Zëvendësministri i Infrastrukturës, Hysen Durmishi, sot gjatë ditës ka bërë të ditur se ka përfunduar ndërtimi i mbikalimit për këmbësorë në Veternik.
Tutje ai ka thënë se ky mbikalim është me konstruksion metalik.
“Lajm tejet i mirë. Ka përfunduar ndërtimi i (konstruksionit metalik) mbikalimit për këmbësorë në rrugën nacionale N25.2 në Veternik”, ka shkruar Durmishi në “Facebook”, ku ka postuar dhe disa foto.
Kryeministri i Kosovës, Albin Kurti, gjatë vizitës së tij në Turqi, ka takuar dhe bashkëbiseduar në Izmir pjesëtarë të mërgatës, studentë dhe përfaqësues të shoqatave të ndryshme shqiptare nga Izmiri, Bursa, Manisa e Stambolli.
Siç njofton Zyra e Kryeministrit, Kurti i njoftoi ata me “progresin, zhvillimet në vend” dhe qeverisjen në këto më shumë se tre vjet, “duke veçuar indikatorët ekonomikë që tregojnë rritjen për dyfish të investimeve të huaja dhe eksporteve, rritjen e të hyrave tatimore për 2/3, pa ndërruar politikën fiskale, dhe nivelin e punësimit, sidomos te të rinjtë”.
“Kryeministri gjithashtu veçoi arsyet se pse Kosova ofron një mjedis të favorshëm për investime, përfshirë këtu çmimin e lirë të energjisë elektrike, fuqinë punëtore profesionale, besimin në institucionet publike, politikat fiskale dhe faktin që Kosova së fundmi ka marrë vlerësimin e saj të parë kreditor sovran nga Fitch Rating”, thuhet në njoftim.
Në këtë drejtim, ai u bëri thirrje që të vijnë në Kosovë, të hulumtojnë mundësitë që ofron vendi dhe të investojnë, teksa shprehu mirënjohjen e tij për kontributin e vazhdueshëm e të rëndësishëm të mërgatës në Turqi, “sa në ruajtjen e raporteve të mira, aq edhe në krijimin e urave të bashkëpunimit ndërmjet Kosovës dhe Turqisë”.
Pjesë e këtij takimi ishte edhe Kryetari i Bashkisë Metropolitane të Izmirit, Cemil Tugay, me të cili Kurti gjithashtu pati një takim gjatë qëndrimit në Izmir.
Ministrja e Drejtësisë, Albulena Haxhiu, ka thënë për EO se konkursi për noterë është në fazën e përzgjedhjes dhe se ky ka qenë proces transparent, derisa sipas saj në të kaluarën kishte pasur ndërhyrje politike.
Kreu i MD-së ka thënë se e kupton që ka mungesë të noterëve, mirëpo zotohet se procesi do të përfundojë në afat sa më të shpejtë.
Haxhiu ka përmendur konkursin e vitit 2019, të cilën e kishte anuluar me ardhjen në krye të këtij dikasteri.
“Çështja e provimit të noterisë, por edhe faza e përzgjedhjes së noterëve, kanë qenë konsideroj një nga proceset më transparente, për të cilat janë kujdesur që të mos ketë asnjë ndikim as nga brenda Ministrisë së Drejtësisë, qysh ka ndodhur në të kaluarën; më kujtohet në vitin 2019, kur i kishin futur duart nga niveli politik deri te zyrtarë civilë”, ka thënë Haxhiu.
“Nuk kam vërejtur që ka një përpjekje ose një presion, që mund të më vijë mua, nga noterët aktualë që të mos e kryejnë detyrën dhe përgjegjësinë që kemi, sepse këtë nuk do ta tolerojmë. Unë e kuptoj që në Kosovë ka shumë pak noterë, mirëpo shumë shpejt iu garantoj që do procedojmë për përgjegjësitë që kemi”, ka thënë kreu i MD-së.
Ministrja e Drejtësisë ka thënë se ka kandidatë të cilët nuk i plotësojnë kushtet për pozitën e punës si noterë, ndërsa pjesa tjetër i ka plotësuar kriteret në përputhje me konkursin e hapur.
“Komisioni për përzgjedhjen e noterëve, tashmë e ka përfunduar punën që e ka pasur në përgjegjësi, e ka dorëzuar raportin në të cilin theksohet puna që e kanë adresuar gjatë kohës së intervistimit të kandidatëve të cilët kanë aplikuar për t’u licencuar për noterë”, ka thënë Haxhiu.
“Sigurisht që ne shumë shpejt do të veprojmë në përputhje me përgjegjësitë që kemi, por më lejoni t’ju njoftoj që ky raport përmban atë që disa prej atyre kandidatëve, komisioni rekomandon që nuk i plotësojnë kushtet. Dhe në anën tjetër janë qindra të tjerë të cilët komisioni konsideron që i plotësojnë kushtet, prandaj në përputhje me këtë raport dhe në përputhje me përgjegjësitë e mia si ministre dhe me diskrecionin që kam ne shumë shpejt do të licencojmë noterët në mënyrë që të përmbushim obligim ligjor që kemi”, ka shtuar Haxhiu.
Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë kritikuar qëndrimin e Qeverise së Kosovës sa i përket deklaratave akuzuese që kanë bërë në adresë të Gjykatës Kushtetuese, pasi kjo e fundit shpalli dy projektligje dhe një vendim të Kuvendit si anti-kushtetues. Deputetë opozitarë, të cilët folën për Ekonomia Online, u shprehen të shqetësuar edhe për shkak se Qeveria nuk po i merr parasysh komentet e as rekomandimet BE-së.
Gjykata Kushtetuese muajin që lamë pas e shpalli të pavlefshëm projektligjin për Byronë Shtetërore për Konfiskimin e Pasurisë së Pajustifikueshme, Ligjin për Këshillin e Pavarur Mbikëqyrës për Shërbimin Civil të Kosovës. Ndërsa, në kundërshtim me Kushtetutën është shpallur edhe vendimi i Kuvendit të Kosovës për shkarkimin e anëtares së Bordit të Organit Shqyrtues të Prokurimit, Kimete Gashi.
Deputeti i PDK-së, Hajdar Beqa, ka thënë se si opozitë rrugë të vetme për të mbrojtur Kushtetutën kanë dërgimin e ligjeve në Gjykatën Kushtetuese, sipas tij, qeveri është duke harton ligje që nuk janë në funksion të qytetarëve.
“Ne nga fillimi në mungesë të votave që kemi pasur si opozitë nuk kemi pasur rrugë tjetër vetëm ta mbrojmë Kushtetutën përmes veprimeve duke dërguar ligjet në Gjykatën Kushtetuese. Ne kemi parë që çdo herë ka qenë insistimi i Qeverisë aktuale që të bëjë ligje të fushatës dhe jo ligje që i hynë në funksion qytetarëve dhe normal që është dashur të dërgojë në Gjykatën Kushtetuese dhe kemi parë që edhe Ligji për Byronë por edhe ligjet tjera paraprake siç është Ligji Prokurorial dhe shumë ligje të tjera që janë ardhur në Komision për Legjislacion. Ne i kemi ngritur paraprakisht shqetësimet, ju kemi thënë se nëse me të vërtetë kemi interes për me pas funksion këtë ligj atëherë hajde ta harmonizojmë me Kushtetutën sepse e kemi një përshtypje që këtë ligj po e bëni për popullizëm apo për vota por jo për me shti në funksion andaj kjo po shihet se nuk e ka pasur serioz Qeveria aktuale ligjin sa i përket Byrosë”, ka thënë Beqa.
Deputeti Beqa, ka shtuar se edhe ligji për KPK do të dërgohet në Kushtetuese, pasi sipas tij ky ligj është më shumë lojë numrash për zgjedhjen e kryeprokurorit se sa të bëjë reforma në drejtësi.
“Por edhe në ligjin më herët që tani prapë do të shkoj në Gjykatën Kushtetuese, Këshilli Prokurorial është më shumë lojë numrash qa ta zgjedhin kryeprokurorin se sa të bëjë reformën në drejtësi. Fatkeqësia jonë është që ne po flasim për luftim të korrupsionit por jemi në vitin e katërt të kësaj Qeverie që Kosova nuk ka kryeprokuror, ka vetëm ushtrues të detyrës. Por edhe ligjet e tjera që presin fatin e njëjtë si të ligjit të Byrosë, që do të shkojë nga kjo javë në Gjykatën Kushtetuese. Qeveria është e paaftë që të hartojë ligje në harmonizim me Kushtetutën atëherë gjen arsyetim dhe alibi për t’i përdorur në fushatë, por e them edhe një herë se Mistria e Drejtësisë nuk ka qenë edhe një herë e sinqertë sa i përket këtij ligji edhe as kryeministri”, ka thënë ai.
Deputetja e AAK-së Time Kadrijaj, ka thënë se qeveria është duke tentuar që edhe ligjet që miraton të i vë në funksion të politikave të tyre.
Ajo ka thënë se nuk ka ndodhur në historinë e jetës politike në Kosovë që qeveritë të akuzojnë Gjykatën Kushtetuese për vendimet që merr.
“Po dëshirojnë që edhe ligjet me i vu në funksion të politikave të tyre, politikat e Lëvizjes Vetëvendosjes sepse ne përplot këto ligje para se me kaluar, i kemi dhënë vërejtje dhe kemi thënë që këto ligje janë antikushtetuese dhe që nëse kalojnë do t’i dërgojmë për interpretim në Gjykatën Kushtetuese. Dhe ashtu ka vepruar opozita në fakt dhe është parë që opozita e kishte me të drejtë sepse ato ligje e kthyen prapë nga Gjykata Kushtetuese duke u konsideruar se janë antikushtetuese dhe shifni tash vrapimet e kësaj qeveri duke e akuzuar edhe Gjykatën Kushtetuese. Nuk ka ndodh në historinë parlamentarizmit ose në jetën politike në Kosovë që në partitë politike me sulmuar edhe me atakuar edhe vendimet e gjykatës që është institucioni më i lartë kushtetuese dhe ligjor”, ka thënë ajo.
Kadrijaj ka thënë se përkundër vërejtjeve që janë duke ju dhënë BE-ja, pushteti nuk është duke i marr parasysh ato dhe është duke proceduar ligje që janë antikushtetuese.
Ajo ka thënë se edhe projektligjet për KPK, KPM dhe për Zyrtarët Publik, do të dërgohen për interpretim në Kushtetuese.
“Po i shihni përkundër vërejtjeve edhe të gazetarëve por edhe të këshillave të zyrave të Këshillit Evropian që i ka dhënë në Kosovë pra po proceduar ligje që janë antikushtetuese. Po dihet paraprakisht që nuk janë në frymën evropiane sepse ne në Komisionin për Integrime Evropian në secilin projektligj kalon dhe ne e analizojmë se a është në përputhje dhe në ligjin e Bashkimit Evropian. Këta përkundër vërejtjeve dhe sugjerimeve prapë po i kalojnë këto ligje dhe normal që edhe këto ligje do të shkojnë për interpretim në Gjykatën Kushtetuese. Këta tash le ta akuzojnë opozitën dhe gjykatën si pengesë në reformat sipas modelit të Lëvizjes Vetëvendosjes, sepse këta ende mendojnë që janë mbi pushtetin, ligjet, mbi Kushtetutën e Republikës së Kosovës, duke u sjellë me arrogancën e numrave”, ka thënë ajo për EO.
Policia e Kosovës ka kërkuar ndihmën e qytetarëve dhe mediave për ta gjetur dhe arrestuar Faton Hajrizin, i cili është raportuar se është arratisur nga burgu i Smrekovnicës.
“Policia e Kosovës kërkon nga qytetarët e Republikës së Kosovës që për çdo informatë që ndërlidhet me personin në kërkim apo vendndodhjen e tije, të lajmëroj Policinë e Kosovës .
Informatat për personin në kërkim, mund të dërgoni në Stacionin Policor me të afërt, përmes telefonit apo edhe përmes aplikacionit ,,Lajmëro Policinë””, thuhet në njoftimin e Policisë.
Sipas njoftimit të SHKK-së, i arratisuri është larguar nga Qendra Korrektuese në Smrekonicë pasi kishte shfrytëzuar “të drejtën e vikendit”.
Për largimin e tij nga institucioni është përgatitur letërrreshtimi dhe është njoftuar edhe policia.
“Lidhur me rastin, deri në përfundim të hetimeve, është suspenduar oficeri i dhomës së vëzhgimit, F.R dhe oficeri i krahut, N.A”. – njofton Shërbimi Korrektues i Kosovës.
PËRGATITI: ARTON HAMITI
Ministri për Kulturë, Rini dhe Sport, Hajrullah Çeku premtimin për ndërtimin e stadiumit me standarde evropiane në Suharekë, para deputetëve e kishte dhënë në shtator të vitit të kaluar.
Por, dhjetë muaj pas ende nuk është përzgjedhur projekti final stadiumit, ani pse konkursi për zhvillimin e projektit ideor ishte hapur në prill të këtij viti.
MKRS-ja nuk dha detaje, por, tha se aktualisht është duke u zhvilluar faza e përzgjedhjes së projektit, përçka kanë aplikuar katër operatorë ekonomikë.
Sidoqoftë, kurdo që përzgjidhet projekti, Komuna e Suharekës është gati.
“Kohëve të fundit me keni parë se kam qenë i zëshëm dhe kam kërkuar stadium me standarde evropiane sepse ne e kemi ndarë një lokacion 15 hektar për fusha sportive që është i paraparë me harta zonale, pra me letra jemi në rregull.”, tha kryetari i Suharekës, Bali Muharremaj.
Kryetari Bali Muharremaj, pret që puna në ndërtimin e stadiumit që e konsideroi shumë të nevojshëm, të fillojë sa më parë.
“Ka qenë një komision qeveritar këtu në zyre para dy muajve kemi biseduar dhe nga ajo që di është duke u bërë projekti dhe me ndërtimin e tij ne do të kemi lehtësira. Momentalisht ai që e fiton projektin besoj që ministri do te marrë masa dhe te fillojë sepse me të vërtetë kemi nevojë.”, shtoi Muharremaj.
Ministria e Kulturës, Rinisë dhe Sportit ka ndarë 100 mijë euro për ndërtimin e stadiumit të ri të qytetit të Suharekës. Sipas projektbuxhetit për vitin 2024, këto mjete, janë dedikuar për hartimin e projektit. Ndërkohë, sa do të kushtojë ndërtimi i stadiumit nuk dihet akoma.
Ditë më parë, ATV-ja raportoi se Komuna e Suharekës përballet edhe me një problematikë, meqë tashmë Klubi i Suharekës që garon për herë të parë në Superligë ka bërë kërkesë për qasje të plotë në stadiumin e qytetit të cilin komuna i kishte dhënë në shfrytëzim Ballkanit për 10 vjet.
Në mungesë të një stadiumi të përmasave evropiane, Klubi i Futbollit, “Ballkani” ndeshjet ndërkombëtare nuk mundi t’i zhvilloi në shtëpi./atvlive.tv/
Për më shumë klikoni në linkun e mëposhtëm:
PËRGATITI: KRENARE MULLIQI
Vetëm gjatë muajit maj vlera e parave që mërgata i dërgoi në Kosovë arriti në rreth 120 milionë euro.
Për këto para që kryesisht shpenzohen për konsum, ekonomistët vlerësojnë se shteti duhet të krijojëstrategji.
Sipas ekonomistit Fidan Qerimi, Qeveria duhet të joshëmërgatën që me këto para të investohet dhe të krijohet mundësia e shumëfishimit.
“ Të krijojmë një politik të cilën mërgata tëinvestojnë këto para të prodhon produkte ku ne te kemi mundësi që këto para të multiplikohen dhe përmes tyre të kemi një zhvillim ekonomik”, tha Qerimi.
Për investimin e miliona eurove që vijnë nga mërgata ka disa opsione.
Sido që të jetë, kontributi i mërgatës mbetet shumë i rëndësishëm për ekonominë e vendit.
Në 5 muajt e parë të këtij viti, mërgata dërgoi në Kosovë afro 514 milionë euro./atvlive.tv
Për më ndiqni linkun e mëposhtëm:
PËRGATITI: DONITA BYTYQI
Ujëra të zeza e rrugë të ngushta pa trotuare, janë një ndër shqetësimet e banorëve të fshatit Shupkofc të Mitrovicës.
Banorët e këtij fshati po ankohen për mungesën e shërbimeve infrastrukturore.
Florim Fejza, banor në këtë fshat, ankohet se nuk mund t’i hapë dritaret për shkak të kundërmimit.
I shqetësuar për gjendjen e keqe të rrugëve e për mungesë të kanalizimit, ishte edhe Islam Behrami, i cili thotë se për shkak të rrugës së ngushtë po rrezikohen fëmijët e kalimtarët. Ai theksoi se komuna deri tash nuk ka ndërmarrë asgjë lidhur me zgjidhjen e këtij problemi.
Ndërkaq, drejtori i Shërbimeve Publike, Granit Tmava, thotë se po presin që sa më parë të nënshkruhet kontrata, në mënyrë që të nisin intervenimet.
“Presim që në afat sa më të shpejtë të ndodhë edhe të lidhet kontrata, Komuna e Mitrovicës të furnizohet me kontratën për zgjerimin dhe mirëmbajtjen e rrjetit të kanalizimit, pritet që brenda këtij viti të punohet edhe në ndërtimin dhe asfaltimin e rrugëve të cilat kanë mbetur të paasfaltuara, presim që të furnizohemi edhe me kontratë, ku banorët e asaj zone të kenë një qasje më të mirë dhe më të sigurt dhe të jemi në dispozicionin e tyre.”, tha Tmava.
Drejtoria e shërbimeve publike në Mitrovicë, ende nuk ka ndonjë shifër të saktë se sa mund të kushtojnë intervenimet për sanimin e infrastrukturës në fshatin Shupkofc./atvlive.tv/
Për më shumë klikoni linkun e mëposhtëm:
PËRGATITI: SARA SHEHU
Tash e një kohë, disa shtylla elektrike të vendosura në rrugën “Rexhep Gjeli” në Vranjevc, janë duke u rrëzuar.
Banorët thonë se ndihen të rrezikur derisa theksojnë se ekipet e KEDS-it asnjëherë nuk kanë intervenuar në përmirësimin e gjendjes së tyre.
Madje, sipas banorëve, shtyllat e vjetra elektrike janë tërrezikshme edhe për nxënësit pasi pak metra më larg është shkolla “Zenel Hajdini”.
“Gjendja e njëjtë është moti shumë, nuk ështëndërmarrë asgjë, KEDS-i nuk na ka vizituar në këtëpjesë asnjëherë. Jemi në rrezik që mund të rrëzohen këto shtylla është mjaft shqetësuese kjo situatë”, tha një banor.
Nga ana tjetër, zëdhënësi i KEDS-it, Lulzim Krasniqi,tha se janë në dijeni për këtë ankesë të qytetarëve dhe se së shpejti do të intervenojnë edhe në këtë pjesë të lagjes.
Ndryshe, për 10 vjet KEDS ka ndërruar më shumë se 142 mijë shtylla elektrike të vjetra, duke i zëvendësuar me të reja në të gjitha komunat e vendit./atvlive.tv/
Për më shumë klikoni në linkun e mëposhtëm:
PËRGATITI: SARA SHEHU
Hapësirat afër dyerve të klinikave të Qendrës Klinike Universitare janë shndërruar në parking për vetura.
Tash e sa kohë parkimi i veturave në QKUK është një çështje problematike, pasi ato po parkohen në vende joadekuate, ndërkohë që ekziston parkingu adekuat.
Madje, as ky shirit i vendosur afër klinikës së Emergjencës dhe asaj interne nuk po i ndal ngasësit e automjeteve që të mos i parkojnë veturat ku është e ndaluar.
Mes tjerash, në këto hapësira janë dëmtuar edhe pengesat të cilat pamundësojnë parkimin e veturave.
Por përcjellësit e pacientëve nuk e shohin shqetësuese këtë situatë.
Derisa ky institucion i nivelit terciar posedon parking adekuat, ndonëse me pagesë, qytetarët e kanë një arsyetim pse nuk e përdorin atë.
Ndërkaq, Shërbimi Spitalor Klinik, Universitar i Kosovës, përmes një përgjigje me shkrim i ka thënë ATV-së se mosrespektimi i rregullave brenda oborrit të QKUK-së nga ana e qytetarëve, po krijon tollovi.
“Ka parkingje të mjaftueshme për parkimin e automjeteve, por insistimi i palëve për ndalje dhe parkim sa më afër ndërtesave ku marrin shërbime, po krijon fluks në pika dhe kohë të caktuara në oborr, përkundër faktit se brenda oborrit kemi parkingun e madh, i cili ka kapacitet të mjaftueshëm. Këto fakte tregojnë se vetëdijesimi lë për të dëshiruar”, thuhet në përgjigjen e ShSKUK-së.
Sipas të dhënave të SHSKUK-së, brenda ditës në oborrin e QKUK-së, qarkullojnë më shumë se 3 mijë automjete nga të gjitha komunat e Kosovës./atvlive.tv/
Për më shumë klikoni në linkun e mëposhtëm: