Blog

Në Dhomat e Specializuara të Kosovës (DhSK) në Hagë është marrë vendim për vazhdimin e paraburgimit për Pjetër Shalën.

Sipas zëdhënëses së DhSK-së Angela Griep, vendimi është marrë më 17 maj nga trupi gjykues i cili kishte konstatuar se vazhdon të ekzistojë rreziku se Shala mund të pengojë ecurinë e procedurave ose të kryej vepra të tjera penale, raporton “Betimi për Drejtësi”

“Më 17 maj, Trupi Gjykues urdhëroi vazhdimin e paraburgimit të Pjetër Shalës, duke konstatuar se vazhdon të ekzistojë rreziku se z. Shala mund të pengojë ecurinë e procedurave penale dhe të kryejë vepra penale të tjera. Trupi Gjykues vendosi gjithashtu se vetëm në objektin e paraburgimit të Dhomave të Specializuara mund të kryhet mbikëqyrja e efektshme e komunikimeve të të akuzuarit”, tha Griep.

Gjatë konferencës për informimin javor të DhSK-së, Griep tha se është konstatuar se ekziston rreziku që Shala mund të bëjë kërcënime andaj edhe masa e paraburgimit për atë vazhdon të jetë e arsyeshme.

“Trupi Gjykues rikujtoi se të gjithë dëshmitarët e thirrur nga Prokuroria kanë dhënë dëshmi dhe se janë paraqitur prova shtesë të cilat mund të jenë inkriminuese. Rrjedhimisht, Trupi Gjykues vendosi se ekzistonte rreziku se z. Shala mund t’i realizojë kërcënimet e bëra më parë, veçanërisht duke pasur parasysh atmosferën e përgjithshme të frikësimit të dëshmitarëve në Kosovë. Duke qenë se gjykimi po përparon pa vonesa të papërligjura, Trupi Gjykues konstatoi se koha që i akuzuari ka kaluar në paraburgim vazhdon të jetë e arsyeshme”, tha Griep.

Ndërsa, për rastin ndaj ish-krerëve të UÇK-së, Griep tha se janë miratuar redaktime të sugjeruara nga palët në procedurë për transkriptet e versioneve publike për katër dëshmitarë që kanë dhënë dëshmi vitin e kaluar.

“Në çështjen gjyqësore Thaçi dhe të tjerët, më 16 maj, Trupi Gjykues miratoi redaktimet e sugjeruara nga Prokuroria, Mbrojtësi i Viktimave dhe Zyra për Mbrojtjen dhe Mbështetjen e Dëshmitarëve për transkriptet e versioneve publike me më pak redaktimeve të katër dëshmitarëve të cilët dhanë dëshmi nga fundi i vitit të kaluar. Trupi Gjykues urdhëroi gjithashtu që disa pjesë shtesë të transkriptit të riklasifikohen si publike. Ky proces është pjesë e rishikimit periodikisht të transkripteve dhe parashtrimeve për të garantuar që proceset të jenë sa më publike”, tha Griep.

Ajo gjithashtu njoftoi edhe për ndryshimin që bëri Prokuroria sa i takon listës së dëshmitarëve.

“Pas një urdhri të lëshuar nga Trupi Gjykues më 21 shkurt, Prokuroria dorëzoi një “njoftim për ndryshim të dëshmitarëve” për ta thjeshtuar listën e dëshmitarëve të saj. Sipas parashtrimit, Prokuroria nuk synon më të mbështetet në dëshmitë e 10 dëshmitarëve dhe do të kërkojë leje për të parashtruar me shkrim dëshmitë e 13 dëshmitarëve, në vend se t’i thërrasë të japin dëshmi në sallë të gjyqit. Prokuroria konfirmoi se do të vazhdojë të rishikojë rregullisht listën e dëshmitarëve dhe bëri me dije se ata do të mund të japin një njoftim për ndryshime shtesë në tetor të këtij viti”, tha Griep.

Griep shtoi se me 22 maj, trupi gjykues ka pranuar në prova deklaratat e pesë dëshmitarëve e po ashtu edhe dy të tjerëve pjesërisht.

“Më 22 maj, Trupi Gjykues pranoi si prova pesë deklarata të dëshmitarëve dhe dy deklarata të dëshmitarëve, pjesërisht. Konkretisht, Trupi Gjykues konstatoi se prova materiale të caktuara që lidhen me dy deklarata nuk janë të përshtatshme për t’u pranuar si prova.”, tha ajo.

Griep njoftoi edhe për dëshmitarët që ka thirrur prokuroria e që kanë dëshmuar gjatë kësaj jave në këtë cështje gjyqësore duke shtuar se dy prej tyre ishin pjesëtarë të KFOR-it

“Në të njëjtën çështje gjyqësore, të martën më 21 maj, dëshmitari i 63-të i thirrur nga Prokuroria, z. Ditrih Klaus-Jensh (Dietrich Klaus-Jensch) dha dëshmi në gjyq publikisht. Sipas përmbledhjes së paraqitur nga Prokuroria, z. Klaus-Jensh shërbeu si oficer në KFOR-in gjerman në Prizren gjatë periudhës përkatëse. Më të njëjtën ditë, dëshmitari i 64-t, Johan Rudolf-Friç (Johan Rudolph Fritsch) filloi dhënien e dëshmisë, po ashtu në seancë publike. Dëshmitari ishte zëdhënës shtypi në KFOR-in gjerman në Prizren gjatë periudhës përkatëse”, tha ajo.

Në fund, Griep tha se dëshmitari i fundit është i mbrojtur dhe sipas përmbledhjes së lexuar nga prokurorja ky dëshmitar është i afërm i një viktime që pretendohet se është zhdukur dhe vrarë nga Drenoci.

“Pasi dëshmitari i 64-të përfundoi dje dhënien e dëshmisë, Prokuroria thirri një dëshmitar të mbrojtur. Sipas përmbledhjes që lexoi Prokuroria, dëshmitari është i afërm i një viktime të pretenduar të zhdukjes me forcë dhe vrasjes së paligjshme në Drenoc. Seanca e ardhshme në këtë çështje gjyqësore është caktuar për nesër, të premten, 24 maj, dhe fillon në orën 9:00 paradite”, tha ajo.

Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë. /BetimipërDrejtësi

Në 30 ditët e ardhshme, Qeveria e Republikës Serbe do të krijojë një marrëveshje që do t’i dërgohet entitetit tjetër të Bosnjës, Federatës së Bosnjës e Hercegovinës, për “ndarje paqësore”, njoftoi kryeministri i RS-së, Radovan Vishkoviq, pas mbledhjes së Qeverisë së Republikës Serbe në Srebrenicë të enjten, më 23 maj.

Seanca e Qeverisë u mbajt në prag të seancës së Asamblesë së Përgjithshme të Kombeve të Bashkuara (OKB), në rendin e ditës të së cilës është edhe rezoluta për gjenocidin në Srebrenicë.

“Kjo nuk është shkëputje, ndarja paqësore nuk është shkëputje. Ndarja paqësore është e drejtë e garantuar me Kushtetutë. Ne do të ofrojmë atë, nëse na konsideroni komb gjenocidal, që nuk jemi, atëherë nuk kemi pse të jetojmë së bashku”, tha Vishkoviq, pa dhënë detaje të tjera për hapat që do të ndërmarrin.

Presidenti i RS-së, Millorad Dodik, po ashtu mori pjesë në mbledhjen e ekzekutivit.

Rezoluta, e cila propozon që 11 korriku të shpallet Ditë Ndërkombëtare e Përkujtimit të Viktimave të Gjenocidit të Srebrenicës, si dhe dënon mohimin e gjenocidit dhe glorifikimin e kriminelëve të luftës, u sponsorizua nga tridhjetë vende.

Propozueset zyrtare të saj ishin Gjermania dhe Ruanda.

Mbështetje për të, deri më tash, shprehën të gjitha vendet e Ballkanit Perëndimor, përveç Serbisë dhe entitetit serb të Bosnje e Hercegovinës, Republika Serbe.

Zyrtarët e tyre, pavarësisht vendimeve të gjykatave ndërkombëtare, mohojnë se në Srebrenicë është kryer gjenocid kundër boshnjakëve dhe thonë se atje ka ndodhur një “krim i tmerrshëm”.

Në korrik të vitit 1995, forcat serbe të Bosnjës vranë mbi 8.000 burra dhe djem myslimanë në Srebrenicë.
Për gjenocidin e kryer u dënuan më shumë se 50 persona me rreth 700 vjet burg.

Në mesin e tyre janë edhe presidenti i kohës së luftës i Republikës Serbe, Radovan Karaxhiq, dhe komandanti i përgjithshëm i ushtrisë së atëhershme serbe, Ratko Mlladiq.

Të dy ata u dënuan me burgim të përjetshëm.

Serbia loboi në mënyrë aktive kundër miratimit të rezolutës për Srebrenicën dhe, një ditë para se të dilte në OKB, Asambleja e Republikës Sërpska miratoi një notë proteste drejtuar vendeve anëtare të Kombeve të Bashkuara, duke kërkuar tërheqjen e rezolutës.

Kjo, edhe përkundër faktit se në dokument nuk përmendet as Republika Serbe, e as Serbia.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007.

Gjykata konstatoi se Serbia nuk ishte përgjegjëse për aktin e as bashkëpunëtore, por deklaroi se ajo nuk bëri asgjë për ta parandaluar atë./rel

Departamenti për të Mitur në Gjykatën Themelore në Prishtinë, ka shpallur aktgjykim dënues ndaj dy të miturve lidhur me vrasjen e 18-vjeçarit në Podujevë. I mituri i parë u dënua me 10 vjet burgim, kurse i mituri i dytë u dënua me 9 vjet burgim.

Shpallja e aktgjykimit sikurse edhe i gjithë procesi gjyqësor ka qenë i mbyllur për publikun, për shkak se në rast janë të përfshirë të mitur, raporton “Betimi për Drejtësi“.

“Betimi për Drejtësi “ekskluzivisht kishte raportuar për dosjen e Prokurorisë ndaj dy të pandehurve për vrasjen e 18-vjeçarit në Podujevë.

Më 20 janar 2024, 18-vjeçari, L.F., kishte vdekur në Qendrën Klinike Universitare të Kosovës në Prishtinë. Prokuroria, rastin fillimisht e kishte iniciuar si “Vrasje në tentativë”, e më pas është ricilësuar në “Vrasje e rëndë”. Përleshja mes viktimës dhe dy të miturve kishte ndodhur më 15 janar.

Sipas Prokurorisë, dy të miturit e kishin goditur 18-vjeçarin me shkop, duke shkaktuar lëndime trupore, ku si pasojë e këtyre lëndimeve të marra, viktima ishte dërguar në QKUK.

Ndryshe, Prokuroria Themelore në Prishtinë më 25 mars 2024 kishte përpiluar propozimin për shqiptimin e dënimit me burgim për të mitur, ndaj dy të miturve për veprën penale “Vrasje rëndë” nga neni 173, par.1, pika.1.4 dhe 1.8 lidhur me nenin 31 të Kodit Penal.

Deputeti i LVV-së, Visar Korenica ka propozuar që të ndryshohet një amandament në projektligjin për shëndetin riprodhues dhe fertilizim të asistuar mjekësor.

Sipas propozimit të tij, “vetëm çiftet bashkëshortore kanë të drejtë me vendos për të pasur fëmijë, asessi individi ose gruaja e pamartuar duke u mohuar të drejtën fëmiut me pasë babë dhe nënë”.

Nëse ndodh e kundërta, Korenica tha se është e dëmshme për shoqërinë.

“Amandamenti 5 paragrafi 4 duhet të ndryshohet si në vijim. Çifti ka të drejtë të vendos lirisht por duke respektuar vullnetin e njëri-tjetrit nëse duan të kenë fëmijë. Për kohën pastaj, numrin e intervaleve të lindjeve dhe të informohen për mjetet e duhura për realizimin e tyre.

Po jap edhe arsyeshmërinë. Ligji i cili na ka ardhë në draft për votim thotë që i jep të drejtën individit për me vendos lirshëm e ne jemi kundër për me vendos kësaj që i është propozu. Është shumë e dëmshme për shoqërinë tonë nëse mendojmë me kalu.

Pra vetëm çiftet bashkëshortore kanë të drejtë me vendos për të pasë fëmijë, asesi individi ose gruaja e pamartuar duke ua mohuar të drejtën fëmiut me pasë babë dhe nënë. Kërkoj me mirëkuptim që ky amandament të përkrahet”, tha Korenica në Kuvend.

Ambasadori i Zyrës së BE-së në Prishtinë, Tomas Szunyog, ka deklaruar se çështja e anëtarësimit në Këshillin e Evropës nuk varet nga Bashkimi Evropian, por nga shtetet anëtarë të KiE-së, të cilat sipas tij, vendosin kushtet që Kosova të bëhet anëtare.

Szunyog nuk ka dashur të komentojë nëse asociacioni është kusht për hyrjen e Kosovës në organizatën evropiane.

“Nuk mund të flas për çështjen e Këshillit të Evropës. BE nuk është anëtare e saj. Varet nga shtetet anëtare, të cilat duhet të vendosin çfarë kushtesh të vendosin që të bëhet anëtare”, ka thënë Szunyog gjatë një vizite sot në Suharekë.

Mos përfshirja e Kosovës në agjendën e KiE vjen pas letrës së tre liderëve evropianë dërguar kryeministrit Albin Kurti përmes së cilës kërkohet asociacioni si kusht për anëtarësimin e vendit në Këshillin e Evropës.

Kancelari gjerman Olaf Scholz, kryeministrja italiane Giorgia Meloni dhe presidenti francez Emmanuel Macron thanë në letër se “ekziston një rrezik real që pa progres vendimtar të asociacionit, aplikimi i Kosovës në Këshillin e Evropës nuk do të merr mbështetjen e mjaftueshme nga shtetet anëtare”.

Publikimi i lajmeve të pakonfirmuara ka shkaktuar dëm të madh tek viktimat dhe në vet procesin e hetimeve. Kështu u tha në punëtorinë “Forcimi i transparencës në sistemin e drejtësisë në Kosovë”, ku po marrin pjesë rreth 30 zyrtarë për informim nga sistemi prokurorial e gjyqësor në Kosovë.

Kjo punëtori po organizohet nga Qendra për Inovacione dhe Zhvillim (CFID), ku pjesëmarrësit janë zyrtarët për informim nga Këshilli Prokurorial i Kosovës, të gjitha prokurorive themelore, si dhe Këshillit Gjyqësor të Kosovës dhe gjykatave në vend.

Në ditën e dytë të punëtorisë po vijohet me sesionet, ku po diskutohet për komunikimin me median dhe publikun në epokën digjitale.

Udhëheqësja e Zyrës për Informim në Gjykatën Supreme, Antigona Uka-Lutfiu theksoi nevojën për numër më të madh të stafit në fushën e komunikimit.

“Ne vazhdojmë të jemi nga një person në zyrat për informim që paraqet një sfidë te veçantë në mundësinë për të transmetuar sa më shumë informacion, për të informuar sa më shumë publikun për zhvillimet në gjyqësor, për aktgjykimet. Kështu që kjo është sfida kryesore aktuale. Përndryshe nga viti në vit transparenca po shkon duke u rritur. Numër shumë i madh i aktgjykimeve publikohen çdo ditë. Nëse nuk gaboj tani i kemi mbi 150 mijë aktgjykime të publikuara në uebfaqe”, deklaroi Uka-Lutfiu.

Ajo përmend edhe rastet e publikimit të lajmeve pa konfirmimin e zëdhënësve të gjykatave, për çka konsideron se është gabimi themelor.

“Kemi një numër të madh të portaleve që shkojnë më shumë me gazetarinë copy-paste edhe që nuk i njohin mirë ligjet dhe nuk e njohin dëmin që mund të shkaktojnë në publik apo në hetim të rasteve. Dhe në këtë aspekt mendoj që kishte qenë nevojë urgjente që të rregullohet kjo fushë sepse ka raste që janë dëmtuar hetimet, kur është shkaktuar dëm i madh tek viktimat. Ideja e plasimit të një lajmi pa konfirmimin prej personave kompetent, në këtë rast prej zëdhënësve të gjykatave, është gabimi themelor qe bëhet në transmetim të lajmit në publik”, shtoi ajo.

E përgjegjësi për komunikim publik në Këshillin Prokurorial të Kosovës, Bedri Gashi tha se ka sfida në realizimin e niveleve të komunikimit.

“Jemi avokatë të institucionit tonë, avokojmë për punët, veprimtaritë dhe detyrat që kemi kompetencë në detyrat që na përshkruan dhe njëkohësisht mundohemi vazhdimisht që ta rrisim nivelin e bashkëpunimit me mediat, shoqërinë civile dhe të tjerat, palët qe janë të interesuara të bashkëpunojnë me neve. Ne kryejmë një mision të dyfishtë si komunitet, për shkak se avokojmë edhe për mediat brenda institucionit, pra është një mision i dyfishtë. Për të cilin kemi diskutuar edhe sot në sesionet e ditës së sytë të punëtorisë. Me Ligjin e ri të Pagave por edhe me rregullore të brendshme të sistemit prokurorial mendojmë se duhet të arrihet shpërblimi karshi punës së tyre që bëjnë sepse mendoj që për tu krijuar një zyrtar për komunikim publik me përvojën e tij dhe me gjithë shtrirjen e tij në publik duhet të kalojë një periudhë kohore edhe nuk krijohen lehte shërbyesit e komunikimit publik, ata duhen ruajtur në sistem , theksoi ai.

Punëtoria e cila po mbahet në Durrës po vijon sesionet, ku do të diskutohet edhe për menaxhimin e komunikimit ndërinstitucional me publikun në situata krizash.

Kjo punëtori me temën “Forcimi i transparencës në sistemin e drejtësisë në Kosovë”, po mbahet nga Qendra për Inovacione dhe Zhvillim (CFID) në bashkëpunim me Institutin e Kosovës për Drejtësi (IKD). /kp

Për biznesmenin, Marco Salihun kanditatin e parë shqiptar nga Italia për deputet në Parlamentin Evropian, zgjerohet gjeografia e takimeve dhe e mbështetjes së shqiptarëve. Ai ka thënë se ‘Do lobojmë për votën e diasporës, celjen e konsullatave dhe kurseve të shqipes në gjithë territorin’.

“Jam Muharrem Salihu, në fletë votimin shënohem Marco, ashtu si më kanë shkruar në dokumentat e Serbisë ku jam lindur zyrtarisht, dhe për lehtësi, autoritetet zgjedhore kanë pranuar këtë zgjedhje”-i tha kandidati i vetëm shqiptar në listat e kandidatëve italianë për zgjedhjet europiane, mbi 100 të mbledhurve në mjediset e CNA, Parma, një shoqatë biznesi drejtuar nga ndërmarrësi dhe filantropi shqiptar Shpend Ndreu. Ky ishte vetëm takimi i tretë në Parma, i kandidatit shqiptar, me grupe interesi, individë të realizuar, në një komunitet si ai i rreth 6000 shqiptarëve të Parmës, ku kanë të drejtë votimi midis 2500 dhe 3000 vetëve.

Në prezantimin e tij, ai shpjegoi i pyetur nga të pranishmit sesi u gjend në Itali, pas diskriminimit në Republikën e Serbisë, studimeve elitare në Zvicër dhe përqëndrimit në Venecia, ku zotëron 12 restorante ,-një pjesë e administron vetë dhe një pjesë nëpërmjet të tjerëve; biznesit hotelier, atij në fushën e sigurisë dhe ekspozitave itinerante sportive- ku ka të punësuar afro 200 persona. Kandidati Marco (Salihu) parashtroi disa prej ideve të veta në biznes dhe politikë, duke vlerësuar rolin e Italisë si shtet mikpritës i afro një milionë shqiptarëve dhe që është i vlerësuar nga të gjithë në Ballkan, si emëruesi më i vogël i përbashkët i vendeve që kanë histori konflikti me njeri tjetrin. “Italia është pëlqyer nga ne dhe gjatë pushtimit, sepse ndikoi në zhvillim, megjithatë-tha ai, i cili shtoi se “Italia duhet të ndjekë shembullin e Gjermanisë për të formuar personelin e punësimit në territor. “ Kandidati shqiptar dha idenë e votimit unik në krejt Europën, dhe jo mbi bazën e shteteve, që krijon mundësinë e zgjedhjes së kandidatëve më të mirë dhe forcon epërsinë e kandidatëve shqiptarë në një territor të bashkuar elektoralisht. Kjo është një ide e tij në frymën e programit të Ema Boninos, politikane veterane, drejtuese e Listës “Shtetet e Bashkuara të Europës”.

Marco (Muharrem Salihu), tha para të pranishmëve se ishte dhuratë të gjendej para ndërmarrësve kryesisht shqiptarë, sepse “ne jemi njerëz që falë sakrificave kemi arritur shumë në jetë, dhe më vjen mirë që dhe ju në pak vite keni shkuar kaq larg”. Ai shpjegoi përbërjen e grupit të vet, duke shpjeguar posacërisht përbërësen e sigurisë në aeroporte ku bëjnë pjesë disa subjekte, si Bosch, Thales, Italsicurezza, Università di Verona, etj.

Ai premtoi se pasi të zgjidhet do të lobonte tek qeveria italiane që të amendonte Ligjin Bosi Fini, që i ndalon rinovimin e lejeve të qëndrimit atyre të huajve që mund të kenë bërë shkelje të vogla në territor, ndonëse të lindur në Itali. Po ashtu ai premtoi se sipas modelit tunizian, që ka frenuar trafikun klandestin në ujrat e veta, do të kërkonte që Italia ’’i ofronte kushte lehtësuese bizneseve shqiptare dhe atyre Italiane te vendosura ne Ballkan që shesin produktet e tyre në Itali dhe Evrope”. Shqipëria ka pozitë preferenciale ndaj qeverisë italiane, për shkak të vendimit për të strehuar disa qendra emigrantësh në Shëngjin, dhe kjo pozitë duhet shfrytëzuar për të kërkuar disa avantazhe. Marco (Salihu), premtoi se do të kërkonte tek kryeministri Rama dhe forcat politike të Shqipërisë të mundësonin votën e diasporës në zgjedhjet nacionale, dhe po ashtu të zgjeronin rrjetin e konsullatave, e të hapnin shkollat shqipe dhe qendrat e kulturës në gjithë territorin italian.

Një takim tjetër i rëndësishëm ishte me disa prej themeluesve të shoqatës Skanderbeg, por dhe të tjerëve, ndërmarrës të dëshmuar Italian me origjine Shqiptare, në zyrën e konsulencës së Erion Begajt që bashkë me të shoqen kishin themeluar dhe Shoqatën e kontabilistëve shqiptarë në Itali. Të pranishmit, Shpendi Spahiu, Sara Blliku, Elton Pashaj, Gasper Keka,Mirian Marku,Elsid Guraj, avokati i shquar Gentian Alimadhi,i angazhuar dhe në Kasacionin italian, premtuan mbështetje absolute për kandidatin e vetëm shqiptar në këto zgjedhje.

Zoti Marco (Salihu), vizitoi dhe monumentin e Skënderbeut, heroit tonë kombëtar, në një park publik të bukur në qendër të Parmës, së bashku me iniciatorët e tij. Takimet do të vazhdojnë.

Dy persona janë lënduar si pasojë e një aksident trafiku të ndodhur në rrugën Lipjan-Ferizaj, këtë të enjte.

Lajmin e konfirmoi për portalin Dukagjini, zëdhënësja e Policisë së Kosovës për rajonin e Prishtinës, Flora Ahmeti.

Sipas saj, në aksident janë përfshirë tri vetura.

“Sot rreth orës 10:00, në rrugën Lipjan -Ferizaj, ka ndodhur një aksident trafiku, ku janë përfshirë tri automjete. Si pasojë e aksidentit, janë lënduar dy persona. Me rastin po merret njësiti i trafikut”, tha Ahmeti.