Blog

Vërshimet e fundit në komunën e Sharrit që erdhën si pasojë e reshjeve të mëdha atmosferike shkaktuan dëme të mëdha veçmas në fshatrat e rajonit të Opojës. Fshatrat më të prekura nga këto vërshime ishin Kuki, Bresana, Blaçi dhe Kosava.

Ndërkohë që banorët e këtyre fshatrave të përmbytura nga ujërat e lumenjve që dolën nga shtrati i tyre, po angazhohen në sanimin e dëmeve dhe normalizimin e gjendjes, qeveria komunale ka caktuar një ekip i cili po merret me vlerësimin e dëmeve në mënyrë ato të kompensohen nga institucionet qendrore dhe ato lokale.

Një ditë pas vërshimeve komunën e Dragashit e ka vizituar edhe kryeministri i Kosovës, Albin Kurti, i cili pasi ka parë nga afër dëmet e shkaktuara nga vërshimet, ka premtuar se Qeveria nga fondi i emergjencave do të ndajë mjete për t’i ndihmuar të goditurit nga këto përmbytje.

Këto vërshime kanë shqetësuar edhe opojanët e shumtë që jetojnë në mërgim, veçmas ata me prejardhje nga fshatrat e përmbytura, të cilët në forma të ndryshme janë mobilizuar për t’i ndihmuar bashkëvendësit që pësuan nga këto përmbytje.  Njëri nga ta është dr. Miran Sadiku nga fshati Kuk, i doktoruar në Austri i cili për momentin jeton në Zvicër ku punon si Këshilltar social për çështje të migracionit.

Dr. Mirani dy ditë pas vërshimeve ia ka nisur një letër të hapur kryetarit të komunës së Dragashit, Bexhet Xheladinit në të cilën shpreh shqetësimin e tij për gjendjen e krijuar nga përmbytjet si dhe propozon disa rrugëzgjidhje konkrete për daljen nga kjo situatë por edhe për parandalimin e rreziqeve të tilla. Ai në letrën e tij të ilustruar edhe me disa fotografi që pasqyrojnë rregullimin e shtretërve të lumenjve në vende të ndryshme evropiane, thekson se veprime të tilla duhet të merren edhe në komunën e Dragashit. Si mundësi konkrete për ndihmën në sanimin e dëmeve,  dr. Mirani propozon organizimin e një aksioni për grumbullimin e mjeteve nga mërgimtarët e kësaj ane, duke e përmendur një shumë simbolike nga 50-100 euro për çdo mërgimtar…

Në vazhdim po e publikojmë në tërësi letrën e dr. Miranit drejtuar kryetarit të komunës, të shoqëruar nga një biografi e shkurtër e tij. 

Referencë: Vërshimet e datës 26.07.2024 në Opojë

I nderuri Kryetar i Komunës z. Bexhet Xheladini,

Unë shpresoj dhe besoj në gatishmërinë tuaj për të ndihmuar dhe gjetur zgjidhje sa më të shpejtë dhe afatgjate për situatën e fundit në Opojë, e sidomos në fshatrat e prekur nga vërshimet e datës 27.06.2024.

Në rrethana të tilla marr guximin t’ju drejtohem për të kërkuar fokusin tuaj për rimëkëmbjen dhe sanimin e dëmeve marramendëse në zonat e prekura.

Edhe fshati Kuk e ka pësuar shumë herë nga mosmirëmbajtja e lumit dhe degradimi total i tij në vitet e fundit. Shkaqet janë të njohura, pasi shumë fshatra janë të prekur nga dukuria e hedhjes së plehrave të kafshëve dhe bërllokut të konsumit ditor.

Unë mendoj, se ju e keni mundësinë për të mbetur në kujtesën e opojarëve, sidomos pas kësaj ngjarje tragjike. Pikërisht me nismën  e një projekti për Rindërtim.

Opoja ka me dhjetëra ndërtimtarë e arkitektë të mirëfilltë, të cilët do ju ofronin plane konkrete pa pagesë për rregullimin e shtretërve të lumenjve. Ju duhet vetëm t’ua kërkoni këtë bashkëpunim, pavarësisht nëse këta ekspertë e kanë braktisur Opojën ose jo.

Problemet me gypat e ujësjellësit dhe ujërave të zeza ka qenë shkaku kryesor që shumë iniciativa për pastrimin e lumit janë shuar në Kuk, akoma pa filluar fare. Shumë shtëpi (para vërshimeve të fundit), kanë pasur gypat e ujit dhe të kanalizimit në lum. Për pasojë, çdo përpjekje për të pastruar përkatësisht rregullimin e shtratit të lumit, haste në kundërshtimin e atyre familjeve, pasiqë në rast të rregullimit të shtratit të lumit, ato do të mbeteshin pa ujë dhe pa kanalizim.

Vërshimet e fundit vetëm sa nuk rrafshuan shtëpitë e fshatrave, e për shtratin e lumenjve nuk do koment.

Fondet shtesë nga qeveria qendrore dhe lokale, ndihma nga kompanitë ndërtuese, por edhe kontributet solide hiç më shumë se nga 50-100 €, nga mërgimtaret (çdo shtëpi tashmë ka një të tillë), do ta transformonin Kukin, por edhe fshatrat e tjera në fshatra atraktive për jetë, dhe jo si vendbanime, nga frika prej vërshimeve të ardhshme, që mund të kushtojnë edhe me jetë njerëzish.

Opojarët e njohin Evropën prej më shumë së 65 vitesh, atëherë edhe kur të paret tanë ikën për jetë më të mirë. Patjetër se pastërtia e lumenjve në Evropë është prej gjerave që na mbeten në kujtesën tonë.

Edhe në Perëndim ka vërshime të llahtarshme dhe shpesh bile me viktima në njerëz.

Pushteti lokal, qendror dhe shoqëria civile aktivizohen këtu dhe ja dalin për t’i kaluar problemet pas vërshimeve.

Neve nuk na mungon asgjë me pak se perëndimorëve. Ne kemi bile një përparësi, ne besojmë në Zotin Një dhe i frikësohemi atij.

Fotot e bashkangjitura pasqyrojnë rregullimin e lumenjve në vende të ndryshme evropiane. Edhe në Kosovë ka disa lumenj të rregulluar për mrekulli.

Ju dëshiroj shumë shëndet dhe suksese në punën tuaj,

Me respekt.

Miran Habil Sadiku

Biografi e shkurtër e autorit të letrës:

Dr. Miran Sadiku është lindur me 26 Korrik 1980 në fshatin Kuk të Opojës.

Pas fillores ai vijoi shkollën e mesme të Mjekësisë në Bresanë për katër vite. Disa javë pa mbaruar Maturën, si të gjithë opojanët tjerë u detyrua të kaloj në Kukës si refugjat. Atje punoi me Profesorin (mjek) Kujtim Kryeziu, fillimisht në qendrat e refugjatëve si teknik medicinal, pastaj u vendos në Spitalin e qytetit të Kukësit me Pediatrin e mirënjohur opojan Dr. Fehim Sadikun.

Mirani nisi studimet në Fakultetin Filozofik të Prishtinës në dhjetor të vitit 1999, drejtimi i Sociologjisë ku edhe diplomon në vitin 2003, me një punim empirik të parin në Sociologjinë e Moshës dhe të Familjes.

 

Në vitin akademik 2007/08 filloi me punimin e Disertacionit në Universitetin “prof. Johann Bacher”, në Linzz të Austrisë, në fushën e Kriminologjisë dhe Sociologjisë së të Rinjve, me Fokus konsumin legal dhe ilegal të shkollarëve përkatësisht dhunën në shkolla.

Gjatë kësaj kohe ai mori pjesë në disa konferenca shkencore në vende të ndryshme evropiane, si: konferenca ndërkombëtare në Universitetin e Krakau në Poloni në vitin 2009, në Universitetin e Prishtinës – për Studentet e nivelit Master në lëmin e Statistikës në vitin 2011, në konferencën e organizuar nga Universiteti i Grazit me atë të Prishtinës mbi Familjen dhe sigurinë Sociale, në Prishtine në vitin 2013.

 

Si 30 vjeçar doktoron në lëmin e shkencave sociale dhe ekonomike me fokus Kriminalsociologji dhe përpunim i të dhënave po në Universitetin e Linzit, ku më vonë, fillon edhe me punë si bashkëpunëtor shkencor për afër dy vite.

Ne vitin 2013 në bashkëpunim me Koleget e Institutit për Sociologji në Universitetin e Linzit prezantojnë studimin: “Shqiptarët në Austri dhe jeta e tyre“. Ky punim voluminoz gjendet në Bibliotekat e qytetit dhe Universitetit të Linzit.

Mirani ka punuar në Projekte me dhe për të rinj në bfi „Berufsförderungsinstitut“ LINZ sidomos prej vitit 2014 deri 2016. Ai kreu me sukses edhe certifikimet si Trajner profesional për të rritur dhe të rinj në Wien në Institutin EWI në vitin 2015.

 

Nga 2017  deri nga fundi i 2018 ai është zhvendosur me punë në kryeqytetin e Austrisë, si konsulent për punësim dhe edukim, projekt ky i Ministrisë për punë dhe çështje sociale.

Prezantimi i punimit të tij të radhës ishte në “European Conference on Social and Behavioral Sciences” e cila u mbajt në Prizren, në maj të vitit 2018.

Ne konferencën shkencore Eurasian Conference on Language and Social Sciences (2022) prezantoi punimin me temën “Corona Virus – its impact on social life”.

 

Mes viteve 2018 dhe 2021 punoi si Koordinator për integrime dhe Projekt-menaxher në Fondin Austriak të Integrimit “ÖIF” në Linz të Austrisë.

Nga fillimi i vitit 2022 deri ne fund të vitit 2023 ka pasur pozitën e “Case Manager” në projektin e njohur si “fit2work” të Ministrisë së punëve dhe çështjeve sociale të Austrisë. Gjatë këtyre dy viteve ka mbaruar me sukses edhe shkollimin në Case Management.

 

Në fund të vitit 2023 merr një ofertë nga Kompania ndërkombëtare «ORS Gruppe» me seli në Zürich të Zvicrës për të punuar si Këshilltar social për Komunat e Zürichut për çështjet e migracionit, përkatësisht këshillimin  e azilkërkuesve në procesin e Integrimit në shoqërinë vendase. (D.Reshiti)

Më 10 maj ka nisur procesi i konvertimit të patentë shoferëve të lëshuar nga strukturat jolegale të Serbisë në patentë shoferë të Republikës së Kosovës. Që nga ajo ditë deri dje një gjë të tillë e kanë bërë afër 2 mijë persona.

Ministria e Punëve të Brendshme më 8 maj njoftoi se pas dy ditësh do të nisë procesi i konvertimit të patentë shoferëve jolegalë në legalë.

“Ministria e Punëve të Brendshme njofton të gjithë qytetarët se nga data 10 maj 2024 do të fillojë procesi i konvertimit të patentë shoferit të lëshuar nga strukturat jo legale serbe në patentë shoferi të Republikës së Kosovës dhe do të zgjasë deri me 9 gusht 2024”, thuhet në njoftimin e 8 majit.

Zëvendësdrejtori i Policisë për Veriun, Veton Elshani, ka thënë për Gazetën Express se deri më 3 korrik 1 mijë e 901 persona kanë aplikuar për të marrë patentë shoferët e Republikës së Kosovës.

Leposaviq: 474;

Mitrovicë e Veriut: 520;

Zubin Potok: 270;

Zveçan: 312.

Detaje rreth aplikimit për konvertim të patentë shoferëve

Procedura për pajisje me patentë shoder të Kosovës zgjatë 15 ditë. Patentë shoferi i lëshuar nga strukturat serbe i kthehet aplikuesit si dokument i pavlefshëm dhe i njëjti pajiset me patentë shoferin e Republikës së Kosovës.

MBP ka bërë të ditur se të gjithë qytetarët që posedojnë patentë shoferi të lëshuar nga strukturat jo legale serbe mund të aplikojnë për patentë shoferi zyrtar të Republikës së Kosovës përmes aplikimit formularit elektronik në ueb faqen https://patentshoferonline.rks-gov.net/ apo edhe fizikisht në Qendrën për Pajisje me Dokumente në të gjitha komunat e Kosovës.

Në rast të paraqitjes fizike për aplikim në sportelet e Qendrave për Pajisje me Dokumente, qytetarët duhet të posedojnë këto dokumente:

Letërnjoftimin e Republikës së Kosovës,

Origjinalin e patentë shoferit të lëshuar nga ana e autoriteteve serbe,

Certifikatën e gjendjes shëndetësore për pajisje me patentë shofer,

Certifikata shëndetësore lëshohet nga institucionet shëndetësore të licencuara nga Ministria e Shëndetësisë e Republikës së Kosovës, në tërë territorin e Republikës së Kosovës;

Çmimi për certifikatë shëndetësore varion nga kategoria e mjetit për të cilin posedon patentë shoferin dhe atë si në vijim: Për kategorinë B/BE çmimi i certifikatës shëndetësore është njëzetë euro (20.00€); Për kategorinë C dhe kategorinë D çmimi i certifikatës shëndetësore është pesëdhjetë euro (50.00€).

Dëshmi të pagesës së taksës vlera e së cilës është pesëmbëdhjetë euro (15.00€) dhe Origjinalin e patentë shoferit të lëshuar nga UNMIK apo RKS në qoftë se bëhet aplikimi për shtimin e kategorive, gjë e cila po ashtu është mundësuar përmes këtij vendimi të Ministrisë së Punëve të Brendshme.

Ministri i Bujqësisë, Pylltarisë dhe Zhvillimit Rural, Faton Peci, ka thënë se këtë vit, “toka e bekuar e Kosovës”, minimalisht do të prodhojë 140 000 deri 150 000 ton më shumë sesa vitin e kaluar.

Sipas Pecit, kjo është sasia e grurit që Kosova ka importuar vjet, duke lënë të nënkuptohet se Kosova pritet të plotësojë nevojat e veta me grurë.

Sipas tij, një qytetar i Kosovës llogaritet se konsumon në ditë mesatarisht prej 250 deri 300 gram miell.

Përmes një postimi në Facebook, Peci ka llogaritur se për 365 ditë kjo i bie 140 deri 150 kg grurë, raporton EO.

“Kosova ka importuar vitin e kaluar 139 000 ton me grurë. E këtë vit, toka e bekuar e Kosovës, minimalisht po i prodhon 140 000 deri 150 000 ton më shumë se vitin e kaluar. Ne kemi të dhëna të sakta për çdo hektar të mbjellë. Në këtë llogaritje nuk përfshihen sipërfaqet nën 1ha që ne si Ministri nuk i subvencionojmë”, ka shkruar Peci.

Një person është arrestuar në Prishtinë për sulm ndaj zyrtarëve policorë, e dy të tjerë u arrestuan për pengim të policëve në kryerje të detyrës.

Në raportin 24 orësh të Policisë, thuhet se rasti ka ndodhur të shtunën pas mesnatëa në “Lagjen e Spitalit”, “Betimi për Drejtësi“.

Rasti u iniciua si “Sulm ndaj personit zyrtar”.

“Janë arrestuar tre të dyshuar meshkuj kosovarë, pasi njëri nga ta kishte sulmuar fizikisht zyrtarët policorë, kurse dy të tjerët i kishin penguar policët në kryerje të detyrës. Si pasojë e sulmit fizik, një zyrtar policor ka pësuar lëndime trupore për çka dhe ka pranuar tretman mjekësor”, thuhet në njoftim.

Bëhet e ditur se me vendim të prokurorit, të dyshuarit janë liruar, kurse rasti vazhdon në procedurë të rregullt.

Ish-kryetari i Odës Ekonomike të Kosovës, Safet Gërxhaliu, ka thënë se mungesa e një dialogu të mirëfillt publiko – privat gjeneron bariera për sektorin privat dhe forcon byrokracin institucionale në dëmë të zhvillimit të qëndrueshëm ekonomik dhe social.

“Ligji i ri për procedurat e Administratës Tatimore të Kosovës (ATK) po krijon sfida të reja dhe të mëdha për ndërmarrjet e vogla dhe të mesme (NVM) në vendin tonë. Një ndër ndryshimet më të diskutueshme është obligimi për kryerjen e transaksioneve përmes bankës për shumën mbi 300 €. Kjo rregullore po krijon një barrë të rëndë financiare për kompanitë e vogla dhe të mesme, të cilat shpeshherë varen nga pagesat në dorë për të mbajtur aktivitetet e tyre të përditshme”, ka thënë Gërxhaliu.

Sipas tij, me hyrjen në fuqi të këtij ligji NVM kanë hasur në vështirësi për të mbledhur pagesat e shitjeve në kohë, raporton Ekonomia Online.

“Në të kaluarën, pagesat bëheshin në dorë në kohën reale të furnizimit të produkteve, ndërsa tani, çdo transaksion mbi 300 € duhet të kryhet përmes bankës. Ky ndryshim ka çuar në vonesa të shumta në ekzekutimin e pagesave nga klientët, duke zhytur shumë kompani në borxhe dhe duke krijuar një cikël negativ financiar. Ligji i ri gjithashtu përmban zgjatjen e afatit të vlerësimit tatimor retroaktiv nga 6 në 10 vite dhe zgjatjen e afatit të ruajtjes së librave nga 6 në 10 vite. Këto ndryshime përfaqësojnë një barrë të shtuar për bizneset, sidomos për NVM-të, të cilat tashmë përballen me 101 barriera në ushtrimin e veprimtarive të tyre. Kjo rritje e byrokracisë dhe përgjegjësive administrative vetëm sa i komplikon më tej funksionimin e tyre ”, shtoi ai.

Po ashtu ai ka treguar edhe për efektet negative të shkaktuara në Mjedisin Biznesor më sektorin privat në Kosovë.

“Në një situatë ku sektori privat në Kosovë tashmë përballet me sfida të mëdha, këto ndryshime të ligjit janë si një goditje e dyfishtë. Nuk është çudi që shumë NVM po mendojnë të mbyllen ose të zhvendosen jashtë Kosovës, duke e bërë kështu mjedisin biznesor në vendin tonë edhe më të pafavorshëm për investitorët e huaj. Siç duket, në vend që të përmirësojmë mjedisin biznesor, po e bëjmë më të vështirë dhe të paqëndrueshëm Një nga arsyet kryesore për këto ndryshime të papërballueshme është mungesa e diskutimeve me sektorin privat gjatë hartimit të këtyre ligjeve. Këto vendime janë marrë nga kolltuqet dhe zyrat e institucioneve, pa u dëgjuar zëri i atyre që preken direkt nga këto ndryshime – bizneset private”, tregoi ai.

Megjithëkëtë, ish-kryetari ka folur edhe për Sektorin Privat Heronjtë e Pasluftës, duke thënë se me shumë sakrifica kanë ndihmuar në ndërtimin e një ekonomie funksionale dhe të qëndrueshme.

“Sektori privat në Kosovë është boshti kurrizor i shtetësisë së vendit tonë. Ata janë heronjtë e pasluftës, të cilët me shumë sakrifica kanë ndihmuar në ndërtimin e një ekonomie funksionale dhe të qëndrueshme. Nëse dëshirojmë një të ardhme më të mirë për Kosovën, duhet të krijojmë ligje që i mbështesin dhe i ndihmojnë këto biznese të zhvillohen dhe të përparojnë, jo t’i ngarkojmë me barriera të panevojshme dhe burokraci të tepruar. Tentativa për rritjen e burokracis dhe qasja për barazi në varfëri duke demtuar sektorin privat e në veqanti atë prodhues ështē rreziku që po forcohet e në heshtje po zbatohet”, foli ish-kryetari.

Ditën e hënë do të vijojë procesi gjyqësor ndaj ish-krerëve të Ushtrisë Çlirimtare të Kosovës, të cilët po gjykohen në Hagë.

Sipas njoftimit në kalendarin zyrtar të Dhomave të Specializuara, seanca të hënën do të nisë në ora nëntë.

Në po të njëjtin orar do të fillojnë edhe seancat për ditën e martë, mërkurë dhe të enjte.

Kjo është java e parafundit e seancave, përpara se trupi gjykues të shkojë në pushim veror.

Përgjatë kësaj jave janë dëgjuar dëshmi të dëshmitarëve të ftuar nga Prokuroria Speciale.

Ditën e enjte, nga Prokuroria deklaruan se dëshmitari i mbrojtur, që ka deklaruar po atë ditë, ka thënë se ai dhe i afërmi i tij kanë përkrahur partinë LDK.

Sipas dëshmisë, në vitin 1998, anëtarët e UÇK-së rrëmbyen të afërmin e dëshmitarit, trupi i të cilit u gjet më vonë atë vit. Në të njëjtin vit, dëshmitari gjithashtu u ndalua dhe u keqtrajtua nga pjesëtarët e UÇK-së.

Kujtojmë se të hënën do të vazhdojë dëshminë edhe Bislim Zyrapi.

Ministri i Punëve të Jashme të Serbisë, Marko Gjuriq, ka thënë se do të marrë pjesë në disa ngjarje të samitit të NATO’s në Uashington.

Ai ka shtuar se ushtarakisht mbesin neutral.

“Kam nderin të përfaqësoj Serbinë në Uashington në një sërë ngjarjesh gjatë javës së Samitit të NATO’s. Ne jemi të përkushtuar ndaj dialogut dhe bashkëpunimit duke qëndruar të palëkundur ndaj politikës sonë të neutralitetit ushtarak dhe interesave kombëtare. Unë do të prezantoj politikën tonë dhe do të bisedoj me përfaqësuesit e vendeve me të cilat ne ndajmë, dhe me ata me të cilët ndajmë më pak ose aspak pikëpamje për çështjet rajonale dhe ndërkombëtare. Misioni ynë është të forcojmë pozitën e Serbisë”, ka shkruar ai në “X”.

Mbrëmë në rrugën B, policia ka ndaluar një veturë në të cilën ndodheshin tre persona ku gjatë kontrolli është konfiskuar një sasi substancë e dyshuar e llojit marihuanë.

Pas intervistimit, të dyshuarit janë liruar në procedurë të rregullt.

Njoftimi:

POSEDIM I PAAUTORIZUAR I NARKOTIKËVE

Rr. B, Prishtinë 06.07.2024 – 22:00. Policia ka ndaluar veturën me targa vendore ku gjendeshin tre persona meshkuj kosovarë. Gjatë kontrollit në veturë është gjetur dhe konfiskuar një sasi substancë e dyshuar narkotike e llojit marihuanë në peshë 15.08 gram . Dy prej tyre janë intervistuar si të dyshuar, ndërsa personi i tretë si dëshmitar dhe pas intervistimit me urdhër të prokurorit të dyshuarit janë liruar në procedurë të rregullt.