Blog

Kryeministri i Republikës së Kosovës, Albin Kurti ka deklaruar se nuk ka informacione nëse ka telashe në përgatitjet për organizimin e Lojërave Mesdhetare që do të zhvillohen në Kosovë në vitin 2030.

I pyetur nga media për këtë çështje, Kurti ka theksuar se është Ministria e Kulturës, Rinisë dhe Sportit që mund të jap përgjigje më të detajuara rreth kësaj çështje.

“Për çështjen e Lojërave Mesdhetare, unë nuk kam kurrfarë informacioni që ka probleme, përkundrazi, dhe për këtë është Ministria e Kulturës, Rinisë dhe Sportit, përkatësisht zëvendësministrja Daulina Osmani e cila mund t’iu jep përgjigje më të mirë”.

Instituti i Kosovës për Drejtësi (IKD) njoftoi se i është refuzuar monitorimi i konkursit për zgjedhjen e përfaqësuesit të sindikatave në Fondin Pensional.

IKD-ja ka thënë të martën se kërkesa ishte bërë me qëllim të monitorimit për të rritur nivelin e integritetit të procesit të përzgjedhjes së anëtarëve në Bordin e FKP-së.

Kjo organizatë tha se s’ka marrë përgjigje në dy kërkesat e bëra.

Në ndërkohë, sipas informacioneve tona, procesi i intervistimit për këto dy pozita do të fillojë sot.

“IKD shpreh shqetësimin e thellë për qasjen mospërfillëse të institucioneve të lartpërmendura ndaj mungesës së transparencës dhe llogaridhënies, duke injoruar në heshtje kërkesën e shoqërisë civile. Andaj, vlerësojmë se qasja e tillë është tregues i qartë i refuzimit në heshtje për ta monitoruar këtë proces. Kjo mospërgjigje dëshmon qëllimin për të shmangur situatat ku duhet të promovohen parimet dhe praktikat e bazuar në meritë në këtë proces të rëndësishëm të rekrutimit. Kufizimi i qasjes për IKD-në, tregon mungesën e transparencës dhe llogaridhënies nga institucionet, e që në mungesë të mbikëqyrjes së nevojshme mund të dërgojë edhe në rritjen e rrezikut të abuzimit dhe mungesës së një procesi të bazuar në integritet dhe meritokraci. IKD vlerëson se bashkëpunimi i hapur dhe konstruktiv mes institucioneve shtetërore dhe shoqërisë civile, është vlerë që do ta përforconte demokracinë, transparencën dhe do të ndihmonte në ndërtimin e një administrate të qëndrueshme dhe efektive për të mirën e të gjithë qytetarëve. Në anën tjetër, për të përmirësuar situatën, është e nevojshme që institucionet shtetërore të zbatojnë standarde më të larta të transparencës dhe të lejojnë monitorimin e pavarur nga organizatat e shoqërisë civile, e që në situatën aktuale po ndodh e kundërta”, thuhet në komunikatë.

Instituti ka thënë tutje se konkursi për pozitën e përfaqësuesit të sindikatave u bë vetëm pas reagimit të IKD-së.

Kryeministri i Kosovës, Albin Kurti dhe ministri i Shëndetësisë, kanë vizituar Klinikën e Kardiokirurgjisë në Qendrën Klinike Universitare të Kosovës, me ç’rast u përuruan renovimet në vlerë prej 750 mijë euro, raporton EO.

Kurti tha se krahas renovimit të tërësishëm, janë shtuar edhe shtretërit dhe hapësira brenda kësaj klinike.

“Ky investim është bërë në vlerën e 750 mijë eurove. Në kujdesin intensiv nga katër në 10 ndërkaq në repart nga 14 në 17, gjithashtu janë edhe zona e filtrimit të cilat ndalojnë infektimit, si dhe kemi arritur që gjatë renovimi të zbulojmë 200 metra katror hapësirë që nuk është përdorur më herët dhe që tash kemi vend edhe për arkiva dhe për zyrë dhe ka kushte të mira si për pacientë por edhe për mjekët. Siç themi klinikë pas klinike po rregullojë shëndetin, para meje kemi një aparaturë e cila shërben që gjatë operacioneve që kur ndalen zemra zëvendëson edhe zemrën edhe mushkëritë”, u shpreh Kurti.

Ministri i Shëndetësisë, Arben Vitia, tha sfidë ka qenë vendi për t’i vendosur pacientët në kohën sa është rinovuar kjo klinikë.

“Sot po e lansojmë edhe një klinikë me kushtet me moderne të mundshme, një klinikë si kjo kanë mundësi që t’i marrin shërbimet që nuk kanë mundur t’i marrin më herët. Sfida e vetme ka qenë ku t’i vendosin pacientët kur bëhen këto renovime. Në mënyrën më të mirë e kemi bërë zhvendosjen e pacientëve dhe nuk ka pasur mosndalje të shërbimeve. Të gjithë njerëzit vullnetmirë që kanë kontribuar në këtë renovim iu falënderojmë, iu garantojmë që të gjithë shërbimet do të kryhen në këtë klinikë”, u shpreh Vitia.

E këto investime u panë të mirëseardhura nga drejtori i Klinikës së Kardiokirurgjisë, Shpejtim Shurdhiqi. Ai tha se do të jetë lehtësim për stafin e për pacientët.

“Kemi arritur të bëjmë një ritransformim jashtëzakonisht të mirë të Kardiologjisë. Që nga hapja e tij në vitin 2013 ka pasur nevojë për një renovim sigurisht që do të jetë një lehtësim i madh për stafin dhe sigurisht edhe për pacientët dhe kjo aparaturë mundëson që të rriten numri i pacientëve dhe krijon mundësinë e kryerjes së operacioneve më komplekse. E cila ka një shpresë që brenda dy viteve vazhdojmë me procedura të tjera më specifike që ne i synojmë”, u shpreh ai.

Kryeministri i Kosovës, Albin Kurti është pyetur nëse dinë zyrtarisht se i vrari në Serbi, është Faton Hajrizi, por ai ka thënë se dy ministrinë e qeverisë që drejton po e trajtojnë këtë çështje.

“Dy ministritë tona, e punëve të brendshme dhe të drejtësisë e trajtojnë këtë çështje, nuk kam nevojë ta bëjë edhe punën e ministrit, besoni kam shumë punë si kryeministër”, ka thënë ai.

Lidhur me rastin e pretenduar nga ana e Serbisë të vrasjes së qytetarit të Kosovës në Serbi, Ministria e Punëve të Jashtme dje ka njoftuar që janë njoftuar nga Drejtoria e Bashkëpunimit Ndërkombëtar Policor – ILECU e Policisë së Kosovës se autoritetet serbe, më datë 22/07/2024, kanë dërguar shenjat e gishtërinjve të një personi dhe të njëjtat shenja së bashku me shenjat e gishtërinjve të qytetarit të Kosovës, Faton Hajrizi, janë përcjellë në Agjencinë e Kosovës për Forenzikë, ku pas krahasimit nga AKF, ILECU ka pranuar përgjigje se këto gjurmë i përkasin qytetarit të raportuar si i vrarë, Faton Hajrizi.

“Duke lutur opinionin që të gjitha këto lajme nga Serbia të merren me rezervë deri në konfirmimin e plotë të tyre, Ministria e Punëve të Jashtme dhe Diasporës do t’iu mbajë të informuar sapo të ketë informacione të reja në lidhje me këtë rast”, thuhet në njoftim.

Ministrja e Drejtësisë, Albulena Haxhiu e ka vazhduar të martën intervistimin nga Prokuroria Speciale e Kosovës. Haxhiu është parë së bashku me avokatin e saj, Tomë Gashi, teksa hyjnë në objektin e Policisë së Kosovë mbi deklarimet e saj për arratisjet e fundit nga burgjet e Kosovës, raporton EO.

Për të njëjtën temë, Haxhiu është intervistuar edhe të hënën.

Ditë më parë, Haxhiu shkroi në Facebook se arratisjet e fundit nga burgjet e Kosovës – e mes të arratisurve ishte edhe Faton Hajrizi – janë lehtësuar dhe organizuar nga Serbia.

“Informacionet e organeve tona sugjerojnë që së paku në disa raste, këto arratisje janë cytur, organizuar, bashkorganizuar e lehtësuar nga grupe kriminale të lidhura me struktura të pushtetit në territorin e Serbisë. Ky organizim konsiston në dhënien e garancisë që për personat e tillë territori i Serbisë, grupet kriminale atje, e nivele të caktuara të pushtetit, u ofrojnë mburojë nga ndjekja penale e Republikës se Kosovës”, ka shkruar ministrja Haxhiu.