Presidenti i Republikës së Shqipërisë, Bajram Begaj është pritur me nderime shtetërore në Prishtinë.
Presidentja e vendit, Vjosa Osmani doli për ta pritur Begajn para Presidencës, ku edhe u intonuan himnet shtetërore nga trupat e FSK-së.
Begaj në seancën solemne të Kuvendit të Kosovës, pritet t’i drejtohet deputetëve me një fjalim.
Orik Morina, një ndër futbollistët më premtues shqiptar në Francë, ishte i ftuar në emisionin STUDIO A në ATV.
Ai, në këtë emision bëri një rrëfim për udhëtimin e tij nga aktrimi në kohën kur ishte i vogël, largimin nga Kosova në moshën 16 vjeçare për të ndjekur pasionin e tij për futbollin në Francë.
Më poshtë është intervista e tij:
Rastet e kollës së mirë janë rritur ndjeshëm në Mbretërinë e Bashkuar me mjekët që paralajmërojnë se infeksioni është “jashtëzakonisht serioz” për foshnjat e vogla. Kolla e mirë si duket ka pasur përhapje të madhe edhe në SHBA.
Autoritetet shëndetësore amerikane thonë se numri i rasteve është tre herë më i madh se e njëjta periudhë vitin e kaluar, shkruan USA Today.
Në SHBA janë raportuar 4,864 raste deri më tani, në vitin 2024, një rritje nga 1,746 të raportuara deri këtë periudhë të njëjtë në vitin 2023.
Kolla e mirë është një infeksion ciklik që normalisht arrin kulmin çdo tre deri në pesë vjet – kështu që rritja aktuale nuk është e papritur.
Por çfarë duhet të dini për simptomat, vaksinën dhe trajtimin e saj?
Çfarë është kolla e mirë?
Kolla e mirë nganjëherë quhet “kolla 100-ditore” për shkak të asaj se sa kohë mund të marrë për t’u rikuperuar.
Infeksioni bakterial, i njohur gjithashtu si pertusis, prek mushkëritë dhe tubat e frymëmarrjes dhe shkakton periudha të kollitjes.
Është shumë ngjitëse dhe përhapet nga pikat e kollitjes dhe teshtitjes.
Cilat janë simptomat e kollës së mirë?
Simptomat e para janë të ngjashme me ato të ftohjes dhe mund të përfshijnë:
Rrjedhje e hundës;
Sy të kuq dhe të përlotur;
Dhimbje të fytit;
Temperaturë pak e ngritur.
Periudhat e kollitjes intensive fillojnë rreth një javë më vonë, sipas Shërbimit britanik Shëndetësor Kombëtar (NHS), shkruan Sky News.
Periudhat e kollitjes kryesisht janë më të zakonshme gjatë natës dhe mund të zgjasin disa minuta.
Midis kollitjes, ju ose fëmija mund të hasni probleme në frymëmarrje. Megjithatë, jo të gjithë e kanë këtë.
Kollitja mund të shkaktojë vështirësi në frymëmarrje dhe në veçanti foshnjat e vogla mund të bëhen blu ose gri.
“Kjo shpesh duket më keq se sa është dhe frymëmarrja e tyre duhet të fillojë përsëri shpejt”, sipas NHS-s.
Kollitja mund të sjellë gjithashtu një mukozë të trashë, e cila mund t’ju bëjë të vjellni.
Periudhat gjithashtu mund të bëjnë që fytyra të skuqet shumë, veçanërisht te të rriturit.
Sa serioze është kolla e mirë?
“Kolla e mirë mund të prekë njerëzit e të gjitha moshave, por për foshnjat shumë të vogla mund të jetë jashtëzakonisht serioze”, sipas Dr Gayatri Amirthalingam, konsulent epidemiolog në Agjencinë e Sigurisë Shëndetësore në Mbretërinë e Bashkuar (UKHSA).
Foshnjat nën 6 muajsh me kollë të mirë kanë një rrezik më të lartë të problemeve duke përfshirë dehidratimin, vështirësitë në frymëmarrje, pneumoni dhe konvulsione, sipas NHS.
Si trajtohet kolla e mirë?
Nëse kolla e mirë diagnostikohet brenda tre javësh, do të jepen antibiotikë për të ndihmuar në ndalimin e përhapjes së saj te të tjerët.
Nëse keni pasur kollë të mirë për më shumë se kaq, nuk jeni më ngjitës dhe nuk keni nevojë për antibiotikë, sipas NHS.
Është e rëndësishme të qëndroni jashtë shkollës, punës ose çerdhes deri 48 orë pas fillimit të antibiotikëve ose tre javë pas fillimit të simptomave nëse nuk keni marrë antibiotikë.
NHS këshillon që të pushoni dhe të merrni shumë lëngje për të trajtuar simptomat e kollës së mirë.
Paracetamoli dhe ibuprofeni mund të ndihmojnë – edhe pse nuk duhet t’u jepen në të njëjtën kohë moshave nën 16 vjeç – por ilaçet e kollës nuk ndihmojnë me këtë lloj kolle. /Telegrafi/
Kryeministri Albin Kurti ka pritur në takim klubin futbollistik Ballkani, derisa thekson se Qeveria është e hapur për ta.
Në një postim në Facebook, Kurti thotë se Suhareka pa dyshim është shndërruar në qytet të sportit, me sukseset e këtij klubi.
“Tre vjet rresht, tre herë kampion në Superligën e futbollit në Republikën e Kosovës, ndërkaq sivjet për herë të parë edhe fitues i Kupës së Kosovës. Ky sukses i jashtëzakonshëm shkon për klubin futbollistik KF Ballkani nga qyteti i Suharekës, që pa dyshim është shndërruar në qytet të sportit. Me gjithë këto suksese, me pjesëmarrje edhe në garat kualifikuese për Ligën e Kampionëve, me shumë lojtarë që nga ky klub tash janë pjesë e shumë ekipeve të njohura në Evropë e më gjerë, e ardhmja e kampionit aktual të futbollit në Kosovë është pa dyshim edhe me më shumë suksese”, tha shkruar Kurti.
Postimi i plotë:
Aleanca Kosovare e Bizneseve (AKB) ka shprehur shqetësimin se rreth 40 për qind e bizneseve, sidomos ato të voglat, nuk janë duke përdorur arkat fiskale 100 për qind, raporton Ekonomia Online.
Kryetari i AKB-së Agim Shahini, ka thënë për EO se ka pasur mungesë të kontrollit të vazhdueshëm të tregut sa i përket kësaj çështje dhe se mos përdorimi i arkës fiskale nga disa biznese bënë që të të këtë një konkurrencë jo të drejtë dhe jo fer me bizneset që përdorin arkat fiskale.
Shahini ka bërë thirrje që Administrata Tatimore e Kosovës dhe Inspektorët tatimor të jenë në vëzhgim të vazhdueshëm të kontrollit të përdorimit të arkave fiskale, në mënyrë që të ketë barazi në treg.
“Fiskalizimi në Kosovë është një proces shumë i rëndësishëm për luftën kundër informalitetit. Edhe pse ky proces është vazhdimisht në rrugëtimin e vetë ka trend i cili e ka penguar ose ka pasur mungesë të kontrollit të vazhdueshëm se fiskalizimi ose arkat fiskale në disa raste janë vetëm si dekor dhe nuk shfrytëzohen nga bizneset. Sipas një analize që ka bërë AKB-ja rreth 40 për qind të bizneseve, sidomos të bizneseve të vogla dhe ato shërbyese nuk i përdorin arkat 100 për qind. Kjo del që neve i bëjmë një konkurrencë jo të drejtët bizneseve që i përdorin arkat 100 për qind. Prandaj Administrata Tatimore e Kosovës dhe Inspektorët tatimor duhet që të jenë në vëzhgim të vazhdueshëm të kontrollit të përdorimit të arkave fiskale, qoftë për kafitërit qoftë edhe për shërbime të ndryshëm. Kjo do të ndikonte dukshëm në rritjen e buxhetit të vendit, në luftën kundër informalitetit dhe barazinë në treg. Ne kemi shumë biznese të cilat janë në kulture fiskale që i përdorin por kemi edhe të tjerë që nuk i përdorin. Prandaj ky proces duhet të jetë vazhdimisht në vëzhgim nga ATK në mënyrë që të kemi barazi në treg”, ka thënë ai.
Kryetari i AKB-së ka shtuar se nderë sektorët që nuk përdorin arkën fiskale janë gastronomia, sallonet e floktarisë, sektori i ndërtimtarisë si dhe sektori i hotelerisë.
“Ndër sektorët që ka dyshime dhe ka fakte të cilët informaliteti është në ekonomi është sektori i gastronomisë i përgjithshëm, po ashtu është ai i hotelerisë, po ashtu i shërbimeve të ndryshme, qoftë i frizerëve, po ashtu sektori i ndërtimtarisë ku është një sektor që ka dukshëm një evazione fiskal. Ne jemi partner në ATK dhe tentojmë që bashkërisht ti shkëmbejmë informatat e ndryshme për këtë fenomen negativ që nuk është vetëm në Kosovë është edhe në shumë vende të tjera por në Kosovë është edhe më i dukshëm”.
“Informaliteti është i shprehur jo vetëm në transaksione financiare është ne transaksione të ndryshme kontraktuale, në punësim, është informlaiteti në blerje, shitje me pakicë gjithmonë po flasim. Kjo e bënë Kosovën jo një vend të përshtatshëm për investitor. Numri i bizneseve që janë të regjistruara dhe numri i bizneseve të cila kanë arke fiskale është rreth 50 për qind më pak. Kjo nuk do të thotë se të gjithë operatorët ekonomik nuk kanë obligim të kenë arka fiskale, por flasin gjithmonë për shitje me pakice”, ka thënë ai.
Qendrat e Mjekësisë Familjare (QMF) në kryeqytet kanë mbetur pa punëtorë teknikë, pasi kontratat e tyre kanë skaduar në fillim të kësaj jave. Kësisoj, 120 punëtorët kanë mbetur pa punë, ndërsa përgjigje nuk kanë marrë nga Komuna, raporton EO.
Kryetari i Sindikatës së Punëtorëve të Sektorit Privat, Jusuf Azemi, ka thënë se shkak i skadimit të kontratës, Qendrat e Mjekësisë Familjarë në Prishtinë kanë mbetur pa punëtorë teknikë. Fajtor për këtë e bën Komunën e Prishtinës.
“Kompanisë, e cila ka kryer shërbime në raport me Komunën e Prishtinës, i ka skaduar kontrata pardje, dhe dje kanë ardhë dhe kanë thënë janë pa kontrata pune dhe se për momentin nuk janë punëtorë të QMF-ve përderisa nuk nënshkruhet kontratë e re me ndonjë kompani. Disa drejtor të QMF-ve kanë bërë presion te këta punëtorë qe t’i kryejnë këto shërbime, pavarësisht se s’kanë ofruar kompensim për punën që do bëjnë dhe ne si Sindikatë i kemi thirrur punëtorët dhe u kemi propozuar edhe është marrë vendim që përderisa të mos ketë kontrata të punës në raport me kompaninë nuk do kryejmë shërbime dhe sot të gjitha QMF-të janë pa shërbime teknike të punëtorëve”, ka thënë Azemi për EO.
Azemi deklaroi se punën e tyre po e bëjnë stafi mjekësor duke thënë se pasi të vazhdohet kontrata punëtorët teknikë do kthehen prapë në vendet e tyre të punës.
“Kam informacione se janë përvjel edhe vet motrat medicionale po e kryejnë këtë punë që nganjëherë po them që është mire, le të din se sa është e rëndë kjo punë për ne , për këta punëtorë nuk ekziston asnjë rrezik që do jenë jashtë procesit të punës sepse me kontratën e nënshkruar tek ajo që është 405 euro këta janë pjesë e asaj dhe ne tani nuk kryejmë shërbime sepse herëve tjera kemi shërbyer pa kantata dhe na nuk jemi kompensuar dhe tani kemi marr vendim që përderisa të mos nënshkruhet kontrata mes një pronari kompanie dhe Komunës së Prishtinës ne nuk kryejmë shërbime dhe nënkuptohet se si është gjendja e Mjekësisë Familjare pa prezencën tonë”, u shpreh ai.
I pyetur se a ka kontakt me komunën e Prishtinës lidhur me këtë rast, Azemi deklaroi se në këtë rast nuk do ketë ndërhyrje nga sindikata pasi është çështje mes komunës dhe drejtorisë së QKMF-së.
“Ne nuk jemi ata që duam ta shpejtojmë ose ngadalësojmë sepse nuk është problem i joni. Komuna e Prishtinës ka problem me operatorin që nuk e ka nënshkruar kontratën dhe ne nuk duam të ndërhyjnë sepse i kanë rregullat e veta dhe duhet ta bartin përgjegjëse. Sindikata i ka garantuar ata punëtorët që së paku do jenë punëtorë në Qendrën e Mjekësisë Familjare, nëse atyre iu konvenon që t’i kenë QFM-të në gjendjen çfarë mund të jenë, ata le të vazhdojnë ne kemi më lehtë, normal që këta punëtorë kanë shqetësime e veta sepse ata duan ta dinë për çfarë po dalin në punë por tani për tani jemi në cilësinë e spektatorit dhe ata le ta kryejnë punën e tyre dhe ne tonën”, u shpreh Azemi.
Ekonomia Online ka kontaktuar me drejtorin e Shëndetësisë në Komunës e Prishtinës, Izet Sadiku, por që i njëjti ka kërkuar që për këtë çështje të kontaktohet drejtori i Qendrës Kryesore të Mjekësisë Familjare në Prishtinë, Bujar Gashi. Ky i fundit, nuk iu është përgjigjur thirrjeve të redaksisë.
Statuja e ish-kryeministrit britanik, Tony Blair do të inaugurohet sot në Ferizaj.
Statuja e cila ka një vit që planifikohet është financuar nga banorët, biznese e diaspora. Eventi pritet të mbledhë emra të njohur për opinionin publik.
Fondacioni “Ne kujtojmë Tony Blair” është bartës dhe organizues i tërë projektit mbi ngritjen e shtatores së Tony Blair-it dhe organizimin e tubimit Inaugurues me 12 qershor 2024 në Sheshin “Tony Blair” në Ferizaj, duke filluar nga ora 14:00.
Më shumë se 13,000 shqiptarë te Kosovës u vranë në luftën e viteve 1998-99. Blair, i cili ishte kryeministër i Britanisë nga viti 1997 deri në vitin 2007, mbështeti bombardimet e NATO-s ndaj Serbisë për ta detyruar atë të tërhiqej nga Kosova.
Shtetet e Bashkuara do t’ia dërgojnë Ukrainës edhe një sistem tjetër kundërajror të llojit Patriot, thanë dy zyrtarë amerikanë të martën.
Uashingtoni i është përgjigjur lutjeve dëshpëruese të Kievit për ta ndihmuar me më shumë mbrojtje ajrore, pasi është duke u përballur me sulme të pareshtura ruse në rajonin e vet verilindor, Harkiv.
Zyrtarët thanë se presidenti amerikan, Joe Biden, e ka dhënë pëlqimin për këtë vendim.
Ky do të jetë kundërajrori i dytë Patriot që Shtetet e Bashkuara ia dhurojnë Ukrainës, edhe pse Pentagoni i ka dhënë kohë pas kohe Kievit një numër të pazbuluar raketash për këtë sistem kundërajror.
Aleatë të tjerë, përfshirë Gjermaninë, gjithashtu i kanë dhënë Ukrainës kundërajrorë dhe municione për ta.
Më 10 maj, forcat ruse e nisën një ofensivë të re në Harkiv – qytetin e dytë më të madh të Ukrainës, që ndodhet rreth 34 kilometra larg kufirit rus. Analistët e kanë përshkruar ofensivën si tentim për të krijuar “zonë neutrale”, përmes së cilës mbrohet territori i Rusisë.
Kah mesi i majit, komandanti i ushtrisë ukrainase, Oleksandr Syrskiy, tha se Rusia e ka zgjeruar ofensivën në një vijë prej 70 kilometrash, në përpjekje për të detyruar Ukrainën që t’i angazhojë edhe rezervistët, raporton REL.
Shprehja ‘asgjë nuk është siç duket’ ngrihet në një tjetër nivel kur shikon pamjet e kesaj fabrike të fytyrave dhe robotëve njerëzorë, që mund të zëvendësojnë këdo në skenën globale.
Koka silikoni, lëkurë e lirshme dhe gjymtyrë sipas kërkesave, shihen pranë robotëve të kësaj fabrike ripodhimi të figurave njerëzore në Kinë, teksa të gjitha fuqitë e mëdha perfeksionojnë aftësitë e tyre të maskimit dhe manipulimit të armikut apo masave.
Në pamjet e publikuara së fundmi nga Kina, një inxhinier shihet që qëndron pranë një kopjeje të përkryer ‘robot’ të vetes së tij, që imiton shprehjet e tij të fytyrës apo të emocioneve.
Ndërsa robotët femra shihet me fytyrën me makijazh, paruke ekstravagante dhe lëvizje elegante të gjymtyrëve, çka të bën të mendosh se gjithkush në skenën publike sot mund të imitohet nga makineritë, pa u kuptuar se cili është në të vërtetë.
Kompania përgjegjëse për projektin e frikshëm është grupi kinez Ex Robot, që ka hapur një muzeum të vetin prej vitit 2022, gjashtë vjet pas krijimit.
Një robot i porositur i kompletuar mund të arrijë deri në $200 000 dhe për pak më shumë se një muaj mund të ‘sillet në jetë’ në fabrikën në Dalian.
Rreth 30 robotë bionikë janë vënë në shfaqje në të gjitha orët, ku vizitorët mund të bashkëveprojnë me ta dhe të dëgjojnë histori mbi shpikjet e çuditshme që mund të përdoren për qëllime nga më të ndryshmet nga aa qe mund te paguajne.
Robotët mund të transformohen në persona të famshëm si Albert Einstein, Stephen Hawking, ose sipas çdo kërkese të klientit.
Prodhuesit thonë se humanoidët mund të stërviten të imitojnë aftësi të ndryshme, si të shërbimit personal apo të punës në industri.
Në vitin 2023, EX Robots njoftoi krijimin humanoidit të parë me lëkurë silikoni që simulonte atë njerëzore.
Në vendet perëndimore raportohen gjithashtu shumë impjante të ngjashme për prodhimin e klonëve.
Grupe amerikane si Tesla e OpenAI punojnë prej kohësh në robotët humanoidë për qëllime sigurie, por pa dhënë shumë detaje mbi arritjet dhe objektivat e tyre.
Tesla ka nxjerrë në shitje një humanoid $20,000 në shtator 2022, për të cilin tha se do të fillojë prodhimin në masë.
Nuk dihet se sa patenta për teknologji të tillë janë dhënë në SHBA por Kina ka lëshuar 1,699, dhe është e dyta pas Japonisë sipas rrjetit The Sun.
Mjetet sipas porosive vijnë dhe të pajisur me armatime të ndryshme, si qentë robotë me automatikë në kurriz, edhe pse të gjitha shtetet prodhuese thonë se kanë vetëm qëllime shëndetësore, bujqësie, logjistike dhe shërbimi personal. /Top Channel
Por meqënëse industria e luftës duket se komandon teatrin aktual të ngjarjeve, nuk ka dyshim që çdo avancim është gjithashtu në funksion të saj.
Kryeministri i Shqipërisë Edi Rama, ka shprehur falënderim e mirënjohje për simpatizantët e Partisë Socialiste në 33 vjetorin e lindjes së saj.
Ndër të tjera Rama ka uruar edhe popullin e Kosovës për përvjetorin e hyrjes së forcave të NATO-s krah për krah me luftëtarët e Ushtrisë Çlirimtare të Kosovës.
“Mirëmëngjes me një përqafim çdonjërit prej 93 mijë anëtarëve të Partisë Socialiste në këtë 33 vjetor të lindjes së saj, si edhe me një falënderim plot mirënjohje për simpatizantët e zgjedhësit që e kanë bërë partinë tonë forcën më të madhe të shqiptarisë, mishërim të Shqipërisë Europiane dhe sinonim të fjalës fitore, si edhe gjithashtu me një urim nga zemra të gjithë popullit të Kosovës për përvjetorin e hyrjes së forcave të NATO-s krah për krah me luftëtarët e Ushtrisë Çlirimtare të Kosovës”, ka shkruar Rama në rrjetin social Facebook.
25 vjet më parë në Kosovë u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara.