Komuna e Prishtinës ka njoftuar se ka ndryshuar orari i nisjes së autobusëve për në Bërnicë ku edhe pritet të mbahet festivali SunnyHill.
Përmes një postimi në Facebook, Komuna e Prishtinës ka bërë të ditur se nisja tani do të bëhet në orën 14:00 te parkingu i Pallatit të Rinisë dhe se transport do të ketë deri në orën 05:00 të mëngjesit.
Derisa vendimi për pagesë nuk ka ndryshuar, transporti vazhdon të jetë pa pagesë për pjesëmarrësit në festivalin SunnyHill përgjatë katër ditëve.
Programi i Kombeve të Bashkuara për Zhvillim (UNDP) në Kosovë publikoi edicionin e 26-të të Përmbledhjes të Pulsit Publik në një konferencë për media të mbajtur sot.
Anketimi i opinionit të Pulsit Publik nxjerr në pah perceptimet e njerëzve për çështjet socio-ekonomike, politike dhe të sigurisë. Të dhënat për këtë përmbledhje janë mbledhur nga 17 prilli deri më 7 maj 2024, duke reflektuar opinionin e mbi 1,300 të anketuarve që mbulojnë të tridhjetë e tetë komunat, duke përfshirë zonat urbane dhe rurale, dhe duke përfshirë të gjitha komunitetet e Kosovës.
Disa nga gjetjet kryesore të anketës përfshijnë:
• Të dhënat tregojnë se mesatarisht 50.1% e njerëzve janë të kënaqur me punën e institucioneve kryesore qendrore të Kosovës.
• Kënaqshmëria me punën e Kabinetit Ekzekutiv u regjistrua në 53.3%, ndërsa me punën e Kryeministrit u regjistrua në 58.3%.
• Kënaqshmëria me punën e Kuvendit ishte 52.10%, ndërsa kënaqshmëria me Kryetarin e Kuvendit ishte 64.4%.
• Kënaqshmëria me Presidenten është regjistruar në 69%.
• Shkalla e kënaqshmërisë me gjykatat ishte 27.1% dhe me Prokurorinë 26.5%
• Varfëria (16.6%), papunësia (16.3%) dhe çmimet për furnizimet thelbësore (12.7%), u regjistruan si tre çështjet kryesore. Shërbimet e kujdesit shëndetësor (7.8%) dhe mjedisi (5.6%) plotësuan pesë problemet kryesore.
• Për shqiptarët e Kosovës, tri çështjet kryesore ishin papunësia (16.8%), varfëria (16.6%) dhe çmimet për furnizimet esenciale (12.8%). Për serbët e Kosovës, varfëria (15.2%), problemet e hapësirës urbane (13.8%) dhe marrëdhëniet ndëretnike (13.3%) ishin tri çështjet kryesore, ndërsa për komunitetet e tjera të Kosovës, çështjet kryesore ishin varfëria (19.5%), furnizimi me energji elektrike. (14.2%) dhe problemet e hapësirës urbane (11.1%).
• Një total prej 83.2% përqind e të anketuarve raportuan se ndjehen të sigurt nga dhuna dhe krimi kur janë në rrugë. Të dhënat e ndara sipas gjinisë treguan se 83.4% e burrave dhe 82.9% e grave ndjehen të sigurt kur janë në rrugë.
• Të dhënat e ndara sipas përkatësisë etnike treguan se një numër më i madh i shqiptarëve të Kosovës (85.3%) dhe komuniteteve tjera të Kosovës (83.2%) krahasuar me serbët e Kosovës (31.9%) ndiheshin të sigurt kur ishin jashtë në rrugë.
• 60% e të anketuarve besojnë se punësimi në sektorin privat fitohet në bazë të meritës, krahasuar me punësimin në sektorin publik, për të cilin vetëm 32% e të anketuarve kanë pohuar të njëjtën gjë.
• Një rritje si në Indeksin e Demokratizimit (ID-ja) ashtu edhe në Indeksin e Besueshmërisë Ekonomike (IBE-ja) u regjistrua në anketën e fundit të opinionit me ID që aktualisht qëndron në 1.62 dhe IBE në 1.21.
• 27.3% e të anketuarve janë deklaruar se janë shumë të kënaqur apo të kënaqur me drejtimin ekonomik, ndërsa 36.33% e të anketuarve janë deklaruar se janë shumë të kënaqur apo të kënaqur me drejtimin politik drejt të cilit po shkon Kosova aktualisht.
• Mesatarisht, 19.9% e të anketuarve kanë perceptuar se ekziston korrupsioni në shkallë të gjerë. Policia e Kosovës me 12.40% është perceptuar si institucioni më pak i korruptuar, e ndjekur nga organizatat ndërkombëtare me 13.70%.
• Për 65.3% të të anketuarve, informacioni nëpërmjet medias është ai që ka formësuar perceptimin e tyre për korrupsionin në shkallë të gjerë. 26.8% e të anketuarve kanë pohuar se biseda me të afërmit është ajo që ka formësuar perceptimin e tyre, ndërsa 6.3% e të anketuarve kanë pohuar se përvojat personale kanë formësuar perceptimin e tyre.
• Të dhënat e ndara etnikisht treguan se gjithsej 81% e komuniteteve të tjera të Kosovës, 76% e shqiptarëve të Kosovës dhe 54% e serbëve të Kosovës kishin gjasa të votonin nëse zgjedhjet do të mbaheshin së shpejti.
• Gjithsej 10.9% e të anketuarve besojnë plotësisht dhe 40.9% e tyre besojnë se Marrëveshja për rrugën drejt normalizimit të marrëdhënieve ndërmjet Prishtinës dhe Beogradit do të ndikojë pozitivisht në jetën e njerëzve. Të dhënat e ndara sipas përkatësisë etnike treguan se 52.9% e shqiptarëve të Kosovës dhe 51.6% e komuniteteve të tjera të Kosovës kishin një pikëpamje pozitive për Marrëveshjen, krahasuar me 25.7% të serbëve të Kosovës.
Të dhënat shtesë të marra nga ky sondazh dhe nga sondazhet e mëparshme do të vihen në dispozicion në Platformën e Vizualizimit të të Dhënave të Pulsit Publik dhe ASKData: https://bit.ly/44GqPyi
Përmbledhja e Pulsit Publik publikohet dy herë në vit dhe që më shumë se njëzet vite ka ndihmuar që institucioneve dhe akterëve të Kosovës t’u ofrohen të dhëna të paanshme dhe të besueshme për treguesit kryesorë në lidhje me perceptimin e qytetarëve për çështjet socioekonomike, politike, të sigurisë dhe ato mjedisore. Të dhënat e Përmbledhjes së Pulsit Publik 26 janë mbledhur nga 17 prilli deri më 7 maj të vitit 2024, duke e pasqyruar opinionin e mbi 1,300 të anketuarve mbi moshën 18 vjeçare. Mostra përfshinte të njëjtin numër të burrave dhe grave nga të gjitha komunat dhe rajonet e Kosovës, duke mbuluar si zonat urbane ashtu edhe ato rurale. Sa i përket përfaqësimit etnik, mostra përfshinte 896 shqiptarë të Kosovës, 210 serbë të Kosovës dhe 200 anëtarë të komuniteteve të tjera të Kosovës (ashkali, boshnjakë, egjiptianë, goranë, romë dhe turq të Kosovës).
Projekti Pulsit Publik, i cili filloi në vitin 2002, financohet nga USAID-i në Kosovë.
Kapiteni i ekipit grek AEK, kroati Domagoj Vida, shënoi autogol në ndeshjen e parë të xhiros së dytë të fazës kualifikuese në Conference League, kundër Inter Escaldes nga Andorra.
Po zhvillohej minuta e 65-të, ku mbrojtësi kroat goditi me kokë një top ku nuk kishte kundërshtarë afër, por topi u godit më shumë se sa duhet dhe kaloi Thomas Strakoshën për të përfunduar në rrjetën e AEK-ut.
Kjo nuk ishte një gajle e madhe për skuadrën greke, pasi po fitonte me rezultat 4:0.
Portieri shqiptar, Thomas Strakosha, më pas e priti pastaj një penallti, por Inter Escaldes realizoi dy herë të tjera me Sascha Andrea edhe Martinez Viti, për rezultatin përfundimtar prej 4:3.
Për fat të mirë të AEK-ut, andorrasit nuk arritën të barazojnë, ndërsa ndeshja e kthimit luhet javën tjetër në Andorrë.
Dyert e Kuvendit të Kosovës janë hapur sot që nga ora 11:00 për mërgimtarët që aktualisht janë me pushime në vendlindje, raporton EO.
Por interesimi për ta vizituar ishte shumë i vogël nga ana e mërgimtarëve.
Të pranishëm ishin disa deputetë të Lëvizjes Vetëvendosje, të cilët shpjeguan për punën që bëjnë si ligjvënës.
Përfaqësuesja e Kosovës do të marrë pjesë me nëntë garues në Lojërat Olimpike “Paris 2024”, që nis nesër (e premte) në kryeqytetin francez. Për pjesëmarrjen e sportistëve kosovar ka folur për Ekonomia Online, presidenti i Komitetit Olimpik të Kosovës (KOK), Ismet Krasniqi.
Krasniqi ka thënë se për herë të parë Kosova po merr pjesë në olimpiadë edhe në sportin e boksit. Nga nëntë garues, pesë janë nga xhudo, një nga boksi, dy të notit dhe një prej atletikës.
“Në Lojërat Olimpike ‘Paris 2024’, përfaqësohet me nëntë garues nga Kosova, ku gjashtë prej tyre janë në normat olimpike pesë janë prej xhudos dhe një është prej boksit, kur flasim për boksin është për herë të parë në histori që Kosova po merr edhe një normë nga një sport tjetër, sepse jemi mësuar deri më tash vetëm me xhudo. Mirëpo kemi edhe dy me ftesë të universalitetit që janë dy prej notit dhe një prej atletikës. Kështu që të gjithë ekipi është prej nëntë garuesish. Presim prej të gjithave ata që kanë norma olimpike të gjithë janë potencial për medalje, nuk mund të anashkalojmë asnjërin prej garuesve vetëm varet edhe fati sportivë në momente të caktuara. Për të marrë normat olimpike është një sfidë e madhe përballet gjatë katër viteve nëpër Kampionate Evropiane Botërore, duhet të jesh në rang listën top 10-shen botërore, kështu që është një sfidë dhe atë sportit që marrin normën olimpikë janë të gjithë potencial për marrjen e medaljes”, ka thënë Krasniqi.
Krasniqi ka pritshmëri të mëdha për sportistët kosovarë, ndërsa veçon xhudisten Dristria Krasniqi.
“Padyshim që pres nga xhudo, e sidomos nga Distria (Krasniqi) e cila është në nivelin më të lartë të listës së bashku me Laurën, Akili edhe Blin Kuka, kështu që besoj që po shkojmë me pak garues por me kualitet shumë të lartë. Ne si Komitet Olimpikë kemi bërë punën tonë gjatë kësaj periudhe katër vjeçare duke mbështetur sportistët tanë me bursa olimpike me kampe stërvitore e me të gjitha punët që janë të nevojshme për të gjithë garuesit. Përgatitjet i kanë kryer në mënyrën më të mirë të mundshme, të gjithë janë me shëndet të mirë dhe besoj që edhe me pak fat do të kemi medalje edhe në Paris”, shtoi ai.
Ndryshe hapja solemne e Lojërave Olimpike “Paris 2024”, do mbahet më 26 korrik dhe mbaron më 11 gusht.
Lojërat Olimpike “Paris 2024” do të kenë 3,800 orë sport të drejtpërdrejtë dhe do të dhurohen 329 medalje ari në 32 sporte gjatë 18 ditëve të garave, të cilat do të mbahen në Paris dhe në pjesë të tjera të Francës.
Nuk është e thjeshtë të ndalosh së ngrëni gjëra të ëmbla, por të reduktosh sasinë e sheqerit sjellë përfitime të mëdha në shëndet.
Sheqeri shkakton shumë rrudha në trupin e njeriut, ndaj ekspertët këshillojnë se po të reduktoni sasinë e sheqerit, mund të dukeni 10 vjet më të rinj.
Do të jeni më të lumtur
Mund të mendoni se një ëmbëlsirë mund t’ju bëjë të lumtur. Por ekspertët e thonë të kundërtën. Patjetër që ditët e para do ta keni të vështirë pasi trupi është mësuar me sheqer, por më vonë do të ndjeheni të lumtur.
Më pak kile
Mesatarisht ne konsumojmë 22 lugë sheqer në ditë, që është e barabartë me 350 kalori. Nëse ju konsumoni më pak, kjo përkthehet në më pak kile për trupin tuaj.
Më pak shanse për shfaqjen e diabetit
Nëse hani ushqime të kontrolluara me më pak sheqer, patjetër që do të keni shumë më pak mundësi të prekeni nga sëmundja e diabetit.
Do të jetoni më gjatë
Presioni i lartë i gjakut është një faktor i madh rreziku për sëmundjet e zemrës, siç është diabeti dhe obeziteti, të cilat janë të lidhura me konsumin e sheqerit të tepërt. Sheqeri gjithashtu rrit yndyrat që përbëjnë rrezik për sëmundjet e zemrës dhe goditjet në tru.
Autoritetet në Francë kanë nisur një operacion të madh për të pastruar kompjuterët e infektuar nga një program i spiunazhit kibernetik që ka prekur miliona përdorues në mbarë botën.
“Në prag të Olimpiadës, ky operacion tregon se lojtarë të ndryshëm në Francë dhe jashtë vendit janë të mobilizuar që të luftojnë të gjitha format e krimit kibernetik”, tha kryeprokurorja e Parisit, Laure Beccuau, përmes një deklarate më 25 korrik.
Ajo tha se hetuesit po shënjestrojnë një rrjet të ‘bot’-ëve , që dyshohet se kanë infektuar kompjuterët me një virus. Po ashtu ky rrjet besohet se po vjedh të dhëna nga përdoruesit, “veçanërisht për qëllime spiunazhi”.
Beccuau tha se analistët dhe hetuesit kanë arritur të marrin nën kontroll serverin që ka nën kontroll miliona kompjuterë të infektuar me virus.
Autoritetet franceze e kanë nisur këtë operacion më 18 korrik dhe i njëjti pritet të zgjasë disa muaj. Sipas njoftimit, deri më tani autoritetet kanë arritur të ndihmojnë viktima në disa shtete evropiane.
Në njoftimin e kryeprokurores së Parisit nuk u përmend ndonjë kërcënim specifik ndaj Lojërave Olimpike që do të mbahen në Paris. Por, ndaras, agjencia për siguri kibernetike në Francë tha javën e kaluar se sulmet kibernetike do të jenë “të pashmangshme” gjatë Olimpiadës, e cila nis të premten./REL
A ju ndodh shpesh që kur ju bie zilja e zgjimit, ju e fikni atë, ktheheni nga ana tjetër dhe vazhdoni të flini? Nëse po, nuk keni faj. Nuk jemi të programuar për të filluar të punojmë para orës 10:00 të mëngjesit.
Të nisësh punën pas orës 10:00 të mëngjesit? Për momentin është utopi, por në të ardhmen duhet të jetë realitet për të rritur produktivitetin dhe mirëqenien. Këtë e bën të ditur një studim i fundit i kryer nga profesori Paul Kelley, kërkues i asociuar i Universitetit të Oksfordit, në Institutin e Neuroshkencës, në lidhje me ritmet kikardianë dhe gjumin.
Thirrja e tij është e rëndësishme dhe provokuese. Shkollat dhe shumë kompani duhet ta spostojnë orarin e fillimit të punës, për të respektuar dhe për të punuar sipas ritmeve biologjike të studentëve dhe të punonjësve.
“Kjo është një çështje e privimit të gjumit, kur jemi të detyruar të ngrihemi sipas një alarmi të caktuar dhe jo natyrshëm – shpjegon Kelley në një intervistë për ‘The Guardian’. Humbja e orëve të gjumit ka pasoja edhe tek shëndeti – kërkime të ndryshme tregojnë se privimi nga gjumi lidhet më diabetin, depresionin, obezitetin dhe një sistem imunitar më të dobët.
Në studimin e tij, ai konstatoi që për fëmijët rreth 10 vjeç, ora biologjike ishte rreth 6:30 të mëngjesit, për adoleshentët rreth 16 vjeç, ora biologjike është rreth 8:00 të mëngjesit, ndërkohë për 18-vjeçarët, të cilët mund t’i mendoni si gjumashë dhe dembelë, në të vërtetë ora e zgjimit biologjik është rreth 9:00 të mëngjesit. Është e lehtë të kuptosh se si orari i fillimit të shkollës funksionon për fëmijët rreth 10 vjeç, por jo për adoleshentët 16 dhe 18 vjeç. Për adoleshentët apo të rriturit do të kishte më shumë kuptim për ta nisur ditën e shkollës në 10:00 ose mbase edhe më vonë.
“Zilja na orën 7:00 për adoleshentët, nënvizon Kelley, është ekuivalente me fillimin e shkollës në orën 4:30 për një mësues 50 vjeç”.
Atyre që mbështesin tezën se do të mjaftonte që të shkonit të flisnit më herët në mbrëmje, për t’u ngritur të çlodhur dhe të ripërtërirë ditën tjetër në orën 7:00, Kelley u përgjigjet se nuk është kaq e thjeshtë.
“Ritmi natyral i trupit kontrollohet nga një lloj drite e veçantë”.
Kelley thotë që dita jonë e punës duhet të jetë me fleksibël, duke respektuar ritmet tona natyrore. Duke e përshkruar humbjen mesatare të orëve të gjumit për çdo natë sipas moshave të ndryshme, profesor Kelley shpjegon se “mes moshës 14- 24 vjeç, kjo korrespondon më shumë se dy orë. Për persona të moshës mes 24 dhe 35 vjeç, është rreth një orë e gjysmë”.
Bie menjëherë në sy se orari 9:00-17:00 nuk do t’i këshillohej pjesës më të madhe të njerëzve dhe është vendosur nga drejtues mbi 50 veç. Një zgjidhje do të ishin oraret alternative. Me fjalë të tjera ata që janë më shumë se 50 vjeç do të duhej ta fillonin punën në orën 8:00 të mëngjesit, ata nën moshën 35 vjeç në orën 10:00, ndërsa studentët dhe ata që punojnë dhe studiojnë në të njëjtën kohë, të mund të paraqiteshin në punë në orën 11:00?
Kelley mendon se oraret e sinkronizuara mund të kenë “më shumë pasoja pozitive, do të sillnin më shumë produktivitet por edhe humor të mirë tek njerëzit. Po ashtu, duke iu referuar pasojave te shëndeti do të kishim më pak njerëz të sëmurë dhe më shumë punonjës të lumtur dhe produktivë”.
Duke e zgjeruar perspektivën, me shumë gjasa do të kishte më pak aksidente në rrugë dhe drejtuesit e mjeteve do të ishin më të kujdesshëm, dhe mbi të gjitha do të reduktohej trafiku në orët e pikut. Me fjalë të tjera, një mënyrë më e mirë për të nisur ditën e punës “që do t’u shkonte për shtat të gjithëve, veçanërisht familjeve”.
Nga një muaj paraburgim është caktuar ndaj pesë të dyshuarve për dallavere me patentë shoferë në Pejë, ndërsa e dyshuara e gjashtë është në arrest shtëpiak
Gjykata Themelore në Pejë ka caktuar masë paraburgimi në kohëzgjatje prej 30 ditësh për pesë të dyshuarit A.SH, R.S, L.G, M.I, D.T, ndërsa për të pandehurën T.SH është caktuar arrest shtëpiak.
Kështu ka bërë të ditur bashkëpunëtorja profesionale e kësaj Gjykate, Elzana Kastrati.
“Sipas kërkesës tuaj, ju njoftojë se ndaj të pandehurve A.SH, R.S, L.G, M.I dhe D.T, është caktuar masa e paraburgimit nga data 23 korrik 2024 deri me datë 22 gusht 2024, ndërsa të pandehurës T.SH, i është caktuar masa e arrestit shtëpiak në kohëzgjatje të njëjtë me të pandehurit tjerë”, thuhet në përgjigjen e Kastratit, njofton“Betimi për Drejtësi”.
Nga ana tjetër, Policia e Kosovës ka njoftuar se gjashtë të dyshuar janë persona zyrtarë në Departamenin e patentë shoferëve, të cilët dyshohen se organizuan provime duke mos i përfillur format zyrtare elektronike.
“Personat e dyshuar, gjashtë (6) prej tyre persona zyrtarë nga departamenti i patentë shoferëve, Ministria e Infrastrukturës, duke bashkëvepruar dyshohet se kanë vepruar jashtë rregulloreve dhe udhëzimeve të Ministrisë së Infrastrukturës, duke organizuar provime për marrjen e patentë shoferëve jashtë orarit zyrtar të punës, duke përdorur metodën e testimeve në formë fizike dhe duke mos i përfillur format zyrtare elektronike. Dyshohet se testet janë plotësuar në emër të kandidatëve nga ana e zyrtarëve të njësisë së patentë shoferëve në Pejë dhe të njëjtat në mënyrë të kundërligjshme janë futur në sistem nga ana e zyrtarit të IT-së”, thuhej në njoftimin e Policisë.
Organi më i lartë i futbollit botëror, FIFA, ka reaguar kundër ankesave ndaj kalendarit ndërkombëtar të tejmbushur nga FIFPRO dhe Ligat Evropiane duke theksuar se disa liga evropiane po veprojnë me interes tregtar, hipokrizi dhe pa konsideratë për pjesën tjetër të botës.
“Kalendari aktual u miratua unanimisht nga Këshilli i FIFA-s, i cili përbëhet nga përfaqësues nga të gjitha kontinentet, përfshirë Evropën, pas një konsultimi të plotë dhe gjithëpërfshirës, i cili përfshinte FIFPRO-në dhe organet e ligës. Kalendari i FIFA-s është instrumenti i vetëm që garanton se futbolli ndërkombëtar mund të vazhdojë të mbijetojë, të bashkëjetojë dhe të përparojë së bashku me futbollin e klubeve kombëtare dhe kontinentale. Disa liga evropiane të cilat janë vetë organizatorë dhe rregullatorë të garave po veprojnë me interes tregtar, hipokrizi dhe pa konsideratë për pjesën tjetër të botës”, ka thënë presidenti i FIFA-s Gianni Infantino.
“Këto liga me sa duket preferojnë një kalendar plot me miqësore dhe turne verore, të cilat shpesh përfshijnë udhëtime të shumta nëpër botë. FIFA, përkundrazi, duhet të mbrojë interesat e përgjithshme të futbollit botëror, duke përfshirë mbrojtjen e lojtarëve, kudo dhe në të gjitha nivelet e lojës”, shtoi ai.
Unioni botëror i futbollistëve dhe Ligat Evropiane, të cilat përfaqësojnë më shumë se 1000 klube në 33 vende në të gjithë kontinentin, njoftuan ditë më parë se kanë paraqitur një ankesë të përbashkët kundër FIFA-s me Komisionin Evropian për “imponimin e njëanshëm” të kalendarit të ndeshjeve ndërkombëtare. .
“Kalendari i ndeshjeve ndërkombëtare është aktualisht i mbingarkuar dhe i paqëndrueshëm për ligat kombëtare dhe për shëndetin e lojtarëve. Vendimet e marra nga FIFA kanë favorizuar garat e saj dhe interesat komerciale”, thuhet në ankesën e tyre.