Blog

Ministria e Industrisë, Ndërmarrësisë, Tregtisë dhe Inovacionit (MINTI) ka organizuar konferencën “She Rises 2026”, me moton “Gratë në Biznes në Kosovë – një dekadë progres dhe vizion për të ardhmen”, e dedikuar grave ndërmarrëse, ku u theksuan arritjet dhe sfidat e fuqizimit ekonomik të grave në vend.

Ministrja në detyrë e MINTI-t, Mimoza Kusari Lila, bëri të ditur se për herë të parë në Kosovë, në Agjencinë e Re për Ndërmarrësi dhe Inovacion, do të themelohet divizioni për gratë ndërmarrëse, ndërsa skemat mbështetëse të lansuara do të institucionalizohen dhe zgjerohen për mbështetje financiare dhe profesionale.

Kusari Lila tha se janë bërë hapa të rëndësishëm në avancimin e grave në biznes dhe se konferenca synon të sjellë në një vend histori suksesi, pune dhe vizioni.

“Nga nxitja tek kodimi, e cyber security, prej punëtorisë rrobaqepës në një tënd të ngjitur shtëpie, tek vendimet e marra në bordet e korporatave e ndërmarrjeve të tashme e tjera. Numrat sot tregojnë se gratë janë pronare të 18% të bizneseve në Kosovë, krahasuar me 10% në vitin 2017. Vetëm këtë vit, një në tre biznese të reja të regjistruara, ka pronare një grua. Kemi arritur gjithashtu, që 40% e vendeve në bordet e shoqërive aksionare, të mbahen nga gratë, falë hapave të ndërmarrë për të garantuar përfaqësim dhe mundësi të barabarta”.

“Për herë të parë në Kosovë, në Agjencinë e Re për Ndërmarrësi dhe Inovacion, do të themelohet divizioni për gratë ndërmarrëse. Ndërsa, skemat mbështetëse të lansuara, do të institucionalizohen, do të zgjerohen për mbështetje financiare dhe profesionale për gratë ndërmarrëse. Kemi bërë rrugë të gjatë.Sot jemi bashkë për të dëshmuar, se barazia nuk është destinacioni i një gruaje të vetme, por rrugëtimi i një shoqërie të tërë. Sot përmes konferencës She Rises, ne sjellim në një vend, histori suksesi, pune dhe vizioni.

Do të flasim për politikat që mbështesin gratë ndërmarrëse, për qasjen në financa, për sukseset që frymëzojnë dhe për pengesat që ende duhet t’i kapërcejmë”, tha ajo.

Nga ana tjetër, Lendita Kastrati nga G7 tha se pavarësisht progresit, potenciali ekonomik i grave vazhdon të mbetet i pashfrytëzuar në masë të madhe.

“Gratë përbëjnë më shumë se gjysmën e popullsisë në vend, por ato përfaqësojnë më pak se 20% të bizneseve të regjistruara në vend. Dhe kjo do të thotë se pjesa më e madhe e potencialit ekonomik të vendit, vazhdon të mbetet i pashfrytëzuar. Dhe kjo nuk është vetëm çështje e barazisë gjinore, por është çështje e zhvillimit ekonomik të vendit. Prandaj, fuqizimi ekonomik i grave, nuk duhet të shihet vetëm si politikë sociale, por duhet të shihet edhe si politikë e zhvillimit ekonomik të vendit, si investim strategjik. Sepse qëllimi ynë nuk është të flasim vetëm për suksesin e grave, por qëllimi ynë është të krijojmë kushte që sa më shumë gra të kenë sukses”, tha ajo.

Ndërsa, Saxhide Mustafa nga Forumi Ekonomik i Grave kërkoi që politikat për fuqizimin ekonomik të grave të përkthehen në veprime konkrete dhe të bëhen prioritet i qeverisë së re.

“Praktikat nga vendet e zhvilluara na tregojnë se politikat publike të bazuara në evidencë nuk sjellin vetëm barazi, por sinergji, zhvillim dhe qëndrueshmëri ekonomike. Prandaj, për të krijuar një mjedis ku gratë shihen si zhvillim, frymëzim, model, është e domosdoshme që këto vlera t’i përkthejmë në veprime konkrete. Me veprime konkrete, me bashkëpunim, me stabilitet institucional. Sepse buxhetimi i përgjegjshëm gjinor, investimi në shërbimet e kujdesit, ndryshimi i ligjit të punës, lirimi i sektorit privat nga barra e pagesës së lejes së lehonisë, vendosja e lejes prindërore si një përgjegjësi e përbashkët familjare, mbështetja financiare e grave ndërmarrëse dhe jo vetëm, nuk duhet të mbesin vetëm kërkesa kyçe të forumit ekonomik të grave, por duhet t’i shohim si parakusht për zhvillim të qëndrueshëm ekonomik në Kosovë dhe prioritet i qeverisë se re”, tha ajo.

Deputetja e LDK-së, Hykmete Bajrami, ka kërkuar anulimin e testit të maturës shtetërore, duke e cilësuar procesin si të dështuar dhe të padrejtë për nxënësit që kanë mësuar me përkushtim.

Përmes një postimi në facebook, Bajrami ka deklaruar se publikimi i testit sapo filloi provimi po përsëritet tash e gjashtë vjet me radhë, duke bërë që testi të mos e vlerësojë dijen, por të favorizojë kopjimin.

“Të anulohet testi i maturësNëse nuk ki mundësi me organizu si duhet, anuloje. Që gjashtë vjet radhazi po përsëritet i njëjti dështim – publikimi i testit sapo fillon provimi. Pra, testi i maturës nuk po e shpërblen dijen, por po e favorizon kopjimin.Sot, fatkeqësisht, më të suksesshëm nuk dalin ata që kanë mësu shumë, por ata që kanë arritë me kopju më shumë.

Kjo është padrejtësi ndaj mijëra nxënësve të vyeshëm që kanë punu me vite. Ky nuk është më veç problem i organizimit të një testi, është problem i drejtësisë në arsim, është edhe pjesë e procesit të regjistrimit në fakultet. Kur kopjimi bëhet rruga ma e lehtë drejt suksesit, atëherë nxënësit e ndershëm ndëshkohen.

Prandaj, është koha me e pranu realitetin: testi i maturës e ka humbë besueshmërinë dhe duhet me u zëvendësu me një sistem vlerësimi që bazohet në suksesin e arritur gjatë shkollimit fillor dhe të mesem.Arsimi nuk mund të ndërtohet mbi kopjim”, ka shkruar Bajrami.

Ish-presidenti amerikan, Barack Obama deklaroi se duket se Shtetet e Bashkuara, pas luftës kundër Iranit të nisur nga presidenti Donald Trump, janë kthyer në pikën fillestare ose madje ndodhen në një pozitë më të keqe se para fillimit të konfliktit.

“Ne tani kemi zhvilluar një luftë, kemi shpenzuar miliarda e miliarda dollarë, kemi vënë ushtrinë tonë nën një barrë të madhe. Shumë njerëz kanë humbur jetën. Dhe duket se jemi kthyer aty ku ishim para se të fillonim luftën, përveçse ndoshta jemi në një situatë disi më të keqe”, tha Obama në një intervistë për emisionin “TODAY”.

Ai iu përgjigj një pyetjeje lidhur me memorandumin e mirëkuptimit mes SHBA-së dhe Iranit. “Jam shumë i kënaqur që shoh një armëpushim dhe shpresoj që ai të vazhdojë”, tha Obama, ndërsa vuri në pikëpyetje arsyetimin për luftën kundër Iranit.

Ish-presidenti kujtoi se sipas marrëveshjes bërthamore me Iranin, e arritur gjatë mandatit të tij, “Irani kishte rënë dakord të mos zhvillonte armë bërthamore. Kjo administratë, ose versioni i saj i mëparshëm, u tërhoq nga ajo marrëveshje, gjë që më pas çoi në zhvillimin e kapaciteteve më të mëdha bërthamore nga Irani”.

Trump gjatë mandatit të parë në vitin 2018 tërhoqi SHBA-në nga marrëveshja bërthamore e nënshkruar në vitin 2015. Marrëveshja parashikonte hapa të detajuar që Teherani duhej t’i zbatonte për më shumë se 25 vjet, me qëllim parandalimin e sigurimit ose zhvillimit të armëve bërthamore.

Memorandumi aktual i mirëkuptimit nuk e zgjidh plotësisht çështjen e së ardhmes së programit bërthamor iranian. Trump e nënshkroi memorandumin gjatë një darke në pallatin e Versajës të mërkurën në mbrëmje.

Dokumenti parashikon një afat prej 60 ditësh për arritjen e një marrëveshjeje më të qëndrueshme që do t’i jepte fund konfliktit.

Udhëheqës të lartë të Gardës Kombëtare Ajrore të shtetit Iowa vizituan pjesëtarët e Skuadrës së Komunikimit të Krahut të 132-të dhe drejtues të Forcës së Sigurisë së Kosovës (FSK) gjatë ushtrimit “Sentinel Sica”, i cili u mbajt në Kosovë.

Gjatë vizitës, gjeneral brigade Mark Muckey, zëvendësadjutant i përgjithshëm i Gardës Kombëtare Ajrore të Iowas, kryerreshteri komandues Sara Orwig dhe kryerreshteri komandues Jason Lehmann vëzhguan nga afër ushtrimin e përbashkët të komunikimit të Gardës Kombëtare Ajrore dhe Tokësore të Iowas.

Delegacioni gjithashtu zhvilloi takime dhe shkëmbime me drejtues ushtarakë të Forcës së Sigurisë së Kosovës, në kuadër të partneritetit afatgjatë ndërmjet Iowas dhe Kosovës përmes Programit të Partneritetit Shtetëror.

Ushtrimi “Sentinel Sica” synon forcimin e bashkëpunimit, shkëmbimin e përvojave profesionale dhe rritjen e aftësive të komunikimit dhe koordinimit ndërmjet forcave partnere, duke kontribuar në avancimin e marrëdhënieve të sigurisë dhe mbrojtjes ndërmjet Kosovës dhe shtetit amerikan të Iowa-s.

Drejtoria e Policisë së Kryeqytetit ka njoftuar për arrestimin e një personi i cili ishte në kërkim.

Njësitet e Stacionit Policor Jugu në Prishtinë kanë realizuar arrestimin e E.K., mashkull, 24 vjeç, i dënuar me dy (2) vite burgim për veprat penale “Përdorimi i armës apo mjetit të rrezikshëm” dhe “Mbajtja në pronësi, kontroll ose posedim të paautorizuar të armëve”.

Pas arrestimit, personi është dërguar për vuajtjen e dënimit, ndërsa njësitet relevante policore kanë ndërmarrë veprimet e nevojshme procedurale lidhur me rastin.

Kryeministri Edi Rama ka mbajtur sot mbledhjen e zgjeruar të Grupit Parlamentar të PS. Mes shumë diskutimesh, ai ka folur lidhur me investimin në Zvërnec.

Ai tha se çështja mori përmasa ndërkombëtare në një kohë shumë të shkurtër, duke theksuar se shumë njerëz që nuk e njihnin zonën apo projektin, krijuan qëndrime të forta mbi të.

Sipas Ramës, reagimet ndaj projektit nuk u bazuan në analiza të detajuara, por u ndikuan nga emocione, perceptime dhe debate ideologjike që shkojnë përtej kufijve të Shqipërisë.

“Miliona njerëz që nuk dinë as ku ndodhet Zëvrneci, dinin saktësisht se çfarë duhet të mendonin për Zvërnecin. Jo sepse studiuan për Shqipërinë apo analizuan projektin, por sepse te brishtësia e bukur e nje zogu identifikuan simbolin e nje rezistence anti kapitaliste. Më bukur se asnjëherë u hap dhe një kanal për mllefin kundër meje, kundër jush dhe PS-së”, tha Rama.

Kreu i qeverisë argumentoi se projekti në Zvërnec u shndërrua në një përplasjeje më të gjerë globale, e cila nuk lidhet drejtpërdrejt me Shqipërinë.

“Ky është mësimi i parë i kësaj historie. Kjo kohë e re ku edhe një rrahje lokale bëhet përplasje globale nuk transporton më vetëm mallra, por zemërime, identitete politike, fetare, agresione, gënjshtra shumë më shpejtë se sa transporton faktet, arsyetimet. Një projekt zhvillimi në Shqipëri u bë brenda pak ditësh pjesë e një lufte ideologjie që nuk ka lindur në Shqipëri dhe nuk ka për objekt Shqipërinë.

Shqipëria u bë zogu, ne u gjendëm në mes të saj, jo si protagonistë por si skenë. Kjo është risia e kohës që jetojmë. Kohë kur emocionet mbërrijnë përpara fakteve. Kur shumë shpesh përceptimi bëhet e vërteta dhe e vërteta mbetet jetime.

Duhet ta lexojmë këtë histori drejt, për çfarë vjen më pas. Se ky është vetëm fillimi. Ne mund të bëjmë vetëm atë që bëhet për të kuptuar politikën sot. Nga një herë është mirë që të largohesh pak prej saj dhe të hapësh librat e historisë”, tha Rama.

Komisioni Qeveritar për Persona të Zhdukur ka bërë të ditur se pas identifikimit përmes analizës shkencore të ADN-së, në mbështetje të kërkesës së familjes, më 21 qershor 2026 do të bëhet rivarrimi i mbetjeve mortore të Dëshmorit Hajdar Pepaj, i cili ishte në Listën e Personave të Zhdukur.

Në njoftim bëhet e ditur se ceremonia e rivarrimit do të mbahet më 21 qershor 2026, në varrezat e fshatit Kodrali, nga ora 16:00.

Paraprakisht, nga ora 15:00, do të mbahen homazhe te ‘Lapidari i Ri’ në fshatin Kodrali të Deçanit.

Ceremonia e rivarrimit organizohet nga Shoqatat e dala nga lufta – Dega në Deçan dhe Komuna e Deçanit, me përkrahjen e Komisionit Qeveritar për Persona të Zhdukur.

Komisioni Qeveritar për Persona të Zhdukur shpreh ngushëllimet më të sinqerta familjes Pepaj, njëkohësisht rithekson përkushtimin institucional për vazhdimin e angazhimit në zbardhjen e fatit dhe vendndodhjes së të gjithë personave të zhdukur me forcë gjatë luftës në Kosovë.