Instituti Hidrometeorologjik i Kosovës ka parashikuar për të mërkurën mot me diell dhe vranësira të shpërndara.
Sipas IHMK temperaturat minimale do të lëvizin ndërmjet 10-13 gradë Celsius, ndërsa maksimalet e ditës parashihen të lëvizin ndërmjet 29-32 gradë Celsius.
“Do të fryjë erë nga drejtimi i verilindjes me shpejtësi 1-4m/s”, thuhet në njoftimin e IHMK.
Presidentja e Kosovës, Vjosa Osmani sot do të takohet me përfaqësuesit e partive politike për konsultime për caktimin e datës së zgjedhjeve.
Partitë politike në vend tashmë kanë konfirmuar pjesëmarrjen në këtë takim me të parën e shtetit.
Kryetari i Lëvizjes Vetëvendosje, Albin Kurti ka refuzuar të marrë pjesë në takimin e thirrur nga presidentja e Kosovës, Vjosa Osmani për konsultime për caktimin e datës së zgjedhjeve.
Burimet e gazetës online Reporteri.net kanë thënë se Kurti është kryetari i vetëm nga partitë politike që ka refuzuar të marrë pjesë në këtë takim që do të mbahet të martën më 31 korrik. Kurti në këtë takim e ka deleguar nënkryetarin e partisë, Glauk Konjufcën.
Gazeta online Reporteri.net raportoi sot se ftesa ka qenë vetëm për kryetarët e subjekteve politike dhe jo për nënkryetarët. Të njëjtat burime kanë thënë se kryeministri Kurti do të kthehet të martën në mbrëmje (sonte) nga Parisi.
Pozitivisht ftesës së Osmanit i është përgjigjur edhe PDK-ja. Nëpërmjet Sekretares së Përgjithshme, Vlora Çitakut, në një konferencë për medie të mbajtur të shtunën më 27 korrik, ajo theksoi se ftesa nuk ndërlidhet me zgjedhjet e parakohshme, pasi një gjë të tillë ka kohë që e kërkon PDK-ja.
“PDK e ka pranuar ftesën e presidentes Osmani për një takim rreth përcaktimit të datës së zgjedhjeve. Sigurisht që ne do t’i përgjigjemi ftesës, e kemi obligim kushtetues dhe ligjor që të marrim në një takim të tillë. Ju e dini mirë që PDK-ja që nga korriku i vitit të kaluar ka kërkuar zgjedhje të parakohshme, mirëpo ftesa e presidentes Osmani nuk ndërlidhet me inicimin e zgjedhjeve të parakohshme por me përcaktimin e datës për zgjedhje të rregullta dhe ne do të marrim pjesë aty dhe qëndrimin për këtë çështje dhe datës e preferuar do ta themi aty”, kishte thënë Çitaku.
Edhe nga Lidhja Demokratike e Kosovës kanë konfirmuar të shtunën për Reporteri.net se do të marrin pjesë në takimin e ftuar nga presidentja Osmani.
“Ju konfirmoj që kryetari Abdixhiku ka pranuar ftesën si dhe të mërkurën në takim do jep qëndrimet e LDK-së”, ka thënë zëdhënësi i LDK-së, Besian Mustafa, për Reporteri.net.
Pjesëmarrjen në këtë takim me presidenten Osmani e konfirmoi edhe Aleanca për Ardhmërinë e Kosovës.
“Mund të ju konfirmoj që AAK do të marrë pjesë në takimin konsultativ të thirrur nga Presidentja për caktimin e datës së zgjedhjeve të rregullta”, tha Kushtrim Xhemajli, zëdhënës i kësaj partie.
Presidentja e Kosovës, Vjosa Osmani, ka ftuar zyrtarisht liderët e partive politike që t’i takojë më 31 korrik për konsultime për caktimin e datës së zgjedhjeve.
Presidentja u ka dërguar një letër liderëve të partive, në të cilën ka shkruar se bazuar në Kushtetutë dhe Ligjin për zgjedhjet e përgjithshme, zgjedhjet duhet të mbahen përgjatë periudhës 26 janar- 16 shkurt 2025.
“Në këtë drejtim, bazuar në kompetencat e mia kushtetuese për shpalljen e zgjedhjeve për Kuvendin e Republikës së Kosovës, ftoheni në takim konsultativ më 31 korrik 2024, në orën 14:00, në Sallën S301, në Ndërtesën e Kuvendit të Republikës së Kosovës”, thuhet në letrën e presidentes drejtuar partive politike
Gjykata Themelore në Prishtinë sot do të shpallë aktgjykimin e vrasjes së të riut nga Podujeva, Lulzim Fejzullahu.
Fejzullahu u godit me veturë mbrëmjen e 14 janarit të këtij viti, për tu rrahur më pas brutalisht me shufra metalike nga dy të dyshuar.
Si pasojë e plagëve të marra, Lulzimi ndërroi jetë në QKUK më 20 janar.
Në shkallë të parë, më 23 maj Gjykata dënoi dy të dyshuarit, të mitur, më 19 vjet burg: njërin dhjetë e tjetrin nëntë.
Ambasadori i Shteteve të Bashkuara të Amerikës në Kosovës, Jeffrey Hovenier, e ka uruar Laura Fazliun për medaljen e bronztë në Lojërat Olimpike “Paris 2024”.
Hovenier në një postim në platformën X, derisa e ka shpërndarë një shkrim të Komitetit Olimpik të Kosovës në të cilin i urohet medalja e fituar Laurës.
“Urime Laura”, ka shkruar Hovenier.
Fazliu bëhet xhudistja e dytë kosovare në Paris që arrin të kurorëzohet me medalje. Para saj, Distria Krasniqi, e rrëmbeu të argjendtën.
Fitorja e “Lakit” erdhi në Golden Score, pasi kundërshtares së saj iu dhanë tri “Shido”, për pasivitet në luftë. Kjo është hera e parë që 23-vjeçarja kosovare merr pjesë në Lojëra Olimpike.
Xhudistja Laura Fazliu ka fituar medaljen e bronztë pas ndeshjeve në repesazh.
Fazliu ka mposhtur kundërshtaren kroater Katarina Kristo në ‘golden score’, pasi nuk mjaftuan minutat e rregullt.
Që të dyja morën nga të dy vërejtje, teksa Fazliu me vendim të përbashkët u shpall fituese.
Kjo është medalja e pestë për Kosovën, si dhe e para për Laura Fazliun.
Ndeshja ishte e vlefshme në peshat 63 kilogramë.
Qendra Kombëtare për Menaxhim Kufitar ka bërë një përditësim lidhur me gjendjen nëpër pikëkalimet kufitare.
Në disa prej pikave kufitare ka pritje deri në 1 orë e 30 minuta minuta, derisa kolonat kanë arritur deri në 350 metra.
Në pikën kufitare Dheu i Bardhë, pritjet për të hyrë në Kosovë janë deri në 1 orë e 30 minuta, ndërkohë që kolona është 350 metra.
Derisa në Muçibabë pritjet janë 50 minuta dhe kolona është 350 metra.
Ndërsa në Merdarë pritjet janë 05-10 minuta.
Sindikata e Pavarur e Minatorëve të Trepçës, ka ftuar në takim minatorët e këtij gjigandi metalurgjik, pas situatës së krijuar dhe vështirësive financiare, raporton Ekonomia Online.
Përmes një njoftimi për media, qëllimi i këtij takimi është diskutimi mbi situatën e rëndë në të cilën ndodhen minatorët dhe miniera e StanTergut.
“Duke pasur parasyshë situaten e fundit të krijuar në ndërmarrjen Trepca Sh.A. dhe vështërsit financiare me të cilat jemi duke u ballafaquar vazhdimisht, me qëllim të gjetjes së ndonjë zgjidhje konkrete dhe afatgjate, ju ftojmë që nesër nga ora 07:00 të takohemi në menzem e minieres në Stan Tërgut. Qëllimi i këtij takimi është diskutimi mbi situatën e rëndë në të cilen ndodhemi ne minatorët dhe miniera e StanTergut”, thuhet në njoftim.
Tjetër delegim i gjyqtarëve të Kosovës në raundin e dytë të UEFA Conference League.
Genc Nuzës i është besuar nga UEFA ndeshja e raundit të dyte të Conference Leauge, Śląsk – Riga. Në ndeshjen e cila do të zhvillohet në stadiumin “Miejski ëe Ëracłaëiu” të Ëroclaëit në Poloni, gjyqtarin Nuza do ta asistojnë Fatlum Berisha dhe Bujar Selimaj, ndërsa gjyqtar i katërt do të jetë Dardan Çaka.
Kjo ndeshje do të zhvillohet të enjten më 1 gusht me fillim në orën 20:30.
Ish-presidenti amerikan Donald Trump tha se ceremonia e hapjes së Lojërave Olimpike të mbajtura në Paris ishte “turp”, transmeton Anadolu.
“Mendoj se ceremonia e hapjes ishte një turp”, tha Trump në një intervistë me Fox News.
Ceremonia e hapjes së Lojërave Olimpike të Parisit 2024 tërhoqi reagime të konsiderueshme për pasqyrimin e pikturës së Leonardo da Vinçit “Darka e Fundit” me një performancë “drag queen”, të cilën shumë persona e shohin si mungesë respekti ndaj besimeve fetare.
Trump tha se nëse ai do të ishte i përfshirë në Lojërat Olimpike Los Angeles 2028 dhe do të kishte ndikim mbi organizatorët, ai do të siguronte që të mos kishte përshkrim të tillë të “Darkës së Fundit”.
Ndërkohë, Konferenca e Peshkopëve Francezë tha se ceremonia “përfshinte skena të talljes me krishterimin”.
Ka shkuar në tre numri i fëmijëve të vdekur nga sulmi i së hënës në një ngjarje vallëzimi në veri të Anglisë.
Policia konfirmoi të martën se fëmija i tretë vdiq si pasojë e plagëve të marra në sulmin me thikë një ditë më parë në Southport, në veri të Liverpulit.
Një 17-vjeçar po mbahet në paraburgim si i dyshuar për vrasje dhe tentim vrasje, pas incidentit në “seminarin e jogës dhe vallëzimit Taylor Swift” në Southport, një ngjarje verore për fëmijë të moshës mes gjashtë dhe 11 vjeç.
Policia tha se që të tri viktimat janë vajza të moshës gjashtë, shtatë dhe nëntë vjeçare. Tetë fëmijë të tjerë pësuan lëndime, prej të cilëve pesë janë në gjendje të rëndë.
Dy të rritur u plagosën rëndë në përpjekje për t’i mbrojtur fëmijët nga sulmuesi i armatosur me thikë, tha policia.
Këngëtarja amerikane Taylor Swift tha se ndihet e tmerruar me atë që ndodhi në Southport.
“Më ka kapluar tmerri i sulmit të djeshëm në Southport, jam plotësisht e tronditur. Ata ishin thjesht fëmijë të vegjël duke mësuar vallëzim”, shkroi ajo në Instagram.
Adhuruesit e këngëtares amerikane grumbulluan mbi 64.000 dollarë online për t’i ndihmuar familjet e viktimave dhe për spitalin ku po mjekohen disa prej fëmijëve të plagosur.
Kryeministri i Britanisë së Madhe, Keir Starmer, e quajti të “tmerrshëm” sulmin, ndërsa Mbreti Charles dhe familja e tij thanë se janë të tronditur nga kjo ndodhi.
Policia e Merzesajd tha se nuk është i qartë motivi i sulmit, por nuk besohet se ka të bëjë me terrorizëm. Policia nuk është në kërkim të ndonjë personi tjetër në lidhje me sulmin./REL