Blog

Këshilli Prokurorial i Kosovës (KPK), ka aprovuar raportin e komisionit për avancimin e nëntë prokurorëve në Prokurorinë Speciale të Republikës së Kosovës (PSRK).

Prokurorët e avancuar janë: Naim Gashi, i cili nga vlerësimi ka marrë 87 pikë, Arbresha Raça-Shala 85.33 pikë, Shenaj Berisha 83.66 pikë, Shahadin Destani 82 pikë, Halim Borovci 77 pikë, Katriot Memaj 76.33 pikë, Fatos Ajvazi 71.33 pikë, Bekim Kodraliu 71 pikë dhe Ajshe Ferati ka marrë 70.66 pikë.

Kryetari i komisionit vlerësues, u.d Kryeprokurori Besim Kelmendi, tha se kandidatët e përzgjedhur janë vlerësuar në bazë të vlerësimit të përformances, nuk kanë pasur masa disiplinore, ngritjen akademike dhe përgjigjet e dhëna gjatë intervistimit, e që sipas tij këta kandidatë kanë plotësuar kriteret sipas rregullores.

Por ndaj këtij vlerësimi të komisionit, ankesa kanë parashtruar kandidati Kujtim Munishi, Bukurije Gjonbalaj dhe Fitore Sadikaj, raporton “Betimi për Drejtësi”.

Ish-kryeprokurori i Prokurorisë Themelore në Prishtinë, Kujtim Munishi, ka paraqitur kundërshtimin e tij në lidhje me vlerësimin, sipas tij të moszbatimit të ligjit dhe poentim të pasaktë dhe të njëanshëm. Ai tha se ky proces ishte diskriminues dhe sipas tij komisioni ishte themeluar në kundërshtim me rregulloren dhe se vlerësimi i kandidatëve është bërë pa monitorues nga shoqëria civile dhe nuk është incizuar.

Munishi nga komisioni ishte vlerësuar më 64.66 pikë, duke zënë vendin e 11-të, i cili përmes ankese së tij ka kërkuar anulim e gjithë procesit.

Në lidhje me këto kundërshtime të Munishit, kryesuesi i komisionit Besim Kelmendi ka thënë se për këtë konkurs kanë qenë të njoftuar edhe shoqëria civile edhe partneret ndërkombëtar por që nuk kanë marrë pjesë.

Ndërsa, për vlerësimin, Kelmendi u shpreh se nga të gjithë kandidatët kanë kërkuar nga tri kopje të aktakuzave për të bërë një vlerësim profesional.

Për këtë, ai tha se prokurori Munishi ka paraqitur aktakuza të vitit 2017, duke thënë se prej atij viti nuk e ka ushtruar veprimtarinë si prokuror. Ai tha se ka vlerësime të mira si menaxher i prokurorisë, por në rastin konkret është marrë parasysh përvoja e punës pasi ka aplikuar në një prokurori që është shumë komplekse.

Por më këtë konstatim nuk është pajtuar anëtarja Jehona Grantolli, e cila tha se kandidati Munishi ka menaxhuar prokurorinë me numrin me të madh të rasteve në këtë sistem dhe se gjatë përformances së tij kjo prokurori ka pas efikasitet.

Ajo tha se gjatë kohës sa Munishi ka qenë në menaxhimin e kësaj prokurorie, ka qenë e pamundur të trajtoj edhe raste, duke pyetur se nëse ky kriter do kërkohet edhe për pozitat tjera në të ardhmen. Sipas saj, tek çështja e integritetit Munishit i është bërë edhe njëherë tjetër padrejtësi kur kishte aplikuar për Kryeprokuror të shtetit.

Edhe anëtari Armen Zenelaj, pyeti nëse është përzierje e kompetencave të komisionit për vlerësimin e përformances kërkimi i aktakuzave.

Për këtë, Kelmendi tha se nuk ka qenë kriter por ka ndihmuar në vlerësimin profesional të kandidatëve.

Më 6 vota kundër dhe katër për, ky kundërshtim i Munishit nuk u aprovua nga Këshilli Prokurorial.

Kundërshtime në lidhje me vlerësimin e komisionit, kishte paraqitur edhe prokurorja Bukurije Gjonablaj, për mos aplikim të drejtë të kritereve dhe poentimit. Gjonbalaj në ankesë kishte thënë se nuk i është poentuar drejtë përformanca, përvojën e punës, specializimi e trajnimet e saja.

Edhe për ankesën e Gjonbalajt, Kelmendi tha se kriteret dhe poentomi janë të qarta dhe varësisht nga vlerësimi i përformancës vendosen edhe pikët, duke shtuar se e njëjta nuk ka pasur ngritje akademike dhe ka pasur vetëm disa trajnime. Ndërsa në kategoritë tjera ka thënë që ka pasur pikët pothuajse maksimale.

Këshilli ka refuzuar edhe kundërshtimet e prokurores Gjobalaj.

Edhe prokurorja, Fitore Sadikaj ishte ankuar se komisioni e ka dëmtuar tek pikët e përformancës në vlerësimin e integritetit dhe përvojën e punës. Ajo kishte thënë se në të njëjtën kategori kur kishte aplikuar për prokurore të Apelit ishte vlerësuar me lartë ndërsa, në këtë konkurs me ulët.

Në lidhje me ankesën e Sadikajt, Kelmendi tha se vlerësimi i komisionit ka qenë korrekt dhe në përputhje me rregulloren.

Edhe ky kundërshtim u refuzua nga ana e Këshillit.

Në pikën tjetër të rendit të ditës, u aprovua ndryshimi i përbërjes së Komisionit për Transferimin dhe Avancimin e Prokurorëve të Shteti. Kjo pasi sipas kryesuesit të KPK-së, Ardian Hajdaraj, komisioni kishte mandat deri në avancimin e nëntë prokurorëve në PSRK.

Ai tha se anëtares Merita Mina-Rugova i ka përfunduar mandati si anëtare e Këshillit dhe në vend të saj u propozua Jehona Grantolli. Ndërsa, tha se anëtari Enver Sokoli ka arritur pensionimin dhe në vend të tij u propozua Agron Bajrami.

Ky propozim u votua nga të gjithë anëtaret e Këshillit.

Një anëtar, u zëvendësua edhe në Akademinë e Drejtësisë, kjo pasi Kryeprokurori i Prokurorisë së Apelit, Xhevdet Bislimi ka dhëne dorëheqje edhe nga pozita e kryeprokurorit edhe nga anëtari i Këshillit të Akademisë se Drejtësi, për shkaqe shëndetësore.

Këshilli aprovoi edhe dy propozimet e Prokurorisë Themelore në Ferizaj dhe asaj të Gjilanit. Prokuroria e Ferizajt ka kërkuar hapjen e konkursit për avancim të një prokurori në Departament për të Mitur pasi kjo prokurori funksionon vetëm me një prokuror, ndërsa Prokuroria e Gjilani ka kërkuar avancimin e prokurorëve në Departament për Krime të Renda, pasi kanë mungesë pas pensionimit të një prokurori dhe dorëheqjes se një tjetri.

Tutje, në këtë takim Merita Bina-Rugova u propozua që të zgjidhet udhëheqëse e Departamentit për Krim të Organizuar në Prokurorinë Speciale, por vendimi për këtë propozim është shtyrë pasi të shikohet rregullorja nëse ka ndonjë pengese që ajo të marrë ketë pozitë pasi ka qenë anëtare e Këshillit.

Ndër të tjera, Këshilli në fillim diskutoi dhe miratoi planin e integritetit në sistemin prokurorial, rregulloren për Mandatin, Strukturën, Funksionimin dhe Organizimin e Zyrës për Mbrojte dhe Ndihmën e Viktimave, raportin vjetor të punës së Prokurorit të Shtetit dhe raportin përmbledhës të Komisionit për vlerësimin e përformancës së Prokurorëve.

Me dyer të mbyllura për publikun po vazhdon diskutimi për pikën “Raporti përfundimtar për vlerësimin e parregullt të përformancës së një (1) prokurori të PTH në Prishtinë dhe kundërshtimi i parashtruar”, si dhe pika “të ndryshme”.

Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione ka diskutuar lidhur me peticionin e punëtorëve të AKP-së, raporton EO.

Të pranishëm në mbledhje ishin kryesuesi Mentor Hysenaj i Bordit Drejtorёve tё AKP-sё dhe drejtori Ekzekutiv i AKP-së, Arben Limaj.

Kryesuesi i Bordit Drejtorёve tё AKP-sё, Mentor Hysenaj ka thënë se pas një kërkese që i është bërë nga punëtorët i kanë takuar së bashku me zëvendëskryesuesin dhe tre anëtarë tjerë të bordit.

Sipas tij kanë diskutuar në detaje të gjitha çështjet dhe shqetësimet që i kanë ngritur ato.

“Në parim ne e kemi thirrur grupin e grave të cilat e kanë përgatitur peticionin. Pas një kërkese që i është bërë bordit dhe e kemi takuar së bashku me zëvendëskryesuesin dhe tre anëtarë tjerë të bordit që kemi diskutuar në detaje të gjitha çështjet dhe shqetësimet që i kanë ngritur ato. Madje, kam dëgjuar edhe deklarimin e saj publik në komision këtu në detaje. Mund të them se jam ekonomist me profesion, çështja e statistikave shpesh din të manipulohet, varësisht prej këndvështrimit si e sheh njeriu, e megjithatë e përgëzoj për iniciativën që e ka bërë si çështje e ngritjes së pabarazisë që ndodhet në AKP, e gjithë Kosovën”, ka thënë Hysenaj.

Kryesuesja e komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, deputetja Duda Balje ka pyetur kryesuesin e Bordit të Drejtorёve tё AKP-sё se sa punëtorë janë.

“Të kemi thirr sot me folë për barazi gjinore brenda shtëpisë a ka pas, jo në Kosovë, të lutem koncentrohu në institucionin që përfaqësoni. Për fillim sa punëtorë jeni komplet”, ka pyetur Balje.

Hysenaj ka thënë se kanë diskutuar për të gjitha detajet e ngritura.

“Kemi diskutuar për të gjitha detajet e ngritura. Barazia gjinore është term tjetër. Janë 209 të punësuar dhe çdo statistikë e ka një histori”, tha ai.

Ai tha se 54% janë gra prej zyrtarëve në AKP-së. Gjithashtu përmendi një shpallje brenda AKP-së. Si përfundim sipas tij, janë 5 kandidatë të kualifikuar e në bazë ligjit prej tyre kanë kaluar vetëm dy burra.

“Kemi pas shumë dëshirë të jemi shumë femra, ka shumë femra të zonja që punojnë mbi 20 vjet. Statistika si bord 8% femra kanë qenë e tash 17% në pozita të mesme”, është shprehur Hysenaj.

Hysenaj tha se nganjëherë duke dashur të respektojmë një të drejtë, shkelet një e drejtë tjetër.

Deputetja e Vetëvendosjes, Arjeta Fejza tha se çka ishte pak shqetësuese për të ishte se gratë kanë hezituar të vijnë në komision si shkak i frikës së hakmarrjes.

Fejza tha se Bordi e ka për detyrë të hartojë politika përkrahëse për gratë, duke shtuar se ligjet e Kosovës e njohin përparësinë drejtë avancimit të gruas.

Ndërsa Hysenaj ka thënë se në Kosovë vet femrat fatkeqësisht në Kosovë nuk i votojnë femrat.

“Vet femrat fatkeqësisht në Kosovë nuk i votojnë femrat për me heq kuotën”, ka thënë Hysenaj.

Kjo është kundërshtuar nga deputetja Fejza e cila ka thënë se kjo nuk qëndron.

Hysenaj ka thënë se ai është i thirrur ta mbrojë ligjin.

“Unë jam thirrë me mbrojt ligjin, ashtu si ju në kuvend që i keni miratu. Unë vet jam jurist, dhe ju siguroj pa asnjë hezitim. E ftoj komisionin edhe deklarimet ti hetojë deri në fund. Jam i hapur me bashkëpunu, asnjë ankesë nuk e kam për ndonjë shkelje për frikësim e as nuk i kam ftu as me i vet për kurgjo peticionistët. Mundohemi në bazë të aftësive me i mbush pozitat me femra unë në AKP jam prej 2010-ës dinamikat i di mirë”, ka thënë Hysenaj.

Gjykata Themelore në Prishtinë ka liruar nga akuza ish-sekretarin e Ministrisë së Infrastrukturës dhe tre zyrtarë të tjerë të kësaj ministrie, që akuzoheshin për keqpërdorim detyre.

Ish-sekretari Betim Reçica, e zyrtarët Isa Berisha, Mirdit Emini e Leonora Limani akuzoheshin për përzgjedhje të operatorëve ekonomikë që nuk i kishin ofertat më të lira për tenderin e Autostradës së Gjilanit.

Reçica akuzohej se si ish-ushtrues i detyrës së drejtorit të Prokurimit ka ushtruar presion mbi anëtarët e komisionit vlerësues për ta bërë një raport brenda 10 ditësh në favor të kompanisë “Gjoka Konstruktion”, e më pas i kishte ndryshuar raportet e komisionit vlerësues duke e shpallur atë kompani fituese. Mbi të rëndonin edhe akuzat për shpëlarje parash, dhe dyshohej se me para me prejardhje kriminale, me qëllim të fshehjes së tyre, e ka blerë një veturë sportive “Audi” duke e lënë në emër të të vëllait.

Mbi Berishën, Eminin e Limanin rëndonin akuzat e keqpërdorimit të detyrës zyrtare, pasi dyshoheshin se nuk zgjodhën operatorët më të lirë.

Kosova nuk ka institucion të veçantë për paraburgimin e personave me çrregullime mendore. Institucioni më i ngarkuar është Qendra e Paraburgimit në Prishtinë, për shkak të afërsisë me Gjykatën Themelore në Prishtinë. Kështu thuhet në raportin për vitin 2023 të Qendrës Kosovare për Rehabilitimin e të Mbijetuarve të Torturës. Në bazë të monitorimit të kësaj organizate thuhet se gjatë vitit të kaluar ka pasur rritje të numrit të rasteve të lëndimeve e vetëlëndimeve.

Drejtoresha e Qendrës Kosovare për Rehabilitimin e të Mbijetuarve të Torturës (QKRMT), Feride Rushiti përmendi rastin e parë të kompensimit të dhunimit seksual në burgun e Dubravës në vitin 2014.

“Këtë vit kemi dëshmuar një rast historik të suksesit, ku gjykata për herë të parë e bën përgjegjës institucionet shtetëror për shkeljen e të drejtave të të burgosurve. E kam fjalën për një viktimë, fatkeqësisht të vitit 2014, i cili kishte përjetuar dhunë seksuale brenda burgut të Dubravës dhe që nga ai vit e kemi mbështetur dhe përfaqësuar në procese gjyqësore, por njëkohësisht rasti si i tillë natyrisht që ka qenë traumatizues dhe përveç që është përcjellur në procedura gjyqësore, i është nënshtruar rehabilitimit në organizatë dhe intervenimeve shëndetësore varësisht nga nevoja që i ka paraqitur rasti në fjalë. Në shtator të vitit 2023 Gjykata Themelore në Prishtinë kishte aprovuar pjesërisht kërkesë-padinë e viktimës dhe e detyron Ministrinë e Drejtësisë të jep kompensimin për dëme. Pas plotfuqishmërisë së këtij aktgjykimi Ministria e Drejtësisë e kompenson viktimën, ashtu siç është e paraparë me aktgjykim. Ky është rasti i parë i këtij lloji, ku Gjykata e bën përgjegjës institucionin shtetëror për shkeljen e të drejtave të të burgosurve”, deklaroi Rushiti.

Ky raport i monitorimit, Rushiti shtoi se shërben për gjenerimin e veprimeve konkreteve nga institucionet vendimmarrëse.

Në prezantimin e këtij raporti, Fatmire Haliti nga QKRMT, tha se kanë zhvilluar 19 vizita monitoruese.

“Ne si vend nuk kemi institucione të veçanta për paraburgimin e personave me çrregullime mendore, kështu që ata janë të shpërndarë në të gjitha qendrat e paraburgimit duke i vendosur në situata ndoshta sfiduese vet institucionet korrektuese për trajtimin e këtyre kategorive. Si institucion më i ngarkuar me persona me çrregullime mendore është Qendra e Paraburgimit në Prishtinë, për shkak të afërsisë që ka edhe me Gjykatën Themelore në Prishtinë, e cila është gjykata që e trajton më së shumti raste edhe po ashtu gjendet në afërsi të Institutit të Forenzikës së Kosovës…Në bazë të të dhënave zyrtare të Ministrisë së Shëndetësisë përveç monitorimit që e kemi marrë nga monitorimi i institucioneve korrektuese, shihet që numri i përdoruesve (të substancave narkotike) është në rritje. Përqindja nga 14 që ishte në vitet e kaluara tashmë ka kaluar 16 për qind ”, u shpreh ajo.

Rritje ka pasur edhe të numrit të lëndimeve dhe vetëlëndimeve të të burgosurve në qendrat korrektuese.

“Vërehet që ka tendencë në rritje të rasteve të lëndimeve dhe vetëlëndimeve. Nëse marrim në mënyrë periodike nga viti në vit, prej vitit 2022 në vitin 2023 ka pasur një rritje prej 40 rasteve më tepër, 341 raste janë evidentuar në rastin 2022 të lëndimeve, ndërsa në vitin 2023 kanë qenë 381 raste të lëndimeve. Për këto raste gjatë vizitave monitoruese kur i kemi pyetur të burgosurit na kanë raportuar për mënyra të ndryshme të lëndimeve të cilat ndodhin qoftë përmes konflikteve në mes të burgosurve apo gjatë lëndimeve aksidentale në punë apo shëtitore apo edhe gjatë sportit. E po ashtu ka pasur edhe raste të tilla që janë raportuar që kanë qenë nga përdorimi i forcës fizike prej stafit korrektues. Edhe numri i vetëlëndimeve ka shënuar një rritje, ku nga 125 vetëlëndime që kanë qenë të evidentuara zyrtarisht në vitin 2022, në vitin 2023, Departamenti Shëndetësor i Burgjeve raporton që numri ka qenë 189….Kemi pasur një vetëvrasje në vitin 2023”, shtoi Haliti teksa shtoi se numri i tentim vetëvrasjeve kanë qenë 24 raste.

Trajtimi i personave të privuar nga liria, zëvendësministri i Drejtësisë, Blerim Sallahu tha se është e rregulluar në përputhje me standardet ndërkombëtare të drejtësisë penale dhe të drejtave të njeriut. Ai tha se po punojnë për krijimin e kushteve ligjore që personat e burgosur të trajtohen me dinjitet.

“Kemi punuar në tri ligje bazë për menaxhimin e institucioneve korrektuese, përkatësisht në Ligjin për Ekzekutimin e Sanksioneve Penale, Ligjin për Shërbimin Korrektues dhe Ligjin për Shërbimin Sprovues. Këto ligje i kemi bërë të mundur që të dënuarve të ju njihen disa të drejta shtesë, përkatësisht të ju kthehen disa nga të drejtat që ju ishin hequr me ndryshimet ligjore të bëra nga qeveritë e kaluara…Kemi shtuar aktivitetet për luftimin dhe parandalimin e kontrabandës dhe për raste të kontrabandës kemi suspenduar zyrtarë korrektues dhe zyrtarë të tjerë të përfshirë. Kemi bashkëpunuar me organizata”, deklaroi ai.

Drejtori i Shërbimit Korrektues të Kosovës, Ismail Dibrani theksoi se ka rritje substanciale të buxhetit të Kosovës.

“Ka rritje substanciale të buxhetit nga ajo që nuk ka qenë as afër një milion euro buxheti, sot kemi buxhetin prej tetë milionë euro. Kemi kërkuar mbështetje në pajisje teknologjike më të avancuara, po ashtu edhe në pajisje të sigurisë të cilat do të na mundësonin avancimin tutje edhe përafrimin e standardeve ndërkombëtare….Si asnjëherë më parë vitin e kaluar kemi hapur konkurse, ku janë punësuar dhe janë në proces të punësimit afër 200 oficerë korrektues. Për herë të parë është hapur konkursi vetëm për gra ku janë punësuar 50 gra në institucionet tona korrektuese”, theksoi ai.

Në raportin e QKRMT-të për të drejtat e njeriut në institucionet korrektuese thuhet se të burgosurit e intervistuar u shprehën kryesisht të kënaqur me ushqimin që ju shërbehet. Po ashtu, theksohet se tri vaktet e ushqimit shërbehen nëpër salla të përbashkëta.

Molotovë, tym dhe flakë edhe në protestën e sotme para bashkisë së Tiranës të nga “Aleanca për Teatrin” e mbështetur dhe nga një pjesë e opozitës.

Në sheshin përpara Bashkisë së Tiranës u mblodhën dhjetëra protestues, teksa e pranishme është edhe Argita Malltezi, vajza e ish-Kryeministrit Sali Berisha.

Po ashtu, në shesh ishin dhe nënkryetari i këshillit bashkiak të Tiranës nga radhët e opozitës Dorian Teliti. Po ashtu, në protestë janë dhe përfaqësues të Partisë së Lirisë.

Kjo është protesta e gjashtë e thirrur pas arrestimit me urdhër të SPAK të disa ish-drejtorëve të kësaj bashkie. Protestuesit kërkojnë dorëheqjen e kryebashkiakut Erjon Veliaj, pas arrestimeve të disa ish-zyrtarëve të këtij institucioni.

Në drejtim të bashkisë protestuesit kanë hedhur molotovë, fishekzjarrë dhe tymuese.

Gjatë protestës, në fjalimin e tij, ish-kandidati për kryebashkiak të Tiranës Belind Këlliçi u shpreh se sot ka nënshkruar kallëzim të ri në SPAK ndaj Erion Veliajt.

“Jemi kundër kreut të bandës 5D dhe pronari faktik i inceneratorit. Do mbahet mend si i vetmi kryebashkiak që vuri policinë për të mbrojtur veten. I takon SPAK të ngrihet në lartësinë e detyrës e t’i përgjigjet një drejtësie pa regji”, tha Këlliçi.

“I bëj thirrje SPAK; sot keni damkën e madhe në kurriz, mbi shpatulla të burgosjes, pa asnjë fakt, pa asnjë provë të arrestit të liderit të opozitës”, tha Këlliçi.

Ndërsa Dorian Teliti, nënkryetar i Rithemelimit u shpreh se kjo protestë është pranë fitores së madhe.

“Jemi afër arritjes së objektivit tonë madhor, dorëheqjes përfundimtare të Erion Veliajt dhe më pas, dorëheqjes edhe të kryeministrit të Shqipërisë. Është rezistenca juaj që sot bëri të mundur që Edi Rama të bëjë disa hapa pas. Ai që para disa javëve i jepte mbështetjen e pakushtëzuar Erion Veliajt, sot u distancua nga ai”, tha Teliti.

Sekretari i Përgjithshëm i Partisë së Lirisë, Tedi Blushi iu drejtua protestuesve duke thënë se “ne nuk do ta lejojmë kurrë Erion Veliajn të bëjë gjumin e qetë, deri ditën që do të japë llogari një më një, për të gjitha krimet që i ka bërë qytetarëve të Tiranës, për të gjitha krimet që i ka bërë Tiranës dhe deri ditën kur ai t’ua kthejë ju dhe të gjithë qytetarëve të kryeqytetit edhe qindarkën më të fundit që ka vjedhur nga xhepat tuaj”.

Gjatë protestës, veç molotovit, protestuesit shtynë gardhin e sigurisë të vendosur nga Policia, duke u përpjekur të hyjnë në godinë çka ka sjellë edhe përplasje fizike me forcat e rendit. /atsh/

Vladimir Putin është betuar sot si president i Rusisë në një ceremoni luksoze në Kremlin, duke nisur një mandat të pestë rekord me më shumë pushtet se kurrë më parë.

Shefi 71-vjeçar i Kremlinit ka udhëhequr Rusinë që nga fillimi i shekullit, duke siguruar një mandat të ri gjashtë-vjeçar në mars, pasi fitoi zgjedhjet presidenciale pa çdo kundërshtim, përcjell klankosova.tv.

Zyrtarë qeveritarë dhe diplomatë të huaj në Moskë janë ftuar në ceremoni, përfshirë ambasadorin francez Pierre Levy, i cili pritet të marrë pjesë.

Vende të tjera evropiane, përfshirë Poloninë, Gjermaninë dhe Republikën Çeke, kanë sinjalizuar se nuk do të dërgojnë përfaqësues në mes të tensioneve të acaruara për konfliktin në Ukrainë.

Fitorja dërrmuese prej 87 për qind e Putinit në zgjedhjet presidenciale u provua nga shumica e vëzhguesve ndërkombëtarë dhe u hodh poshtë si e manipuluar nga opozita dhe grupet e të drejtave.

Është gjetur edhe trupi i 39-vjeçares Alma Arrazi, e cila u vetëhodh në lumin Bunë të Shkodrës bashkë me 3 fëmijët.

Trupi i djalit të vogël u gjet paraditen e sotme, ndërsa po ashtu është gjetur edhe trupi i dy vajzave, 9 dhe 8 vjeçe.

Tragjedia ndodhi më 2 maj, kur dyshohet se Alma Arrazi në kushte të rënduara psikologjike, u hodh bashkë me tre fëmijët e saj në lumin Buna.

Trupi i vajzës së madhe, E.Arrazi, 9 vjeç u gjet mbrëmjen e 4 majit nga një peshkatar në lumin Buna. Pasditen e së hënës, polumbarët gjetën trupin e dytë të vajzës së vogël 8 vjeçe jo shumë larg urës së Bunës.

Ndërsa ditën e sotme, 7 maj, u gjet trupi i Almës dhe djalit 3 vjeçar.

Erdgys Arrazi, bashkëshorti i Almës, është vënë në pranga dhe akuzohet se ka shtyrë gruan drejt vetëvrasjes.

Nga familja e Almës, motra e saj, u ka thënë hetuesve se Erdgys Arrazi ushtronte dhunë fizike e psikologjike ndaj 39-vjeçares e fëmijëve dhe vetëflijimi dyshohet se është pasojë e dhunës në familje.

Sipas dëshmive të tjera, shkaku shihet edhe tek tradhtia me një 18 vjeçare, për të cilën Alma kishte marrë dijeni. Madje pretendohet se Erdgysi e nxirrte live të dashurën e tij në celular, dhe ia tregonte vajzës 9-vjeçe.

Në një njoftim, prokuroria e Shkodrës ka treguar itinerarin e gruas dhe thotë se nga hetimet e deritanishme janë krijuar ‘dyshime të arsyeshme bazuar në prova se Erdgys Arrazi, si rrjedhojë e dhunës psikologjike të vazhdueshme ndaj bashkëshortes së tij, shfaqur në formën e ofendimeve të vazhdueshme dhe tradhtisë bashkëshortore, duke prekur rëndë dinjitetin e saj, ka shkaktuar vetëvrasjen e Alma Arrazit, e cila në gjendje të rënduar psikologjike dyshohet të jetë hedhur në lumë bashkë me tre fëmijët e mitur.

Gjykata e Shkodrës, vendosi sot masën e sigurisë “arrest me burg” ndaj Erdgys Arrazit.

Kryeministri i Republikës së Kosovës, Albin Kurti, të martën ka bërë homazhe pranë varrit të heroit, Bahri Fazliu, në 26-vjetorin e rënies së tij, raporton Ekonomia Online.

Nga aty, Kurti tha se Bahri Fazliu ra në një ballafaqim të rreptë me forcat serbe.

“Sot më 7 maj  janë mbushur 26 vjet nga rënia heroike e dëshmorit te kombit, Bahri Fazliut. Ai u vra në betejë, ballafaqim me forcat armike serbe në vendin i cili ndodhet në kufi të Kosovës, Shqipërisë dhe Malit të Zi, pra një vend domethënës i cili është në përputhje edhe me idealet e Bahri Fazliut”, u shpreh Kurti.