Blog

Ambasada e ShBA-së në Kosovë sonte organizon pritjen për 248 vjetorin e pavarësisë.

Ambasadori amerikan, Jeff Hovenier ka thënë se bashkë me kantautoren Alma Bektashi do ta këndojnë himnin e ShBA-së.

Ai ka ndarë pamje, ku ka thënë se Bektashi u pajtua që të këndojë bashkë me të.

“Jam shumë i kënaqur që Alma Bektashi u pajtua që ta këndojë himnin kombëtar të ShBA-së me mua, në pritjen tonë për Ditën e Pavarësisë. Mezi pres të festojmë 248 vite të pavarësisë tonë sonte”, ka shkruar ambasadori amerikan.

I’m so pleased that Alma Bektashi agreed to sing the U.S. National Anthem with me at our Independence Day reception. Looking forward to celebrating 248 years of our independence tonight! #USAInKosovo pic.twitter.com/WXDOYg6YvN

— Ambassador Jeff Hovenier (@USAmbKosovo) July 2, 2024

Kryeministri Albin Kurti ka uruar kryeministrin e ri të Holandës, Dick Schoof, për postin e ri.

Ai erdhi në krye të qeverisë holandeze pasi Mark Rutte lëshoi këtë post për t’u bërë Sekretar i Përgjithshëm i NATO-s.

Kurti tha se mezi pret që të vazhdojë bashkëpunimin me të dhe të zgjerojë raportet mes dy vendeve.

“Urime për Dick Schoof në emërimin e tij si kryeministër i Holandës. Mezi pres që të vazhdojmë bashkëpunimin në zgjerimin e raporteve Kosovë-Holandë dhe promovimin e përbashkët të paqes, sigurisë, zhvillimit dhe demokracisë në Ballkanin Perëndimor”.

Komisioni Qendror i Zgjedhjeve njofton se janë publikuar në ueb faqe raportet vjetore financiare të vitit 2023 pas përfundimit të procesit të auditimit nga auditorë të cilët janë përzgjedhur nëpërmjet një konkursi të hapur publik nga Zyra për Regjistrim, Certifikim dhe Kontrollin Financiar të Subjekteve Politike (ZRCKFSP).

Raportet e audituara financiare të vitit 2023, të cilat u takojnë partive politike, janë publikuar në ueb faqen e KQZ-së:

Shërbimet e KQZ-së > Shërbimet për Subjekte Politike > Raportet Vjetore Financiare, ose në
vegzën direkte: https://kqz-ks.org/sherbime-per-subjektet-politike/raportet-vjetore- financiare-te-audituara.

Fondi i Sigurimeve Shëndetësore e ka ndihmuar deputeten Ganimete Musliu me 30 mijë Euro për trajtim në Gjermani.

Fondi i Sigurimeve Shëndetësore e ka ndihmuar deputeten Ganimete Musliu me 30 mijë Euro për trajtim jashtë vendit për shkak të një problemi shëndetësor.

Në vendimin e Bordit për trajtim mjekësor jashtë institucioneve shëndetësore publike më datë 21 dhjetor të vitit të kaluar, thuhet se Musliu kishte aplikuar përmes procedurës së rregullt më datën 3 prill. Aplikimi sipas këtij dokumenti u bë me arsye se trajtimi i nevojshëm nuk mund të ofrohej në Qendrën Klinike Universitare të Kosovës.

Gazeta i ka dërguar pyetje deputetes Musliu pse nuk i është dhënë mundësia për trajtim në QKUK por ajo nuk ka kthyer përgjigje edhe pas më shumë se një jave. Përgjigje nuk i kanë kthyer gazetës as nga menaxhmenti i SHSKUK-së/QKUK-së.

Pasi e mori vendimin nga FSSH, deputetja Musliu pati udhëtuar për në Gjermani më 18 shkurt të këtij viti për trajtim në një spital.

Gazeta Shneta posedon vendimin e plotë ku bëhet e ditur edhe diagnoza e cila me të njëjtin emër nuk gjendet në listën e diagnozave në Udhëzimin Administrativ 03/2023 për trajtim jashtë institucioneve publike.

Ministria e Shëndetësisë dhe Fondi i Sigurimeve Shëndetësore nuk i kanë dhënë sqarime gazetës për këtë rast.

Kryetari i Partisë Demokratike të Kosovës, Memli Krasniqi, në 34-vjetorin e Miratimit të Deklaratës Kushtetuese për Kosovën më 2 korrik 1990, tha se kjo datë është një ndër vendimet më të rëndësishme politike e historike të shprehjes së vullnetit të popullit tonë për çlirim dhe pavarësi, përmes një akti politiko-juridik.

“Kjo deklaratë, që mishëron parimet e barazisë, lirisë dhe demokracisë, i parapriu hartimit dhe miratimit të Kushtetutës së Kaçanikut, si dhe proceseve tjera në përpjekjet e gjata të shtet-formimit dhe shtet-ndërtimit të Kosovës”.

“Mirënjohje për të gjithë delegatët, të cilët përmes kësaj deklarate demonstruan guxim dhe maturi politike duke e shpallur Kosovën njësi të pavarur dhe të barabartë me të gjitha Republikat tjera të ish-Jugosllavisë, ndonëse ndërtesa e Kuvendit ku ata ishin mbledhur, ishte e rrethuar nga policia serbe”, shkroi Krasniqi në postimin e tij në Facebook.

Gjatë vizitës së tij të parë në Ukrainën fqinje që nga pushtimi i plotë i Rusisë, kryeministri hungarez Viktor Orban i tha presidentit Volodymyr Zelensky të martën se lufta në vazhdim ishte “çështja më e rëndësishme për Evropën”.

I njohur si aleati më i afërt i presidentit rus Vladimir Putin në Bashkimin Evropian , vizita e Orbanit ishte një gjest i rrallë në një marrëdhënie të trazuar midis dy vendeve pasi Budapesti ka thyer vazhdimisht rangjet me pjesën tjetër të Bashkimit Evropian dhe ka anuar drejt Moskës, shkruan AP.

Kryeministri hungarez ka bllokuar, vonuar ose zbutur në mënyrë rutinore përpjekjet e BE-së për të zgjeruar ndihmën ndaj Ukrainës dhe për të sanksionuar Moskën për luftën e saj, duke irrituar si Zelenskyy-n ashtu edhe liderët e tjerë të BE-së.

Në vitin 2023, janë regjistruar 18 mijë e 493 kurorëzime (brenda dhe jashtë Kosovës). Prej këtyre kurorëzimeve të regjistruara, 16 mijë e 978 kurorëzime kanë ndodhur brenda territorit të Kosovës, kurse kurorëzime të cilat kanë ndodhur jashtë Kosovës janë regjistruar gjithsej 1 mijë e 515.

“Krahasuar me vitin paraprak (2022) që ishin 17 863, në vitin 2023 janë kurorëzuar 16 978 apo (4.95 %) persona më pak”, thuhet në njoftimin e Agjencisë së Statistikave të Kosovës.

Kurse sipas raportit, jashtë Kosovës janë regjistruar 1 515 Kurorëzime. Krahasuar me vitin 2022 (1627 Kurorëzime), në vitin 2023 janë Kurorëzuar 1 515 apo (6.9 %) më pak qifte.

Nga të dhënat statistikore, shihet se Kurorëzime (brenda Kosovës), janë regjistruar më pak në vitin 2023 krahasuar me vitin 2022, gjithashtu (jashtë Kosovës) kemi numër me te vogël të qifteve të kurorëzuar në vitin 2023 krahasuar me vitin 2022.

Sipas komunës ku ka ndodhur ngjarja, në Prishtina janë regjistruar më së shumti kurorëzime 1 mijë e 727 apo 9,3%, në Prizren me 1 mijë e 597 apo 8,6% , në Ferizaj 1 mijë e 102 apo 6.0%, etj.

Personat e kurorëzuar sipas grup-moshës në vitin 2023, më së shumti raste ka te meshkujt e grupmoshes 25-29 ne vendin e dyt grupmoshat 30-34 dhe ne vendin e tretë grupmoshat 20-24,ndërsa tek femrat më së shumti raste të kurorëzimeve ka grup-mosha 20-24, vendin e dytë grup-mosha 25-29 si dhe vendin e tretë grup-mosha 30-34.

Mosha mesatare e personave të kurorëzuar, të regjistruar gjatë vitit 2023 ishte 30 vjeç.

Korporata Energjetike e Kosovës pas protestës së banorëve të fshatiti Shipitullë të Komunës së Obiliqit ka dal me njoftim lidhur me shpronësimet e tokave.

“Korporata Energjetike e Kosovës.. përsëri njofton banorët përreth fushës së operimeve të cilët përmes protestave po shprehin pakënaqësitë e tyre rreth procesit të shpronësimit, se përvetësimi i tokës për nevoja xehetare (përmes Zhvendosjes/Shpronësimit) nga KEK bëhet vetëm bazuar në Planin Kryesor Xehetar dhe në legjislacionin në fuqi, përfshirë Kornizën e Politikave të Zhvendosjes (KPZH), Ligjin për Shpronësimin e Pronës së Paluajtshme në Kosovë dhe Ligjin për Miniera dhe Minerale (LMM)”, thuhet në njoftim.

Poashtu në njoftim thuhet se sa i përket shqetësimeve (pretendimeve) të banorëve në lidhje me procesin e shpronësimeve, KEK0u të gjitha i ka adresuar tek organet relevante të drejtësisë.

“Prandaj, sa i përket përvetësimit të tokave dhe zgjerimit të minierave (për arsye të tjera), që nuk janë në përputhje me Planin Kryesor Xehetar, dhe planet tjera operative, përsëri ju bëjmë te ditur se kjo çështje është përtej kompetencave dhe interesit të KEK sh.a”, përfundon njoftimi.

Dhjetëra banorë të fshatit Shipitullë të Obiliqit, kanë protestuar para zyrave të KEK-ut në Prishtinë. Banorët kanë kërkuar takim me bordin e KEK-ut lidhur me shpronësimet e tokave.