ATV

Blog

  • Vuçiq deklarohet lidhur me marrëveshjet e dialogut

    Vuçiq deklarohet lidhur me marrëveshjet e dialogut

    Presidenti i Serbisë, Aleksandar Vuçiq, gjatë takimit me përfaqësuesin special të BE-së për dialog, Miroslav Lajçak, pretendoi se Serbia është gjithmonë e gatshme për dialog.

    Sipas mediave serbe, Vuçiq e ka njoftuar përfaqësuesin special të BE-së për gjoja seriozitetin e situatës “me të cilën ballafaqohen serbët, si në veri ashtu edhe në jug të Ibrit, duke shprehur shpresën se procesi i mëtutjeshëm i dialogut do të çojë në rezultate”.

    Bëhet e ditur se në takimin e sotëm, Vuçiq ka insistuar për formimin e Asociacionit të komunave me shumicë serbe, ndërsa janë diskutuar edhe tema të tjera të rëndësishme në kuadër të dialogut Beograd-Prishtinë.

    Diplomati sllovak erdhi në Beograd para takimit të kryenegociatorëve Besnik Bislimi dhe Petar Petkoviq, të paralajmëruar për 16 nëntor në Bruksel.

    Më 7 nëntor, Lajçak ka vizituar Kosovën, ku është takuar Bislimin. Ai të nesërmen është takuar edhe me liderët e opozitës kosovare.

  • A respektohet kodi i veshjes në vendet e punës?

    A respektohet kodi i veshjes në vendet e punës?

    Duam apo nuk duam, që nga momenti që dalim jashtë shtëpisë – krahas gjuhës së trupit, ne komunikojmë edhe me anë të veshjes. Në njëfarë forme thuhet se veshja pasqyron karakterin e një personi.

    Për të diskutuar në lidhje me këtë çështje të ftuarit në “LIBERO” dhanë opinionin e tyre në lidhje me temën.

    Njohësi i protokollit, Tomor Avdija e konsideroi veshjen si gjuhë të komunikimit. Ai tha se veshja ka të bëjë me edukatën që marrin fëmijët nga familja që në moshë të hershme.

    “…Në institucione zonjat dhe zonjushat vishen me fustane të cilat janë më të shkurtra se sa lejon kodi etik, të ngushtë dhe po ashtu veshjet e tyre nuk janë komode për të zotëruar si duhet punën që ato bëjnë…”, deklaroi ai.

    Sa i përket pasqyrimit të karakterit me anë të veshjes, aktorja, Shota Baraliu e sheh krejtësisht ndryshe. Ajo mendoi se jo domosdoshmërisht ajo që veshim tregon statusin apo pozitën që ne e kemi në vende të ndryshme.

    “…Njeriu me kalimin e kohës e ndryshon edhe stilin…I përshtatem vendit, në dasmë vishem me rroba dasme ,në emisione serioze normalisht që do vishem më serioze…”, tha ajo.

    Vlen të ceket se sipas studimit të Temple University, veshjet tona lidhen me mendimin që ne kemi për veten dhe sjelljen në punë.

    Për të ndjekur diskutimin e plotë klikoni në linkun e mëposhtëm:

  • Dita Ndërkombëtare e Diabetit, studentët e Kolegjit AAB ofrojnë matjen e glikemisë falas

    Dita Ndërkombëtare e Diabetit, studentët e Kolegjit AAB ofrojnë matjen e glikemisë falas

    Në Ditën Ndërkombëtare të Diabetit, studentët e kolegjit AAB, nën kujdesin e asistentëve dhe profesorëve kanë kryer matjen e glikemisë për studentët, stafin dhe jo vetëm.

    Lidhur me këtë aktivitet ka folur edhe profesoresha e infermierisë, Teuta Bujupi, e cila tha se ky shërbim do të vazhdojë edhe gjatë ditës së nesërme.

    “Sot kemi dashur që studentet të kenë kontakt me pacientin thënë ndryshe kalimtarë të rastit apo edhe studentë duke i matur glikeminë në mënyrë vullnetare. Kemi dashur që ata ta kenë një pasqyrë se si punohet në komunitet, se si të bëjnë një këshillim rreth kësaj sëmundje, si për shembull ndryshim të jetesës sepse është një prej faktorëve kyç në sëmundjen e diabetit. Ka interesim dhe ky aktivet pritet të vazhdojë gjatë tërë ditës”, tha ajo në emisionin “A LIVE”.

    Ndryshe, nesër do të ofrohet matja e glikemisë falas për të gjithë qytetarët e Prishtinës në sheshin “Zahir Pajaziti”, duke filluar nga ora 10:00 – 13:00./atvlive.tvl/

    Për më shumë ndiqni videon e mëposhtme:

     

     

     

     

  • Szpisjak: Viti i fundit ishte një nga më sfiduesit në historinë e KFOR-it

    Szpisjak: Viti i fundit ishte një nga më sfiduesit në historinë e KFOR-it

    Në kampin “Film City” në Prishtinë është organizuar ceremonia e ndërrimit të komandës së zëvendëskomandantit të KFOR-it, mes Jozsef Szpisjak dhe Federico Bernacca. Paraardhësi i këtij të fundit deklaroi se viti i fundit ishte më sfiduesi në historinë e misionit paqeruajtës të NATO-s në Kosovë. Tutje, Szpisjak shtoi se gjatë kësaj periudhe kanë reaguar ndaj krizave të shkaktuara që nga dorëheqja e serbëve nga institucionet e Kosovës.

    Komandanti i KFOR-it, Ozkan Ulutaş tha se Jozsef Szpisjak ka shërbyer me nder në NATO dhe se ka bërë hapa të mëdhenj në përmbushjen e mandatit të KFOR-it në Kosovë.

    “E di që ky vit ka qenë sfidues. Megjithatë, ju keni bërë hapa dhe përparim të jashtëzakonshëm për të ndihmuar në përmbushjen e mandatit të KFOR-it, duke ofruar asgjë tjetër veçse më të mirën partnerëve tanë të vendit nikoqir të Kosovës…”, tha komandanti i ri i KFOR-it.

    Tutje përmendi edhe disa nga arritjet e ish-zëvendëskomandantit.

    “Ju siguruat rihapjen e linjave ajrore ndërmjet Shqipërisë dhe Kosovës”, tha ai.

    Ai i uroi mirëseardhje edhe zëvendëskomandantit Federico Bernacca, për të cilën tha se ka punë të mëdha për të bërë.

    Në ceremoninë e ndërrimit të komandës, ish-zëvendëskomandanti i KFOR-it, Jozsef Szpisjak tha se viti i kaluar ishte më sfiduesi për historinë e KFOR-it në Kosovë.

    “Viti i fundit ishte një nga më sfiduesit në historinë e KFOR-it”, tha ai.

    Zëvendëskomandanti Federico Bernacca tha se trashëgimia profesionale e paraardhësit do të jetë busulla që do të drejtojë mandatin e tij.

    Një muaj më parë është organizuar edhe ceremonia e ndërrimit të komandës mes Angelo Michele Ristuccia dhe Ozkan Ulutas. /kp

  • Ministri Sveçla priti në takim ambasadorin e Shqipërisë, Petrit Malaj

    Ministri Sveçla priti në takim ambasadorin e Shqipërisë, Petrit Malaj

    Ministri i Punëve të Brendshme, z. Xhelal Sveçla priti në takim njoftues ambasadorin e Republikës së Shqipërisë, z. Malaj.

    Fillimisht ministri Sveçla e uroi z. Malaj për emërimin e tij për postin e ambasadorit të Republikës së Shqipërisë në Kosovë.

    Në këtë takim u diskutua për marrëdhëniet e mira ndërmjet dy vendeve që do të vazhdojnë edhe më tutje, për zbatueshmërinë e marrëveshjeve të nënshkruara mes institucioneve të rendit dhe sigurisë mes dy vendeve e në veçanti për thellimin e mëtejmë të këtij bashkëpunimi.

    Në fund të takimit ministri Sveçla dhe ambasadori Malaj u dakorduan për angazhim të mëtejmë në avancimin e politikave në shërbim të rendit, ligjit dhe qytetarëve të vendeve tona.

  • KQZ: Kuvendi Zgjedhor Listës Serbe ishte konform ligjeve – Kurteshi interesohet nëse janë marrë masa ndaj Radojiçiqit

    KQZ: Kuvendi Zgjedhor Listës Serbe ishte konform ligjeve – Kurteshi interesohet nëse janë marrë masa ndaj Radojiçiqit

    Kuvendi Zgjedhor i Listës Serbe ishte temë diskutimi të martën në Komisionin Qendror të Zgjedhjeve (KQZ), raporton EO.

    Nga Komisioni Qendror i Zgjedhjeve ka bërë të ditur se ka monitoruar Kuvendin Zgjedhor të Listës Serbe, i cili është mbajtur më 24 tetor 2023.

    Drejtori i Zyrës për Regjistrim të Partive Politike, Besnik Buzhala tha se pas shqyrtimit të dokumenteve të pranuara nga Lista Serbe, rezulton se zgjedhja e kryetarit, kryesisë dhe nënkryetarëve është në përputhje me Rregulloren për Regjistrimin dhe Funksionimin e Partive Politike dhe statutin e kësaj partie.

    Ndërsa Sami Kurteshi nga Lëvizja Vetëvendosje, pyeti nëse janë marrë masa ndaj ish-nënkryetarit të kësaj partie, Millan Radojiçiq.

    “A ka ndonjë masë apo ndonjë përjashtim për shkak se e ka pranuar vetë se ka marrë pjesë në sulmet terroriste, nuk po dua t’i përmend emra sepse dihet por po dua të di nëse është shkarkuar për shkak të veprimeve kundër rendit kushtetues”, pyeti Kurteshi.

    Por përgjigje nuk mori nga Besnik Buzhala. Ai tha se për shkak të interesimit të madh nga mediet dhe numrit të madh të pjesëmarrësve, nuk janë dëgjuar të gjitha vendimet por që konstaton se zgjedhja e kryesisë ka qenë konform ligjeve.

  • Peja dhe Trepça vazhdojnë me sfidat e radhës në FIBA Cup

    Peja dhe Trepça vazhdojnë me sfidat e radhës në FIBA Cup

    eja dhe Trepça sot do të kenë sfida të rëndësishme në grupet e FIBA Europe Cup.

    Kampionët e Kosovës do të jenë mysafirë të Heroes Den Bosch, në një sfidë jetike. Verdhezinjtë kanë dy fitore e dy humbje, duke u renditur momentalisht në vendin e dytë, kurse holandezët kanë katër humbje në katër ndeshje.

    Pejanët kishin triumfuar ndaj holandezëve 99:84. Liderët e Superligës kanë mundur edhe PGE Spojnia Stargard, që ka po ashtu dy fitore e dy humbje. Polakët do të ndeshen me Niners, që kanë katër fitore në katër ndeshje dhe kanë siguruar kualifikimin tutje.

    Ndërkohë, Trepça është mysafire e ZZ Leiden. Holandezët dhe BCM Gravelines Dunkerque kanë nga dy fitore e një humbje, ndërsa mitrovicasit kanë pësuar dy humbje në dy ndeshje.

    Fituesit e Kupës dhe Superkupës së Kosovës ishin mundur nga ZZ Leiden në Mitrovicë me shifrat 54:84.

    Të dy ndeshjet zhvillohen nga ora 20:00.

  • Kompania e David Beckham merr në pronësi ekipin kosovar ‘Bad News Eagles’

    Kompania e David Beckham merr në pronësi ekipin kosovar ‘Bad News Eagles’

    Pothuajse dy vjet pasi filluan kërkimet e tyre, Bad News Eagles, ekipi i CSGO, më pas CS2 nga Kosova kanë gjetur një organizatë.

    Njoftimi shënon fillimin e një epoke të re për “Guild” pasi organizata nënshkruan në listën e ish-Bad News Eagles që do të luajë nën emrin e Guild Eagles, transmeton lajmi.net.

    Sipas të dhënave që mund të gjinden lehtësisht online, organizata në fjalë bashkëudhëhiqet nga legjenda e futbollit, David Beckham dhe pronarë tjerë.

    Organizata me bazë në Mbretërinë e Bashkuar ka hyrë më parë në Counter-Strike me nënshkrimin e një ekipi femëror në mars dhe tani zgjeron praninë e saj në qitësin e Valve duke nënshkruar listën e saj të parë meshkuj përpara PGL Copenhagen Major.

    Ekipi i përbërë nga Flatron “⁠juanflatroo⁠” Halimi, Rigon “⁠rigoN” Gashi, Genc “⁠gxx-⁠” Kolgeci, Sener “⁠SENER1⁠” Mahmuti dhe Dionis “⁠sinnopsyy⁠” ka qenë pa mbështetje organizative që nga fillimi i tyre gati dy vjet më parë. Përkundër kësaj, formacioni kosovar mori pjesë në tre Majors dhe arriti në fazën e Legends.

    “Me publikimin e CS2, ne kuptuam se nuk kishte kohë më të mirë për ne për të rritur praninë tonë në Counter-Strike. Trajektorja e listës së Bad Neës Eagles ka qenë frymëzuese dhe mishëron qëndrimin që vlerësojmë këtu në Guild Esports – ne mezi presim t’i mbështesim ata në udhëtimin e tyre në CS2,”, tha Jasmine Skee, CEO e Guild Esports, në lidhje me njoftimin.

    Stafi stërvitor me në krye Jonatan “⁠Devilwalk⁠” Lundberg dhe Kevin “⁠kRYSTAL⁠” Amend kanë bërë gjithashtu kalimin në organizatën e re, dhe suedezi ishte plot lavdërime për vizionin e GUILD.

    “Ne kemi pasur oferta nga organizata të shumta gjatë kohës që ishim një ekip i panënshkruar, por në fund zbuluam se Guild ishin më të afërt me atë që duam të arrijmë në CS2.

    “Me atë që kemi parë tashmë nga takimi me stafin dhe duke parë ambientet, nuk kemi dyshim se këtu i përkasim për të arritur në nivelin tjetër”.

  • Rritet interesimi për pasaporta në Kosovë, Krasniqi: Pas 1 janarit, mund të theksohet më shumë mungesa e fuqisë punëtore

    Rritet interesimi për pasaporta në Kosovë, Krasniqi: Pas 1 janarit, mund të theksohet më shumë mungesa e fuqisë punëtore

    Për gjashtë muaj mbi 51 mijë qytetarë të Kosovës, kanë bërë aplikime për herë të parë për pasaporta. Ky interesim i madh për pasaporta vjen pasi që nga 1 janari me pasaportë të Kosovës, pritet që qytetarët të lëvizin pa viza.

    Lidhur me këtë temë, në një lidhje direkte në emisionin “A LIVE”, foli Lirim Krasniqi nga “Germin”, i cili tha se interesimi i madh i qytetarëve për tu pajisur me pasaporta, nënkupton përgatitjen e tyre për të lëvizur lirshëm pas datës 1 janar 2024.

    “Besoj është e natyrshme sepse një numër i madh i qytetarëve të Kosovës nuk ka pasur mundësi që të lëvizin nëpër vende të zonës shengen dhe rrjedhimisht edhe s’kanë pasur nevojë për pasaporta. Mendoj se shpjegohet në këtë mënyrë, pra shumë njerëz janë duke e përgatitur që të lëvizin lirshëm pas datës 1 janar 2024”, tha ai.

    Tutje, ai përmendi se pas 1 janarit mund të theksohet më shumë mungesa e fuqisë punëtore në vend.

    “Edhe pa liberalizimin e vizave po vërehet mungesa e fuqisë punëtore, sepse ata që kanë pasur aftësi dhe shkathtësi veç sa janë pajisur me viza punë por mendoj se kjo do të theksohet më shumë edhe pas liberalizimit, të cilën bizneset në Kosovë do të duhet ta adresojnë duke gjetur format të tjera për të kompensuar mungesën e fuqisë punëtore, marrim shembull shtetet e rajonit që kanë gjetur alternativa të atilla si rritja e pagave, ardhja e punëtorëve të huaj etj.”, deklaroi Krasniqi./atvlive.tv/

    Për më shumë ndiqni videon e mëposhtme:

  • Anëtarësimi në BE, kritikohet qeveria për mungesë konsultimi me shoqërinë civile

    Anëtarësimi në BE, kritikohet qeveria për mungesë konsultimi me shoqërinë civile

    Lëvizja “Fol” ka kërkuar nga Qeveria e Kosovës të përmirësojë konsultimin dhe angazhimin e palëve të interesuara në procesin e negociatave për anëtarësim në Bashkimin Evropian.

    Përmes publikimit të raportit “Si mund të përmirësojë Kosova konsultimin dhe angazhimin e palëve të interesuara në procesin e negociatave për anëtarësim në BE?”, “Fol” e konsideron të domosdoshëm demokratizimin dhe zhvillimin e shoqërisë civile si parakusht për integrime evropiane.

    Burbuqe Kastrati nga Lëvizja “Fol”, në konferencë për medie të martën tha se raporti thellohet në përvojat e vendeve të rajonit në lidhje me rolin e shoqërisë civile, sektorin privat/odat ekonomike, akademinë, dhe palëve të tjera të interesuara në proceset e negociatave për anëtarësim në BE.

    Duke përmendur anëtarësimin e Sllovenisë në BE, ajo tha se një nga faktorët që dha një kontribut të rëndësishëm në suksesin e këtij shteti në procesin e integrimit evropian ishte sektori i gjallë i shoqërisë civile, i nxitur nga një kulturë e bashkëpunimit me institucionet publike.

    “Rregullorja thekson rëndësinë, konsultimin dhe shkëmbimin e informacionit me organizatat e shoqërisë civile dhe palët e tjera të interesuara në këtë proces”, tha ajo.

    Megjithatë, Kastrati kritikoi ekzekutivin për qasjen e saj në raport me shoqërinë civile për mungesën e konsultimeve në raport me zbatimin e MSA-së.

    “Qeveria s’bën konsultime paraprake me shoqërinë civile”, tha ajo.

    Duke paraqitur disa rekomandime, ajo tha se Qeveria e Kosovës duhet të përgatisë një raport vlerësimi për përfshirjen e shoqërisë civile dhe palëve të tjera të interesuara në punën e strukturave të stabilizim-asociimit. Po ashtu nënvizoi nevojën e prioritizimit të fushatave të ndërgjegjësimit publik që komunikojnë përfitimet, sfidat dhe implikimet e integrimit evropian, duke larguar keqkuptimet dhe duke nxitur mbështetjen.

    Të domosdoshme e pa edhe nevojën e rritjes së konsultimeve me sektorin privat në kuadër të procesit të integrimit evropian dhe të njohë rolin integral të sektorit privat, duke pasur parasysh fokusin ekonomik të Marrëveshjes së Stabilizim -Asociimit. Angazhimi i Odave të Ekonomisë dhe Tregtisë, së bashku me shoqatat specifike të sektorëve, në proceset e konsultimit dhe vendimmarrjes në lidhje me integrimin ekonomik. /kp