Blog

Presidentja e Republikës së Kosovës, Vjosa Osmani, me ftesë të Presidentit të Republikës Emmanuel Macron dhe të Presidentit të Komitetit Olimpik Ndërkombëtar, Thomas Bach, ka udhëtuar për në Paris për të marrë pjesë krahas liderëve të shumtë botërorë, në ceremoninë hapëse të Lojërave Olimpike Paris 2024, dhe për t’i mbështetur 9 sportistët që do ta përfaqësojnë Kosovën në këto Lojëra.

Me këtë rast, Presidentja Osmani ka potencuar se për Kosovën, pjesëmarrja në Lojëra Olimpike paraqet kulmin e punës së palodhur, përkushtimit dhe vendosmërisë së sportistëve tanë.

“Është një dëshmi e qëndrueshmërisë së shtetit tonë dhe aftësisë për t’u ngritur mbi sfidat dhe për të shkëlqyer në skenën botërore”, ka theksuar Presidentja Osmani.

Në kuadër të vizitës në Paris, Presidentja Osmani do të marrë pjesë në Samitin “Sporti për zhvillim të qëndrueshëm”, i cili organizohet nga Presidenti i Republikës së Francës, Emmanuel Macron.

Gjatë qëndrimit në Paris, Presidentja Osmani e shoqëruar nga Zotëria i parë, Prindon Sadriu, janë të ftuar në pritjen e organizuar nga Presidenti i Francës në Pallatin Elize dhe në të njëjtën kohë do ta ndjekin paraqitjen e sportistëve të Republikës së Kosovës në Trokadero. Ata gjithashtu janë të ftuar edhe në darkën e organizuar nga Presidenti i Komitetit Olimpik Ndërkombëtar.

Kosova në Lojërat Olimpike Paris 2024, do të përfaqësohet me 9 sportistë në disa disiplina sportive.

Dy anëtare të stafit që punojnë për ekipin kanadez të futbollit për femra janë dërguar në shtëpi pasi Zelanda e Re u ankua se një dron po përdorej për të spiunuar seancën e tyre stërvitore.

Stafi nga ekipi i Zelandës së Re vuri re një dron që fluturonte mbi seancën e tyre stërvitore në “St Etienne” të hënën, raporton KosovaPress.

Duke e raportuar atë në polici, operatori u identifikua si një anëtare e stafit mbështetës të ekipit të Kanadasë. Personi u ndalua nga policia franceze.

Komiteti Olimpik Kanadez më vonë konfirmoi se ndihmës-trajnerja Jasmine Mander dhe analisti Joseph Lombardi u përjashtuan nga ekipi pas incidentit.

Trajnerja kryesore e Kanadasë, Bev Priestman gjithashtu u largua nga pozita e saj.

Kanadaja është kampionia olimpike në fuqi dhe kundërshtari i parë i Zelandës së Re në Lojërat e Parisit të enjten.

Një deklaratë e lëshuar nga Komiteti Olimpik i Zelandës së Re tha se ata ishin “thellësisht të tronditur dhe të zhgënjyer nga ky incident” dhe kërkonin përgjigje.

“NZOC ka paraqitur zyrtarisht incidentin në njësinë e integritetit të IOC dhe i ka kërkuar Kanadasë një rishikim të plotë,” thuhej në deklaratë.

“NZOC dhe Futbolli i Zelandës së Re janë të përkushtuar për të ruajtur integritetin dhe drejtësinë e Lojërave Olimpike”, thuhej më tej në deklaratë.

Priestman kërkoi falje për shkeljen.

“Në emër të gjithë ekipit tonë, para së gjithash dua t’u kërkoj falje lojtarëve dhe stafit të Zelandës së Re dhe lojtarëve të Team Canada. Kjo nuk përfaqëson vlerat për të cilat përfaqëson ekipi ynë. Unë jam përfundimisht përgjegjës për sjelljen në programin tonë”, tha Priestman.

Kryetari i Federatës së Futbollit të Kosovës, Agim Ademi, e ka vizituar sot stadiumin e Gjakovës, ku po kryhen punimet që ky të bëhet i kategorisë së katërt, sipas standardeve të UEFA-s.

Ademi tha se ky stadium do t’i mundësojë kombëtares së Kosovës zhvillimin e ndeshjeve, e për çka ky dha një premtim.

“Në vitin 2026, Kombëtarja jonë do të zhvillojë ndeshjen e parë në këtë stadium, qoftë ajo miqësore apo zyrtare”, tha Ademi.

I pari i FFK-së e ka përgëzuar kryetarin e Gjakovës Ardian Gjinin, për punë e jashtëzakonshme, që ka bërë në fillimin dhe realizimin e këtij projekti madhor.

“Stadiumi, me kapacitet prej 14,500 ulësesh, do të plotësojë të gjitha kriteret për zhvillimin e ndeshjeve ndërkombëtare. Ky projekt filloi me fonde lokale dhe tani po vazhdon me ndihmën e Ministrisë së Sportit, duke pasur përkushtimin e madh të kryetarit Gjini që nga fillimi deri në realizimin e tij. Gjithashtu, me kryetarin Gjini u dakorduam për nënshkrimin e një Memorandumi Bashkëpunimi për një fushë ndihmëse, sipas modelit tonë me komunat”, tha kreu i FFK-së.

Komuna e Gjakovës do të kryejë procedurat bazë, ndërsa FFK do të ndërtojë fushën.

Po ashtu, do të ndërhyjmë edhe në riparimin e fushës stërvitore në Shkugëz, e cila është degraduar pas ndërtimit nga federata.

Bashkërisht me komunën, do ta riparojmë dhe organizojmë atë në mënyrën më të mirë që të jetë në gjendje optimale për klubet.

Ndërkaq, fusha e re do të jetë nën menaxhimin e Ligës Rajonale të Futbollit t% Gjakovës dhe do të shërbejë për të gjitha shkollat e futbollit që nuk zotërojnë fushat e tyre.