Blog

Presidenti i Këshillit Kombëtar të Zvicrës, Eric Nussbaumer, i ka bërë thirrje Kosovës dhe Serbisë të ndërmarrin hapa që parandalojnë tensionet dhe të kthehen në tavolinën e bisedimeve, raporton EO.

Në një konferencë për media së bashku me kryeparlamentarin Konjufca, Nussbaumer, ka thënë se Zvicra mbështet dialogun, teksa shtetin e tij e ka quajtur aleat të fortë për Kosovën.

“Ne kemi pasur një takim të frytshëm, diskutimet tona i kanë theksuar marrëdhënie dinamike dhe të fuqishme. Kosova dhe Zvicra kanë bashkëpunuar edhe në fushën e diplomacisë parlamentare. Unë e kam përshëndetur bashkëpunimin e ekspertizave parlamentare. Zvicra është një mbështetëse e vazhdueshme e Kosovës, Zvicra është krenare me komunitetin e integruar mirë në shoqërinë tonë, të kosovarëve. Zvicra është e shqetësuar për tensionet në rritje në lidhje me pakicat serbe në Kosovë. Ne i bëjmë thirrje Qeverisë së Kosovës dhe Serbisë që të ndërmarrin hapa që të parandalojnë tensionet. Zvicra mbështet dialogun, Kosova ka Zvicrën një aleate të besueshme për zhvillim dhe integrimin evropian”, u shpreh ai.

Kryetari i Kuvendit të Kosovës, Glauk Konjufca, ka thënë se Serbia nuk duhet të mbetet e pandëshkuar sidomos pas agresionit të 24 shtatorit në Banjskë. Sipas tij, ekziston rreziku që shteti serb ta përsërisë një sulm më përmasa edhe më të mëdha nëse nuk ndëshkohet, raporton EO.

Këto komente i bëri pas takimit që pati me presidentin e Këshillit Kombëtar të Zvicrës, Eric Nussbaumer, ku shtoi se nëse Serbia ende vazhdon ta mbështesë Rusinë në luftën në Ukrainë.

“Një temë e pashmangshme në këto rrethana ishte edhe siguria në Kosovë dhe rreziqet që po përballemi për shkak të pretendimeve territoriale që ka Serbia ndaj Kosovës. Ia shpreha shqetësimet po që se Serbia lihet e pandëshkuar lidhur me agresionin e 24 shtatorit në Banjsk, Serbia ka për ta përsëritur këtë skenarë. Një nga shtet që nuk e ka sanksionuar Rusinë por që vazhdon të ketë bashkëpunim me Rusinë”, u shpreh Konjufca, teksa falënderoi presidentin e Këshillit Kombëtar të Zvicrës për ndihmën ndër vite dhënë Kosovës.

Numri i përgjithshëm i nxënësve në institucionet publike parauniversitare në vend ka shkuar duke rënë vazhdimisht në mënyrë drastike. Po ashtu edhe numri i studentëve të rinj në institucionet publike ka rënë dukshëm.

Sipas të dhënave zyrtare të Agjencisë së Statistikave të Kosovës, në vitin shkollor 2015/2016 numri i nxënësve në shkollat fillore dhe të mesme ka qenë 367 mijë e 940, ndërsa në vitin 2023/2024 ky numër ka rënë në 291 mijë e 882 nxënës ose 76 mijë e 58 më pak në vit.

Sipas të dhënave zyrtare të Agjencisë së Statistikave të Kosovës, numri i nxënësve në klasën e I të shkollës fillore në vitin shkollor 2015/2016 ka qene 26 mijë 959 nxënës, ky numër në vitin 2023/2024 ka rënë në 22 mijë e 765 nxënës, ose katër mijë e 194 vetëm në klasën e parë. Ndërsa, në një përgjigje me shkrim nga Ministria e Arsimit, numri i nxënësve të klasës së parë në sektorin publik dhe privat në vitin shkollor 2023/2024 është 23 mijë e 870m raporton KosovaPress.

Dhe numri i studentëve të regjistruar në nivelin bachelor në universitetet publike në vitin akademik 2018/2019 ka qenë 11 mijë e 718 student të rinj, në vitin e parë, ndërkaq në vitin 2023/2014 ky numër është tkurrur në 7 mijë e 890 student të regjistruar në vitin e parë.

Sipas Ministrisë së Arsimit numri i studentëve për vitin akademik 2023/24 në Institucionet e Arsimit të Lartë (IAL) publike dhe private, është 21 mijë e 71 studentë të regjistruar për herë të parë.

Sipas ASK-së numri i përgjithshëm i nxënësve dhe studentëve në sektorin publik dhe privat, 2023/2024 është 384 mijë e 363. Ky numër i përgjithshëm i nxënësve dhe studentëve në sektorin publik dhe privat në vitin 2022/2023 ka qenë 390 mijë e 895. Kurse në vitin 2021/2022 numri i përgjithshëm i tyre ka qenë 410 mijë e 65.

Punëtorët teknikë të Kuvendit të Kosovës do të protestojnë sot para ndërtesës së Kuvendit me kërkesë që t’iu rriten pagat.

Protesta do të nisë në orën 10:00. Paga e tyre është 275 euro, derisa kanë paralajmëruar për veprime sindikaliste dhe i kanë njoftuar grupet parlamentare për pakënaqësitë e tyre.

Për këtë çështje, deputetja e Lidhjes Demokratike e Kosovës (LDK), Hykmete Bajrami, ka akuzuar Qeverinë, duke thënë se ka dështuar të ndryshojë pagën minimale. Ajo tha se Qeveria i ka dobësuar sindikatat dhe nuk po merret me çështje sociale.

“Pres nga deputeti Armend Muja që të ju adresohet protestuesve dhe t’i bindë se ‘ata i kanë pagat mjaftueshëm të larta, se atyre u janë rritë pagat së paku 200 euro në tri vitet e fundit vetëm se ata nuk po e dinë’. Qeveria e propagandës, ka dështu me me ndryshu pagën minimale, ka dobësu sindikatat dhe nuk është marrë me asnjë çështje sociale nëse kjo e fundit nuk ka rezultu direkt në votë e në përkrahje për LVV-në”, është shprehur Bajrami.

Ajo shtoi se Qeveria me mospunë dhe mosveprime i ka varfëruar qytetarët.

Rusia tha se ka kapur dhjetëra dronë ukrainas, të lëshuar gjatë natës së shkuar në drejtim të territorit të saj.

Sulmet e raportuara ndodhën pasi presidenti ukrainas, Volodymyr Zelensky, u zotua se do të hakmerret për sulmet masive të një dite më parë në Ukrainë, të cilat lanë së paku 37 njerëz të vrarë.

Kievi nuk i komentoi ende pretendimet ruse.

Ministria e Mbrojtjes e Russë tha të martën se 38 dronë në pesë rajone janë kapur, përfshirë: 21 në Rostov, shtatë në Kursk, pesë në Astrakhan, tre në Belgorod dhe dy në Voronezh.

Mediat lokale raportuan se aeroportet në rajonet jugore të Astrakhanit dhe Volgogradit i kanë kufizuar fluturimet pas sulmeve me dronë.

Sipas guvernatorit të Belgorodit, Vyacheslav Gladkov, granatimet ukrainase në rajon lanë të vrarë katër persona dhe të plagour 20.

Ai shtoi se sulmi shkaktoi ndërprerje të energjisë elektrike dhe dëmtoi 60 shtëpi dhe 160 apartamente.

Në Volgograd, një depo nafte dhe një nënstacion elektrik u përfshinë nga flakët si pasojë e rënies së mbetjeve nga dronët, tha guvernatori rajonal, Andrei Bocharov.

Një ditë më herët, autoritetet në Ukrainë thanë se sulmet ruse me raketa shënjestruan disa qytete në këtë vend, duke vrarë 37 njerëz – prej tyre 21 në Kiev.

Shënjestër e sulmeve ishte edhe një spital për fëmijë, ku mbetën të vrarë dy punonjës.

Perëndimi i dënoi sulmet ruse, ndërsa Këshilli i Sigurimit i Kombeve të Bashkuara pritet të diskutojë sot për to./REL

Dy kamionë u dogjën në orët e para të së martës në Mitrovicë të Veriut, ndërsa zjarri prej tyre dëmtoi edhe një veturë udhëtarësh.

Zjarri ka të ngjarë të ketë qenë i qëllimshëm, tha për Radion Evropa e Lirë zëvendësdrejtori i Policisë së Kosovës për Rajonin Verior, Veton Elshani.

Ai nuk dha detaje të tjera rreth rastit, përveçse nuk ka të dyshuar dhe se hetimet janë duke u zhvilluar.

REL-i mori vesh se pronarë të kamionëve janë shqiptarë, të cilët kanë biznese me shumicë në veri të Mitrovicës, ndërsa automjeti i dëmtuar i pasagjerëve është në pronësi të një serbi, D.P.

Zjarrit që përfshiu kamionët, i paraprinë tri shpërthime.

Në veri të Kosovës – zonë e banuar me shumicë serbe – kanë ndodhur disa incidente të ngjashme këtë vit.

Në fillim të qershorit janë djegur dy makina në vendin e njëjtë ku janë djegur edhe kamionët e fundit, ndërsa në fillim të prillit, një pjesëtari të policisë kufitare të Kosovës i është djegur, po ashtu, vetura.

Në fillim të muajit mars është djegur edhe një restorant në pronësi të Natasha Tomaniqit, ish-zëvendëskryetare e Komunës së Zveçanit.

Ajo dhe autoritetet lokale kanë thënë se dyshohet se zjarri është shkaktuar qëllimisht.

Në fund të marsit, ndërkaq, është djegur një objekt në pronësi të Nenad Radosavleviqit, ish-drejtor i Administratës për Sport, Rini dhe Kulturë në Komunën e Leposaviqit.

Radosavleviq ka thënë për REL-in atëkohë se beson se motivi për zjarrvënien ka qenë i natyrës politike.

Gjatë vitit 2023 dhe në fund të vitit 2022, kur ka qenë në proces riregjistrimi i automjeteve me targa të Kosovës në veri, janë djegur disa vetura me targa RKS (Republika e Kosovës) në atë zonë.

Presidenti amerikan Joe Biden ka dënuar valën e sulmeve raketore ruse që vranë të paktën 41 njerëz në Ukrainë si një “kujtues i tmerrshëm i brutalitetit të Rusisë”, pasi ai u zotua të forcojë mbrojtjen ajrore të Kievit.

Të paktën 166 persona u plagosën në të gjithë vendin, duke përfshirë disa në një spital për fëmijë në kryeqytetin Kiev të hënën.

Kjo vjen ndërsa Biden përgatitet të presë një samit të NATO-s në Uashington të martën.

Presidenti i SHBA tha se në takim do të njoftohen përforcime të mëtejshme për mbrojtjen ajrore të Ukrainës.

Udhëheqësit nga 32 shtetet anëtare të NATO-s, vendet e tyre partnere dhe BE-ja po mblidhen për të shënuar 75-vjetorin e bllokut.

Biden tha se ai do të mirëpresë presidentin e Ukrainës Volodymyr Zelensky dhe liderë të tjerë të NATO-s.

Samiti do të fokusohet në mbrojtjen dhe parandalimin në kontekstin e pushtimit rus të Ukrainës.

“Ne do të shpallim masa të reja për të forcuar mbrojtjen ajrore të Ukrainës për të ndihmuar në mbrojtjen e qyteteve dhe civilëve të tyre nga sulmet ruse”, tha Biden.

“Unë do të takohem me Presidentin Zelenskyy për të bërë të qartë se mbështetja jonë për Ukrainën është e palëkundur.”

Këshilli i Sigurimit i OKB-së do të takohet gjithashtu të martën me kërkesë të Ukrainës.

Sekretari i Përgjithshëm i OKB-së Antonio Guterres iu bashkua zyrtarëve perëndimorë në dënimin e sulmit raketor të Rusisë ndaj Ukrainës.

Kryetari i komunës së Kievit, Vitali Klitschko, shpalli 9 korrikun si ditë zie pas sulmeve vdekjeprurëse në kryeqytet.

Dy persona vdiqën kur një raketë rrafshoi një pjesë të Spitalit të Fëmijëve Ohmatdyt – objekti më i madh i pediatrisë në Ukrainë – dhe kërkimi për të mbijetuar nën rrënoja vazhdoi deri në orët e para të së martës.

Presidenti Zelensky u ka kërkuar aleatëve perëndimorë që të rrisin furnizimet e mbrojtjes ajrore për muaj të tërë, mes sulmeve të shtuara ruse. Zyrtarët e OKB-së thanë se maji ishte muaji më vdekjeprurës për viktimat civile në pothuajse një vit.

Qeveria në Kiev thotë se ka dëshpërimisht nevojë për sisteme të reja të mbrojtjes ajrore Patriot të prodhuara nga SHBA. Por zyrtarët perëndimorë kanë hezituar të dorëzojnë më shumë nga numri i kufizuar i baterive tokë-ajër të shpërndara në të gjithë aleancën e NATO-s./BBC/