ATV

Blog

  • Sveçla: Policët që protestuan sot këtë vit morën nga 2.200 euro në muaj

    Sveçla: Policët që protestuan sot këtë vit morën nga 2.200 euro në muaj

    Ministri i Punëve të Brendshme Xhelal Sveçla ka reaguar pas protestës së Njësisë Speciale Intervenuese (NJSI) për ndryshim të kategorizimit të vendeve të punës dhe shtesa më të mëdha të rrezikshmërisë.

    Ai në një postim në Facebook, ka shkruar se Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukturë.

    “Nga marrja e mandatit, deri në votimin e buxhetit për vitin 2024, kemi rritje për mbi 30% në buxhetin total të Policisë, përderisa, në investimet kapitale kemi rritje për 300%. Nga viti 2021, buxheti për pajisje operacionale është 21-fishuar. Në vitin 2021, buxheti ka qenë më pak se gjysmë milioni për pajisje operacionale ndërsa këtë vit është mbi 9 milionë euro”, ka shkruar Sveçla.

    Për më tepër, Sveçla ka bërë të ditur se të ardhurat mesatare mujore gjatë këtij viti të zyrtarëve që protestuan sot janë mbi 2.200 euro.

    “Angazhimi ynë për shtet dhe forcim të tij do të jetë i pakursyer dhe i pandalshëm me të gjithë ata të cilët përkundër sfidave e kanë vullnetin. Unë falënderoj edhe njëherë të gjithë zyrtarët e Ministrisë së Punëve të Brendshme e veçanërisht të Policisë së Kosovës për angazhimin dhe sakrificën drejt një shteti të drejtë dhe prosperues”, ka thënë ai.

    Ndryshe, sot është mbajtur protesta e Njësisë Speciale Intervenuese (NJSI). Një nga pjesëtarët e kësaj njësie ka deklaruar para mediave se nuk lejojnë të përdoren politikisht nga politika. Në emër të grupit protestues, ai tha se kërkojnë rishikimin e vendimit për shtesat e rrezikshmërisë për këtë kategori.

    Po ashtu, bëri të ditur se nuk do të ndalen së kundërshtuari dhe se do të ndërmarrin edhe masa të tjera.

    Kohë më pare kryeministri Albin Kurti ka prezantuar shtesat për pjesëtarët e Policisë së Kosovës. Ai ka thënë se në këtë propozim përfshihen gjithsej shtatë kategori të pozitave në polici. Sipas tij, deri më tani ka pasur pabarazi në mesin e policëve.

    Kurti shtoi se shtesat për rrezikshmëri do të fillojnë së aplikuari nga paga e muajit nëntor.

    Shefi i ekzekutivit, Albin Kurti tha se pas shqyrtimeve dhe analizave që kanë bërë me ministritë përkatëse, kanë hartuar propozimet për shtesat e qeverisë për pjesëtarët e Policisë së Kosovës.

    Shtesat për njësitë elitare të Policisë së Kosovës:

    Njësia speciale intervenuese – 150 euro

    Njësia për ndërhyrje të shpejtë – 150 euro

    Njësia për mbrojte të afër – 150 euro

    Njësitë speciale operative K9 – 120 euro

    Njësinë për eksplozivët dhe deminim – 120 euro

    Pjesëtarët e patrullave kufitare – 100 euro

    Pjesëtarët e hetuesisë – 75 euro

    Ekipet reaguese dhe patrullat – 60 euro

    Policët në sigurim të objekteve – 50 euro

    Policët në menaxhim të operacioneve 50-45 euro.

    Postimi i plotë i ministrit Sveçla:

    Republika e Kosovës është vend i varfër dhe me buxhetin më të vogël në Evropë. Por, Republika e Kosovës është e themeluar mbi sakrificën e luftës për liri, me akte heroike dhe humbje në njerëz. Mbrojtësit e Republikës sot janë njerëzit më të vlerësuar prej popullit të Kosovës.

    Kërkesat janë të shumta dhe ka kategori shoqërore të cilat kanë shumë vështirësi përgjatë jetesës së tyre.

    Si Ministri e Punëve të Brendshme, nga 9 agjenci ekzekutive, Policia e Kosovës ka pasur mbështetje dhe fokus të veçantë me qëllim të mobilizimit në luftimin e krimit, kontrabandës, mbrojtjen e integritetit territorial dhe sovranitetit. Nga vetë Policia e Kosovës, Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukturë.

    Me marrjen e mandatit, pjesëtarët e Njësive Speciale të Policisë së Kosovës i kemi gjetur pa uniforma, pa pajisje mbrojtëse për jetën e tyre, pa kushte të punës e me ushqim të mangët e jo cilësor.

    Nga marrja e mandatit, deri në votimin e buxhetit për vitin 2024, kemi rritje për mbi 30% në buxhetin total të Policisë, përderisa, në investimet kapitale kemi rritje për 300%. Nga viti 2021, buxheti për pajisje operacionale është 21-fishuar. Në vitin 2021, buxheti ka qenë më pak se gjysmë milioni për pajisje operacionale ndërsa këtë vit është mbi 9 milionë euro.

    Për ne, ka qenë gjithmonë synim përmirësimi i kushteve të punës, sigurimi i pajisjeve që mbrojnë jetën e zyrtarit policor si dhe trajtimi dinjitoz e i drejtë i tyre, teksa për dallim nga kohërat e mëhershme, kur kompensimet për angazhimet shtesë nuk janë zbatuar fare, ne kemi kompensuar ato pa vonesa. Të ardhurat mesatare mujore gjatë këtij viti të zyrtarëve që protestuan sot janë mbi 2.200 euro.

    Angazhimi ynë për shtet dhe forcim të tij do të jetë i pakursyer dhe i pandalshëm me të gjithë ata të cilët përkundër sfidave e kanë vullnetin.

    Unë falënderoj edhe njëherë të gjithë zyrtarët e Ministrisë së Punëve të Brendshme e veçanërisht të Policisë së Kosovës për angazhimin dhe sakrificën drejt një shteti të drejtë dhe prosperues.

  • Azemi i LDK-së: Shteti po i lë në rrezik e baltë ata që mbrojnë vendin

    Azemi i LDK-së: Shteti po i lë në rrezik e baltë ata që mbrojnë vendin

    Zyrtari i LDK-së, Visar Azemi, ka reaguar për protestën e sotme të pjesëtarëve të njësive elitare të Policisë së Kosovës para Qeverisë së Kosovës.

    Azemi ka thënë se shteti po i lë në rrezik ata që e mbrojnë vendin. Ai shkruan se mësuesit, mjekët, minatorët, zjarrfikësit e policët janë të pakënaqur dhe potencon se pushteti pakënaqësive të tyre po iu përgjigjet më shpërfillje ose duke tentuar t’i shtypë.

    Reagimi i plotë:

    ATA MBROJNË VENDIN, SHTETI I LË NË RREZIK

    Kjo qeveri ka treguar aftësi vetëm në krijimin e pakënaqësive. Të pakënaqur mësuesit, mantelbardhët, minatorët, zjarrfikësit, policët e kush jo tjetër. Kërkesave të krejt këtyre, ky pushtet iu përgjigjet ose me shpërfillje e injorim ose duke tentuar t’i shtypë.

    Sot, para zyreve të këtij ekzekutivi protestuan edhe njësitet më elitare të Policisë së Kosovës. Për herë të parë kjo qeveri i detyroi të dalin në rrugë për të shprehur pakënaqësi. Ata, me punën e guximin e të cilëve zyrtarët më të lartë të shtetit krenohen përditë. Madje, tentojnë që t’i marrin edhe meritat e tyre, edhe kur ata vënë jetën në rrezik. Por, jo edhe të ua paguajnë siç duhet e sa duhet shtesën e rrezikshmërisë. Nuk ua përmbushin kërkesën më bazike. Veç ua përkeqësuan gjendjen. Po i lënë në baltë. Po i lënë midis rrezikut. E turpshme. E papranueshme.

  • Evropiani i xhudos, Kosova garon me gjashtë garues

    Evropiani i xhudos, Kosova garon me gjashtë garues

    Ekipi kosovar elitar i xhudos do të marr pjesë në Kampionatin Evropian për Senior me 6 garues, i cili do të mbahet me datë 03-05 nëntor 2023.

    Atje do të garojnë 46 shtete, 388 garues, 218 meshkuj dhe 170 femra.

    Nga Kosova do të ndeshen:

    1.Distria Krasniqi (-52 kg)

    2.Nora Gjakova (-57 kg)

    3.Flaka Loxha (-57 kg)

    4.Laura Fazliu (-63 kg)

    5.Loriana Kuka (-70 kg)

    6.Akil Gjakova (-73 kg)

    Distria, Nora e Flaka ndeshen të premten, kurse Laura, Loriana e Akili ndeshen ditën e shtunë.

    Bashkë me garuesit kanë udhëtuar edhe kryetari i Federatës Agron Kuka, trajneri e selektori ynë Driton Kuka dhe trajnerja Majlinda Kelmendi.

  • Në Amerikë prodhohet qepa që nuk shkakton lotim dhe erë të keqe të gojës

    Në Amerikë prodhohet qepa që nuk shkakton lotim dhe erë të keqe të gojës

    Nëse keni përgatitur ndonjëherë qepë në kuzhinë, atëherë e dini se kjo është një nga punët më të vështira të kuzhinës. Të gjithë kuzhinierët pajtohen për një gjë, dhe kjo është se sytë çdo herë lotojnë kur presin qepë, dhe përveç bartjes së syzeve mbrojtëse, deri më tani nuk ka pasur zgjidhje adekuate.

    Megjithatë, shkencëtarët dhe fermerët nga Shtetet e Bashkuara kanë dalë me zgjidhje për këtë problem, i cili për dekada të tëra po i mundon kuzhinierët dhe me forca të përbashkëta e kanë prodhuar një qepë e cila nuk shkakton lot, përcjell Washington Post.

    Produkti i ri është quajtur Sunion dhe është rezultat i një gërshetimi natyral të disa lloje të qepëve, në të cilin shkencëtarët kanë punuar në fermat në Nevada dhe Washington që nga viti 1980.

    Krijuesit e perimes së re theksojnë se konsumatorët nuk duhet të shqetësohen për cilësinë e saj, sepse kjo bimë i përmban të gjitha shijet, si qepët e zakonshme, përveç se nuk shkakton lot gjatë përgatitjes dhe është eliminuar era e pakëndshme e cila mbetet pas konsumimit të qepës së zakonshme.

    Tek prerja e qepës së zakonshme lirohen enzimet, të cilat e prodhojnë gazin sin-propantial-S-oksid. Kur arrin te sytë prodhohet acidi i butë sulfurik, i cili shkakton djegie. Derisa mbaresat nervore e njohin një reagim të tillë si rrezik, trurit i dërgohet sinjali nga i cili rrjedhin lotët mbrojtës. Ajo që është interesante është se nga qepa e zakonshme këto substanca bëhen më të forta nëse qepa është ruajtur më gjatë, ndërsa edhe kuzhinierët pajtohen me këtë të dhënë.

    Te produkti i ri, qepa Sunion, ky fenomen është neutralizuar krejtësisht dhe sa më gjatë që qëndron e ruajtur, efekti i lotëve në sy është gjithnjë e më i vogël.

    Sunion tashmë gjendet në tregun amerikan, dhe janë konfirmuar deklaratat e shkencëtarëve që ajo nuk shkakton lot dhe nuk lë erë të pakëndshme në gojë, ndërkohë që ka ruajtur të njëjtën shije. Disa prej tyre vunë në dukje se ajo ishte aq e shijshme sa që mund të konsumohej si kokoshka.

    Për fat të keq, për dashamirësit e tjerë të këtij ushqimi të shëndetshëm, qepa e re Sunion aktualisht mund të blihet vetëm në Nevada dhe Washington. Prodhuesit e këtij produkti kanë vënë në dukje se janë duke u bërë përpjekje të mëdha që produkti i ri të plasohet në raftet e supermarketeve anembanë botës.

  • A ia vlen njohja “de facto” e Kosovës nga Serbia? Flasin njohësit

    A ia vlen njohja “de facto” e Kosovës nga Serbia? Flasin njohësit

    Dialogu në mes Kosovës dhe Serbisë, tashmë nuk po e ka synimin primar për njohje reciproke mes të dyja vendeve.

    Pas takimit të fundit në Bruksel të kryeministrit të vendit, Albin Kurti, me pesëshen e liderëve nga Evropa, Kosovës iu kërkua themelimi i Asociacionit të Komunave me Shumicë Serbe, ndërsa Serbisë njohja “de-facto” e Kosovës.

    Njohës i marrëdhënieve ndërkombëtare, Dritëro Arifi, shpjegon se termi “de-facto” përdoret për të treguar se një vend, qeveri apo etnitet është funksional dhe ekziston në realitet, por nuk është njohur në mënyrë zyrtare, në këtë rast Kosova nga Serbia.

    “Njohja ‘de-facto’ është një njohje efektive e situatës aktuale në terren, ku s’ka nevojë të ketë një deklaratë formale nga Serbia dhe kjo nga BE-ja dhe ShBA-ja po shihet se mund të jetë një fazë paraprake drejt njohjes ‘de-jure’”.

    “Njëfarë mënyre s’po e zgjidhim problemin, vetëm po ecim një hap drejt problemit përfundimtar, pra kjo është vetëm një fazë, nga këndvështrimi im sepse njohja ‘de-jure’ është njohje zyrtare dhe ligjore e një vendi, një qeverie”, tha Arifi.

    Sipas tij, për palët njohja “de-facto” nuk paraqet obligime ligjore, por është një veprim që vendet mund ta bëjnë në bazë të kujdesit dhe qëndrimit të tyre ndaj situatave aktuale, teksa shtoi se nga njohja “de-facto” është më vështirë të lëvizet drejt asaj “de-jure”.

    “Nga njohja ‘de-facto’ është më vështirë të shkohet drejt njohjes zyrtare apo ‘de-jure’, pasi Serbia do të blinte kohë jashtëzakonisht shumë për ta arritur që ta ndryshonte qëndrimin dhe ta kishim njohjen ‘de-jure’, ligjërisht të obligueshme”.

    “Në një mënyrë edhe vetë Perëndimi po i ikë atij obligimi, marrëveshjes ligjërisht të obligueshme, e cila i bie eksplicit njohje ‘de-jure’ e Kosovës. Mendoj që vetëm po humbim kohë shumë të vlefshme për Kosovën, por jo për Serbinë. E gjithë kjo humbje e kohës do të jetë reflektojë në dëm të zhvillimit të shtetit të Kosovës”, tha Arifi .

    Ndërsa, për njohësin e zhvillimeve politike, Arbnor Sadikun, njohja “de-facto” konsiderohet si hap i parë drejt njohjes ‘de-jure’, e po ashtu paraqet njohje të përkohshme të një shteti.

    Sadiku tha se njohja “de-facto”, në bazë të Konventës së Montevidios është atëherë kur një shtet ka kontroll të mjaftueshëm mbi një territor të caktuar.

    “Bazuar në të Drejtën Ndërkombëtare Publike, me njohje ‘de facto’ nënkuptohet nëse një shtet ka vendosur marrëdhënie normale diplomatike me një qeveri të një shteti të ri. Kjo bëhet në formën që në këtë rast Serbia bën një deklaratë se shteti i Kosovës është efektiv dhe ekziston në praktikë, por jo legal“.

    “Pra, thënë ndryshe, me njohje ‘de facto’ Serbia e njeh realisht Kosovën në praktikë, dhe shkëmben ambasadorët me Kosovën, njeh dokumentet zyrtare, etj. Por, nuk e njeh ‘de jure’ Kosovën përderisa pavarësia e saj nuk pranohet nga Rusia, Kina dhe aleatet e tyre, që i bie se pranon legalitetin e pavarësisë së Kosovës, por, jo legjitimitetin e saj ndërkombëtar, pra, Serbia e njeh realisht, por jo nominalisht Republikën e Kosovës, derisa Kosova të pranohet në OKB”, tha Sadiku,

    Më tej, Sadiku tha se njohja “de-facto” do të ishte diçka e re, ndonëse thuhet se Serbia e ka njohur Kosovën “de-facto” që nga Marrëveshja e Kumanovës, njohje që sipas tij, s’ka ekzistuar më parë, pasi s’ka pasur komunikim normal midis dy vendeve.

    “Në rastin e Kosovës kusht për njohje ‘de-facto’ është zbatimi marrëveshjes së Brukselit, dhe Aneksit të Ohrit, nga Serbia, kurse me njohje ‘de-juro’ nënkuptojmë njohje ligjore të shtetit sovran të Kosovës nga Serbia, dhe pranimin e saj në OKB, me të drejta plota si të gjitha shtetet anëtare të saj”, tha Sadiku.

    Kujtojmë se kryeministri i vendit, Albin Kurti, gjatë takimeve në Bruksel që pati me pesëshen evropiane ka thënë se ishte i gatshëm për nënshkrimin e Marrëveshjes Bazë, Aneksit të Ohrit dhe planin e ri evropiano-amerikan për draft-statutin e Asocicaionit.

    Por, sipas tij, kjo gjë nuk u bë, pasi ishte presidenti i Serbisë, Aleksandar Vuçiq, ai i cili refuzoi të hedh firmat në këto dokumente.

  • ​Britania publikoi një deklaratë për inteligjencën artificiale

    ​Britania publikoi një deklaratë për inteligjencën artificiale

    Britania e Madhe shpalli sot Deklaratën e Bletchley-t, të rënë dakord me vende të tilla si Shtetet e Bashkuara dhe Kina, për të rritur përpjekjet globale për të bashkëpunuar në sigurinë e inteligjencës artificiale.

    Deklarata, e nënshkruar nga gjithsej 28 vende, u publikua në ditën e hapjes së samitit të inteligjencës artificiale në Bletchley Park, Anglia qendrore.

    “Deklarata përmbush qëllimet kryesore të samitit në vendosjen e një marrëveshjeje dhe përgjegjësie të përbashkët për rreziqet, mundësitë dhe vazhdimin e procesit të bashkëpunimit ndërkombëtar për sigurinë dhe kërkimin e inteligjencës artificiale, veçanërisht përmes bashkëpunimit më të madh shkencor,” tha Britania në një deklaratë të veçantë.

    Britania mblodhi së bashku qeveritë, akademinë dhe kompanitë që punojnë në inteligjencën artificiale për Samitin inaugurues të Sigurisë së inteligjencës artificiale (AI) të mërkurën për të diskutuar se si të frenohen rreziqet e teknologjisë dhe nëse mund të bëhet.

    Takimi është ideja e kryeministrit Rishi Sunak, i cili dëshiron që Britania të bëhet një ndërmjetëse midis blloqeve ekonomike të Shteteve të Bashkuara, Kinës dhe Bashkimit Evropian.

    Lista e 100 të ftuarve përfshin liderë botërorë, udhëheqës të teknologjisë si Elon Musk dhe shefi i ChatGPT, Sam Altman, dhe akademikë. Ata mblidhen të mërkurën dhe të enjten në Bletchley Park, shtëpia e kodeve britanike të Luftës së Dytë Botërore.

    Çfarë thotë deklarata?

    Deklarata e miratuar bën thirrje për transparencë dhe llogaridhënie të aktorëve që zhvillojnë teknologjinë më të avancuar të AI në planet e tyre për të matur, monitoruar dhe zbutur aftësitë potencialisht të dëmshme.

    Ai vendosi një agjendë me dy drejtime që synon identifikimin e rreziqeve me interes të përbashkët dhe ndërtimin e një kuptimi shkencor të tyre, si dhe politika të përbashkëta për të zbutur rreziqet.

    “Kjo përfshin, përveç rritjes së transparencës së aktorëve privatë që zhvillojnë aftësitë e AI, standardet e duhura të vlerësimit, mjetet e testimit të sigurisë dhe zhvillimin e aftësive përkatëse të sektorit publik dhe kërkimit shkencor”, thuhet në deklaratë.

    Mbreti britanik Charles III tha sot se komuniteti ndërkombëtar duhet t’i përgjigjet rreziqeve të inteligjencës artificiale me një ndjenjë urgjence dhe uniteti, si në rastin e ndryshimeve klimatike.

    “Kjo është mënyra se si komuniteti ndërkombëtar u përpoq të trajtonte ndryshimet klimatike, të ndriçonte rrugën drejt emetimeve zero dhe të mbronte të ardhmen e planetit tonë,” tha mbreti në një video-mesazh të shfaqur në samitin e inteligjencës artificiale.

    “Ne duhet t’i përgjigjemi në mënyrë të ngjashme rreziqeve që paraqet inteligjenca artificiale, me një ndjenjë urgjence, uniteti dhe forcë kolektive”, tha Charles III.

    Skeptikët pyesin se sa ndikim mund të ketë Britania edhe kur SHBA, G7 dhe Bashkimi Evropian po përpiqen të shtyjnë nisma të tjera, disa prej të cilave tashmë kanë përparuar.

  • ​Ballkani i fortë për Dritën, Malisheva e njofton Egbon me humbje

    ​Ballkani i fortë për Dritën, Malisheva e njofton Egbon me humbje

    Kanë përfunduar ndeshjet e sotme të Superligës së Kosovës, ku kemi rezultate tejet interesante.

    Pas plot 90’ minutave lojë në stadiumin e qytetit në Suharekë, Ballkani e ka fituar derbin kundër Dritës me rezultat minimal 1:0, raporton KosovaPress.

    Golin e vetëm të ndeshjes e shënoi Lumbardh Dellova, i cili i siguroi Ballkanit fitoren në minutën e 36’.

    Fitore sot regjistroi edhe Gjilani, i cili e mposhti 2:1 Feronikelin ’74. Golat për gjilanasit i shënuan Redon Ismaili (minuta e 44’) dhe Nasko Milev (minuta e 63’), kurse golin e nderit te Feronikeli ’74 e shënoi Shilova në minutën e 88’.

    Ndërkaq, skuadra e Malishevës e ka njoftuar Emmanuel Egbon me humbjen e parë në Superligë, pasi e mposhti Prishtinën 1:0.

    Egbo e riktheu qysh në ndeshjen e parë të tij Prishtinën drejt fitores, kurse sot u mposht nga Malisheva 1:0, ku golin e vetëm të ndeshjes e shënoi Ilir Mustafa nga penalltia në minutën e 85’.

    Rezultatet finale i gjeni më poshtë.

    FC Ballkani 1:0 Drita

    Gjilani 2:1 Feronikeli ‘74

    Malisheva 1:0 Prishtina

  • ​Stacioni Policor në Istog pranon donacion nga KFOR-i

    ​Stacioni Policor në Istog pranon donacion nga KFOR-i

    Stacioni Policor në Istog, sot ka pranuar donacion pёr “dhomёn mike” nga KFOR-i, e cila do tё pёrdoret nga hetuesit e dhunёs nё familje për intervistimin e viktimave të dhunës familjare dhe personave të mitur.

    Donacioni ёshtё dhuruar nga komandanti i brigadёs Perёndimi, kolonel Gabriele Vacca, ndërsa u pranua nga komandanti i Stacionit Policor nё Istog, kapiten Enver Gashi.

    Nё ceremoni ishte prezentë kolonel Shaban Shala, drejtor i Drejtorisё rajonale tё Policisё nё Pejё dhe kryetari i Istogut, Ilir Ferati.

    Policia e Kosovës, do të jetё gjithmonё falënderuese dhe mirënjohëse për ndihmën e ofruar si dhe bashkëpunimin e vazhduar në fusha tё ndryshme dhe atё të sigurisë, thuhet në komunikatën për media.

  • ​Arrestohen 51 persona me urdhëresa tё gjykatave gjatë muajit tetor

    ​Arrestohen 51 persona me urdhëresa tё gjykatave gjatë muajit tetor

    Stacionet Policore, pranё Drejtorisё Rajonale tё Policisё nё Pejё, gjatё muajit tetor 2023, kanё realizuar urdhëresat e gjykatёs ndaj personave tё kёrkuar.

    Gjatё tetorit janё arrestuar 51 persona tё dyshuar pёr vepra tё ndryshme penale, disa prej tyre janё dёrguar nё vuajtje tё dënimit nё qendrat e paraburgimit, ndёrsa disa janё dёrguar ne seanca gjyqёsore, dhe pasi kanё bёrё pagesën e dënimit (gjobёn) janё liruar.

    Drejtoria Rajonale e Policisё nё Pejё, do tё vazhdojë me realizimin e urdhёresave tё lёshuara nga gjykatat kompetente, thuhet në një komunikatë për media.

  • Haxhiu: Pasuria e pajustifikueshme do t’i kthehet shtetit

    Haxhiu: Pasuria e pajustifikueshme do t’i kthehet shtetit

    Agjencia për Parandalimin e Korrupsionit e Kosovës (APK) ka lansuar programin e mentorimit për verifikimin e pasurisë të zyrtarëve publikë me ekspertë nga Këshilli i Evropës.

    Programi i mentorimit fokusohet në procesin e verifikimit dhe auditimit të deklarimit të pasurisë së zyrtarëve publikë që kryhet nga APK, në përputhje me Ligjin për deklarimin, origjinën dhe kontrollin e pasurisë dhe dhuratave si dhe Ligjin për APK-në.

    Programi do t’u ofrojë stafit të APK-së mundësinë për tu njoftuar me praktikat më të mira evropiane në verifikimin e aseteve të deklaruara nga zyrtarët shtetëror të Kosovës.

    Ministrja e Drejtësisë, Albulena Haxhiu, tha se një shoqëri nuk mund të ketë rrugën e ndritur nëse ata që drejtojnë institucionet apo që janë në nivele të tjera veprojnë kundërligjshëm dhe nga puna e tyre e kundërligjshme krijojnë pasuri marramendëse.

    “Në Kosovë kemi pasur shumë të tillë. Por këta të fundit duhet ta dinë që kjo pasuri e paligjshme apo e pajustifikueshme asnjëherë e tyre nuk do të bëhet, sepse drejtësia herë-do-kur me ta do të merret dhe pasuria e pajustifikueshme do t’i kthehet shtetit me qëllim të përdorimit për shtresat që kanë më së shumti nevojë. Si qeveri, përgjatë gjithë kësaj kohe, jemi angazhuar që të fuqizojmë legjislacionin kundër korrupsionit dhe të adresojmë secilën shkelje që kemi gjetur,” tha Haxhiu.

    Ndërsa drejtori i APK-së, Yll Buleshkaj, tha se ky program është një hap i rëndësishëm në përpjekjet për të forcuar kapacitetet e APK-së për të parandaluar korrupsionin.

    “Deklarimi dhe verifikimi i pasurisë është një mjet kyç në përpjekjet për parandalim të korrupsionit. Ky program do të ndihmojë stafin tonë të zhvillojë aftësitë dhe njohuritë që u nevojiten për të hetuar në mënyrë më efektive rastet e shkeljeve eventual dhe rrjedhimisht t’i shërbejmë më mirë popullit të Kosovës,” tha ai.

    Ndryshe, eksperti i Këshillit të Evropës do t’i ofrojë stafit të APK-së mentorim, trajnim kolektiv dhe individual, përgjatë procesit të verifikimit të deklarimit të pasurisë për vitin paraprak.

    Programi i mentorimit do të mbulojë një gamë të gjerë temash që lidhen me verifikimin e pasurisë, duke përfshirë praktikat ndërkombëtare krahasuese lidhur me verifikimin dhe auditimin e deklarimit të pasurisë, hapat për identifikimin e flukseve financiare dhe procedurat për të marrë informacione lidhur me asetet e mbajtura brenda dhe jashtë vendit nga zyrtarët publikë, si dhe procedurat e verifikimit dhe auditimit të deklarimit të pasurisë.

    APK beson që programi i mentorimit do ta ndihmojë atë të bëhet një agjenci më efektive dhe efikase në përpjekjet për parandalimin e korrupsionit, si dhe për të promovuar transparencën dhe llogaridhënien në Kosovë.

    Programi pritet të ketë një ndikim pozitiv në aftësinë e APK-së për të adresuar edhe rekomandimet e Komisionit të Venedikut për sa i përket verifikimit të deklarimit të pasurisë të zyrtarëve nga radhët e sistemit prokurorial dhe gjyqësor të Kosovës.

    Programi i mentorimit realizohet me përkrahjen e Projektit kundër Krimit Ekonomik (PECK III) dhe është pjesë e një nisme bashkëpunimi të Bashkimit Evropian (BE) dhe Këshillit të Evropës të financuar nga Bashkimi Evropian dhe Këshilli i Evropës dhe i zbatuar nga ky i fundit.