ATV

Blog

  • Misteri i zhdukjes së turistëve në ishujt grekë, çfarë dyshon policia

    Misteri i zhdukjes së turistëve në ishujt grekë, çfarë dyshon policia

    Operacionet e kërkimit për gjetjen e tre turistëve të zhdukur në dy ishuj grekë janë intensifikuar pasi policia njoftoi se dy pushues ishin gjetur të vdekur në ishuj të tjerë gjatë fundjavës.

    Ekipet e shpëtimit të mbështetur nga qen snifer, helikopterë dhe dronë kanë kërkuar në ishujt cikladikë të Sikinos dhe Amorgos për dy gra franceze dhe një burrë amerikan që u zhdukën javën e kaluar.

    Duke e përshkruar përpjekjen e kërkimit si “të pamëshirshme”, kryebashkiaku i Sikinos, Vassilis Marakis, tha se shërbimet e urgjencës e kishin kaluar të hënën duke u fokusuar në terrenin shkëmbor në të cilin dy alpinistet femra mund të kenë humbur.

    “Ne kemi qenë jashtë gjatë gjithë mëngjesit për të kërkuar,” tha Marakis. “Vullnetarët kanë mbërritur nga Santorini, zjarrfikësit, policia, një qen i trajnuar posaçërisht kanë kërkuar të gjithë, por terreni është shkëmbor dhe plot lugina. Përpjekja ka qenë e madhe, por zona ku ata u zhdukën është e vështirë dhe, për fat të keq, ne ende nuk i kemi gjetur”.

    Në harkun e nëntë ditëve, gjashtë pushues, përfshirë prezantuesin televiziv britanik dhe nutricionistin Michael Mosley, ose kanë gjetur vdekjen ose janë zhdukur në ishujt grekë.

    Mosley, 67 vjeç, mendohet se ka vdekur brenda disa orësh pasi doli për një shëtitje gjatë së cilës mori një kthesë të gabuar dhe përfundoi duke u ngjitur në një gadishull shkëmbor në Symi, një ishull tjetër i largët në Egje.

    Të shtunën, ekipet greke të kërkimit njoftuan se trupi i një holandezi 74-vjeçar, i zhdukur për gati një javë, ishte gjetur nga një dron i shërbimit zjarrfikës në një grykë në ishullin lindor të Egjeut, Samos, afër bregdetit turk. Ai gjithashtu kishte dalë në një shëtitje në mot të nxehtë.

    Disa orë më vonë, të dielën, policia njoftoi se një turist amerikan 70-vjeçar, i cili ishte zhdukur që nga e enjtja në ishullin Mathraki, në perëndim të Korfuzit, ishte gjetur i vdekur në një plazh të largët.

    Në Amorgos, ishulli më lindor në zinxhirin e Cyclades, kërkimi për një oficer policie në pension të Los Anxhelosit, Albert Calibet, vazhdoi për të gjashtën ditë të hënën, pa sukses.

    Ish-sherifi 59-vjeçar, një vizitor i rregullt në Amorgos, u zhduk pasi u nis i vetëm për një ecje katër-orëshe në një ditë kur temperaturat arritën në 40 gradë Celsius.

    Kryebashkiaku i Sikinos tha se dy turistët francezë, të moshës 73 dhe 64 vjeç, kishin nisur një shëtitje kur ishulli i Egjeut po përjetonte një periudhë të motit “jashtëzakonisht të nxehtë” të qershorit.

    “Ishte jashtëzakonisht nxehtë të premten, ditën kur ata u zhdukën,” tha ai. “Ne kishim dëgjuar për incidente të tilla që po ndodhnin në ishuj të tjerë dhe tani ka ndodhur këtu. Dje, ne kishim edhe një varkë të rojes bregdetare që patrullonte bregdetin e ishullit tonë. Nuk e fsheh që jam shumë i shqetësuar.”

  • Ministri i Brendshëm i Izraelit mbërrin në Qeveri

    Ministri i Brendshëm i Izraelit mbërrin në Qeveri

    Ministri i Punëve të Brendshme të Izraelit, Moshe Arbel, po qëndron për vizitë në Kosovë.

    Ai tashmë ka arritur në Qeveri, ku do të takohet me kryeministrin Albin Kurti, raporton ATV.

    Gjatë ditës së sotme, ambasada ka njoftuar se ambasadorja Tamar Ziv do të organizojë pritjen e Ministrit Arbel për ditën e Pavarësisë së Izraelit, ku pritet edhe nënshkrimi i marrëveshjes për heqjen e vizave për shtetasit kosovarë. /atvlive.tv

  • Ministria e Arsimit në LIBERO jep të gjitha informacionet për testin e maturës, ja çfarë duhet të dini

    Ministria e Arsimit në LIBERO jep të gjitha informacionet për testin e maturës, ja çfarë duhet të dini

    Ministria e Arsimit, Shkencës, Teknologjisë dhe Inovacionit (MASHTI), për herë të parë ka lansuar në platformën e-Kosova paraqitjen e provimit të maturës. Mbi 18 mijë maturantë do t’i nënshtrohen më 22 qershor testit të vlefshëm për ta siguruar të drejtën e aplikimit për studime universitare.

    Ndërkohë që rreth 3 mijë nxënës kanë mbetur jashtë testit të maturës, dhe në lidhje me këtë, Fatmir Elezi – Shef i Divizionit për Vlerësim në Ministrinë e Arsimit dha arsyet se pse ndodhi kjo!

    “…Një numër i nxënësve nuk ka interesim për të hyrë në maturë (sidomos nga shkollat profesionale)… Nxënës të rregullt (që e mbarojnë klasën e 12-të) i kemi diku  20 mijë e 500 maturantë, ka disa që kanë mbetë prej viteve të kaluara. Nëpërmjet platformës e-Kosova kanë hy për të paraqitur provimin diku 19 mijë e 149 nxënës dhe 18 mijë e 648 janë të verifikuar nga shkollat…”, deklaroi Elezi nga MASHTI.

    Gjithashtu, ai njoftoi se të gjithë nxënësit të cilët ende nuk kanë aplikuar (për shkak të vështirësive teknike), do të mund të aplikojnë.

    “…Do t’i shtijmë me metodën e vjetër dhe ju krijojmë llogari më vonë. Do të thotë, nxënësit nuk do të mbesin pa hyrë në maturë për shkak të platformës e-Kosova…”, theksoi Elezi.

    Po ashtu ai njoftoi të gjithë nxënësit se këtë vit ata nuk do të lejohen (as) të posedojnë telefonë e lëre më ta përdorin. Vlen të ceket se këtë vit, për ta penguar kopjimin në Testin e Maturës Shtetërore, maturantët do të shpërndahen nëpër objekte të shkollave të ndryshme.

    Për të marrë më shumë informacione rreth kësaj teme, mund ta ndiqni tërësisht emisionin “LIBERO”, në linkun e mëposhtëm:

     

  • Kosova sot ia dorëzon Serbisë mbetjet e tre trupave të vrarë gjatë luftës

    Kosova sot ia dorëzon Serbisë mbetjet e tre trupave të vrarë gjatë luftës

    Mbetjet e tre trupa të qytetarëve serbë të vrarë në luftën e fundit në Kosovë, pritet t’u dorëzohen autoriteteve të Serbisë, të martën, në pikën kufitare në Merdarë. Ata kanë qenë në mesin e 280 trupave të paidentifikuar në morgun e Prishtinës.

    Ditor Haliti, drejtor i Institutit të Mjekësisë Ligjore ka thënë për Radion Evropa e Lirë se mbetjet e trupave që do të dorëzohen sot, kanë qëndruar në Institut që nga paslufta, por ka qenë problem identifikimi i tyre.

    “Kanë qenë në Institut sepse nuk kanë mundur të identifikohen gjatë kësaj kohe për arsye se familjarët nuk kanë dhënë mostra të gjakut që të identifikohen. Vitin e kaluar janë dhënë mostrat e gjakut të familjarëve edhe janë dërguar mostra shtesë të ADN-së, të cilat na kanë dhënë rezultatet e tyre që janë të identifikuar”, ka thënë ai.

    Për pranimin e këtyre trupave kanë njoftuar edhe autoritet e Serbisë. Në një komunikatë të lëshuar nga Qeveria e Serbisë bëhet e ditur se sot në Merdarë, autoritetet e tyre do të pranojnë mbetjet e dy personave, ndërsa për personin e tretë, mbetjet do t’i pranojë familja e tij. Sipas Qeverisë së Serbisë, ata janë vrarë në Ferizaj, Prizren dhe Prishtinë në vitin 1999.

    Haliti ka thënë se në Institut janë ende shumë mbetje mortore të paidentifikuara.

    “I kemi 280 trupa (mbetje kockore) që nuk kanë përputhje me mostrat e gjakut, janë të dy komuniteteve, serbë dhe shqiptarë. Po punohet edhe në rrafshin e zhvarrimeve që janë bërë vitin e kaluar, por edhe rishikimin e mbetjeve mortore që janë”, ka thënë ai.

    Haliti, po ashtu, ka bërë të ditur se institucionet e Kosovës, Policia e Kosovës, misioni i EULEX-it e Komisioni qeveritar për të pagjeturit, janë duke i vazhduar kërkimet për mbetje mortore, por nuk ka dhënë detaje të tjera.

    Gjatë luftës së viteve 1998/’99 në Kosovë u vranë rreth 13.000 njerëz, 10.794 shqiptarë, 2.119 serbë, ndërsa të tjerët u përkasin etnive të tjera.

    Nga rreth 6.000 njerëzit e zhdukur me forcë atëkohë, të pagjetur sot mbeten edhe më shumë se 1.600 persona. Shumë prej të zhdukurve u gjetën ndër vite në varreza masive në Serbi.

    Sipas Komisionit qeveritar të Kosovës për persona të pagjetur, gjatë vitit 2023 u gërmua në 15 lokacione brenda territorit të Kosovës, që ndërlidhen me procesin e zbardhjes së fatit të personave të zhdukur, si dhe në një lokacion në Serbi.

    “Të zhvarrosura janë mbetjet mortore të njëzet individëve – viktima të luftës, edhe pse numri i personave të zhvarrosur dhe identiteti i tyre do të përcaktohen pasi të përfundojnë të gjitha ekzaminimet mjeko-ligjore dhe identifikimi përmes analizës së ADN-së”, thuhet në raportin e Komisionit qeveritar të Kosovës./REL/

  • Specialja i jep paralajmërimin e fundit Nasim Haradinajt

    Specialja i jep paralajmërimin e fundit Nasim Haradinajt

    Kryetarja e Dhomave të Specializuara të Kosovës në Hagë, Ekaterina Trendafilova, e ka paralajmëruar Nasim Haradinajn që t’iu përmbahet kushteve të përcaktuara mbi vendimin e dënimit, duke thënë se Haradinaj ka zhvilluar intervista në media “pa kërkuar paraprakisht leje”.

    Në komunikatën për media, Trendafilova tha se i ka dhënë paralajmërimin e fundit Haradinajt për këtë, duke shtuar se “çdo shkelje tjetër do të rezultojë në kthimin e tij të menjëhershëm në objektin e paraburgimit”.

    “Kryetarja shpjegoi se megjithëse Vendimi mund të revokohet ose modifikohet menjëherë mbi bazën e shkeljeve, ajo vendosi që zotit Haradinaj t’i jepte edhe një paralajmërim të fundit, dhe e bëri të qartë se çdo shkelje tjetër do të rezultojë në kthimin e tij të menjëhershëm në objektin e paraburgimit të DHSK-së për të vuajtur pjesën e mbetur të dënimit”, thuhet në komunikatë.

    Nasim Haradinaj ishte dënuar me 4 vjet e tre muaj burgim nga Gjykata Speciale në Hagë për frikësim gjatë procedurës penale dhe shkelje të fshehtësisë së procedurës.

    Ai ishte liruar me kusht në dhjetorin e 2023-s, pasi kishte vuajtur dy të tretën e dënimit të tij.

  • Publikohet kalendari i ndeshjeve të Premierligës për sezonin e ri

    Publikohet kalendari i ndeshjeve të Premierligës për sezonin e ri

    Numërimi zyrtar për sezonin 2024/25 të Premierligës është duke u zhvilluar pas publikimit të listës së ndeshjeve të sezonit të ri. Fundjava hapëse fillon të premten, më 16 gusht me Manchester United që pret Fulhamin në “Old Trafford”.

    Kampionët në fuqi, Manchester City, e nisin sezonin me ndeshjen kundër Chelseat të dielën, më 18 gusht, teksa nisin rrugëtimin për titullin e pestë radhazi, transmeton KosovaPress. Nënkampionët e sezonit të kaluar Arsenali hapin fushatën e tyre në “Emirates Stadium” kundër Ëolves .

    Sezoni 2024/25 do të përbëhet nga 33 xhiro, katër raunde të mesjavës, ndërsa pushimi i mes-sezonit është hequr. Xhiro e fundit është më 25 maj me të 20 skuadrat që luajnë njëkohësisht, siç është bërë traditë.

    Këto janë ndeshjet e xhiros së parë:

    Hapja e lojërave të fundjavës

    E premte, 16 gusht

    Manchester United vs Fulham

    E shtunë, 17 gusht

    Ipswich Town vs Liverpool

    Arsenal vs Wolves

    Everton vs Brighton

    Newcastle United vs Southampton

    Nottingham Forest vs Bournemouth

    West Ham United vs Aston Villa

    E diel, 18 gusht

    Brentford vs Crystal Palace

    Chelsea vs Manchester City

    E hënë, 19 gusht

    Leicester City vs Tottenham Hotspur

  • Izraeli ia heq vizat Kosovës

    Izraeli ia heq vizat Kosovës

    Këtë të martë do të nënshkruhet marrëveshja për heqjen e vizave nga Izraeli për shtetasit e Kosovës.

    Lajmi është bërë i ditur nga ambasada izraelite në Prishtinë, e ku thuhet se prezentë do jetë edhe ambasadorja Tamar Ziv.

    “Kemi kënaqësinë t’ju ftojmë në pritjen e nesërme të organizuar nga Shkëlqesia e Saj znj. Tamar Ziv, Ambasadore e Shtetit të Izraelit në Republikën e Kosovës, me ç’rast do ta shënojmë Ditën e Pavarësisë së Izraelit dhe Marrëveshjen për Heqjen e Vizave për shtetasit kosovarë”, thuhet në njoftim.

    Më 29 janar të këtij viti, presidentja e Kosovës, Vjosa Osmani, pati njoftuar se Izraeli është pajtuar t’i heqë vizat për shtetasit e Kosovës.

    Ky vendim i Izraelit i cili është vendi i fundit që e njohu pavarësinë e Kosovës para rreth tri vjetëve, thuhej se do të hynte në fuqi pas nënshkrimit të marrëveshjes.

    “Në këtë drejtim, të dy ministritë përkatëse do të vazhdojnë me procedurat e nënshkrimit të marrëveshjes dhe qytetarët do të njoftohen sapo vendimi të hyjë në fuqi. Përmes kësaj marrëveshje, qytetarëve të Kosovës do t’u mundësohet udhëtimi pa viza në Izrael për qëllime turistike”, thuhej në komunikatën e presidencës.

    Ndryshe, prej 1 janarit, shtetasit e Kosovës me pasaporta biometrike janë në gjendje të udhëtojnë lirshëm në shtetet e zonës Schengen, pas hyrjes në fuqi të vendimit për liberalizimin e vizave.

    Që nga 5 janari, kosovarëve iu mundësua ta vizitojnë edhe Spanjën pa viza.

    Liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.

    Udhëtimet pa viza shërbejnë për vizita turistike, çështje familjare ose të ngjashme.

    Megjithatë, liberalizimi i vizave nuk nënkupton leje pune apo përfitime të tjera.

  • U rrahën mes vete në një kafene në Lipjan, arrestohen gjashtë persona

    U rrahën mes vete në një kafene në Lipjan, arrestohen gjashtë persona

    Policia e Kosovës ka arrestuar gjashtë persona në Lipjan, meqë dyshohet se derisa ishin në një kafene, ishin përfshirë në një rrahje ndërmjet vete.

    Pesë nga ta, kanë pranuar edhe tretman mjekësor.

    “LËNDIM I LEHTË TRUPOR /SULM – Lipjan / 17.06.2024 – 21:15. Janë arrestuar gjashtë meshkuj kosovarë për arsye se të njëjtit gjersa ishin duke qëndruar në një kafiteri, ishin përfshirë në një rrahje ndërmjet vete. Pesë nga personat e përfshirë në incident për shkak të lëndimeve të pësuara kanë pranuar trajtim mjekësor. Me vendim të prokurorit gjashtë të dyshuarit janë dërguar në mbajtje”, thuhet në raport.

  • “Fare Cinema”: Filmat rekord mbërrijnë në Kosovë 18 -20 qershor

    “Fare Cinema”: Filmat rekord mbërrijnë në Kosovë 18 -20 qershor

    Kthehet në Kosovë “Fare Cinema”, përmbledhja e Ministrisë së Punëve të Jashtme dhe Bashkëpunimit Ndërkombëtar të Italisë që promovon kinemanë dhe industrinë e filmit italian në botë. Takimi fillon prej datës 18 deri më 20 qershor në kinemanë “Kino Armata” Prishtinë dhe më 19 qershor në shkollën “Nena Kabrini” në Prizren. Shfaqja është planifikuar të shfaqet dy herë (më 18 në Prishtinë si premierë kombëtare dhe më 19 në Prizren) për filmin që theu rekorde “C’è ancora domani” nga Paola Cortellesi, “La Chimera” nga Alice Rohrwacher (19 qershor) dhe “Rapito” nga Marco Bellocchio (20 qershor). Filmat do të shfaqen në gjuhën origjinale (italisht) me titra anglisht, ndërsa për filmin “C’è ancora domani” do të ketë edhe titra shqip.

    “Jemi jashtëzakonisht të lumtur që po rikthejmë në Kosovë festivalin ‘Fare cinema’ me filmat italianë më të vlerësuar me çmime të shumëfishta vitin e kaluar. Kjo ngjarje do të ofrojë mundësinë për t’u zhytur në historitë, personazhet dhe vizionin artistik të disa prej regjisorëve dhe aktorëve italianë më të dashur ndërkombëtarisht. Përmes kësaj nisme synojmë gjithashtu të forcojmë lidhjet kulturore në mes Italisë dhe Kosovës, duke inkurajuar një shkëmbim idesh dhe perspektivash që do të pasurojnë të dy komunitetet”, shprehen ambasadori italian në Prishtinë Antonello De Riu dhe Drejtori i Institutit Italian të Kulturës së Tiranës (përgjegjës edhe për Kosovën) Alessandro Ruggera.

    “Me filmin ‘C’è ancora domani’ në mënyrë të veçantë, ne kompletojmë festimet për festën kombëtare. Filmi, në fakt, zhvillohet në vitin 1946, vit në të cilin u mbajtën zgjedhjet e lira në Itali pas përfundimit të luftës dhe njëzet viteve të fashizmit; me këtë rast për herë të parë mundën të votojnë dhe të zgjedhen edhe gratë. Lufta për të drejtat e grave është tema të cilës do t’i kushtojmë një debat të veçantë pas përfundimit të filmit. Filmi i dytë ‘Kimera’, është sa ëndërrimtar aq edhe shpirtëror, historik dhe dokumentar, me një vështrim të rrallë që na bën të kuptojmë se sa shumë ndikojnë në të tashmen tonë, në përgjithësi, dëshmitë e të kaluarës dhe arti. Së fundi, ‘Rapito’ i referohet një ngjarjeje të vërtetë, pak të njohur, e cila ka ndodhur në vigjilje të shpalljes së Shtetit Italian në 1861, e cila na fton të reflektojmë mbi respektimin e autonomisë individuale dhe mbi pasojat që lidhen me indoktrinimin e detyruar dhe mohimin e identitetit”, shtojnë De Riu dhe Ruggera.

    “Fare Cinema” është përmbledhje tematike kushtuar promovimit të kinemasë dhe industrisë italiane të filmit, organizuar në bashkëpunim me Ministrinë e Kulturës, ANICA, ICE, Istituto Luce – Cinecittà, Komisionet Italiane të Filmit dhe Akademinë e Kinemasë Italiane – Çmimi David di Donatello. Lansuar në vitin 2018, parasheh organizimin e ngjarjeve nga rrjeti diplomatik-konsullor dhe institutet italiane të kulturës jashtë vendit me qëllim të dyfishtë, promovimin e kinemasë si dhe profesionistëve italianë në këtë sektor.

    Pjesët

    Filmi bardh e zi “C’è ancora domani” (2023) na tregon ngjarjet e një familjeje në Romë në vitin 1946; lufta sapo ka përfunduar dhe qyteti është ende i pushtuar nga ushtarët amerikanë. Protagonistja Delia, grua dhe nënë, sakrifikon veten çdo ditë duke u përpjekur t’i bëjë të gjithë të lumtur, ani pse duket se askush nuk i sheh dhe vlerëson përpjekjet e saj. Ajo detyrohet të bëjë paralelisht jetë të shumëfisht: kujdeset për shtëpinë dhe fëmijët, kryen njëqind punë të ndryshme për të plotësuar të ardhurat e familjes, kujdeset për vjehrrin e saj invalid e tiran dhe ështe viktim e dhunës së vazhdueshme nga bashkëshorti i saj Ivano. Martesa e vajzës së saj, i ndryshon këndvështrimin mbi një rruge pashmangëshmërisht të paracaktuar të jetës së gruas: Delia nuk është në gjendje ta pranojë këtë fat për vajzën e saj, dhe ndoshta as për veten e vet. “Kimera” (2023) zhvillohet në vitet 1980 në Tuscia. Një grup grabitësish te varrezave fitojnë jetesën duke vjedhur gjetjet Etruske. Mes tyre është edhe Arturi, një arkeolog i ri anglez, i cili ka dhuntinë të gjejë ku ndodhen varret e lashta. Arturi miqësohet me Italinë, një nënë beqare braziliane që ndjek zërin e saj të brendshëm dhe rebelohet kundër përdhosjes sistematike të vendeve të shenjta. Secili nga personazhet ndjek kimerën e vet. Filmi shpaloset mes skenave thuajse dokumentare të jetës së fshatit, realitetit historik të trafikimit të paligjshëm të gjetjeve arkeologjike, jetës së një familjeje të lartë borgjeze, thirrjeve të botës së përtejme si dhe përpjekjes për të krijuar një jetë ndryshe në një komunë grash dhe fëmijësh, pothuajse duke ripropozuar vlerat e shoqërisë misterioze etruske, artefaktet e së cilës risjellin buzëqeshjet e ndritshme të grave të rafinuara dhe autonome. “Rapito” (2023) është frymëzuar nga një histori e vërtetë. Jemi në 1858 në Bolonjë, ushtarët e Papës hyjnë në shtëpinë e familjes hebreje Mortara për të marrë me forcë djalin e tyre shtatëvjeçar Edgardon. Si foshnje ai ishte pagëzuar fshehurazi nga shërbëtorja dhe ligji kanunor është i pakthyeshëm: ai do të duhet të jetojë në Romë për të marrë një arsimim katolik. Familja e tij do të bëjë gjithçka për të rikthyer djalin e tyre, madje duke lëvizur edhe politikën ndërkombëtare, por Papa nuk do të pranojë ta kthejë fëmijën. Në sfond janë ngjarjet historike të kohës: fuqia kohore e Kishës Katolike ecën drejt rënies dhe trupat e Savojës do të pushtojnë Romën, e cila do të bëhet kryeqyteti i Italisë.

    Kalendari i shfaqjeve

    E martë 18 qershor, ora 18, Kino Armata, Prishtinë

    “C’è ancora domani” nga Paola Cortellesi (2023), italisht me titra në anglisht dhe shqip (në shqip përkthyer me dashamirësi nga “Centro Dante” në Prishtinë). Vijon një debat i moderuar nga Fjolla Muçaj (Qendra për Informim dhe Përmirësim Social) me Bjeshkë Guri (Nisma e të Rinjve për të Drejtat e Njeriut – Kosovë) dhe Adelina Berisha (Rrjeti i Grave të Kosovës) dhe ne fund një koktej rasti.

    E mërkurë 19 qershor, ora 19, Kino Armata, Prishtinë

    “La chimera” nga Alice Rohrwacher (2023), italisht me titra anglisht.

    E mërkurë 19 qershor, ora 20, Shkolla Nena Kabrini, Prizren

    “C’è ancora domani” nga Paola Cortellesi (2023), italisht me titra anglisht dhe shqip.

    E enjte 20 qershor, ora 19, Kino Armata, Prishtinë

    “Rapito” nga Marco Bellocchio (2023), italisht me titra anglisht.

  • Sulmoi policët gjatë shqiptimit të një gjobe, arrestohet

    Sulmoi policët gjatë shqiptimit të një gjobe, arrestohet

    Një person është arrestuar në Prishtinë pasi që i njëjti kishte penguar zyrtarët policorë derisa po i shqiptonin një gjobë për kundërvajtje në trafik.

    Sipas raportit policor, me vendim të prokurorit pas inicimit të rastit i dyshuari është dërguar në mbajtje.

    “Është arrestuar i dyshuari mashkull kosovar për shkak se i njëjti kishte penguar zyrtarët policor derisa po i shqiptonin një gjobë për një kundërvajtje në trafik. Me vendim të prokurorit pas inicimit të rastit i dyshuari është dërguar në mbajtje.”