Blog

Kryetari aktual i Prishtinës dhe kandidati për një mandat të dytë nga radhët e Lidhjes Demokratike të Kosovës, Përparim Rama, ka ndarë një video nga projektet e realizuara në lagjen Dardania dhe aktivitetet e tij me mësimdhënesit, duke nënvizuar angazhimin e tij për një Prishtinë që respekton mësuesit, fuqizon shkollat dhe investon në të ardhmen e nxënësve.

Besnik Osmani, kandidati për kryetar të Fushë Kosoves ka vizituar banorët e Lismirit të cilët i dhanë një përkrahje të madhe.

Osmani po ashtu gjatë ditës ka prezantuar projektin ideor për rinovimin e lagjes “Kolonia” dhe ndërtesave të reja në Bresje.

Kurse kandidati i LDK-së për kryetar të Suharekës, Ardian Shala ka zhvilluar takime me banorët e fshatrave Nëperbisht dhe Samadraxhë, duke dëgjuar nevojat e tyre dhe duke premtuar investime që do të dërgojnë Suharekën në një epoke të re zhvillimi dhe permirësimi të jetesës.

Kandidati për Gjilan, Arbër Ismajli premton punësim për mjekët e sapodiplomuar, për të garantuar që do qytetarë të ketë mjekun e vet, pajisje moderne dhe efikasitet në menaxhimin e shërbimeve shëndetësore.

Kryetari aktual dhe kandidat për një mandat të dytë në Viti, Sokol Haliti ka zhvillar takime me Forumin e Gruas, aty ai premtoi angazhimin e tij për një të ardhme më të drejtë dhe me dinjitoze për qytetarët.

Xhafer Gashi, kryetari aktual i Obiliqit, kandidat edhe për një mandat 4-vjecar ka publikuar video mbi punën e ndermarrjes komunale ne fushën e mjedisit, duke përmirësuar hapësirat e gjelbra, parkun dhe kënde atraktive për qytetarët.

Në ditën e tretë të fushatës gjashtëditore për raundin e dytë të zgjedhjeve lokale, kryetari aktual dhe kandidati për një mandat të dytë në Klinë, Zenun Elezaj, mbajti një tubim madhështor në shtëpinë e kulturës “Jehona e Dukagjinit”, ku morën pjesë kryetari i AAK-së Ramush Haradinaj, Pal Lekaj, si dhe deputetët Lahi Brahimaj e Time Kadrijaj.

Elezaj u zotua për vazhdimin e projekteve zhvillimore dhe përkushtim ndaj çdo fshati e lagjeje të Klinës dhe se “fitorja e 9 nëntorit do të jetë fitore e punës, ndershmërisë dhe e besimit të qytetarëve”.

Në Gjakovë, kryetari dhe kandidati i AAK-së, Ardian Gjini zhvilloi takim me përfaqësues të një organizate austriake me të cilën komuna bashkëpunon në projekte sociale dhe për mbrojtjen e fëmijëve. Ai tha se vizioni i tij për mandatin e ardhshëm përfshin një Gjakovë me zhvillim të qëndrueshëm, partneritet ndërkombëtar dhe kujdes të veçantë për shtresat në nevojë.

Gjini gjithashtu përcolli mesazh urimi me rastin e Ditës Ndërkombëtare të Gjuhës Rome, duke nënvizuar mbështetjen e komunës për komunitetet dhe diversitetin kulturor.

Në Suharekë, kryetari Bali Muharremaj inspektoi punimet infrastrukturore në Sallagrazhdë dhe Nëpërbisht, duke deklaruar se projektet për përmirësimin e rrugëve dhe pastrimin e lumenjve janë dëshmi e përkushtimit për një Suharekë më të zhvilluar.

Ai mbajti edhe një tubim me qytetarë në Duhël, ku kërkoi mbështetjen për mandatin e ri me numrin 174.

Në Junik, kandidati i AAK-së Agron Kuçi u shpreh mirënjohës ndaj mërgatës për mbështetjen e vazhdueshme dhe u zotua se mandati i tij do të jetë “mandat i bashkimit të Junikasve të vërtetë dhe zhvillimit të komunës”, duke u distancuar nga, siç tha ai, “propagandat që synojnë të devijojnë vullnetin e qytetarëve”.

Ndërsa në Rahovec, kryetari Smajl Latifi u fokusua në përfshirjen e grave në vendimmarrje, duke thënë se mandati i ardhshëm do të karakterizohet nga “mbështetje e veçantë për gratë në sektorin publik dhe privat”. Në një takim me gra të komunës, Latifi tha se zhvillimi i Rahovecit nuk mund të arrihet pa kontributin e barabartë të grave dhe burrave në çdo fushë.

Në ditën e tretë të fushatës për raundin e dytë të zgjedhjeve për kryetar të Komunës së Mamushës kandidati Abdulhadi Krasniq nga Partia Demokratike Turke e Kosovës tha se prioritet I tij mbetet kujdesi shëndetësor.

Ai rikujtoi se gjatë mandatit të tij, komuna ka përjetuar një transformim të rëndësishëm në këtë fushë nga rritja e furnizimit me ilaçe e pajisje mjekësore, deri tek zgjerimi i shërbimeve 24-orëshe për qytetarët.

“Ne e kemi nxjerrë nga hija Qendrën e Shëndetit Familjar dhe e kemi kthyer në model të shërbimit publik. Kemi forcuar stafin shëndetësor me 150 për qind, kemi shtuar dy ambulanca të reja dhe kemi krijuar ekipin mobil që shkon tek pacientët në shtëpitë e tyre” deklaroi Krasniq, duke premtuar vazhdimësi të projekteve nëse fiton një mandat të ri.

Ndërkohë, kandidati i Mamusha Halk Hareketi, Fikret Morina, e përqendroi mesazhin e tij tek bashkimi qytetar dhe vizioni për një Mamushë më të fortë e më të bashkuar. Ai njoftoi për organizimin e aktiviteteve dhe udhëtimeve të bashkëqytetarëve nga diaspora drejt Mamushës në kuadër të raundit të dytë të zgjedhjeve, që mbahen të dielën më 9 nëntor.

“Kjo rrugë nuk është vetëm një udhëtim, por rrugë e unitetit, e besnikërisë dhe dashurisë për atdheun tonë. Le të qëndrojmë së bashku për të mbrojtur të ardhmen e Mamushës,” u shpreh Morina në një komunikatë përkrahësve të tij.

Në ditën e tretë të fushatës për raundin e dytë të zgjedhjeve lokale, kandidatit i Lëvizjes Vetëvendosje për kryetar të Gjakovës, Ardian Gola organizoi tubim madhështor me pjesëmarrjen e kryetarit të VV-së, Albin Kurti.

Gola falenderoi qytetarët për mbështetjen e deritanishme dhe kritikoi kryetarin aktual për keqqeverisje. Ai premtoi qeverisje të drejtë, transparente dhe të pakorruptuar, duke i ftuar të gjithë të dalin për të votuar më 9 nëntor për një Gjakovë më të mirë.

Në Prishtinë, kandidati i VV-së Hajrulla Çeku vizitoi tregun e shitjes me shumicë dhe premtoi përmirësim të infrastrukturës dhe kushteve të tregtisë si mënyrë për të rritur standardin e jetesës dhe për të ulur papunësinë.

Në Pejë, Taulant Kelmendi bëri thirrje për ndryshim dhe hapjen e një kapitulli të ri për qytetin, duke u fokusuar tek qeverisja e përgjegjshme.

Valon Prebreza, kandidat për kryetar të Fushë Kosovës zhvilloi takim me gratë e komunës, duke diskutuar për mbështetjen e grave në biznes, nënat e reja, çerdhet publike dhe menaxhimin më të mirë të infrastrukturës urbane. Ai premtoi përfshirje të drejtë dhe mundësi më të shumta për komunitetin.

Kurse Faton Peci, kandidat për kryetar në Mitrovicë, riafirmoi zotimet për ndriçim publik, trotuare, transport publik falas dhe trajtim të barabartë për të gjitha lagjet. Ai gjithashtu falenderoi mërgatën për përgatitjet për votim me postë.

Ali Dula, kandidati i VV-së për Rahovec, ftoi qytetarët të marrin pjesë në tubimin më 7 nëntor, ku do të jetë I pranishëm edhe lideri i partisë, Albin Kurti.

Kryetari aktual dhe kandidat për kryetar të Gjilanit, Alban Hyseni, vizitoi fshatin Cërnicë, ku u prit me krahëhapur nga banorët. Hyseni u zotua se projektet e nisura do të vazhdojnë dhe i ftoi qytetarët të dalin më 9 nëntor për të votuar për një fitore të madhe.

Në Viti, kandidati Arsim Ademi premtoi qeverisje të drejtë dhe transparente, duke marrë shembullin e ndryshimeve të suksesshme në Shtime dhe duke u zotuar për zhvillim të ngjashëm për qytetarët e Vitisë më 9 nëntor.

Në ditën e tretë të fushatës për raundin e dytë të zgjedhjeve lokale, kryetari aktual dhe kandidati i PDK-së për një mandat të dytë në Prizren, Shaqir Totaj, ka vizituar një numër biznesesh nga Muzeu “Nënë Tereza” deri te Spitali i qytetit.

Ai tha se mbështetja për bizneset vendore do të jetë një nga prioritetet kryesore të qeverisjes së tij të ardhshme dhe se zhvillimi ekonomik dhe hapja e vendeve të reja të punës janë ndër synimet kryesore, duke shtuar se bashkëpunimi me sektorin privat do të jetë çelësi për një Prizren më të fortë ekonomikisht.

Në Dragash, kandidati i PDK-së Shaban Shabani zhvilloi takim me banorët e fshatit Brrut, ku tha se mbështetja që po merr çdo ditë është tregues i besimit për ndryshime konkrete në komunë.

Nga Kaçaniku, kryetari aktual dhe kandidati, Sabedin Vishi, njoftoi përgatitjet për tubimin përmbyllës të fushatës, ku pritet të prezantohet programi I tij për katër vitet e ardhshme.

Në Mitrovicë, kandidati për kryetar Arian Tahiri ka vazhduar takimet me qytetarë e biznese.

Ai poashtu mori pjesë edhe në një panair artizanal të grave të Mitrovicës, ku tha se mbështetja për gratë dhe fuqizimi i tyre ekonomik do të jenë shtylla të zhvillimit lokal.

Ndërkohë, në Vushtrri, kryetari aktual dhe kandidati për një mandat të ri, Ferit Idrizi, takoi banorët e Studimes së Poshtme. Idrizi u zotua për vazhdimësinë e projekteve të nisura dhe për përmirësimin e infrastrukturës lokale teksa tha se banorët po e mbështesin punën e mirëfilltë e të përkushtuar që ka nisur gjatë mandatit të pare.

Në Klinë, kandidati Sokol Bashota ka paralajmëruar tubimin përmbyllës të fushatës që do të mbahet më 6 nëntor në Qendrën e Kulturës “Jehona e Dukagjinit”, ku do të marrë pjesë edhe kryetari i PDK-së, Memli Krasniqi.