Blog

Oda Ekonomike Amerikane në Kosovë përmes një komunikate për media shpreh shqetësimin e saj të thellë lidhur me vazhdimin e trajtimit të favorizuar të ndërmarrjeve publike nga ana e Qeverisë së Republikës së Kosovës, të cilat cenojnë, sipas OEAK-së, parimet e konkurrencës së lirë dhe ekonomisë së tregut, në kundërshtim me aktet juridike të shtetit.

Në komunikatë po ashtu thuhet se përgjatë viteve të kaluara – specifikisht në 2016, 2019 dhe 2020 – Oda Amerikane ka shprehur shqetësimin e saj lidhur me diskriminimin që u është bërë ndërmarrjeve private në favor të ndërmarrjeve publike, respektivisht aplikimin e gabueshëm të dispozitave për blerjet “brenda shtëpisë” përmes të cilave autoritetet publike blejnë shërbime nga ndërmarrjet publike në kundërshtim me dispozitat kushtetuese dhe Ligjin e Prokurimit Publik.

Sipas tyre shqetësues vazhdon të jetë promovimi direkt i shërbimeve dhe produkteve të operatorit shtetëror të telefonisë mobile, në kundërshtim me dispozitat e Ligjit për Ndërmarrjet Publike.

“Oda Amerikane rikujton hisedarët shtetërorë se Neni 13 i këtij Ligji, respektivisht paragrafi 13.1 e thotë në mënyrë të qartë se të gjitha ndërmarrjet publike si dhe zyrtarët dhe drejtorët e tyre, pa asnjë përjashtim, u nënshtrohen ligjeve, rregulloreve dhe akteve nënligjore të cilat i rregullojnë shoqëritë tregtare në pronësi private”.

“Oda Amerikane ka përcjell veprimet e zyrtarëve më të lartë të Qeverisë, përfshirë kryeministrin, të cilët qartazi kanë promovuar produktet e kësaj ndërmarrje publike para qytetarëve të Kosovës dhe pjesëtarëve të diasporës, në kundërshtim direkt me dispozitat e ligjit që rregullon funksionimin e ndërmarrjeve publike. Favorizimet direkte dhe indirekte të kësaj ndërmarrje publike kundrejt operatorit privat, respektivisht një investitori të huaj, në një treg të rregulluar, përbëjnë shkelje jo vetëm të dispozitave të ligjit të sipërcekur, por edhe të aktit më të lartë juridik – Kushtetutës së Republikës së Kosovës, e cila parasheh që bazë e rregullimit ekonomik të Republikës së Kosovës është ekonomia e tregut me konkurrencë të lirë”, thuhet në komunikatë.

Tutje nga Oda Amerikane thonë se brengosës është edhe mosveprimi i Autoritetit të Konkurrencës dhe organeve të tjera ligjzbatuese në Kosovë, për mbrojtjen e ligjshmërisë dhe kushtetueshmërisë në Republikën e Kosovës.

Në përmbyllje, Oda Ekonomike Amerikane në Kosovë, u bënë thirrje edhe një herë të gjitha institucioneve të Republikës së Kosovës, që të ndërpresin menjëherë praktikën e favorizimit të ndërmarrjeve publike dhe diskriminimit të ndërmarrjeve private dhe investitorëve të huaj në vend, në kundërshtim me dispozitat kushtetuese e ligjore.

“Secili veprim ndryshe i autoriteteve publike të cilat kanë përgjegjësi për ofrimin e mjedisit të barabartë për të gjithë operatorët ekonomik, privatë dhe publikë, do të rëndojë më tej klimën e të bërit biznes në vend dhe do të cenojë prospektet e Kosovës për tërheqjen e investimeve të huaja direkte”, përfundon komunikata.

Mehdi Taremi po krahasohet me ish-sulmuesit e Serisë A, Miroslav Klose dhe Edin Dzeko nga anëtarët e shtypit italian, pasi shënoi tre gola në dy paraqitjet e tij të para për klubin gjatë përgatitjeve të tyre parasezonale.

“La Gazzetta dello Sport” sugjeroi se Taremi posedon karakteristika të ngjashme si Klose ashtu edhe Dzeko, të cilët të dy u drejtuan nga Simone Inzaghi; i pari te Lazio dhe i dyti në “Giuseppe Meazza”, raporton KosovaPress.

Ata gjithashtu sugjerojnë që Taremi arrin në Serie A në një kohë të ngjashme me atë sikurse Klose dhe Dzeko.

Klose ishte 33 vjeç në momentin e ardhjes së tij dhe vazhdoi të shënonte 55 gola të rëndësishëm për Lazio në Serie A. Dzeko ishte pak më i ri kur nënshkroi fillimisht për Romën në formë huazimi, 29 vjeç për të qenë më të saktë, por vazhdoi me 107 gola në Serie A me “Giallorossi” dhe “Nerazzurri”.

“Gazzetta” gjithashtu konfirmon se Taremi do të udhëheqë sulmin për Interin edhe në miqësoret e ardhshme, ndërsa Inzaghi pret që sulmuesit e tjerë të tij të lartë të kthehen nga detyra ndërkombëtare.

Lautaro Martinez, Marcus Thuram dhe Marko Arnautovic ishin të gjithë në Kupën e Amerikës dhe Euro 2024 për Argjentinën, Francën dhe Austrinë respektivisht.

Rusia njoftoi të martën se 13 drejtuesit kryesorë të kompanive të mëdha japoneze do të ndalohen të hyjnë në vend si hakmarrje për masat kufizuese të Tokios kundër Moskës.

Ministria e Jashtme tha në një deklaratë se Rusia ka futur në listën e zezë presidenten e Agjencisë Japoneze të Bashkëpunimit Ndërkombëtar Tanaka Akihiko, Kryetarin e Bordit të Toyota Motor Toyoda Akio, themeluesin e Korporatës Rakuten Mikitani Hiroshi dhe të tjerë.

Në listën e sanksioneve janë edhe biznesmenë të tjerë japonezë./AA/

18 trupa të pasagjerëve dhe ekuipazhit janë gjetur pas rrëzimit të një avioni të mërkurën në Nepal.

Kapiteni MR Shakya i aeroplanit të Saurya Airlines u shpëtua dhe është nën trajtim në një spital.

Avioni “u rrëzua gjatë ngritjes” në Aeroportin Ndërkombëtar Tribhuvan (TIA) në kryeqytetin Katmandu, raportoi e përditshmja Kathmandu Post.

Premnath Thakur, zëdhënësi i TIA, tha se incidenti ndodhi rreth orës 11:00 (me kohë lokale).

Në mesin e 19 personave ishin edhe anëtarë të ekuipazhit dhe avioni ishte nisur për në qytetin Pokhara në Nepalin qendror.

Ushtria nepaleze drejtoi operacionet e shpëtimit që janë duke u zhvilluar në vendin e aksidentit./AA/

Kryeministri i Republikës së Kosovës, Albin Kurti, ka kritikuar Prokurorinë, që ende nuk ka ngritur aktakuzë ndaj Milan Radoiçiq, i cili mori përgjegjësinë për sulmin terrorist të 24 shtatorit në Banjskë të Zveçanit, ku mbeti i vrarë rreshteri policor, Afrim Bunjaku.

Në mbledhjen e sotme të Qeverisë, Kurti është shprehur se Prokurorisë s’i kanë mjaftuar dhjetë muaj për të ngritur aktakuzë, por s’iu deshën as dhjetë orë për ta intervistuar ministren e Drejtësisë, Albulena Haxhiu.

“Sot janë bërë fiks 10 muaj nga vrasja e Afrim Bunjakut… në Kosovë nuk është ngritur ende aktakuzë ndaj Milan Radoiçiqit. Prokurorisë sonë nuk i kanë mjaftuar 10 muaj për të ngritur aktakuzë, por nuk iu deshën as 10 orë për ta marrë në pyetje ministren e Drejtësisë për një status në Facebook”, ka shtuar Kurti.

Prokuroria Speciale ka intervistuar për dy ditë me radhë ministren Haxhiu, pasi përmes një postimi në rrjetin social Facebook ka pretenduar se arratisjet e të burgosurve nga burgjet e Kosovës, janë lehtësuar dhe organizuar nga Serbia.

2.5 milionë euro rrezikohet t’i humb Komuna e Gjilanit për shkak të bllokimit të të hyrave vetanake nga Kuvendi komunal. Kështu ka deklaruar i pari i kësaj komune, Alban Hyseni.

Në një intervistë për KosovaPress, ai thotë se ende vazhdojnë të përballen me sfida të trashëguara nga qeverisjet e kaluara, derisa shton se duhet të votohet bartja e buxhetit, në të kundërtën këto fonde nuk mund të shpenzohen për të mirën e qytetarëve.

“Ndërkohë edhe për këtë vit problemin më shumë e kemi me Kuvendin komunal që na ka bllokuar të hyrat vetanake nga viti paraprak për këtë vit dhe është tash muaji i pestë që nuk na voton bartjen e buxhetit, me të cilën 2.5 milionë euro rrezikojnë të na humbin ose të mos shfrytëzohen për të mirën e qytetarëve në projekte kapitale, subvencione dhe kategori të ndryshme të buxhetit”, thotë Hyseni.

Hyseni gjithashtu theksoi sfidat e shumta me të cilat përballet kjo komunë, përfshirë borxhet e trashëguara dhe problemet me implementimin e projekteve të mëparshme.

“(Sfida) ka të shumta e të panumërta. Një prej sfidave me të cilat jemi përballur dhe vazhdojmë të kemi ende me gjithë se jo në nivelin e njëjtë është edhe çështja e borxheve që kemi trashëguar. Janë mbi 10.5 milionë euro që brenda këtij viti do të bëhen total të paguara nga qeverisja jonë për tre vite me radhë. Ndërkohë që sfidat tjera kanë të bëjnë edhe me implementimin e projekteve që i kemi trashëguar, hyrje-daljet e qytetit, autostrada dhe projekte të shumta të cilat po vazhdojmë të ballafaqohemi me probleme të ndryshme, me kontrata të vjetra që pas inflacionit po bëhen të vështira të realizohen por edhe defekte në projekte, mungesa të planifikimeve e kështu me radhë”, tha ai.

Megjithatë, Hyseni thotë ka edhe rezultate të shumta të cilat mund të maten në këtë komunë, derisa tregon për punën që kanë bërë prej marrjes së mandatit.

“Ka rezultate të shumta të cilat mund të maten në komunën tonë. Kemi gjithsej 12 sektorë të ndarë nëpër drejtori që funksionojnë, ndërkohë që prioritet për ne ka qenë arsimi, shëndetësia dhe fushat e tjera, ndërkohë që edhe bujqësia është një prej sektorëve që është përkrahur shumë. Në vitin 2021 planifikimi i buxhetit dhe votimi nga ish qeverisja ka qenë 400 mijë euro, me të cilin ne kemi punuar në vitin 2022. Ndërkohë viti 2022 ka qenë vit planifikimi për ne për vitin 2023 me të cilin kemi punuar ne me buxhetin tonë dhe nga 400 mijë kemi rrit buxhetin në 800 mijë euro, ndërkohë përmes organizatave tjera kemi rrit buxhetin edhe për 700 mijë të tjera që i bie 1.5 milion

Ndërkaq, sa i përket bashkëpunimit me qeverinë, ai shprehet se janë të kënaqur.

“Jemi të kënaqur, nuk kemi ndonjë telash të veçantë, sigurisht që kërkesat dhe nevojat janë shumë të mëdha, mirëpo praktikisht aty ku janë të arsyeshme, mbështetja është edhe në nivel”, thotë Hyseni.