Blog

Finlanda po e mbështet fuqishëm anëtarësimin e Kosovës në Këshillin e Evropës.

Madje, Kryetari i Komisionit për Punë të Jashtme i Parlamentit të Finlandës, Kimmo Kiljunen, tregon se edhe në fazën e fundit Kosova do ta ketë mbështetjen e shtetit finlandez, por siç thotë ai qeveria duhet të bëjë disa hapa drejt respektimit të marrëveshjes për Asociacionin.

Sipas tij është tejet e rëndësishme që 1.7 milionë qytetarë të Kosovës të kenë qasje në Gjykatën Evropiane të të drejtave të njeriut.

“Që nga fillimi ne kemi qenë përkrahës të idesë që Kosova të bëhet anëtare e Këshillit të Evropës. Për neve është shume e rëndësishme që 1.7 milionë qytetarë të Kosovës të kenë qasje në Gjykatën Evropiane të të drejtave të njeriut. Ne do të vazhdojmë t’iu mbështesim edhe në hapat e ardhshëm. Në këtë fazë institucionet e Kosovës duhet të kujdesen për sigurinë e të gjithë qytetarëve dhe të mos lejohen më tensione të panevojshme. Tani para mbledhjes së Komitetit të Ministrave do të ishte shumë mirë që Kosova t’i ndërmarr disa hapa konkret për Asociacionin e Komunave me shumicë serbe. Kjo është një marrëveshje në kuadër të dialogut me Serbinë dhe është e rëndësishme të respektohet”, ka thënë ai për Tëvë 1.

Kiljunen, thotë se Serbia nuk ka forcë që ta ndalë anëtarësimin e Kosovës në Këshillin e Evropës.

Ai konsideron se shteti më i ri ne Evropë e gëzon mbështetjen e shumicës së vendeve anëtare të kësaj organizate.

“Ne e kuptojmë qëndrimin e Serbisë por ata nuk mund t’ua imponojnë të tjerëve qëndrimin e tyre sa i përket anëtarësimit të Kosovës në Këshillin e Evropës. Pranimi i një i shteti të ri bëhet me 2/3 të shumicës dhe Serbia nuk mund ta diktoj këtë gjë. Nga delegacioni serb më kanë thënë se ata nuk do ta njohin kurrë pavarësinë e Kosovës, por edhe unë ia kam bërë të qartë atyre se nuk do jenë kurrë pjesë e BE-së nëse nuk e zgjidhin këtë çështje. Përgjigjja ime nuk iu pëlqeu por ata e kuptuan mesazhin” , ka thënë Kryetari i Komisionit për Punë të Jashtme i Parlamentit të Finlandës.

Kosova mori dritën jeshile nga Asambleja Parlamentare për anëtarësim në Këshillin e Evropës dhe tani çështja ka kaluar në Komitetin e Ministrave.

Hartuesja e raportit pozitiv për anëtarësimin e Kosovës në Këshillin e Evropës, Dora Bakoyannis, ka deklaruar se asnjë kandidati nuk i janë kërkuar më shumë reforma se Kosovës para diskutimit për anëtarësim në këtë organizatë.

Përmes raportit 24 orësh, Policia e Kosovës ka dhënë detaje për tentim vrasjen e Marko Jablanoviqit, anëtarit të partisë së Nenad Rashiq.

Siç ka raportuar në Polici, ai vërejtur se afër tij ishte një person i maskuar me armë në dorë, të cilën ia kishte drejtuar, por nuk kishte arritur të gjuante.

“VRASJE NË TENTATIVË- Leposaviq 05.05.2024-00:01. Ankuesi mashkull kosovar, ka raportuar se deri sa ishte duke hyrë në një lokal kishte vërejtur afër tij një person të maskuar me një armë në dorë të cilën ia kishte drejtuar viktimës, por nuk kishte arritur të gjuante. Njësit policore kanë dal në vendin e ngjarjes, ndërsa me vendim të prokurorit rasti shkon në procedurë të rregullt.”

Zëvendësministri për kthim në Qeverinë e Kosovës, Radoica Radomiroviq, ka shkruar të dielën në Facebook se në Leposaviq ka pasur tentativë vrasjeje ndaj Marko Jablanoviqit, anëtarit të partisë së Nenad Rashiq.

Ai ka thënë se sulmuesit i ka dështuar arma që kishte planifikuar ta kryente atentatin. Po ashtu ka akuzuar Beogradin që qëndron mbrapa kësaj.

“Ngjarja tragjike nuk ka ndodhur pasi sulmuesit i ka dështuar arma automatike e tipit “Scorpion”. Nuk ka dyshim se pas atentatit qëndron regjimi i Beogradit, si dhe Radoiçiqi dhe kaubojët vendas Slavko Simiq dhe Zoran Todiq… Gjithashtu dua t’ju njoh me ngjarjet e ndodhura para zgjedhjes së Apos 2. Dihet gjerësisht se unë dhe Marko e mbështetëm Aleksandar Jabllanoviqin për të sjellë ndryshimet e nevojshme në Leposaviq”.

Investimet e fundit nga Ministria e Shëndetësisë në klinikat e Qendrës Klinike Universitare të Kosovës, po konsiderohen të kryera sa për sy e faqe, nga partitë opozitare. PDK e LDK thonë për Ekonomia Online se Qeveria është treguar e paaftë në përmirësimin e kushteve për punëtorët shëndetësor.

Deputeti i Lidhjes Demokratike të Kosovës, Armend Zemaj, thotë për Ekonomia Online se në shëndetësi po ndodh një keqpërdorim i buxhetit dhe se investimet po bëhen vetëm sa të shpenzuar buxheti.

Zemaj thotë se investimet e fundit nga Ministria e Shëndetësisë që po bëhen po i pengojnë pacientët për të marrë shërbime shëndetësore.

Ai shtoi se profesionistët shëndetësor janë dëmtuar për shkak të bindjeve politike dhe janë detyruar të largohen nga sektori publik në atë privat po ashtu edhe jashtë vendit.

“E mirëpresim çdo investim që bëhet nëpër klinikat tona por mënyra se si janë bërë dhe po vazhdohet të bëhet me një strategji po e pengon pacientin dhe ofrimin e shërbimeve sidomos që grumbullohen në vitin e fundit zgjedhor. Kjo është edhe si vërejtje por edhe si një keqpërdorim në gjithë buxhetin që ka qenë ndër vite tash po tentohet të shpenzohet kujtdo që i jepet mundësia. Trajtimi i mirë i brendshëm krijimi i një ambienti të mirë të punës, të eliminohen ndërhyrjet ashtu siç është parë në këto vit profesionistët janë atakuar për shkak të bindjeve politike dhe kanë ardh njerëz pa kompetencë në udhëheqjen menaxheriale, shumë janë detyruar të largohen nga institucionet private mbi të gjitha edhe jashtë vendit e që është shqetësimi më i madh”, u shpreh Zemaj.

Deputeti i Partisë Demokratike e Kosovës, Bekim Haxhiu, thotë për Ekonomia Online se shëndetësia në qeverisjen e fundit është përkeqësuar.

Haxhiu e konsideron një mangësi të madhe në mos-plotësimin e kushteve të punës ndaj profesionistëve shëndetësor, të cilët si pasojë e kësaj po largohen nga vendi e në sektorin privat.

“Dështim total i kësaj qeverie në sektorin e shëndetësisë, jo që shëndetësia jonë ka qenë në një stad të lartë, mirëpo me këtë qeverisje gjendja në shëndetësinë tonë është përkeqësuar edhe më shumë në raport me vitet e kaluara. Ka qenë një paaftësi e qeverisë që me kohë të ndërmerr veprime për të parandaluar ikjen e profesionistëve shëndetësorë edhe nga sektori publik në sektorin privat, por edhe prej Kosovës në vendet e Bashkimit Evropian. E kam propozuar para një viti që të ketë një strategji për të ndalur dhe përmirësuar kushtet e punëtorëve shëndetësor në sektorin publik. Derisa ne nuk arrijmë me ofru kushte të punës dhe paga të dinjitetshme për profesionistët shëndetësor në sektorin publik, sigurisht se kanë me na ikë në sektorin privat. I keni parë rastet e anesteziologëve të cilët shumica kanë braktis sektorin publik kanë kaluar në sektorin privat sepse sektori privat iu ka ofruar kushte më të mira”, thotë Haxhiu.

Deputeti i PDK-së thotë se në një mënyrë apo tjetër, Qeveria është treguar e paaftë në ndërmarrjen e veprimeve për kushte më të mira të punëtoreve shëndetësor.

“Ka qenë një paaftësi e qeverisë që me kohë të ndërmerr veprimet për të parandaluar ikjen e profesionistëve shëndetësor edhe nga sektori publik në sektorin privat por edhe prej Kosovës në vendet e Bashkimit Evropian. Dështim total i kësaj qeverie në sektorin e shëndetësisë jo që shëndetësia jonë ka qenë një stad të lartë mirëpo me këtë qeverisje gjendja në shëndetësinë tonë është përkeqësuar edhe më shumë në raport me vitet e kaluara”, thotë Haxhiu.

Sot mbushen 27 vjet nga rënia e heroit Luan Haradinaj, në njërën prej betejave të para të UÇK-së kundër forcave pushtuese serbe, më 6 maj 1997, në kufirin shqiptaro -shqiptar.

Beteja disa orësh me forcat serbe, derisa po e udhëhiqte një ekspeditë të Ushtrisë Çlirimtare të Kosovës në rrugën për të hyrë në Kosovë, i mori jetën njërit nga djemtë e familjes Haradinaj.

Në këtë ditë, Luan Haradinaj, bashkë me të vëllain Ramush Haradinaj dhe grupin e përbërë nga Fehmi e Xhevë Lladrovci, Selim Krasniqi e Ramiz Lladrovci, Abedin Rexha e Ilaz Kodra, Rafet Rama e Gani Rama, Emrush Xhemajli dhe Ali Ahmeti, u nisën për në Kosovë. Kishin arritur sipër fshatit Larë, fshat ky që ndodhej afër Kushninit të Hasit, në vendin e quajtur “Qafa e Mullarit”, kur grupi bien në një pritë të ushtrisë jugosllave, në kufirin shqiptaro-shqiptar.

Në këtë pritë vritet Luan Haradinaj, plagoset Rafet Rama, e po ashtu edhe Ramush Haradinaj dhe Fehmi Lladrovci. Trupi i Luan Haradinajt pushoi në Vlanë deri në çlirimin e Kosovës. Pas çlirimit trupi i tij u rivarros në Varrezat e dëshmorëve të kombit në vendlindje, në Gllogjan të Rekës, ku prehet i qetë, së bashku me 20 dëshmorët e vendlindjes.

Luan Haradinaj u lind më 17 nëntor 1973 në Gllogjan të Rekës përkatësisht të Deçanit. Shkollën fillore e kreu në fshatin Irzniq, ndërsa shkollën e mesme përkatësisht gjimnazin “Vëllezërit Frashëri” në Deçan. Pas kryerjes së shkollës së mesme Luan Haradinaj regjistrohet në Fakultetin e Edukatës Fizike në Tiranë, të cilin nuk arriti ta kryejë duke iu bashkuar kështu luftës për çlirimin e Kosovës.

Sot mbushen 25 vjet nga vrasja e nënkryetarit shumëvjeçar të LDK-së dhe deputet i Kuvendit të Republikës së Kosovës, Fehmi Aganit.

Agani u vra me 6 maj të vitit 1999, nga forcat pushtuese serbe. Figura e Aganit la gjurmë të pashlyeshme në historinë e pavarësisë së Kosovës, fushën e arsimit dhe mendimit shkencor. Fehmi Agani, njëri nga themeluesit dhe udhëheqësit e Lidhjes Demokratike, u vra afër Lipjanit nga serbë me uniforma dhe të armatosur.

Më 6 maj 1999, Agani, së bashku me familjen e tij, tentoi të linte Kosovën me tren. Në kufirin me Maqedoninë, treni u kthye mbrapsht. Diku afër Fushë Kosovës, policia ndaloi trenin dhe urdhëroi të zbrisnin të gjithë. Dëshmi të ndryshme të botuara në shtyp thonë se Agani u mor ose në një autobus së bashku me burra të tjerë shqiptarë, ose i vetëm me policët brenda një makine private. Kufoma e tij u gjend të nesërmen buzë një rruge gjithë baltë, pranë Lipjanit.

Për nder të profesor Aganit vite më parë është ngritur përmendorja e tij në oborrin e Fakultetit të Filologjisë në Prishtinë.

Qe nga vitet 60-ta kur ishte paraqitur me argumentim e së drejtës së Republikës së Kosovës e deri me vrasjen e tij, Agani e kishte vënë gjithë krijimtarinë e tij në shërbim të projektimit, argumentimit dhe realizimit të këtij qëllimi. /KosovaPress/

Abdullah Haradinaj del shpesh në parkun e Gërmisë.

Gjatë ecjes këndej, i ka rënë të shohë edhe gjarpërinj, por nuk është ndier i rrezikuar. Thotë se kohëve të fundit është rralluar prezenca e tyre.

“Parkun e Gërmisë e frekuentoj 3 herë në javë. Para dy vjete kam pa me shumicë në këtë pjesë. Dal natën e ditën po nuk ndihem i rrezikuar”, thotë Abdullah Haradinaj, qytetar.

Qytetarë të tjerë thonë se nuk kanë hasur asnjëherë në ta, deri tash.

‘’Çdo ditë dal për të ecë, mirëpo nuk kam pa gjarpërinj”, thotë një qytetar.

Sipas fotografit të botës së egër, Arian Mavriqi, në Gërmi ka vetëm një lloj gjarpri helmues. Mirëpo, deri tash nuk është shënuar ndonjë rast kafshimi nga ta.

“Në Gërmi si shumë vende tjera të Kosovës ka gjarpërinj. Prej tyre është vetëm një helmues, është Vipera Ammodytes. Nëse ndonjëherë ndodhë ndonjë kafshim, atëherë mos keni panik dhe duhet automatikisht të kontaktoni mjekësinë familjare më të afërt që mund të na ndihmojnë derisa të marrim serumin e duhur”, tha Arian Mavriqi, fotograf i botës së egër.

Se ky lloj i zvarranikëve është prezent në Parkun Kombëtar të Gërmisë, e konfirmon edhe drejtori për Siguri dhe Emergjencë në komunën e Prishtinës, Lulzim Fushtica. Megjithatë, ky thotë se autoritetet nuk guxojnë të ndërhyjnë në largimin e tyre.

‘’Është habitat i tyre i mbrojtur dhe si i tillë nuk ka askush të drejtë të intervenojë dhe t’i largojë nga ambienti i tyre natyror, nuk ka të drejtë askush të prishë disbalancin apo ekuilibrin e Florës dhe Faunës në parkun e qytetit”, tha Fushtica.

Në Parkun e Gërmisë ka edhe disa lloje të tjera të kafshëve të egra, të cilat janë të mbrojtura me ligj. /ATV

Më shumë detaje i gjeni në Edicionin Qendror të lajmeve në videon më poshtë: