Një grua është raportuar e zhdukur në Viti.
Ankuesi, mashkull kosovar ka raportuar se nuk dinë asgjë për vendndodhjen e saj, ndërsa policia është duke hetuar.
“Me 12.03.2024 ankuesi mashkull kosovar ka raportuar se viktima femër kosovare, me datën e cekur është larguar nga shtëpia dhe nuk kanë njohuri për vend ndodhjen e saj. Rasti është duke u hetuar nga njësitet relevante”, thuhet në raportin e policisë.
Në orët e para të mëngjesit të së mërkurës është përfshirë nga zjarri objekti i Gjykatës Themelore – dega në Kaçanik, ku si pasojë janë dëmtuar dy zyre.
Lajmin e ka konfirmuar zëdhënësi i Policisë së Kosovës për rajonin e Ferizajt, Kanun Veseli.
Ai pohoi se nga hetimet e para dyshohet se ka të bëjë me zjarrëvënie nga tre persona të panjohur.
“Ju njoftojmë se me datën 13.03.2024 rreth orës 03:55 kemi pranuar një informatë se në Objektin e Gjykatës Themelore- dega në Kaçanik ishte një zjarrëvënie. Menjëherë në vendin e ngjarjes kanë dalë ekipe tê Zjarrëfikësve të cilët rreth orës 04:40 kanë lokalizuar dhe shuar zjarrin. Si pasojë e këtij incidenti nga zjarri janë dëmtuar dy zyre të kësaj gjykate.
Gjithashtu në vendin e ngjarjes kanë dalë patrullat e stacionit të Kaçanikut e më pas edhe hetuesit dhe krimteknikët rajonal nga Sektori Rajonal i Hetimeve, të cilët nën autorizim të prokurorit i kanë nisur hetimet intenzive.
Nga hetimet e para dyshohet se kemi të bëjmë me zjarrëvënie nga 3 persona të panjohur, e që hetuesit policorë janë duke grumbulluar informacione në terren në zbardhjen sa më shpejtë të këtij rasti. Për informata tjera ju nioftojmë më pas”, thotë Veseli.
Në Mitrovicë sot përkujtohet masakra që ndodhi në tregun e këtij qyteti 25 vjet më parë e ku pati viktima dhe qindra të plagosur.
Atë kohë, forcat serbe sulmuan me minahedhës derisa tregu ishte përplot me njerëz, ndërsa si pasojë mbetën të vdekur gjashtë qytetarë, në mesin e të cilëve kishte fëmijë dhe gra, ndërsa u plagosën edhe 128 të tjerë.
Përfaqësues të institucioneve komunale dhe asociacioneve të tjera në Mitrovicë, familjarë të viktimave e martirëve, si dhe qytetarë tjerë, çdo vit mblidhen në vendin e ngjarjes në nderim të viktimave të masakrës së tregut në Mitrovicë, që ndodhi 25 vjet më parë.
Pasojat shëndetësore e psikologjike të këtij sulmi të ushtrisë dhe policisë serbe i vuajnë edhe sot shumë prej atyre që ishin atë ditë në treg.
Administrata e presidentit amerikan, Joe Biden, ka thënë se do të dërgojë në Ukrainë ndihmë ushtarake në vlerë të 300 milionë dollarëve, paketën e parë të ndihmës që disa muaj, teksa projektligji për një paketë të madhe të ndihmës vazhdon të jetë i bllokuar në Kongresin amerikan.
Shtëpia e Bardhë ka shqyrtuar mundësi të shumta për të dërguar më shumë ndihmë ushtarake në Ukrainë, pasi ndihma paraprake prej Kongresit i është dërguar në tërësi Kievit, në dhjetor të vitit të kaluar.
Këshilltari amerikan për Siguri Kombëtare, Jake Sullivan, u ka thënë gazetarëve më 12 mars se fondet do të nisen prej Pentagonit, i cili ka kursyer para prej kontratave.
Ndihma në vlerë të 300 milionë dollarëve është ndarë prej buxhetit gati 840 miliardë dollarësh të Pentagonit.
Sullivan kanë thënë se fondet do të përdoren për të dërguar artileri dhe municione për sistemet raketore amerikane HIMARS në Ukrainë.
Ai ka thënë se ndihma do t’i ndihmojë ushtrisë vetëm për disa javë.
Rusia i ka ashpërsuar sulmet në vijën e frontit, teksa ushtria ukrainase përballet me mungesë të municioneve dhe raketave.
Shtetet e Bashkuara – prej të cilave Ukraina ka pranuar më së shumti ndihmë ushtarake në dy vjetët e fundit – nuk kanë munduar të dërgojnë ndihmë të re për shkak të bllokadës në Kongres.
Republikanët në Dhomën e Përfaqësuesve janë duke e mbajtur pezull një paketë të shpenzimeve që parasheh ndarjen e 60 miliardë dollarëve si ndihmë për Ukrainën, dhe pjesa më e madhe është për ndihmë ushtarake.
Zyrtarët amerikanë të inteligjencës i kanë thënë një ditë më parë Kongresit që nëse Shtetet e Bashkuara nuk dërgojnë shpejt ndihmë në Ukrainë, atëherë forcat ukrainase do të kenë vështirësi që të pengojnë përparimin e Rusisë.
Lufta në Ukrainë ka nisur më 24 shkurt të vitit 2022.
Presidenti rus Vladimir Putin e quan luftën “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL/
Qeveria e Kosovës sot pritet të mbaj mbledhjen e radhës.
Sipas një njoftimi për medie të Qeverisë, kabineti qeveritar pritet të mblidhet me fillim në orën 11:00.
Ndërkohë, nuk është bërë i ditur rendi i ditës i kësaj mbledhje.
Komisioni për Buxhet, Punë dhe Transfere sot do të mbajë mbledhje. Në këtë mbledhje pritet të raportojë Guvernatori i Bankës Qendrore të Kosovë, Ahmet Ismaili.
Ai do të flas lidhur më MSA-në, dhe lidhur më rregulloret e BQK-së. Lajmin për raportimin e guvernatorit Ismaili e ka konfirmuar edhe deputeti i LDK-së, Avdullah Hoti.
Ai, në profilin e tij në Facebook, ka thënë se guvernatori i BQK-së do të raportojë në Komisionin Parlamentar për Buxhet për takimin në Bruksel, për rregulloren e valutave të huaja në Kosovë.
“Me kërkesë të opozitës, nesër në orën 12:00, në Komisionin Parlamentar për Buxhet raporton Guvernatori i BQK-së lidhur pjesëmarrjen e tij të pakuptimtë dhe pa asnjë autorizim ligjor në dialog në Bruksel për rregulloren për përdorimin e valutave të huaja në Kosovë”, ka shkruar të martën Hoti.
I dërguari i Shteteve të Bashkuara të Amerikës për Ballkanin Perëndimor, Gabriel Escobar, do të qëndrojë sot në Kosovë.
Nga ora 10:00 ai do të pritet nga presidentja e Kosovës, Vjosa Osmani, ka njoftuar Zyra e Presidentes.
“Mediat fillimisht do të marrin pamje nga takimi, ndërkaq pas takimit do te ketë deklaratë për medie”.
Një nga çështjet e pashmangshme të diskutimit pritet të jetë ndalimi i dinarit.
Zëvendësndihmës Sekretari për Çështjet Evropiane dhe Euro-Aziatike i SHBA-së, Gabriel Escobar në një konferencë për media online të martën ka folur për çështjen e dialogut mes Kosovës dhe Serbisë, dhe vendimin e BQK-së për dinarin serb.
“Prej Brukselit do të udhëtojmë në Prishtinë ku do të fokusohemi për efektet dhe një zgjidhje të mundshme për vendimin e pakoordinuar për dinarin”, ka thënë Escobar.
Ai ka shtuar se procesi i dialogut është në një moment kritik, dhe “më duhet të them se nuk ka asnjë alternativë tjetër përveç dialogut të lehtësuar nga BE-ja”.
“I inkurajoj të dyja palët të implementojnë marrëveshjet e arritura sidomos atë të arritur në Ohër. Kjo është njëra ndër arsyet primare që po vizitojë Kosovën”, tha ai.
Escobar u shpreh se “duke injoruar dialogun Kosova po injoron partnerët evropianë”.
Sa i përket vendimit të BQK-së për dinarin serb, Escobar u shpreh se i kanë bërë thirrje Qeverisë së Kosovës që të marrin seriozisht rekomandimet e tyre.
Ai u shpreh se kanë probleme komunikimi me kryeministrin Albin Kurti.
Emisari amerikan do të takohet edhe me krerët opozitarë, por nuk ka pasur njoftime zyrtare për vendin dhe kohën e mbajtjes së takimeve.
Emisari amerikan, Gabriel Escobar ka deklaruar sot se po kanë probleme të komunikojnë me Kryeministrin Kurti, e sipas tij jo vetëm SHBA-në, por edhe NATO-ja.
Për këtë ka reaguar edhe nënkryetarja e Partisë Demokratike të Kosovës (PDK), Vlora Çitaku.
Ajo ka cituar deklaratën e Escobarit dhe ka shtruar një pyetje.
“Pyetja është me kë po koordinihet Kryeministri, nëse jo me SHBA-të, BE-në, NATO-n, Shqipërinë? Ky është alarmi i fundit për ne”, ka shkruar Çitaku.
Escobar e ka pranuar se ekziston një çarje në komunikimet diplomatike mes SHBA-së dhe Kosovës.
“Partneriteti në mes të Shteteve të Bashkuara dhe Kosovës është mes popullit amerikan dhe atij të Kosovës, nuk depërton përmes një njeriu në Kosovë, apo një partie. Mirëpo, më duhet të them që aktualisht kemi probleme në komunikim me kryeministrin [e Kosovës, Albin Kurtin]. Dhe jo vetëm SHBA-ja, është problem që e ka Kosova edhe me BE-në, NATO-n, Mbretërinë e Bashkuar dhe më shumë partnerë, përfshirë Shqipërinë dhe Maqedoninë e Veriut”.
Ai ka thënë se komunikimi me Kosovën ka qenë shumë i mirë në të kaluarën dhe shpreson që e njëjta situatë do të jetë edhe në të ardhmen.
I dërguari i Shteteve të Bashkuara për Ballkanin Perëndimor, Gabriel Escobar, e ka quajtur “katastrofik” dhe “jokompetent” vendimin e autoriteteve të Kosovës për të zbatuar rregulloren e Bankës Qendrore të Kosovës që përcakton euron si valutën për kryerje të pagesave me para të gatshme.
Kështu është pamundësuar përdorimi i dinarit serb në komunat me shumicë serbe në Kosovë.
Ai i ka bërë këto deklarata në Bruksel gjatë një bashkëbisedimi të hapur me gazetarë.
I pyetur për pasojat e mundshme ndaj Kosovës dhe Serbisë për moszbatim të marrëveshjes së Ohrit, Escobar ka thënë se Prishtina zyrtare duhet të nisë punën drejt formimit të Asociacionit të komunave me shumicë serbe, ndërsa Serbia t’i konsiderojë si obligative zotimet e bëra.
Sipas tij, pasojë e mospërmbushjes së zotimeve të marrëveshjeve do të jetë ngadalësimi në rrugën e integrimeve evropiane.
Escobar e ka pranuar se ekziston një çarje në komunikimet diplomatike mes SHBA-së dhe Kosovës.
“Partneriteti në mes të Shteteve të Bashkuara dhe Kosovës, mes popullit amerikan dhe atij të Kosovës, nuk depërton përmes një njeriu në Kosovë, apo një partie. Mirëpo, më duhet të them që aktualisht kemi probleme në komunikim me kryeministrin [e Kosovës, Albin Kurtin]. Dhe jo vetëm SHBA-ja, është problem që e ka Kosova edhe me BE-në, NATO-n, Mbretërinë e Bashkuar dhe më shumë partnerë, përfshirë Shqipërinë dhe Maqedoninë e Veriut”.
Ai ka thënë se komunikimi me Kosovën ka qenë shumë i mirë në të kaluarën dhe shpreson që e njëjta situatë do të jetë edhe në të ardhmen.
Bisedën e plotë të Gabriel Escobar-it me gazetarët e gjeni në videon më poshtë:
Përgatiti: Pranvera Krasniqi
Çdo ramazan, rrjetet sociale mbushen me reklama mbi ofertat e restoranteve të ndryshme për iftar. Shpesh, “Menytë e Ramazanit” janë të sponsorizuara me qëllim që konsumatorët të njihen me ofertat.
Nëpër restorantet e Prishtinës, nga 10 e deri në mbi 26 euro janë çmimet më të zakonshme të menysë së Ramazanit për person.
Por, qytetarët janë të zemëruar.
Madje, ka qytetarë të cilët për shkak të çmimeve të larta, iftarin do ta hanë vetëm në shtëpi.
Ndërkaq, për Shoqatën e Gastronomeve, kundrejt konkurrencës çmimet janë të arsyeshme.
“Ka shumë konkurrencë dhe risi, ka plot restorante që po hapen natyrisht që do të lëvizin me çmime…”, tha Arian Vranica nga Shoqata e Gastronomeve.
Por, shfrytëzimi i Ramazanit për përfitim të bizneseve, sipas ekonomistit Safet Gërxhaliu, nuk arsyetohet.
“Është muaj i shenjtë për myslimanët, kur nevoja për produkte ushqimore dhe sofër të begatshme shtohet, bizneset nuk duhet të përfitojnë nga ky muaj me ngritje çmimesh”, tha Gërxhaliu.
Megjithatë, nëse rritja e çmimeve është vendim kolektiv, kërkohet ndërhyrje nga qeveria.
“Çfarë nuk po më pëlqen në këtë aspekt është se nëse ka bashkëpunim mes bizneseve, gjë që është vepër penale, duhet të inspektohen dhe të ndalohen”, tha Vranica.
Për më tepër, siç kupton ATV-ja shumë prej restoranteve në kryeqytet nuk ofrojnë mundësi të tjera ushqimi jashtë menysë së përgatitur enkas për iftar.