ATV

Blog

  • Kurti bëri homazhe në Drenicë: Gjaku i martirëve është dritë e lirisë, është rrënjë e Republikës sonë

    Kurti bëri homazhe në Drenicë: Gjaku i martirëve është dritë e lirisë, është rrënjë e Republikës sonë

    Kryeministri i Republikës së Kosovës, Albin Kurti, filloi ditën duke bërë homazhe në Gllobar, Verboc dhe Shtuticë, në përkujtim të shqiptarëve të vrarë nga këto fshatra dhe zonat përreth, nga forcat policore e ushtarake të Serbisë më 30 prill 1999.

    “Para 25 vjetëve janë vrarë 276 shqiptarë, që dëshironin të jetonin të lirë në tokën e tyre stërgjyshore dhe gjaku i tyre është sot dritë e lirisë, është rrënjë e Republikës sonë, për çfarë ne u përkulemi përjetësisht dhe shprehim mirënjohjen tonë për këto familje të dëshmorëve që po qëndrojnë gjithnjë të fortë”, tha kryeministri Kurti.

    Pas homazheve në Gllobar, ku nderoi nëntë të vrarët e atij fshati, dhe nderimeve për 60 të vrarët në Verboc, Kryeministri vendosi buqetë me lule edhe në fshatin Shtuticë. Aty, kryeministri Kurti nderoi 76 shqiptarët e vrarë gjatë luftës, ndër ta 32 të vrarë në masakrën e vitit 1999. Në mesin e tyre, dy janë ende të pagjetur.

    Duke vlerësuar flijimet kaq të mëdha të popullit në fshatrat Shtuticë, Gllobar, Verboc, Baks, e mbarë Kosovës, ai tha se Kosova jonë demokratike me progres të gjithanshëm që po e forcon sundimin e ligjit, sovranitetin, integritetin territorial, por gjithashtu edhe drejtësinë dhe ekonominë, është dëshmia që ia ka vlejtur sakrifica edhe për çlirim edhe për përparim.

    Fjala e plotë e kryeministrit Kurti:

    Jemi këtu në Shtuticë bashkë me mësuesin Rifat dhe me shumë familje të dëshmorëve. Mësuesi Rifat ka qenë vet i plagosur. Në këtë fshat në të cilin janë gjithsej 76 shqiptarë të vrarë, dëshmorë e martirë, në vitin 1998 dhe 1999, ndërkaq para 25 vjetëve, pra me 30 prill 1999, këtu janë 32 të vrarë, dy janë ende të pagjetur.

    Në gjithë këtë zonë me fshatrat Gllobar, Verboc, Baks e kështu me radhë, ku kanë qenë të strehuar popullsia civile, para 25 vjetëve janë vrarë 276 shqiptarë, që dëshironin të jetonin të lirë në tokën e tyre stërgjyshore dhe gjaku i tyre është sot dritë e lirisë, është rrënjë e Republikës sonë, për çfarë ne u përkulemi përjetësisht dhe shprehim mirënjohjen tonë për këto familje të dëshmorëve që po qëndrojnë gjithnjë të fortë.

    Kosova sot është shtet demokratik me progres të gjithanshëm që po e forcon sundimin e ligjit, sovranitetin, integritetin territorial, por gjithashtu edhe drejtësinë dhe ekonominë, andaj kjo është një dëshmi që sakrifica ia ka vlejtur fortë edhe për çlirim edhe për përparim.

    Lavdi gjithë dëshmorëve e martirëve të Shtuticës, Verbocit, Gllobarit, Baksit dhe mbarë popullit tonë ngado që ai është, me këto flijime kaq të mëdha, me çmim kaq të lartë për lirinë që e gëzojmë sot.

  • Ja si ndikon grisja e letrës në largimin e zemërimit sipas një studimi në Japoni

    Ja si ndikon grisja e letrës në largimin e zemërimit sipas një studimi në Japoni

    Studiuesit në Japoni zbuluan se të shkruash mendimet dhe ndjenjat negative në një letër, pastaj ta grisësh ose bësh lëmsh dhe ta hedhësh tutje, mund të largojë zemërimin.

    Rolin kyç e luan asgjësimi i letrës, nuk duhet thjesht të shkruash ndjenjat.

    ‘Studimi tregon se asgjësimi i letrës që përmban mendime për shkakun e një ngjarje provokuese neutralizon zemërimin, ndërsa mbajtja e letrës jo’, – shkruajnë autorët e studimit, Yuta Kanaya dhe Nobuyuki Kawai.

    Për të kryer studimin, një grupi me 57 studentë iu kërkua të shkruanin opinione të shkurtra për një problem të rëndësishëm social, siç është pirja e duhanit në publik. Përgjigjet e shkruara me dorë u vlerësuan qëllimisht dobët dhe u kritikuan.

    Pjesëmarrësit që morën vlerësime negative, shfrynë zemërimin në letër. Disa prej tyre e hodhën letrën, disa të tjerë e mbajtën.

    Si përfundim, ata që e hodhën letrën në kosh ose e grisën, e hodhën pas krahëve zemërimin. Ndërsa ata që e mbajtën letrën, përjetuan reduktim të lehtë të zemërimit.

    Sipas studiuesve, interpretimi ose kuptimi i asgjësimit është ajo që ka vërtet rëndësi, jo vetëm veprimi. Ata zbuluan se mënyra se si deponimi perceptohet dhe kuptohet është vendimtar në përcaktimin e ndikimit të tij.

    Eliminimi i zemërimit përmes asgjësimit të një objekti mund të arrihet duke pranuar se entiteti fizik, në këtë rast, copa e letrës, është asgjësuar, duke bërë që edhe zemërimi të zhduket.

    Kanaya dhe Kawai vunë në dukje se studimi ofron një mënyrë ‘të përshtatshme’ dhe ‘me kosto efektive’ për të menaxhuar zemërimin në një sërë mjedisesh, duke përfshirë kujdesin për fëmijët, takimet e biznesit dhe aplikimet klinike.

    Aplikimi i kësaj metode në një pajisje dixhitale ose krijimi i një aplikacioni specifik mund të ketë dobi në situata të ndryshme të përditshme, si dhe në terapi për të trajtuar çështjet e sjelljes. Në mënyrë të veçantë, për dikë që e ka të vështirë të kontrollojë zemërimin në shtëpi, kjo metodë mund të jetë mjaft e dobishme.

  • A është ngjitëse psoriaza? – Shkaqet dhe trajtimi i saj

    A është ngjitëse psoriaza? – Shkaqet dhe trajtimi i saj

    Psoriaza nuk është një sëmundje ngjitëse, kështu që ajo nuk përhapet nga personi në person.

    Shpërthimet e psoriazës përhapen në trup për shkak të një përgjigjeje të brendshme imune.

    Pasi sistemi juaj imunitar sulmon qelizat e shëndetshme të lëkurës. Ky sulm shfaqet si skuqje në pjesë të ndryshme të trupit tuaj.

    Kjo është edhe arsyeja pse është e rëndësishme të identifikoni shkaktarët dhe të gjeni një trajtim që mund të ndihmojë në lehtësimin e simptomave tuaja.

    Llojet e psoriazës
    Psoriaza në formë petëzash-Këto mund të shfaqen në të gjithë trupin. Por më së shpeshti shfaqen në lëkurën e kokës, gjunjë dhe bërryla.

    Psoriaza guttate-Ky sulm shfaqet si skuqje në pjesë të ndryshme të trupit tuaj. Ato përhapen përgjatë krahëve, këmbëve dhe gjoksit tuaj. Disa njerëz gjithashtu përjetojnë shpërthime në fytyrë dhe kokë.

    Psoriaza inverte-Këto njolla të kuqe të cilat janë të dhimbshme, përhapen kryesisht tek të pasmet, sqetullat dhe ijet tuaja.

    Psoriaza eritrodermike-Karakterizohet nga njolla të kuqe të ndritshme që duken si djegie dhe përhapen shpejt në të gjithë trupin. Ato mund të shkaktojnë dridhje të pakontrollueshme dhe ënjtje në kyçet e këmbës. Ky lloj është shumë i rrallë dhe mund të jetë edhe kërcënues për jetën.

    A mund ta parandaloni përhapjen e psoriazës?
    Ndoshta! Por ju patjetër që mund të ndërmerrni hapa për të lehtësuar simptomat.

    Filloni duke e mbajtur zonën e prekur të pastër dhe pa grim e më pas të përdorni ilaçe qetësuese.

    Por nëse ndjeni që jeni në prag të një shpërthimi është koha për të ushqyer lëkurën tuaj duke ngrënë shëndetshëm dhe të shmangni shkaktarët e mundshëm si djegia nga dielli, pickimet e insekteve dhe stresi.

    Infeksionet dhe sëmundjet gjithashtu mund të jenë shkaktarë të psoriazës. Prandaj ndërmerrni hapa për të mbrojtur veten kurdo që të jetë e mundur.

    Rezistojini dëshirës për të kruajtur zonat e prekura sepse mund ta përhapni më tepër.

    Gjithashtu ky veprim mund të çojë në infeksione një shpërthim afatgjatë. Sa më shpejt të qetësoni shpërthimin, aq më e ulët është mundësia që ai të përhapet.

    Ekspertët këshillojnë hidratimin e lëkurës sa më shumë që të jetë e mundur në rast se nuk i rezistoni dot kruarjes.

    Çfarë e shkakton shpërthimin e psoriazës?
    Shkenca ende nuk e di me saktësi se çfarë e shkakton psoriazën.

    Duket se mund të jetë një kombinim i gjenetikës, mjedisit dhe sistemit imunitar që vepron kundër qelizave të lëkurës.

    Më poshtë gjeni disa nga faktorët e zakonshëm:

    Stresi
    Moti i ftohtë
    Dëmtimet e lëkurës si djegia nga dielli, kafshimet e insekteve, e deri tek tatuazhet.
    Medikamente të caktuara
    Infeksione të ndryshme
    Alkooli
    Duhani

    Deri më sot nuk ka asnjë mënyrë për të kontrolluar plotësisht këtë sëmundje dhe përpjekja e tepërt për ta bërë këtë mund të jetë shumë stresuese./AgroWeb.org

  • Haradinaj kujton Ilaz Kodrën: Ishim bashkë në betejën e Qafë Mullarit, ditën kur ra Luani

    Haradinaj kujton Ilaz Kodrën: Ishim bashkë në betejën e Qafë Mullarit, ditën kur ra Luani

    Kryetari i Aleancës për Ardhmërinë e Kosovës (AAK), Ramush Haradinaj, ka kujtuar Betejen e Qafë Mullarit dhe heroin e kombit, Ilaz Kodra.

    Haradinaj ka thënë se në atë betejë ishte bashkë me Ilaz Kodrën, Fehmi e Xhevë Lladrovcin, Abedin Rexhën e luftëtarë tjerë.

    “Me Ilaz Kodrën ishim bashkë në betejën e Qafë Mullarit, në ditën që u vra Luani e u plagos Rafet Rama. Në atë betejë, isha bashkë po ashtu me Fehmi e Xhevë Lladrovcin, Abedin Rexhën, Ali Ahmetin, Ramiz Lladrovcin, Gani Ramën, Selim Krasniqin dhe Emrush Xhemajlin”, ka thënë Haradinaj.

    Postimi i plotë:

    Me Ilaz Kodrën ishim bashkë në betejën e Qafë Mullarit, në ditën që u vra Luani e u plagos Rafet Rama. Në atë betejë, isha bashkë po ashtu me Fehmi e Xhevë Lladrovcin, Abedin Rexhën, Ali Ahmetin, Ramiz Lladrovcin, Gani Ramën, Selim Krasniqin dhe Emrush Xhemajlin.

    Që nga ajo ditë jo vetëm që fitova respektin për Ilazin por kishim besim të madh se Ilazi do të bëhet shtyllë e luftës çlirimtare. Ashtu edhe ndodhi, ai luftoi heroikisht deri në rënien heroike në vendin e tij të dashur, në Drenicë, me bashkëluftëtarët e tij trima.

    Në këtë datë kujtojmë po ashtu, dëshmorët dhe martirët e rënë në Vërboc, Shtuticë, Tërstenik, Dashec, Baks, Gllobar dhe fshatrat përreth.

    Në këto treva, shpirti i qëndresës është i përjetësuar. Ato mbesin në kujtesën historike si simbole të guximit dhe përkushtimit për Atdheun

    Lavdi e përjetshme!

  • Dëshmitari: Rrushe e Latife Kolollin i vranë forcat serbe

    Dëshmitari: Rrushe e Latife Kolollin i vranë forcat serbe

    Gjatë dëshmisë së tij, dëshmitari Nuredin Abazi tha se Latife dhe Rrushe Kolollin i vranë forcat serbe, pasi që trupat e tyre janë gjetur në një zonë ku vazhdimisht ka pasur patrullime nga ata.

    Dëshmitari tha se vendi ku janë gjetur këto dy gra, ka qenë vend i rrezikshëm për të pasur qasje UÇK-ja, raporton “Betimi për Drejtësi”.

    “Jo. Unë kam kuptu tek mas luftës se ato janë gjetur me një udhëkryq, në udhëkryq të cilin vazhdimisht patrullonin policia dhe ushtria e Serbisë, me autoblinda…I kanë vra forcat serbe se ka qenë e pamundur që me hy na si ushtri. Ka qenë vend tejet i rrezikshëm. Kur janë gjet trupat e tyre, se mbas luftës kam dëgju, ka qenë tejet e rrezikshme me u afru aty na se ai vend ka qenë gjithmonë me autoblinda e tanke të Serbisë”, tha dëshmitari.

    Abazi tha se ka dëgjuar se trupat e këtyre grave janë gjetur në rrugën kryesore Suharekë-Prizren.

    “Sa e di unë ato janë gjet afër Leshanit, rrugës kryesore që shkon për Suharekë-Prizren. Rruga që shkon për fshatin Leshan aty është udhëkryqi, njëfarë ishulli. Aty kam dëgju që janë gjet, se as nuk i kam parë”, tha dëshmitari.

    Duke folur për kohën kur kishte biseduar me këto gra, Abazi tha se nuk kishte autoritetin që t’i ndalonte.

    Madje, edhe për Sadik Halitjahën tha se nuk i ka njohur këto gra më herët.

    “Sadik Halitjaha nuk i ka njohur fare ato. Ku ka pas me i njoftë Sadik Halitjaha, kur Sadiku ka ardhë prej Zvicrës e s’i ka njoftë as 10 % të popullatës. 15 vjet në Zvicër ka qenë pa ardhë hiç”, tha ai.

    Dëshmitari tha se këto gra si të dyshimta i kishte sjellë Musë Çerkini pasi që ishin parë teksa hynin dhe dilnin nga stacioni i policisë serbe.

    “Që i kanë legjitimu, gjegjësisht Musë Çerkini. Mendohej se kanë bashkëpunu me policinë serbe, i kanë parë duke hy dhe dalë nga stacioni i policisë, e kështu me radhë”, tha ai.

    I pyetur se pse ishte i dyshimtë ky veprim, dëshmitari Abazi tha se ishin në gjendje lufte me stacionin e policisë e me ushtrinë Serbe.

    “Se ishte gjendje lufte, luftë kishim me stacionin e policisë, me ushtrinë e Serbisë. Bashkëpunimi me ata ka qenë i palejueshëm, i parregullt, i pamoralshëm. Gjendje lufte”, tha ai.

    Nga biseda me dy gratë, dëshmitari tha se e kishte kuptuar se veprimet e tyre në stacionin e policisë ishin për çështje të ulëta morali.

    “Ne, bashkëbiseduam me ato rreth asaj çka pretendohej, por gjatë bisedimeve u konstatu se nuk ka kurrgjë të dyshimtë. Ato thjesht i kishin bërë ato veprime për çështje të ulëta të cilat ia kam thënë edhe prokurorit”, tha ai.

    Dëshmitari shtoi se nuk ka raportuar tek Sadik Halitjaha për këtë bashkëbisedim me këto dy gra.

    “S’ka pas nevojë me i raportu. S’ka pas kurrfarë nevoje… Gjithherë nuk kemi mujt me kontaktu me komandantin se ai ka qenë edhe i zanë me detyra tjera. Shpesh ka mungu nga brigada, shpesh ka qenë e panevojshme. Kështu, disa gjana nuk kam mujtë me i raportu”, tha Nuredin Abazi.

    Abazi shtoi se i tha Agim Zybës dhe Naim Kadollit se gratë duhet të liroheshin.

    “Kam bisedu me Agimin dhe Naimin, Naim Kadollin, ( iu thash) femrat duhet të lirohen se nuk ka asgjë kontestuese, s’ka asgjë të ndaluar që kam konstatuar gjatë bisedimit me to. Krejt ishin çështje të ulëta të cilat nuk janë, nuk ja vlen me diskutu për ato, çështje morali që nuk ia vlen me u përmend. Ishin për çështje morali”, tha dëshmitari, duke shtuar se nuk e di nëse ata e kanë bërë një gjë të tillë dhe se a i kanë shoqëruar gratë në ndonjë vend tjetër.

    Dëshmitari Abazi thotë se Thaçi ka qenë udhëheqës politik në UÇK, por nuk e ka takuar kurrë

    Nuredin Abazi i cili është duke dëshmuar në Hagë në rastin ndaj ish-krerëve të UÇK-së, ka thënë që Hashim Thaçi ka qenë udhëheqës politik në UÇK.

    “Po, kanë qenë staf politik. Udhëheqës politik i UÇK-së”, tha Abazi, raporton “Betimi për Drejtësi”.

    Por, ai tha që me Thaçin dhe anëtarët e tjerë të Shtabit nuk është takuar asnjëherë gjatë luftës.

    “Jo kurrë. S’besoj që më njohin as ata mu. Veç në televizor i kam pa mbas luftës”, tha dëshmitari.

    Sa ishte në funksion në Budakovë, dëshmitari mohoi se ka trajtuar çështje të ndalimit atje.

    “Nuk kemi pas çështje të ndalimit na asnjëherë. Kemi pas çështje të legjitimimit, kryesisht të identifikimit të personave të cilët kanë hyrë në zonën e luftës dhe kurgjo tjetër”, tha ai.

    “Për detyrë e ka pas roja që e ka përkufizu zonën. Ata e kanë pas për detyrë me e identifiku se kush po hynë në zonë dhe kush po del, jo unë”, tha Abazi.

    I pyetur se në rast që ndonjë ushtar bënte shkelje kush e merrte në pyetje, dëshmitari tha se e bënte ai, duke e korrigjuar avokatin Luka Mishetiq se ishte bashkëbisedim.

    “Me bashkëbisedu me atë, unë. Objektivi ishte gabimi që kishte bërë ai që ka shkelë diçka që s’është dashtë me e ba, një veprim jonjerëzor, jo të duhur”, tha ai.

    Dëshmitari Abazi tha se pas bashkëbisedimit i raportonte komandantit, duke treguar edhe masat që i merrnin.

    “I raportoja komandantit. S’ka pas nevojë, ka qenë një shkelje e vogël , ia kemi dhënë një vërejtje ose një roje jashtë orarit dhe ka përfundu më kaq se s’kemi pas çka me i ba”, tha ai.

    Nuredin Abazi: Nuk ka pasur Gjykatë Ushtarake ndonjëherë në UÇK

    Në Dhomat e Specializuara të Kosovës (DhSK) në Hagë po vazhdon dëshminë Nuredin Abazi, i cili deklaroi se nuk ka pasur Gjykatë Ushtarake gjatë kohës së luftës, kur ai ka shërbyer si këshilltar juridik në Zonën Operative të Pashtrikut.

    Këtë deklarim, dëshmitari e bëri të martën në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, raporton “Betimi për Drejtësi”.

    “Nuk ka pas ndonjëherë Gjykatë Ushtarake dhe as që është krijuar ndonjëherë ndonjë Gjykatë Ushtarake, sa e di unë. Gjykatë Ushtarake nuk ka pas kërkun në Kosovë pasi që për themelimin e një Gjykate Ushtarake, janë dashtë kushtet e veçanta të cilat atëherë na kanë munguar dhe kemi qenë të pazotë që ta krijojmë një gjykatë të tillë pasi ofensivat nuk na kanë lanë me e çu kokën. Nuk kemi mendu diçka rreth asaj përveçse me u mbrojtë dhe me marrë pjesë në aksione”, tha Abazi.

    I njëjti shtoi se Gjykatë Ushtarake edhe sot nuk ka mbas 25 viteve paqe.

    “Nuk jemi t’u mujtë me e themelu tani Gjykatën Ushtarake e lëre më atëherë në kushte të luftës. Prapë po e ceki, sa e di unë kurrë nuk kam ni për Gjykatë Ushtarake dhe as nuk ka pas Gjykatë Ushtarake”, tha dëshmitari.

    Përpara kësaj, mbrojtësi i Thaçit, avokati Luka Mishetiq ia prezantoi dëshmitarit disa fragmente nga libri i Ilaz Kadollit të titulluar “Syri i Shqiponjës”, në të cilin përmendej një iniciativë për krijimin e një Gjykate Ushtarake.

    “Thotë; në fillim të marsit 1999, baza- njësiti “Syri i Shqiponjës” ishte zhvendosur nga shtëpia e Ilnaz Papajt nga Vneshta në fshatin Kastër të Therandës rreth 100 metra pranë Shtabit të Zonës Operative të Pashtrikut. Njëri nga ushtarët në rojë më njoftoi se më kërkonte një rojë nga Shtabi i Përgjithshëm. E pyeta; Kush ishte?, më tha se ishte një burrë i moshuar që quhej “Baca Kolë”. Baca Kolë e quanim Sokol Dobrunën nga Gjakova”, tha Mishetiq, gjatë leximit të këtij fragmenti.

    Sipas Mishetiq, në këtë libër përmendej edhe Nuredin Abazi që sot është dëshmitar, që ka pasur mundësi që të shërbejë në Gjykatën Ushtarake pasi në kohën e luftës ishte jurist i diplomuar.

    “Tek paragrafi i dytë thuhet; Kola më njoftoi arsyen e ardhjes në Zonën Operative të Pashtrikut, përkatësisht takimit me mua dhe se ishte caktuar që të shtrinte degët e kësaj gjykate në të gjitha zonat ushtarake. Në fillim do të vepronin si shërbime juridike, ndërsa aty ku kishte kushte edhe si gjykatë dhe se do të ishin të lidhura në qendër me Shtabin e Përgjithshëm. Kola më bëri të ditur se unë isha caktuar që të organizoja Gjykatën Ushtarake në Zonën Operative të Pashtrikut, ndërsa urdhëresa do të më vinte me vonë përmes korrierëve”, lexoi Mishetiq.

    Sipas avokatit, aty ishte biseduar edhe për ushtarët që mund të shërbenin në Gjykatën Ushtarake.

    “ Baca Kolë më kishte parasysh për shkak të njohjes së mëhershme të profesionit tim jurist. Biseduam edhe për ushtarët e tjerë që mund të shërbenin në Gjykatën Ushtarake dhe u përmendën emrat e juristëve si Nuredin Abazi, Emri Gashi dhe të tjerë me të cilët fillimisht do të formohej shërbimi juridik në kuadër të zonës, ndërsa më vonë edhe vetë gjykata ushtarake”, tha Mishetiq duke lexuar fragmente nga ky libër.

    Në këtë seancë, pati një diskutim mes prokurorit James Pace, trupit gjykues dhe avokatëve mbrojtës lidhur me dëshminë e këtij dëshmitari dhe vërtetësinë e deklaratave që ai i kishte dhënë ndër vite në autoritetet e drejtësisë.

    Prokurori Pace propozoi që të merret parasysh deklarata e dëshmitarit e dhënë sipas rregullës 154. Ndërsa, mbeti që trupi gjykues të marrë një vendim lidhur me këtë.

    Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

    Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

    Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

    Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi

  • Abdixhiku: Ali Lajçi ishte një ndër figurat më emblematike të lëvizjes kombëtare për liri, pavarësi e demokraci

    Abdixhiku: Ali Lajçi ishte një ndër figurat më emblematike të lëvizjes kombëtare për liri, pavarësi e demokraci

    Kryetari i Lidhjes Demokratike të Kosovës, Lumir Abdixhiku, ka bërë homazhe në nderim të veprimtarit Ali Lajçi.

    Abdixhiku në librin e zisë ka shkruar se Lajçi ka qenë një ndër figurat emblematike të lëvizjes për liri, pavarësi dhe demokraci.

    Njoftimi i plotë:

    Kryetari i Lidhjes Demokratike të Kosovës, Lumir Abdixhiku me bashkëpunëtorë kanë bërë homazhe në nderim të jetës së veprimtarit të madh, Ali Lajçi.

    Kryetari Abdixhiku në librin e zisë për veprimtarin Ali Lajçi ka thënë: “Ali Lajçi ishte një ndër figurat më emblematike të lëvizjes kombëtare për liri, pavarësi e demokraci. Kontributi i tij në orët më të rënda për vendin mbeten shtyllë e një Kosove të zhvilluar, progresive dhe demokratike. Si deputet i Kuvendit të Kosovës dhe si kryetar i komunës së Pejës ushtroi me mburrje dhe dinjitet funksionin e tij, në shërbim të qytetarëve. I tillë do të kujtohet përherë!

    Pusho në paqe!”

  • Gërvalla: Kosova kampione e demokracisë dhe sundimit të ligjit në Ballkanin Perëndimor

    Gërvalla: Kosova kampione e demokracisë dhe sundimit të ligjit në Ballkanin Perëndimor

    Ministrja e Jashtme e Kosovës, Donika Gërvalla, ka thënë se shpreson që diskutimet e të martës të jenë konstruktive dhe se Kosova të mund të “kontribuojë si kampione e demokracisë dhe sundimit të ligjit në Ballkan Perëndimor që të vendosen standarde të reja”.

    Gërvalla ka folur para takimit joformal të ministrave të BE-së përgjegjës për çështje të përgjithshme që mbahet sot në Bruksel.

    “Unë si zëvendëskryeministre dhe ministre e Jashtme e Kosovës, erdha këtu me shpresë që të kemi një bisedë të hapur për sundimin e ligjit dhe integrimin e Ballkanit Perëndimor e shteteve tjera aspiruese që të bëhen anëtare të Bashkimit Evropian. Të diskutojmë për nivelet e standardeve demokratike e të sundimit të ligjit që janë të nevojshme të plotësohen para se t’i bashkohemi të gjithë bashkërisht familjes evropiane. Shpresoj që diskutimet sot të jenë konstruktive e që Republika e Kosovës të mund të kontribuojë si kampione e demokracisë dhe sundimit të ligjit në rajonin e Ballkan Perëndimor në vendosjen e standardeve të reja për anëtarët e rinj”, tha Gërvalla.

  • Osmani kujton Ilaz Kodrën: Gardian i lirisë dhe i shtetit tonë

    Osmani kujton Ilaz Kodrën: Gardian i lirisë dhe i shtetit tonë

    Presidentja e vendit, Vjosa Osmani në 25- vjetorin e rënies ka kujtuar heroin Ilaz Kodra.

    Osmani ka thënë se Ilazi mbetet shembull i luftëtarit me kauzë, i cili fatin e popullit të tij e vendosi mbi fatin personal, ndaj është heroi ynë.

    “Sot në 25- vjetorin e rënies heroike, kujtojmë me respekt heroin Ilaz Kodra, një ndër luftëtarët e radhëve të para të UÇK-së, krahas kryekomandantit Adem Jashari. Ilazi mbetet shembull i luftëtarit me kauzë, i cili fatin e popullit të tij e vendosi mbi fatin personal, ndaj është heroi ynë. Ai do të mbetet udhërrëfyes për brezat dhe sikurse atëherë që ishte gardian i popullsisë civile nga regjimi gjenocidal i Serbisë, sot është gardian i lirisë dhe shtetit tonë bashkë me heronjtë e tjerë të UÇK-së. Qoftë i përjetshëm kujtimi për gjithë të rënët për liri!”, ka thënë Osmani.

  • Osmani bëri homazhe në Vërboc dhe Shtuticë në nderim të 280 martirëve të kësaj ane dhe 43 dëshmorëve të UÇK-së

    Osmani bëri homazhe në Vërboc dhe Shtuticë në nderim të 280 martirëve të kësaj ane dhe 43 dëshmorëve të UÇK-së

    Presidentja e Republikës së Kosovës, Vjosa Osmani ka bërë homazhe në Vërboc dhe Shtuticë, në 25- vjetorin e masakrave në këto dy fshatra dhe në fshatrat përreth: Tërstenik, Dashec, Baks, Gllobar, ku forcat e regjimit gjoenocidal të Serbisë më 30 prill 1999, vranë mizorisht 280 civilë shqiptarë.

    “Sa më afër lirisë, brutaliteti i forcave të regjimit gjenocidal të Serbisë rritej e manifestohej në mënyrën më çnjerëzore, ndaj në ofensivën e tyre vranë 280 banorë të kësaj ane vetëm pse ishin shqiptarë. Në mbrojtje të popullsisë civile u vunë vajza e djem të UÇK-së, në krye me komandant Ilaz Kodrën. Përballë egërsisë së regjimit kriminal, Ilazi me 42 bashkëluftëtarë qëndruan me guxim dhe vendosmëri deri në flijim. Ata ranë në fushë të betejës, duke u bërë të pavdekshëm”, ka theksuar Presidentja Osmani.

    Presidentja Osmani tha se sakrifica e heronjve dhe dëshmorëve të UÇK-së, nuk do të harrohet kurrë, ndërkaq guximi i tyre do të mbahet mend gjithmonë.

  • Konjufca: Projektet e MCC-së me ndikim pozitiv në mirëqenien e qytetarëve

    Konjufca: Projektet e MCC-së me ndikim pozitiv në mirëqenien e qytetarëve

    Kryetari i Kuvendit të Republikës së Kosovës, Glauk Konjufca, priti sot në takim Zëvendëspresidentin e Operacioneve Kompakte të Korporatës së Sfidës së Mijëvjeçarit (MCC), Cameron Alford, i shoqëruar nga ambasadori i ShBA-së në Kosovë, Jeffrey Hovenier.

    Në takim u bisedua për bashkëpunimin aktual ndërmjet Kosovës dhe MCC-së, përfshirë çështjen e nisjes së Programit Kompakt multimilionësh për sektorin e energjisë, si dhe u shqyrtuan planet për të ardhmen dhe çështje të tjera të interesit të përbashkët.

    Kryetari Konjufca falënderoi përfaqësuesit e Korporatës së Sfidave të Mijëvjeçarit dhe theksoi rëndësinë e projekteve me ndikim pozitiv në mirëqenien e qytetarëve, duke shprehur njëherësh mirënjohje për kontributin e çmuar të MCC-së në ecurinë zhvillimore të Republikës së Kosovës. Ai ritheksoi po ashtu gatishmërinë për vazhdimin e bashkëpunimit të ngushtë edhe në të ardhmen.

    “Zëvendëspresidenti i MCC, Cameron Alford u shpreh i kënaqur me nivelin e bashkëpunimit dhe potencoi nevojën e angazhimit të mëtejshëm për realizimin e projekteve zhvillimore, në linjë me avancimin e kuadrit legjislativ që mbështet investimet. Takimi u vlerësua si një rast i mirë për forcimin e bashkëpunimit dhe avancimin në drejtim të qëllimeve të përbashkëta për zhvillim të gjithmbarshëm”, thuhet në komunikatën e Kuvendit të Kosovës.