Në ambientet e sallës së sporteve ne Kolegjin AAB, të dielen u mbajt turneu ndërkombëtar i shahut rapid, “Kupa Adem Jashari 2024”.
Organizuar nga Federata e Shahut të Kosovës dhe mbështetur nga Ministria e Kulturës, Rinisë dhe Sportit, ky turneu mikëpriti rreth 205 garues.
Shahu rapid – disiplinë në të cilën edhe u zhvillua ky turne – zhvillohet me nëntë xhiro nga 13 minuta, plus 5 sekonda sipas rregullave të FIDE-së.
E sa i përket organizimin, dhe gjithçkaje tjetër mbi këtë organizim, detaje dhe edhe kryetari i Federatës së Shahut të Kosovës, Armend Budima.
Si turne mbarëkombëtar, edhe garues kishte nga të gjitha viset shqipfolëse.
Fahredin Osmani, kishte marrë rrugë nga Maqedonia e Veriut për të marrë pjesë në këtë ngjarje, madje për të nuk ishte hera e parë.
Nga ana tjetër, një nga favoritët kryesor të kësaj gare, gjithashtu edhe kampion i shumfishtë i Kosovës, Nderim Saraçi u shpreh i kënaqur me organizimin e kësaj gare.
Ndryshe, fituesi i këtij turneu fitoi plotë 2580 euro.
Më shumë detaje i gjeni në Edicionin Qendror të lajmeve në videon më poshtë:
Pa përfshirjen e gjetjeve të Gjykatës Kushtetuese, opinionit të Komisionit të Venecias, e rekomandimet e shoqërisë civile, projektligji për Këshillin Prokurorial po kërkohet që të mos kalojë në Kuvendin e Kosovës.
Kjo nismë ligjore pritet të diskutohet në lexim të parë në seancën e 7 marsit.
Lavdim Makshana nga Instituti i Kosovës për Drejtësi thotë se deputetët nuk duhet ta miratojnë projektligjin në parim.
“Po tentohet të kalojë në lexim të parë dhe pastaj në mes të dy leximeve të bëhen adresimet dhe vërejtjet e opinionit të Komisionit të Venecias. Për neve është gabim, për shkak se Ministria e Drejtësisë, Qeveria është dashur të tërheq këtë projektligj, t’i adresojë fillimisht të gjitha vërejtjet, kritikat”, tha Makshana.
Problem tjetër vlerësohet edhe koha kur po synohen këto reforma.
“Duke marrë parasysh se kjo reformë në Këshillin Prokurorial është një reformë e vonuar, ne besojmë që as në këtë mandat nuk mund të arrihet reforma në Këshillin Prokurorial të Kosovës. Për shkak se jemi shumë mbrapa sa i përket procedurave ligjore të cilat i kërkon ligji deri në miratimin e këtij ligji”, tha Viona Bunjaku nga “Lëvizja FOL”.
Njohës të sistemit të drejtësisë thonë se ka edhe tjera mangësi në projektligj.
“Këtu paraqitet problem çështja e rritjes së numri të anëtarëve të KPK-së, gjë e cila paraqet një problem në vete, e po ashtu është çështja e përfshirjes përsëri të Avokatit të Popullit në përzgjedhjen e anëtarëve jo-prokurorë të KPK-së. Me gjendjen aktuale të këtij drafti, ne nuk jemi të kënaqur”, tha Liridon Salihi nga “Grupi për Studime Juridike dhe Politike”.
Komisioni i Venecias në opinionin e fundit për këtë projektligj, nuk e ka përkrahur rritjen e numrit të anëtarëve të Këshillit Prokurorial.
Më shumë detaje i gjeni në Edicionin Qendror të lajmeve në videon më poshtë:
Kanë kaluar rreth 6 vjet që Kosova nuk ka strategji shtetërore kundër korrupsionit.
Në vitin e fundit të qeverisjes, Qeveria Kurti II ende nuk e ka miratuar një të tillë, ndonëse premtimet ishin se do të miratohej më së largu në dhjetor të vitit të shkuar.
Por, përpjekjet për ta miratuar këtë strategji, janë ende në fazën e draftimit.
“Do të përmbyllet hartimi i draftit të parë të këtij dokumenti të rëndësishëm, i cili më pas del në diskutim publik dhe po besoj që brenda 1-2 muaj do ta kemi këtë dokument të aprovuar, në mënyrë që agjencia më pas t’i zhvillojë mekanizmat për monitorimin e zbatimit të këtij dokumenti”, tha Yll Buleshkaj nga Agjencia për Parandalimin e Korrupsionit.
Megjithatë, vlerësohet se edhe pa strategji Kosova ka shënuar progres në luftimin dhe parandalimin e korrupsionit.
“Edhe pa dokument mund të kryhet, ka shtete që nuk kanë strategji për luftimin e korrupsionit, por është si praktikë e mirë, ka vende tepër të zhvilluara të cilat përmenden, qoftë për sundim të ligjit, qoftë për jetë kualitative, p.sh. Finlanda edhe pse janë në top lista për nivel të ulët të korrupsionit e zhvillojnë një dokument të tillë”, tha Buleshkaj.
Njësoj thotë edhe ministrja e drejtësisë, Albulena Haxhiu, sipas së cilës përpjekjet më të mëdha për luftimin e korrupsionit janë bërë gjatë qeverisjes Kurti.
“E vërtetë që s’ka strategji, por asnjëherë s’ka pasë përpjekje serioze institucionale edhe pa strategji hiç që ta luftojnë krimin e organizuar dhe korrupsionin. Përveç kësaj, 247 lëndë i kemi dërguar në prokurori, s’ka pasë ndonjëherë ndonjë qeveri që ka dërguar lëndë në institucionet e drejtësisë që ndërlidhet me keqpërdorim të milionave eurove”, tha Haxhiu.
Njësoj sikurse në 2022-tën edhe vitin e shkuar Kosova, në indeksin e perceptimit të korrupsionit, kishte pasë 41 pikë. Ndërkohë, në ranglistën botërore, zë vendin e 83-të.
Më shumë detaje i gjeni në Edicionin Qendror të lajmeve në videon më poshtë:
E gjithë toka ka mbetur djerrinë. Në këtë hapësirë prej 14 hektarësh në Lumë të Madh të Vushtrrisë, parashihej të ndërtohej parku i biznesit.
Gjithçka filloi gjatë qeverisjes së shkuar në Vushtrri, kur edhe u rregullua infrastruktura, derisa ishin përzgjedhur edhe bizneset që do të operonin në atë zonë.
Por ndërrimi i pushtetit, ndërroi edhe gjendjen, meqë dyshimet për keqpërdorime çuan në shfuqizimin e vendimit.
Kryetari Idrizi fajëson paraardhësin e tij për keqpërdorim të detyrës zyrtare, kur kishte lejuar që prona e komunës të mund të tjetërsohej.
Për këtë ai kishte bërë edhe kallëzim penal edhe në Prokurorinë Speciale.
Megjithatë, prokuroria e kishte cilësuar si të pabazuar kallëzimin penal të Idrizit.
Andaj ish-kryetari Xhafer Tahiri thotë se udhëheqësia aktuale në Vushtrri po i humb qindra vende të punës për qytetarët.
Me gjithë kundërshtimet e përplasjet, komuna tashmë ka në plan jetësimin e këtij projekti.
Afate kohore nuk dhanë, megjithatë në këtë zonë pritet të vendosen afro 15 biznese të ndryshme.
Më shumë detaje i gjeni në Edicionin Qendror të lajmeve në videon më poshtë:
Kosova dhe Shqipëria në të ardhmen do të jenë të lidhura edhe përmes binarëve.
“Tashmë kanë filluar punimet në studimin e fizibilitetit dhe projektit ideor”, tha zëvendësministri i Infrastrukturës, Hysen Durmishi.
Në janar, Ministri i Infrastrukturës, Liburn Aliu, njoftoi se dy shtetet janë pajtuar për trasenë se kah do të kalojë hekurudha që lidh Prishtinën me Durrësin.
Por, pikëpyetja e vetme mbetet financimi për ndërtimin e saj.
“Po shpresojmë se gjatë këtij viti do të përfundojë studimi i fizibilitetit dhe projekti ideor, në momentin kur të përfundojë, dihet saktë linja nga do të kalojë traseja e hekurudhës, dihet saktë tunelet ku do të jenë, pra do të kemi një kosto pak më të detajuar se sa do të kushtojë ky projekt në mënyrë që ose të aplikojmë për fonde nga BE-ja ose të merremi vesh e ta financojmë vetë”, tha Durmishi.
Geri Selenica, nga Qendra Shqiptare e Studimeve Strategjike e përjashton mundësinë e financimit nga Bashkimi Evropian përmes granteve.
“Nëse do të aplikojnë për fonde në Bashkimin Evropian, kjo hekurudhë nuk është në asnjë nga korridoret evropiane, kështu që nuk ke mundësi të marrësh, financime merr me garanci sovrane, por nuk merr dot grante. Procesi i granteve është një proces i gjatë në fillim, do të futesh në korridoret ndihmëse më pastaj në ato kryesore”, tha Selenica.
Selenica, i cili është i angazhuar në lobim për gjetjen e një forme më të shpejtë të financimit, ka një propozim.
“Neve po e modelojmë në këtë versionin, në mënyrë që kontraktori ta gjejë financimin më shpejt se Qeveria, sepse Qeveria për ta gjetur financimin duhet të kalojë në tenderime ndërkombëtare, vonohet. Pastaj, do të kalojnë në tenderime ndërtimi të cilët nga eksperienca e këtij studimi e pamë që dy qeveritë mezi u morën vesh për të ndarë dy milionë euro, jo për të dhënë një miliard euro”, tha Selenica.
Sipas llogaritjeve të Qendrës Shqiptare të Studimeve Strategjike, projekti për konstruktimin e hekurudhës pritet të ketë kosto prej një miliard eurosh.
Referuar të dhënave të kësaj qendre, hekurudha do të ketë një numër të madh tunelesh me gjatësi totale prej më shumë se 20 kilometrash, kurse ura 6 kilometra.
Më shumë detaje i gjeni në Edicionin Qendror të lajmeve në videon më poshtë:
Kombëtarja U18 e Kosovës në hendboll (vajzat) është kualifikuar për në Kampionatin Botëror, që do të mbahet në gusht në Kinë.
Në ndeshjen vendimtare për kualifikim, Kosova e mposhti Nigerinë me rezultat 22:16.
Për këtë arritje të kombëtares së Kosovës ka reaguar përmes platformës “X”, presidentja Vjosa Osmani.
Ajo ka shkruar “nuk ka kufij për vajzat që të arrijnë”.
“Vajzat tona kanë dëshmuar edhe një herë se nuk ka kufi për atë që mund të arrijnë! Urime ekipit tonë të hendbollit të femrave U18, trajnerëve të tyre të përkushtuar dhe të gjithëve në Federatën e Hendollit për kualifikimin në Kampionatin Botëror. Vazhdoni të ngrini lart flamurin tonë”, ka shkruar Osmani.
Our girls have proven yet again that there are no limits to what they can achieve! 👏
Congratulations to our Women's Handball Team U18, their dedicated trainers, and everyone at @FHK_Zyrtare for qualifying for the World Championship.
Një kompani e re publike do t’i shtohet sektorit të energjisë elektrike në vend, gjatë muajit mars.
Qeveria do të themelojë një ndërmarrje multifunksionale për ruajtjen e energjisë, përkatësisht menaxhimin me bateritë, të cilat Kosova do t’i blejë në kuadër të marrëveshjes në vlerë 202 milionë dollarë, me agjencinë amerikane MCC.
“Themelimi i kompanisë që do t’i ketë në pronësi bateritë, është një parakusht tjetër dhe këtu dokumentacionin e kemi gati dhe besoj që në mbledhjen e radhës të Qeverisë do ta miratojmë”, tha ministrja e Ekonomisë, Artane Rizvanolli.
Megjithatë, Qeveria ende nuk ka qartësuar në detaje rolin që kjo ndërmarrje do të ketë, përtej akumulimit.
“Ne faktikisht nuk kemi shumë informata se cili do të jetë roli konkret i kësaj ndërmarrjeje publike, por mund të nënkuptohet se kjo ndërmarrje mund të luajë një rol koordinues mes institucioneve publike, Qeverisë dhe sektorit privat që ndërlidhet me zhvillimin e sektorit të baterive në Kosovë”, tha Naim Bujupi, ekspert i energjisë.
Menaxhimi i aktiviteteve komerciale, tepricave dhe rrjedhave të energjisë elektrike nga burimet e ripërtërishme, sipas ekspertit Naim Bujupi, mund të jenë nga rolet.
“Burimet e ripërtërishme nga aspekti fizik i operimit, ato mund të operojnë energji kur ne nuk kemi nevojë dhe mandej kjo ndërmarrje e blen këtë energji nga këto burime, për shembull këta gjeneratorë të erës ose diellit, dhe atë tepricë e akomodon në bateri, pastaj kur neve na nevojitet, në kohën e pikut, kur kërkesa është e lartë, të njëjtën energji e plason në rrjet”, tha Bujupi.
Strategjia Kombëtare e Energjisë parasheh që deri më 2031, Kosova të instalojë kapacitete akumuluese prej së paku 170 megavatë, përmes baterive.
Më shumë detaje i gjeni në Edicionin Qendror të lajmeve në videon më poshtë:
Opozita po e konsideron të gabuar përfshirjen e përdorimit të dinarit si temë në procesin e dialogut Kosovë-Serbi.
Të martën, përfaqësues të dy vendeve u takuan në Bruksel, me ftesë të ndërmjetësuesit nga Bashkimi Evropian, Miroslav Lajcak, për të folur për rregulloren e Bankës Qendrore, mirëpo nuk u arrit asnjë marrëveshje.
Për këtë zhvillim, deputeti i Aleancës për Ardhmërinë e Kosovës, Besnik Tahiri, po e kritikon qeverinë.
“Problemi qëndron se kjo qeveri do të thotë i nxjerr disa tema pa kurrfarë nevoja që pastaj kthehen në tema që e pengojnë ecjen e Kosovës përpara dhe në veçanti e pengojnë Kosovën në rrugëtimin e vet në formësimin dhe forcimin e subjektivitetit të vet ndërkombëtar. Kjo ka ndodhur, pra nuk duhet diskutohet dinari askund mirëpo duhet të trajtohet me partnerët tanë Kosovë për me u gjet një zgjidhje”, tha Tahiri.
Ndryshe vlerëson deputeti i pushtetit, Driton Hyseni, që thotë se në takim, guvernatori Ahmet Ismaili vetëm i ka dhënë sqarimet e nevojshme për rregulloren që e njeh vetëm euron si valutë zyrtare në Kosovë.
“Unë mendoj që është qartësuar me vizitën që zyrtarët e Bankës Qendrore të Kosovës që e kanë bërë në Bruksel. Guvernatori i Bankës Qendrore e dha njoftimin lidhje me të gjitha sqarimet që ka pasur nevojë të diskutohen me të gjitha palët e interesuara në Bruksel në lidhje me lehtësirat që Banka Qendrore e Kosovës ka ofruar për të gjithë qytetarët në pjesën veriore të Kosovës me qëllim që ata të mos kenë as një vështirësi sa i takon qasjes në shërbimet bankare”, tha Hyseni.
Ndërkohë të shtunën Presidenti i Serbisë Aleksandër Vucic, në një konferencë është shprehur i bindur që Banka Qendrore e Kosovës nuk do ta ndryshojë rregulloren, andaj ka thënë se në vazhdim do të marrë siç u shpreh, “vendime të ndryshme” për të gjetur mënyra se si të dërgohen pagesat te qytetarët serbë të Kosovës.
Më shumë detaje i gjeni në Edicionin Qendror të lajmeve në videon më poshtë:
Nga e hëna në Qendrën Kryesore të Mjekësisë Familjare në Prishtinë, do të fillojë vlerësimi multidisiplinar për fëmijët.
Ky shërbim përfshin vlerësimin e aftësive të përgjithshme, komunikuese, si dhe psiko-sociale, që mund të kushtojë rreth 150 euro, por i cili do të ofrohet falas. Këtë do ta bëjë një ekip i përbërë nga psikologë, logopedë dhe ergoterapistë.
Kontrollet e tilla po mundësohen përmes bashkëpunimit të drejtorisë së shëndetësisë në Prishtinë dhe shoqatës “Autizmi”.
“Ata e ofrojnë stafin ndërse ne do ta ofrojmë hapësirën në QKMF. Vlerësimi i tyre tregon çfarë problemi ka dhe përveç kësaj ne kemi bërë një marrëveshje me kolegj privat që ofron shërbime logopedike që ata me na ofruar për 6 muaj një logoped i cili do të punojë në QKMF dhe do të jap shërbime falas ndërkaq edhe vlerësimi do të jetë falas”, tha drejtori i Shëndetësisë në Komunën e Prishtinës, Izet Sadiku.
Për një vlerësim të tillë duhet fillimisht të bëhet termin përmes linjës telefonike.
“Numri telefonik është 038220841 të gjithë munden me u lajmërua. Nuk do të thotë që fëmijët e tyre kanë problem por çdo hezitim që e kanë le të vijnë me bo një kontroll dhe mund të i ndihmojnë”, tha Sadiku.
Iniciativa po vlerësohet pozitive. Sociologu, Jeton Brajshori, thotë se ka shumë fëmijë që kanë nevojë për këto kontrolle, mirëpo shumë prindër hezitojnë, për shkak të kushteve ekonomike.
Vlerësimi multidisiplinar për fëmijët e kryeqytetit do të zgjasë një muaj.
Më shumë detaje i gjeni në Edicionin Qendror të lajmeve në videon më poshtë:
31 gjoba janë shqiptuar ndaj farmacive nga Inspektorati Farmaceutik vetëm në dy muajt e parë të këtij viti. Kjo përbën 10 gjoba më shumë se në periudhën e njëjtë të vitit të kaluar.
Parregullsia më e shpeshtë në të cilën kishin hasur gjatë inspektimeve, thuhet të jetë shitja e barnave, përkatësisht antibiotikëve, pa recetë mjekësore.
“Varësisht nga shkeljet e takuara janë marrë masa komfort dispozitave ligjore në fuqi: për dhënie të produkteve pa recetë të mjekut në mesin e të cilave hyjnë edhe antibiotikët, për produkte ilegale, mungesë farmacisti përgjegjës apo zëvendësues, si dhe për parregullsi të tjera”, thuhet në njoftimin e Inspektoratit Farmaceutik.
Farmacisti Arbnor Alidemaj thotë se pacientët që kërkojnë barna pa recetë, e kanë detyrë t’i këshillojnë që fillimisht të konsultohen me mjekun.
“E kemi qendrën afër këtu, u themi të shkojnë të konsultohen me mjekun mandej me rekomandim të tyre t’i marrin barërat”, tha Alidemaj.
Mirëpo vlerëson se shumica e qytetarëve janë të vetëdijshëm për këtë. Sipas tij, pa udhëzim të mjekut, kërkohen barëra më të thjeshta.
“Rrallë aty këtu, zakonisht vetëm ilaçet pak ma të thjeshta…paracetamol…”, tha Alidemaj.
Gjatë vitit 2023, inspektorati kishte shqiptuar 249 gjoba ndaj farmacive.
Përpos gjobave, Inspektorati Farmaceutik, për procedura të tjera ligjore, këto lëndë i dërgon në Odën e Farmacistëve të Kosovës, për marrjen e masave ligjore ndaj stafit profesional farmaceutik.
Më shumë detaje i gjeni në Edicionin Qendror të lajmeve në videon më poshtë:
