Blog

Kreu i drejtorisë së inteligjencës ushtarake të Izraelit dha dorëheqjen të hënën për dështimet rreth sulmit të paprecedentë të Hamasit më 7 tetor, duke u bërë zyrtari i parë i lartë që jep dorëheqjen si përgjegjës për mos-parandalimin e sulmit të Hamasit.

Dorëheqja e Gjeneral Major Aharon Haliva pritet të pasohet në forcat e larta të sigurisë izraelite.

“Drejtoria e inteligjencës nën komandën time nuk e përmbushi detyrën që na ishte besuar. E mbaj atë ditë të zezë me vete qysh atëherë, ditë pas dite, natë pas nate. Dhimbjen do ta mbaj me vete përgjithmonë”, ka shkruar Haliva në letrën e dorëheqjes.

Menjëherë pas luftës, Haliva kishte thënë publikisht se ai kishte fajin për mosparandalimin e sulmit si shef i departamentit ushtarak përgjegjës për t’i ofruar qeverisë dhe ushtrisë paralajmërime të inteligjencës dhe alarme ditore.

Në një deklaratë të bërë ushtria izraelite njofton se shefi i shtabit ushtarak pranoi kërkesën e Halivës për të dhënë dorëheqjen dhe e falënderoi për shërbimin e tij.

Haliva, si dhe udhëheqës të tjerë ushtarakë dhe të sigurisë, pritej gjerësisht të jepnin dorëheqjen si përgjigje ndaj dështimeve të dukshme në sulmin e Hamasit në 7 tetor.

Ndërsa Haliva dhe të tjerët kanë pranuar fajin për dështimin në ndalimin e sulmit, të tjerët janë rezervuar, veçanërisht kryeministri Benjamin Netanyahu, i cili ka thënë se do t’i përgjigjet pyetjeve të vështira për rolin e tij, por nuk e ka pranuar plotësisht përgjegjësinë e drejtpërdrejtë për mosparandalimin e sulmit. /tch

Vetëm disa qindra qytetarë serbë, nga rreth 45 mijë me të drejtë vote, morën pjesë në referendumin në katër komunat në veri të Kosovës që për synim kishte largimin e kryetarëve shqiptarë.

Por pas thirrjes së Listës Srpska për bojkot, serbët e veriut e bojkotuan pothuaj tërësisht referendumin dhe KQZ pas mbylljes së vendvotimeve e shpalli atë të dështuar. “Andaj konstatojmë se iniciativa qytetare për largimin e kryetarëve të komunave Leposaviç, Zubin Potok, Zveçan dhe Mitrovicë e Veriut ka dështuar”, tha kryetari i KQZ-së, Kreshnik Radoniqi.

Lista Srpska në muajin janar të këtij viti kishte marrë pjesë në mbledhjen e nënshkrimeve për mbajtjen e referendumit në Mitrovicë të Veriut, Zveҫan, Leposaviq dhe Zubin Potok, por vetëm disa ditë para referendumit të së dielës, ajo bëri thirrje për bojkot, thirrje kjo që u dëgjua nga serbët.

Kosova bën përgjegjëse presionin e Beogradit për dështimin e votimeve

Presidentja e Kosovës, Vjosa Osmani pas dështimit të referendumit, tha se Kosova i dha qytetarëve të komunave të veriut mundësinë që t’i largojnë kryetarët aktualë dhe t’i zgjedhin kryetarët e rinj, por qytetarët në masë të madhe nuk e shfrytëzuan këtë mundësi. “Për fat të keq, kjo kryesisht ndodhi për shkak të presionit të Beogradit të ekzekutuar nga Lista Serbe dhe strukturat ilegale kriminale. Edhe njëherë, Serbia kreu ndërhyrje të paligjshme në një proces zgjedhor të një shteti tjetër. Edhe njëherë, Vuçiçi shkeli fjalën që ua kishte dhënë partnerëve ndërkombëtarë”, shkroi Presidentja në profilin e saj social. Presidentja Vjosa Osmani, shkroi më tej se “me organizimin e procesit të sotëm, Kosova i ka plotësuar të gjitha kushtet e kërkuara nga Bashkimi Evropian dhe masat kundër Kosovës të hiqen menjëherë”

Kryeministri i Kosovës, Albin Kurti, nga ana e tij, tha se “rezultatet e votimit për shkarkim ose jo të kryetarëve shqiptarë në katër komunat me shumicë serbe, tregojnë se nuk ka vullnet për t’i shkarkuar kryetarët aktualë”. “20% të votave të mbledhura nga Lista Serbe për peticionin, për të iniciuar këtë proces, nuk rezultuan më shumë se aq. Serbia e ka parë që mund t’i mbledhë 20% por jo edhe 50%”, shkroi kryeministri.

Reagime pas dështimit të votimeve në veri pati edhe nga SHBA. Shtetet e Bashkuara të Amerikës, shprehën keqardhje për vendimin e Listës Serbe dhe figurave tjera politike serbe në Kosovë, që nuk morën pjesë në procesin e votimit për largimin ose jo të kryetarëve shqiptarë nga katër komunat në veri të Kosovës. “Përmes pjesëmarrjes në votim, serbët kanë mundur të avancojnë në demokraci efektive dhe përfaqësuese. Pjesëmarrja demokratike ndihmon që udhëheqësit të jenë përfaqësues të popullatave, të cilave u shërbejnë. Votimi është e drejtë kyçe në shoqëritë demokratike”, tha ambasada amerikane në reagimin e saj.

Lista Srpska përshëndet unitetin mes serbëve

Partia më e madhe e serbëve, Lista Srpska që e ka mbështetjen e Beogradit, tha pas mbylljes së vendvotimeve, “të dielën është treguar shkallë e lartë e unitetit të popullit serb”.”Më 21 prill është dëshmuar se nuk janë Lista Serbe dhe Serbia që po frikësojnë serbët, por kryeministri i Kosovës, Albin Kurti dhe njësitë e tij ilegale parapolicore, që kanë rezultuar me rrugë të zbrazëta në veri”, thuhet në një komunikatë të Srpska-as.

Mitrovica e Veriut, Zubin Potoku, Leposaviçi dhe Zveçani, aktualisht udhëhiqen nga kryetarë shqiptarë të dalë nga zgjedhjet e 23 prillit të vitit të shkuar, zgjedhje këto të cilat u bojkotuan nga partitë politike serbe. Aktualisht është e paqartë se çfarë do të ndodhë pas dështimit të referendumit të datës 21 prill, meqë një i tillë, nuk mund të organizohet më para se të kenë kaluar 12 muaj të plotë.

Ministri i Bujqësisë Faton Peci ka akuzuar kryetarin e Komunës së Prishtinës, Përparim Rama se po e bllokon ndërtimin e objektit të Ministrisë së Bujqësisë, Pylltarisë dhe Zhvillimit Rural.

Peci ka thënë se Rama ka bllokuar çdo procedurë që ka të bëjë me ndërtimin e objektit të MBPZHR-së. Ndërsa i ka quajtur banale arsyet e zyrtarëve komunal.

“Qytetarët e Prishtinës por edhe qytetarët e Kosovës duhet ta dinë që Përparim Rama ka bllokuar cdo procedurë për ndërtimin e Objektit të MBPZHR-së! Sot është dita e 73-të nga dita e paraqitjes së kërkesës dhe dita e 42-të e kalimit të afatit kohor që Përparim Rama ka mohuar pajisjen e MBPZHR-së me kushtet e ndërtimit të objektit! Përkundër dhjetra takimeve dhe shkresave zyrtare duke përfshirë emailin direkt në adresë të tijën, ne mbesim të bllokuar me arsyet banale dhe fiktive të zyrtarëve komunal të llojit të: I është sëmurë babai njërit nga zyrtarëve; Zyrtari kompetent është në pushim vjetor, Kemi bërë disa lëshime teknike, javën tjetër ua lëshojmë; Zyrtarit i është sëmurë kunata; e kështu me rradhë”, ka shkruar Rama në Facebook.

Peci ndër të tjera ka rikujtuar se Përparim Rama dhe Ekzekutivi i Komunës së Prishtinës ka zvarritur në vazhdimësi përgjegjësitë ligjore të cilat iu takojnë karshi kërkesave të MBPZHR-së, siç janë përgjegjësitë ndaj aksioneve të inspektorëve!

“Qartësojmë për qytetarët e Kosovës, se bllokimi i ndërtimit të Objektit të MBPZHR-së, ndër të tjerat mohon përfitimin e 160 milionë eurove për bujqësinë vetëm në vitin e parë nga akreditimi në IPARD, si dhe liron buxhetin e shtetit nga barra e qirasë së lartë. Njëherit ky objekt do të akomodojë zyrtarët e institucionit tonë dhe agjencive përkatëse ekzekutive.Përparim, hap krahun përparimit të Kosovës”, ka shkruar Rama në Facebook.

Në Dhomat e Specializuar të Kosovës (DhSK) në Hagë, po vazhdon dëshminë dëshmitari i 54 i Zyrës së Prokurorit të Specializuar në rastin ndaj Hashim Thaçit, Kadri Veselit, Rexhep Selimit dhe Jakup Krasniqit.

Ky dëshmitar mban kodin W4739 në këtë rast gjyqësor, ndërsa dëshmia e tij është duke u dëgjuar në seancë të mbyllur për publikun. Sipas kryetarit të trupit gjykues, arsyeja e mbylljes së seancës ndërlidhet me mbrojtjen e dëshmitarit.

Ndryshe, përpara fillimit të seancës, trupi gjykues, pranoi në prova materiale disa deklarata të dëshmitarëve përmes audio-incizimeve.

Sipas tij, pasi është konstatuar se deklaratat janë të pranueshme, ata i kanë pranuar në prova materiale dhe kanë kërkuar nga Zyra Administrative që të iu caktojë audio-incizimeve numrin përkatës.

Po ashtu, Zyra Administrative u urdhëruar që t’i riklasifikojë disa prova materiale nga konfidenciale në publike.

Sipas kryetarit të trupit gjykues, ndryshe nga herat e tjera, këtë herë në seancë gjyqësore janë të pranishëm fizikisht të gjithë të akuzuarit.

Dëshmia e dëshmitarit të 54-të filloi me 2 prill për të vazhduar me 3 dhe sot me 22 prill.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi

Instituti Kërkimor për Çështje Evropiane dhe të Zhvillimit (RIDEA)organizoi konferencën “Formësimi i paqes: Përfshirja e grave në procesin e paqes Kosovë-Serbi”, raporton EO.

Genta Shabani, konsulente për Hulumtim nga kjo organizatë ka thënë se vazhdimësia e hendekut gjinor në mjediset politike dhe institucionale vjen si rezultat i mungesës se strategjive dhe strukturave mbështetëse për përfshirje.

“Faktorët kufizues në përfshirjen e grave në proceset formale të pagës në Kosovë shihen si të njëanshme, ekskluzive, me qasje lart-poshtë, elitiste dhe të imponuara nga akterët politik vendor dhe ndërkombëtarë. Modeli shihet si proces i orientuar drejt burrave, me mungesë të grave në pozita vendimmarrëse përveç kryenegociatores së mëparshme, znj. Edita Tahiri. Theksohet mungesa e perspektivës gjinore në procesin e dialogut i cili fokusohet në sigurinë tradicionale dhe jo sigurinë njerëzore dhe çështjet që prekin direkt gratë. Pavarësisht mekanizmave ligjor si Rezoluta 1325 e OKB-së, grat vazhdojnë të mos jenë te përfshira në proceset formale të pagës. Faktorët e procesit nënpërfaqësimi i grave në vendimmarrje dhe negociata formale, veçanërisht mungesa e konsultimeve me akterët lokale. Vazhdimësia e hendekut gjinor në mjediset politike dhe institucionale si rezultat i mungesës se strategjive dhe strukturave mbështetëse për përfshirje. Përzgjedhja e bazuar në numër dhe jo domethënie që rezulton në mungesë të agjendës gjinore në proceset formale të pagës. Mungesa së transparencës nga palët e përfshira në dialog, duke përfshirë paqartësinë e gjuhës së marrëveshjeve të arritura, narrativat e ndryshme publike dhe mungesën e konsensusit për statusin ligjor të marrëveshjeve të arritura pa nënshkrim”, ka thënë ajo.

Ndërsa nënkryetarja e Partisë Demokratike të Kosovës, Vlora Citaku është shprehur se duhet ti marrim seriozisht rekomandimet që do të dalin nga kjo konferencë dhe siq u shpreh ajo do të dëshironte që kjo tryezë të ishte më gjithëpërfshirëse.

“Po shpresojë që të gjithë përreth kësaj tavoline por edhe më gjerë do t’ i marrin seriozisht rekomandimet e juaja. Po ashtu do dëshiroja që kjo tryezë të ishte më gjithëpërfshirëse, sepse përfshirja e grave në proceset politike nuk duhet të jetë vetëm punë e grave. Kërkesa për gjithëpërfshirje nuk është një gjinore dhe nuk duhet të jetë një gjinore. Ne në PDK pikërisht për t’ ju ikur këtyre lloj ndarjeve kemi marrë vendim që forumin e gruas si të tillë ta shuajmë dhe po synojmë që të gjitha strukturat ndërtuese të partisë të jenë të përfaqësuara 50-50. Fatkeqësisht gjithmonë tradicionalisht kanë ekzistuar dy tavolina, tavolina e parë ku janë marr vendimet e mëdha ku rëndom janë ulur burrat dhe tavolina dytë që janë trajtuar tema më të lehta që rëndom që janë ulur gratë. Fatkeqësisht ende ka tema të burrave dhe temave të grave, ku flitet për politikat e mbrojtjes, politikat e sigurisë, kur flitet edhe për politikën e jashtme, rëndom personat e parë që ftohen edhe në studio televizive edhe në panele të ndryshme edhe tavolina vendimmarrëse fatkeqësisht vazhdojnë të jenë vetëm burrat. Ne kemi një betejë kulturore para vetes si shoqëri dhe duhet të punojmë dhe të emancipohemi që vlerat virtytet, dhuntitë, kompetencat nuk kanë gjini”, ka thënë Çitaku.

Komuna e Prishtinës dhe Ministria e Mjedisit, Planifikimit Hapësinor dhe Infrastrukturës, kanë nënshkruar memorandum bashkëpunimi në vlerë prej 1.5 milion euro. Me këtë marrëveshje “synohet shkarkimi i trafikut në Kryeqytet”, raporton Ekonomia Online.

Aty u tha se me nënshkrimin e kësaj marrëveshje, Kryeqyteti do të përfitojë katër projekte, ndërsa MMPHI do të vazhdojë mbështetjen edhe me komunat tjera.

Ministri i MMPH-së, Liburn Aliu, tha se ministria që e udhëheq ai ka nisur nënshkrimin e memorandumeve me Prishtinën dhe se nënshkrimi i këtyre marrëveshjeve do të vazhdoj edhe me komunat e tjera.

Ai ka thënë se me këtë nënshkrim komuna e Prishtinës ka përfituar 4 projekte në vlerë e 1.5 milion euro.

“Ishte një kënaqësi që po e fillojmë një cikël të nënshkrimeve të memorandumeve të me komunat. Po fillojmë me Prishtinën dhe me komunat me radhë. Me Prishtinën nënshkruam memorandume për katër projekte në vlerë 1.5 milion euro të cilat projekte do të lidhej me interesin qytetar, projekt që tani është hekurudha njëri. Të gjitha këto projekte do të kenë një rëndësie të madhe për Prishtinën. Kemi projekte të tjera që na presin një nder to është edhe ura nënë urën të Veterniku që i lidh të dyja lagjet, lagjen e spitalit me lagjen Kalabria, rrugë e cila duhet të kaloj Veternikun. Aty kemi bërë marrëveshje ku komuna do ta bëjë projektin e ministria ka ndarë 8 milionë euro dhe shumë shpejt do të filloj punën që të shkarkohet qyteti”, u shpreh Aliu.

E kryetari i Prishtinës, Përparim Rama, tha këto projekte do të kenë ndikim drejtpërdrejt tek qytetarët dhe se do të lirojnë komunikacionin në kryeqytet.

Ai me këtë rast përmendi edhe projektin e Unazës së Kryeqytetit, për të cilën tha se është jetik dhe që përsëri kërkoi që Ministria e Financave të nënshkruaj për ndarjen e buxhetit për këtë projekt.

Ai tha se edhe nëse Ministria e Financave nuk do të nënshkruaj, si komunë kanë edhe opsionin me sektorin privat, ku nëpërmjet një partneriteti publiko-privat mund të financohet ky projekt.

“Me punët që po i bëjmë më qytet po shkon drejtë çlirimit të transportit dhe trafikut. Projektet janë madhorë për kryeqytetin uroj që të vazhdojmë edhe, për shembull ‘Unaza e Kryeqytetit’. Siç e përmenda është jetike për kryeqytet, e kur është jetike për kryeqytet është jetikë për gjithë Kosovën. Jemi në bashkëpunim në këtë aspekt, me ministrin edhe kemi biseduar për zhvillimin e këtij projekti sa më shpjet. Krejt varet prej Ministrisë së Financave. Kemi edhe opsione të tjera me sektorin privat, ku mundemi nëpërmjet një partneriteti publiko-privat ta financojmë ‘Unazën e Kryeqytetit’, mirë është që ta kemi Ministrin e Financave që e nënshkruan edhe i vazhdojmë punët”, ka thënë ai.

Ministri, sa i përket “Unazës së Kryeqyteti”, tha se është projekt i rëndësishëm për komunën dhe se kjo çështje duhet të zgjidhet me kohë.

“Sa i përket projektit dizajnimit të Unazës ne kemi qenë në diskutim të vazhdueshëm duke e parë marrëdhënie e kësaj unaze me korridore të tjera . Çështja e financave mbete një sfidë e cila duhet te zgjidhet mbase në kohë”, ka thënë ai.

Dje është mbajtur në katër komunat veriore referendumi për votimin pro apo kundër për shkarkimin e kryetarëve.

Procesi zgjedhor ka përfunduar pa ndonjë incident, por Komisioni qendror i zgjedhjeve e ka konfirmuar se për shkak të numrit të vogël të votuesve ka dështuar iniciativa qytetarë për të larguar kryetarët aktual në Mitrovicën veriore, Zveçan, Zubin Potok si dhe Leposaviq.

Pas numërimit të votave, kryeministri i Republikës së Kosovës, Albin Kurti, iu ka bëre thirrje dy kryetarëve nga PDK-ja që të dalin në zyrat e tyre komunale dhe të ushtrojnë detyrën të papenguar.

“E kryetarët e Zveçanit dhe Zubin Potokut, Ilir Peci dhe Izmir Zeqiri, bëjnë mirë që më në fund të shkojnë në zyrat e tyre dhe ta ushtrojnë në mënyrë të papenguar detyrën në objektet zyrtare të komunave të Republikës së Kosovës”, ka thënë Kurti.

Ndërsa, kryetari i Zubin Potokut, Izmir Zeqiri, në një prononcim për IndeksOnline, ka thënë se për shkak të renovimeve që janë duke u bëre në komunë e kanë pasur të pamundur që të ushtrojnë detyrën e tyre në zyrat komunale.

Por, premtoj që se shpejti, posa të kryhen renovimet do të dalin në zyre.

“Do të dalim po, një pjesë e zyrës është në funksion që punon por, pjesa tjetër duhet disa renovime, të dyert dhe disa pjesë tjera sepse ka thyerje për shkak të intervenimit, por gradualisht, kati i parë tashmë veç ka filluar. Ne do të jemi në zyre gjithë andej ku është e nevojshme, natyrisht se edhe atje i kemi zyrat”, ka thënë Zeqiri

I pyetur se nëse janë renovimet kanë qenë arsyeja kryesore që nuk kanë dal në objektin e komunës, Zeqiri u shpreh “absolutisht që renovimet, sepse ne ishim dal edhe më përpara, proceduralisht ne i kemi në plan të renovimit, por se shpejti do të funksionalizohet e gjitha”, theksojë Zeqiri.

Në raportin e fundit nga Policia e Kosovës, evidentohen tri raste të dhunës në familje, që janë raportuar brenda një periudhe 24-orëshe

Përgjatë 24 orëve të fundit janë regjistruar tri raste të dhunës në familje në disa qytete të vendit.

Në rastin e parë, në Prishtinë, Policia e Kosovës ka bërë të ditur se një grua ka raportuar sulmin fizik ndaj saj nga një burrë.

Edhe pse viktima ka refuzuar trajtimin mjekësor, autoritetet policore janë në kërkim të dyshuarit.

“Më datën 21.04.2024 ankuesja femër kosovare ka raportuar se është sulmuar fizikisht nga i dyshuari mashkull kosovar. Viktima ka refuzuar trajtimin mjekësor. I dyshuari gjendet në kërkim policor, ndërsa rasti ne procedure hetimore”, thuhet në raportin 24-orësh të policisë.

Në Gjakovë, një burrë është arrestuar për dyshimet se ka shkaktuar dhunë ndaj disa familjarëve.

Autoritetet e prokurorisë kanë vendosur dërgimin e tij në mbajtje për hetim të mëtejshëm.

“Është arrestuar i dyshuari mashkull kosovar pasi që i njëjti dyshohet se ka shkaktuar dhunë ndaj viktimave kosovarë. Me vendim të prokurorit, i dyshuari është dërguar në mbajtje”, thuhet në njoftimin e Policisë.

Ndërsa në Malishevë, një grua është dërguar për trajtim të mëtutjeshëm në QKUK, pasi është viktimë e dhunës psikike nga dy të dyshuarit kosovarë.

Pas intervistimit, ata janë liruar me vendim të prokurorit, ndërsa rasti po vazhdon në procedurë të rregullt.

“Viktima femër kosovare pas pranimit të tretmanit mjekësor në QKMF-Malishevë, është dërguar në QKUK për tretman të mëtutjeshëm pasi që sipas saj, dy të dyshuarit kosovarë në vazhdimësi i kanë shkaktuar dhunë psikike. Palët janë intervistuar dhe me vendim të prokurorit, janë liruar dhe rasti vazhdon në procedurë të rregullt”, thuhet në njoftim.

Në rastin e fundit në Obiliq, një burrë është arrestuar pas hetimeve që nga data 6 prill 2024 dhe i njëjti është dërguar në mbajtje pas hetimeve për dyshime të dhunës në familje.