Blog

Me datën 30.10.2025, policët e Njësisë së Komunikacionit Rrugor në Ferizaj, gjatë patrullimeve dhe mbikëqyrjes së trafikut, kanë shqiptuar masa ndëshkuese ndaj gjashtë shoferëve për kundërvajtje të rënda në komunikacionin rrugor.

Rastet e evidentuara:

Në rrugën magjistrale Ferizaj–Shtime, në fshatin Slivovë, policia ka ndaluar shoferët E.Sh. (22 vjeç) me veturën Citroën dhe E.D. (25 vjeç) me veturën Dacia, të dy me targa vendore, të cilët kanë kryer kundërvajtje duke tejkaluar automjetet në vijë të plotë.
Ndaj tyre janë shqiptuar gjoba prej 200 euro, 2 pikë negative dhe masë mbrojtëse – ndalim i drejtimit të automjetit për 3 muaj.

Në po të njëjtën rrugë, në hyrje të Shtimes, është ndaluar shoferi B.K. (51 vjeç), i cili po drejtonte automjet transportues pa poseduar kategorinë përkatëse (C).
Ndaj tij është shqiptuar gjobë prej 500 euro, 3 pikë negative dhe masë mbrojtëse – ndalim i drejtimit të automjetit për 3 muaj.

Në magjistralen Ferizaj–Gjilan, në fshatin Bibaj, në zonën me kufizim shpejtësie prej 40 km/h, është ndaluar shoferi J.H. (32 vjeç), i cili me veturën VW T-Roc po zhvillonte shpejtësi prej 97 km/h.

Ndaj tij është shqiptuar gjobë prej 300 euro, 3 pikë negative dhe masë mbrojtëse – ndalim i drejtimit të automjetit për 3 muaj.

Në të njëjtën rrugë, policia ka ndaluar në flagrancë shoferin Sh.Sh. (37 vjeç), i cili po përdorte telefonin celular gjatë ngasjes së automjetit Mercedes me targa vendore.
Pas verifikimeve, rezultoi se kjo ishte herë e tretë që i njëjti person kryente të njëjtën kundërvajtje, ndaj u gjobit me 500 euro, 3 pikë negative dhe masë mbrojtëse – ndalim i drejtimit të automjetit për 6 muaj.

Në fshatin Sojevë, policia ka ndaluar shoferin R.Z. (47 vjeç), i cili me veturën Audi Q5 me targa të Maqedonisë së Veriut, kishte tejkaluar kolonën e katër automjeteve në lëvizje.
Ndaj tij është shqiptuar gjobë prej 200 euro, si dhe masë mbrojtëse – ndalim qarkullimi në territorin e Republikës së Kosovës për 3 muaj.

Policia Rajonale e Ferizajt apelon tek të gjithë shoferët që të respektojnë kufizimet e shpejtësisë, shenjat dhe rregullat e komunikacionit rrugor dhe inkurajon qytetarët që të raportojnë çdo kundërvajtje në trafik në numrin 192.

Ministria e Haxhit dhe Umrës në Arabinë Saudite ka njoftuar për ndryshime të reja në rregulloret e vizave të Umrës, të cilat do të hyjnë në fuqi javën e ardhshme.

Sipas burimeve të “Al Arabiya”, vizat e Umrës do të anulohen automatikisht 30 ditë pas lëshimit nëse pelegrini nuk ka hyrë në Arabinë Saudite gjatë asaj periudhe. Kjo nënkupton se vlefshmëria e vizës para hyrjes është reduktuar nga tre muaj në vetëm një muaj.

Megjithatë, autoritetet saudite kanë sqaruar se koha e lejuar e qëndrimit pas hyrjes në vend do të mbetet e pandryshuar tre muaj nga momenti i mbërritjes.

Sipas këshilltarit të Komitetit Kombëtar për Umrën dhe Vizitat, Ahmed Bajaeifer, ky vendim është pjesë e përgatitjeve për një rritje të madhe të numrit të pelegrinëve, sidomos pas përfundimit të verës dhe rënies së temperaturave në qytetet e shenjta, Mekë dhe Medinë.

Qëllimi i këtij ndryshimi është menaxhimi më i mirë i fluksit të pelegrinëve dhe shmangia e mbipopullimit në zonat e shenjta.

Deri më tani, mbi 4 milionë viza për Umrë janë lëshuar për pelegrinët ndërkombëtarë që nga fillimi i sezonit të ri në qershor — një shifër rekord brenda vetëm pesë muajsh, sipas të dhënave të “Al Arabiya”.

Kandidati i PDK-së për kryetar të Mitrovicës, Arian Tahiri, ka njoftuar se ka arritur marrëveshje bashkëpunimi me Ergin Kanin, kryetar i Kosova Demokratik Türk Partisi (KDTP) në Mitrovicë.

Tahiri ka bërë të ditur se marrëveshja përfshin një koalicion katërvjeçar, i cili synon zhvillimin dhe barazinë e qytetarëve të Mitrovicës.

“Një hap tjetër i rëndësishëm për të ardhmen e Mitrovicës. Me mikun tim, Ergin Kanin, Kryetar i Kosova Demokratik Türk Partisi (KDTP) në Mitrovicë, sot nënshkruam marrëveshjen e koalicionit dhe mbështetjes për mua në zgjedhjet e 9 nëntorit për Kryetar të Mitrovicës.
Koalicioni katërvjeçar do të jetë një angazhim i përbashkët për të siguruar që çdo qytetar i Mitrovicës të ketë mundësi të barabarta dhe një të ardhme më të mirë në qytetin tonë.
Faleminderit të gjithë qytetarëve të Mitrovicës për besimin dhe mbështetjen! Mitrovica është shtëpia jonë e përbashkët! 🤝”, ka deklaruar Tahiri.

Marrëveshja e sotme shihet si një hap strategjik për PDK-në në Mitrovicë, vetëm pak ditë para zgjedhjeve të 9 nëntorit.

Nënkryetarja e Kuvendit të Kosovës nga radhët e Lëvizjes Vetëvendosje, Albulena Haxhiu, ka konfirmuar se përfaqësuesit e VV-së do të marrin pjesë në takimin e thirrur nga Presidentja e Kosovës, Vjosa Osmani, që do të mbahet nesër.

Pas mbledhjes së Kryesisë së Kuvendit, Haxhiu deklaroi se qëndrimi zyrtar i Vetëvendosjes do të bëhet publik gjatë takimit të nesërm.

“Nesër ne do të jemi në takimin e thirrur nga Presidentja Osmani. Nesër do ta japim qëndrimin e VV-së. Edhe një herë, qëndrimin në raport me këtë do ta japim nesër”, tha Haxhiu.

E pyetur për mungesën e votave për formimin e qeverisë, ajo u shpreh e bindur se Qeveria “Kurti 3” do të bëhet.

“Ajo do të bëhet, natyrisht që do të ketë qeveri Kurti 3”, theksoi Haxhiu.

Sa i përket nënshkrimeve të deputetëve, ajo sqaroi se deri më tani nuk ka firmosur asnjë dokument përveç atij që lidhet me formimin e grupeve parlamentare.

“Nuk ka nënshkrime. Unë në asnjë letër nuk kam vendosur nënshkrimin përveç në themelimin e grupeve parlamentare. Nëse do të ketë ndonjë veprim tjetër nga VV, do t’ju njoftoj. Deri tani kam vendosur nënshkrim vetëm për formimin e grupeve parlamentare”, tha ajo.

Haxhiu e bëri të qartë edhe qëndrimin e partisë ndaj idesë së një qeverie teknike, duke theksuar se Vetëvendosje nuk e mbështet një opsion të tillë.

“Nuk e përkrahim një qeveri teknike. Qytetarët e kanë vendosur, qytetarët e kanë votuar Kurtin. Në qoftë se nuk do të ketë numra, vendi do të shkojë në zgjedhje të parakohshme”, deklaroi Haxhiu.