirisë. Ai theksoi se në këtë ditë është e rëndësishme të mbështeten zgjimin e sotëm: mësuesit, akademikët, studiuesit, artistët dhe zbuluesit e talenteve.

Zëvendëskryeministrja dhe ministrja e Jashtme Mariya Gabriel shkroi në Facebook se nderimi i udhëheqësve shpirtërorë konfirmon përpjekjen tradicionale të popullit bullgar për dije, duke e mbushur me krenari kombëtare dhe vetëvlerësim.

Sipas saj, në këtë ditë bullgarët nderojnë të gjithë individët e historisë së tyre që me fuqinë e fjalës dhanë jetën për lirinë dhe pavarësinë bullgare.

Patriarku Neofit i Bullgarisë gjithashtu iu drejtua bullgarëve: “Dita Kombëtare e Zgjimit është një festë e shpirtit të lirë dhe të ndritur bullgar. Një festë e tillë mund ta mbajë vetëm një komb që nuk njeh dorëheqjen, që është i vetëdijshëm për rëndësinë e shpirtit të tij. traditën kulturore dhe shtetërore, si dhe të identitetit të saj midis diversitetit të popujve dhe kulturave të botës ku jetojmë.”

Dita Kombëtare e Zgjimit i kushtohet veprës së letrarëve, iluministëve, luftëtarëve të lirisë kombëtare, të cilët ruajtën ndër shekuj vlerat shpirtërore dhe morale të kombit. Ndër qindra prej tyre janë Paisiu i Hilendarit, Gregori Tsamblak, Kostandini i Kostenetit, Vladislav Gramatiku, Shën Gjoni i Rilës, Neofit Bozveli, vëllezërit Miladinov Dimitar dhe Konstantin, Georgi Stojkov Rakovski, Vasil Levski, Hristo Vazovi, I. Karaxha, Haxhi Dimitar, Lyuben Karavelov dhe Dobri Çintulov.

Festa u shënua për herë të parë jo-formalisht në Plovdiv (Bullgaria Jugore Qendrore) në vitin 1909. Në vitin 1923, Mbreti Boris III nënshkroi një ligj që prezantonte Ditën Kombëtare të Zgjimit si një ditë përkujtimi të bullgarëve të shquar. I ndaluar nga regjimi komunist në vitin 1945, ai u rivendos në 1992. /BTA

Ka përfunduar bastisja nga Dhomat e Specializuara në shtëpinë e Ismail Sylës, ish-këshilltar i presidentit Hashim Thaçi, me ç’rast i është konfiskuar telefoni.

Kështu bën të ditur avokati, Artan Qerkini i cili tha se gjatë bastisjeve është konfiskuar vetëm telefoni i Ismail Sylës, derisa shtoi se po ta kishin ftuar këtë të fundit, do ta kishte dorëzuar telefonin, pa pasur nevojë për bastisje.

Qerkini, bastisjen e quan të kotë, duke potencuar se po cenohet privatësia e personave pa ndonjë bazë ligjore.

“Është duke u cenuar privatësia e personave pa ndonjë bazë ligjore pa ndonjë logjikë të shëndoshë juridike… Kjo fushatë e bastisjeve tashmë është e njohur për opinionin publik dhe nuk ka asnjë njeri me inteligjencë mesatare jo mbi mesatare do të mbante në shtëpinë e vet diçka inkriminuese duke e ditur se shumë lehtë mund të jetë shënjestër e bastisjeve. Prandaj, mendoj se të njëjtat janë të kota dhe nuk janë në funksion të realizmit të bastisjes, marrë parasysh rrethanat e rasteve konkrete…Asgjë s’është konfiskuar përveç se një telefon, asgjë tjetër, telefonin i përket zotit Syla, zotit Ismail Syla. Asgjë tjetër përveç një telefoni nuk është konfiskuar dhe të jeni të bindur se edhe po ta ftonin zotin Syla që ta dorëzonte atë telefon do ta bënte një gjë të tillë”, tha Qerkini.

Avokati, Artan Qerkini tha se ish këshilltari Ismail Syla dhe as të tjerët që janë bastisur gjatë kësaj jave, përkundër faktit që nuk e kanë statusin e personit të dyshuar, po bastisen.

Ai tha se arsyeja e këtyre bastisjeve është se ‘sipas tyre mund të gjenden prova me relevancë për procedurat të cilat janë duke u zhvilluar pranë Dhomave të Specializuara.

“Po e përsëris se edhe ai siç edhe zoti Behrami e disa të tjerë nuk e kanë fare statusin e personit të dyshuar. Përkundër faktit që nuk e kanë statusin e dyshuar, po batisen. Mendoj se kjo është shkelje kushtetuese dhe ligjore, mirëpo ne këto shqetësime do t’i adresojmë përmes mjeteve juridike në fazën adekuate të procedurës. Cila është arsye ..Arsyeja është si edhe në rastet e tjera, sepse sipas tyre mund të gjenden prova me relevancë për procedurat të çilat janë duke u zhvilluar pranë dhomave të specializuara. Kjo është e vetmja arsye, por nuk jepen detaje të tjera se pse ata mendojnë. Unë besoj se ish dashur të jepen edhe ato detaje, se po cenohet një e drejtë kushtetuese privatësia dhe paprekshmëria e banesës”, tha Qerkini.

Ndërsa dje (e martë) është bastisur shtëpia e Artan Behramit, po ashtu ish-këshilltar i Thaçit si dhe shtëpia e prindërve të tij.

Bastisjet që ndërlidhen me proceset gjyqësore që po kryhen në Hagë, ditëve të fundit janë kryer edhe tek shtëpitë e ish-këshilltarit të Hashim Thaçit, Blerim Shalës dhe ish-shefit të AKI-së, Bashkim Smakajt.

Ish-punëtorët e ish-fabrikës “Llamkos” në Vushtrri, kanë protestuar para Agjencisë Kosovare të Privatizimit (AKP) në Prishtinë, për shkak siç thonë borxhit të pashlyer ndaj tyre.

Ish-punëtorët për të cilën po kërkojnë të kompensohen 13 pagat e papaguara në periudhën 2008/2009 janë në shumë të përgjithshme prej mbi 3.5 milionë euro.

Kryetari i Sindikatës së Punëtorëve “Llamkos”, Ragip Hasani tha se janë rreth 487 punëtorë të cilët nuk i kanë marrë pagat për të cilat kanë punuar, derisa disa prej tyre nuk jetojnë më e disa janë jashtë Kosovës.

Hasani tha se kanë mbajtur takimin me përfaqësuesit e AKP-së, por të njëjtin nuk i janë përgjigjur në lidhje me mos pagesën e këtyre mjeteve. Ai tha se arsyetimi i AKP-së është se mjetet e ish-punëtorëve janë të bllokuar nga Dhoma Speciale.

“Kërkesat tona të punëtorëve ish-“Llamkos” janë pagimi pagave 31 për qind nga borxhi ka mbet prej 13 pagave të papaguara. Kemi pas 13 paga, na kanë mbet prej vitit 2008 deri 2009 dhe ne kemi fituar, kemi vendimin që AKP-ja na ka dhënë, mirëpo nuk na i kanë paguar AKP-ja, çdo herë kanë neglizhuar se Dhoma e posaçme nuk po lejonin. Kemi qenë në Dhomën e Posaçme, kemi dërguar email-in, konfirmimin e AKP-së se kemi drejt me ndarë mjetet, mirëpo këta nuk po i ndajnë. Sot ishim dhe u ndamë të pakënaqur me përfaqësuesin e AKP-së, kemi menduar se diçka do të dalë në ndihmë por asgjë, u arsyetuan se kompania Bullgare i ka bllokua mjetet e AKP-së. D.m.th. i ka blloku vetëm për këta punëtorë të fabrikës, jo për rrogat e tyre që i arrin çdo muaj edhe kemi qenë te drejtori përfaqësuesi, Ardian Berisha dhe Ardita Loka dhe u ndamë të pakënaqur me fjalimet e tyre, sepse nuk na dhanë asnjë shpresë se duhet me u zhbllokuar në gjykatë xhirollogaria jonë”, u shpreh Hasani.

Ai paralajmëroi se nëse nuk shlyhet borxhi ndaj ish-punëtorëve të “Llamkos” do të nisin një protestë më agresive, pasi që sipas tij, fabrika është mbyllur me fajin e AKP-së.

“Ne i kemi vendimet, por nuk po duan me i paguar, punëtorët janë të lodhur, janë të vjetërsuar, të sëmurë ata të rinjtë kanë ikur, ne jemi mbet këtu me shpresë mos po na i japin ato 31%, qw i bie diku në mesatare 2300 euro për punëtorë edhe pse e kemi pas vendimin qw kemi punuar 25 muaj pa rroga. Vetëm se për 13 janë dhënë vendimet edhe këto nuk na kanë jap 13 paga, na kanë jap vetëm 69 pwr qind dhe 315 nuk po na i japin. 487 punëtorë jemi për një 100 janë vdekur, krejt janë në pension për një 5 ose 10 persona kanë ikur jashtë….02:28 Hapat tonë janë vetëm nëse mundemi me u nisë me një protestë më agresive ndryshe nuk u mbet, erdhëm të qetë edhe punëtorët e vjetër , nuk na lanë derë ndryshe edhe fabrikën faji fabrika që u mbyll është faji AKP-së, 2005 është privatizuar fabrika nga një kompani bullgare”, tha Hasani.

Policia e Kosovës në Deçan ka arrestuar një person pasi tek i njëjti ka gjetur tri armë.

Në një njoftim për media thuhet se rasti ka ndodhur më 31 tetor 2023. Stacioni Policor nё Deçan ka pranuar informacion se njё i dyshuar, armët tё cilat i kishte blerё dhe pёr tё njëjtat posedonte leje legale, i kishte shitur, nga i dyshuari ёshtё kёrkuar t’i prezantojë armёt, por i njëjti nuk ka mundur t’i prezantojë pasi tё njëjtat i kishte shitur: njё armё Glock 9×19 mm dhe dy armё Five Seven 7×28 mm.

Hetuesit janё duke punuar intesivisht pёr gjetjen e armёve të shitura nga i dyshuari.

Pas intervistimit tё personit tё dyshuar, me vendim tё prokurorit tё shtetit i dyshuari dёrgohet nё mbajtje pёr 48-orё.

Kryeministri i Izraelit Benjamin Netanyahu ka paralajmëruar për një luftë “të ashpër” dhe “të gjatë” përpara, pasi disa ushtarë të IDF u vranë gjatë luftimeve në Gazën veriore.

Në një video të postuar në X, kryeministri izraelit foli për “humbje të dhimbshme”.

“I gjithë kombi i Izraelit ju përqafon ju, familjet, nga thellësia e zemrave tona,” tha ai, duke shtuar se Izraeli do të vazhdojë misionin e tij “deri në fitore”.

Zyra e Prokurorit të Specializuar tash e tri ditë është duke zhvilluar bastisje në Kosovë.

Cak i këtyre bastisjeve këto ditë kanë qenë ish-këshilltarët e ish-presidentit Hashim Thaçi, Blerim Shala, Bashkim Smakaj, Artan Behrami dhe Ismail Syla.

E ish-këshilltari i Thaçit, Artan Behrami banesa e të cilit u bastis dje nga ZPS-ja, ka treguar se gjatë kësaj bastisje iu konfiskuan edhe dy iPad-at e fëmijëve të tij.

Ai ka publikuar një e-mail të cilin ia ka drejtuar Gjykatës Speciale derisa i ka pyetur se kur do t’ua kthejë iPad-at fëmijëve të tij.

“Të nderuar, dje gjatë një aksioni të paprecedent për bastisje në banesën time, janë konfiskuar dy iPad-at e fëmijëve të mi, Teos (9) dhe Reit (7).

Sot në mëngjes, Teo dhe Rei i kërkuan iPad-at e tyre, sepse iu duheshin për praktikat ditore në shkollë. Përmes këtij e-maili ju pyes: kur do t’ua ktheni iPad-at fëmijëve të mi”, shkruan në e-mailin që Behrami i ka drejtuar Gjykatës Speciale.

Ndryshe kujtojmë se sot ZPS-ja ka bastisur shtëpinë e ish-këshilltarit të Thaçit, Ismail Syla.