Blog

Deputeti i Partisë Demokratike të Kosovës, Bekim Haxhiu, ka thënë për Ekonomia Online se investimet në QKUK po bëhen për shkaqe elektorale. Ai vlerëson se gjendja nëpër spitale vazhdon të jetë e rëndë dhe se investimet në shëndetësi kanë qenë minimale.

Haxhiu ka deklaruar se para zgjedhjeve po bëhen investime të tilla por që sipas tij nuk e përmirësojnë gjendjen nëpër spitale.

Pikëpyetja e pacientëve sipas deputetit të PDK-së janë listat e pritjes për analiza e operacione.

“Siç e dini në tri buxhetet të cilat janë miratuar ka pas planifikime për investime në sektorin e shëndetësisë. Shumica e këtij buxheti ka shkuar në suficit, investimet në sektorin e shëndetësisë kanë qenë minimale. Tash para zgjedhjeve kanë filluar diçka me disa renovime të cilat nuk janë se përmirësojnë kushtet më të mira për operacione për të reduktuar numrin e pritjes së pacientëve. Ne kemi probleme substanciale në menaxhim. Pas gjithë këtyre investimeve, pyetja kryesore që e bëjnë pacientet a ka më i ra me prit prapë tri vjet për një operacion në listë të pritjes. Sa ka me prit për analiza? Sa ka me prit për procedura diagnostikuese?”, u shpreh Haxhiu.

Deputeti i PDK-së shprehet i zhgënjyer edhe për listat e gjata të pritjes nëpër klinika, teksa përmend raste kur pacientët vdesin derisa t’u vijë radha për koronografi.

“Siç e dini në Kardiologji, listat e pritjes ndonëse ka pasur investime prapë vazhdojnë të jenë të gjata, prapë listat e pritjes vazhdojnë të jenë të gjata edhe në klinika tjera, kështu nuk ka përmirësim të ofrimit të shërbimit shëndetësor tek pacientët. Në Kardiologji kemi pas raste që pacientet të cilët kanë qenë në listë të pritjes kanë vdekur pa mundur me realizu një koronarografi. Kur stafi i klinikës i ka thirr familjarët, me mllef janë përgjigjur pas një viti e gjysmë se pacienti ka ndërruar jetë dhe këto janë brenga të mëdha në sistemin tonë shëndetësor”, u shpreh tutje Haxhiu.

Haxhiu ka thënë se investimet janë “kozmetikë” dhe se nuk e përmirësojnë gjendjen në shëndetësi. Ai ka thënë se ekzekutivi ka dështuar ta sjellë në Kuvend Ligjin për Shëndetësi dhe Ligjin për Sigurime Shëndetësore.

“Kjo krejt çka po bëhet po bëhet një lloj kozmetike e cila nuk ka efekt në përmirësimin e kushteve në sektorin e shëndetësisë po vazhdohet me këso lloj investimesh elektorale derisa për tri vite qeveria nuk ka qenë në gjendje të miratojë strategjinë e shëndetësisë dhe nuk ka qenë në gjendje t’i sjellë në kuvend dy ligjet bazike, Ligjin për Shëndetësi dhe Ligjin për Sigurime Shëndetësore”, ka thënë Haxhiu.

Kuvendi Komunal i Prishtinës ka marrë vendim për anulimin e një kufizimi për punën e barnatoreve.

Retkoceri ka thënë se PDK kërkon që kjo rregullore të kthehet në debat publik dhe vendimmarrja lidhur me këtë çështje të kthehet tek qytetarët.

“Sot anuluam orarin e barnatoreve – më nuk do të ketë kufizime!”, ka shkruar Leutrim Retkoceri, shef i asamblistëve të PDK-së në Prishtinë.

“Pacientët e kryeqytetit në vitin e fundit hasën në shumë vështirësi në furnizim me barëra gjatë kujdestarisë, posaçërisht në situata emergjente dhe për pasojë ishin detyruar që të furnizohen me këto barëra nga barnatoret në komunën e Fushës Kosovës apo Graçanicës”.

Ministri teknik i Punëve të Brendshme, Pançe Toshkovski tha se deri më tani nuk ka pasur shkelje të procesit të votimit, ndërsa MPB-ja tashmë i ka dislokuar të gjithë policët në mbarë vendin të cilët duhet të kujdesen për realizimin e procesit zgjedhor në mënyrë demokratike.

“Nuk kemi vërejtur shkelje të rënda të procesit zgjedhor. Dita është e bukur, shpresoj që qytetarët të mund të ushtrojnë të drejtën e tyre të votës në zgjedhje demokratike. Të gjitha departamentet e punëve të brendshme janë përfshirë me kushte teknike. Ne veprojmë sipas udhëzimeve të përcaktuara nga shtabi zgjedhor”, shtoi Toshkovski.

Në zgjedhjet presidenciale marrin pjesë shtatë kandidatë.

Qytetarët e Maqedonisë së Veriut sot vendosin për presidentin e tyre të ardhshëm. Këto janë zgjedhjet e shtatë presidenciale, ndërsa raundi i dytë i mundshëm mbahet së bashku me zgjedhjet parlamentare më 8 maj. Vendvotimet janë hapur në orën 7:00, ndërsa votimi zgjatë deri në orën 19:00. Votohet në 3480 vendvotime në tërë Maqedoninë e Veriut. Ndërsa, numri i përgjithshëm i votuesve të regjistruar në Listën zgjedhore është 1.814.317.

Në mënyrë teorike presidenti mund të zgjidhet edhe në rrethin e parë me atë kandidat i cili do të marrë shumicën e votave nga numri i përgjithshëm i votave, përkatësisht 50% plus një, gjë për të cilën ekzistojnë gjasa të vogla posaçërisht në këto zgjedhje kur votohet për 7 kandidatë.

VMRO DPMNE-ja opozitare në zgjedhje do të garojë me deputetët aktuale Gordana Siljanovska*Davkovën. Lidhja Social Demokrate në pushtet do të garojë me presidentin aktual, Stevo Pendarovski. Në garën zgjedhore, Bashkimi Demokratik për Integrim do të garojë me ministrin e Punëve të Jashtme, Bujar Osmani, ndërsa opozita e bashkuar shqiptare me Arben Taravarin, kryetarin aktual të Gostivarit. Pjesë e garës zgjedhore do të jetë edhe Maksim Dimitrievski, kryetari i komunës së Kumanovës, Stevçe Jakimovski, kryetari i komunës së Karposhit në Shkup dhe Biljana Vankovska, kandidate e partisë “E Majta”.

Përzgjedhja e shefit të shtetit duhet të ndodh në rrethin e dytë kur do të vendoset për dy kandidatë të cilët në rrethin e parë kanë marrë më së shumti vota. Megjithatë edhe për përzgjedhjen e tyre nevojitet plotësimi i censusit, përkatësisht në zgjedhje të dalin më së paku 40% të votuesve të regjistruar. Rezultatet e zgjedhjeve nga rrethi i parë i zgjedhjeve presidenciale, KSHZ duhet t’i publikojë para mesnatës së 24 prillit. Ndërkohë, janë gjithsej 942 vëzhgues, gazetarë dhe përkthyes të huaj janë të akredituar për monitorimin e zgjedhjeve presidenciale.

Ish-kryenegociatorja e Kosovës në dialog me Serbinë, Edita Tahiri e ka uruar për datëlindjen e 56-të ish-presidentin e Republikës së Kosovës, Hashim Thaçi.

Tahiri me një postim në Facebook tha se veprimtaria çlirimtare e Thaçit është dhe mbetet historike.

Postimi i plotë:

Eurodeputetja liberale e Parlamentit Europian, Viola von Cramon, është takuar me përfaqësuesit politik të shqiptarëve në Luginën e Preshevës.

Von Cramon tha se ka pasur takim të rëndësishëm me përfaqësuesit shqiptar, ku pjesë e takimit ishin Shaip Kamberi dhe Ragmi Mustafa.

Ajo tha se diskriminimi sistematik ndaj tyre, duke përfshirë ‘pasivizimin’ e adresave, nga Serbia është i papranueshëm dhe duhet ndalur menjëherë.

“Takimi i rëndësishëm me përfaqësuesit politikë të minoritetit shqiptar nga jugu i Serbisë. Diskriminimi sistematik ndaj tyre, duke përfshirë ‘pasivizimin’ e adresave, nga qeveria e Serbisë është e papranueshme dhe duhet ndalur menjëherë!”, ka shkruar Cramon.

Sot feston ditëlindjen ish-presidenti i vendit, Hashim Thaçi.

Me këtë rast, kryetari i PDK-së, Memli Krasniqi, e ka uruar me anë të një fotografie të postuar në rrjete sociale.

“Urime ditëlindjen president. Dielli do të lindë përsëri”, ka shkruar kreu i Partisë Demokratike të Kosovës.

Thaçi i cili po vazhdon të mbahet në paraburgim në Hagë për më shumë se tre vjet, mbush sot 56 vjet jetë.

Rrjeti i Grave të Kosovës ka shprehur “shqetësim të madh për dënimin e ulët të dhënë nga Gjykata Themelore në Prishtinë” për rastin e dhunimit të 11-vjeçares.

RrGK thotë se gjykata ka shqiptuar minimumin e dënimit dhe këtë e kanë vlerësuar “skandaloze dhe të papranueshme”.

“Vepra penale për të cilën po akuzohen të pandehurit sipas Kodit Penal të Kosovës, neni 227, paragrafi 7, është e dënueshme me burgim së paku 10 vjet. Në këtë rast, gjykata ka shqiptuar minimumin e denimit, gjë që e vlerësojmë si skandaloze dhe të papranueshme, veçanërisht kur kemi të bëjmë me një rast i tillë.”

“Ne si shoqëri, përfshirë Rrjetin e Grave të Kosovës, shprehim një shqetësim të thellë në lidhje me trajtimin e rasteve të dhunimit nga institucionet e drejtësisë. Është thelbësore që gjykatat të kuptojnë peshën dhe ndikimin e këtyre rasteve në shoqëri dhe të ndërmerren veprime me seriozitet dhe dinjitet në trajtimin e tyre.”

RrGK ka shtuar se dënimet minimale shkaktojnë shqetësim për gratë dhe vajzat në Kosovë.

“Dënimet minimale që shqiptohen për këto vepra shkaktojnë shqetësim për gratë dhe vajzat në Kosovë pasi ato duket të jenë në favor të autorëve të krimit dhe jo në mbrojtje të viktimave. Kjo situatë i dekurajon viktimat e dhunës për të raportuar rastet e tyre dhe e bën më të vështirë për ta gjetur besimin në sistemin e drejtësisë.”

“Rrjeti i Grave të Kosovës do të vazhdojë të monitorojë reagimin institucional ndaj rasteve të dhunës me bazë gjinore dhe të angazhohet për të siguruar mbështetje dhe drejtësi për viktimat e këtyre veprave të tmerrshme. Ne jemi të hapur për bashkëpunim dhe ndihmë për viktimat e dhunës me bazë gjinore përmes këshillimit ligjor falas dhe referimit tek institucionet relevante. Nëse keni nevojë për ndihmë juridike falas për rastet e dhunës me bazë gjinore, apo njihni dikë që ka nevojë, na kontaktoni në numrin: 048 105 800.”

Dje Gjykata Themelore në Prishtinë ka dënuar me 62 vjet burgim gjashtë të akuzuar për dhunimin e 11 vjeçares – një me 12 vjet, ndërsa pesë të tjerë me nga 10 vjet.

“Të akuzuarit B.R, D.RR, B.S, M.S, F.S, M.R janë shpallur fajtor dhe janë dënuar nga gjykata, pasi të njëjtit veç e veç kanë kryer veprën penale të Dhunimit, ashtu që i akuzuari B.RR është dënuar me dënim me burgim në kohëzgjatje prej dymbëdhjetë (12) viteve, ndërsa të akuzuarit D.RR, B.S, M.S, F. S dhe M.R janë dënuar në kohëzgjatje prej dhjetë (10) vitesh, secili veç e veç. I akuzuari G.S është liruar nga aktakuza për veprën penale të Dhunimit, i pandehuri D.RR është liruar nga aktakuza për veprën penale Ndihmë në kryerjen e veprës penale të Dhunimit, i pandehuri F.S është liruar nga aktakuza për veprën penale Ndihmë në kryerjen e veprës penale të Dhunimi, si dhe i akuzuari E.S është liruar nga aktakuza për veprën penale Ndihmë në kryerjen e veprës penale të Dhunimit”, thuhet në njoftimin e Gjykatës.