Blog

Kryeministri i Kosovës, Albin Kurti, ka thënë se sot do të nisin komunikimet për takime me krerët e opozitës, në përpjekje për të arritur marrëveshje për zgjedhjen e presidentit të ri të vendit.

Kurti tha se komunikimet me opozitën do të fillojnë menjëherë pas takimit me presidenten e Komisionit Evropian, Ursula von der Leyen.

Këtë deklaratë ai e bëri për KosovaPress, pas homazheve për ish-rektorin e Universitetit të Prishtinës “Hasan Prishtina”, Ejup Statovci.

“Posa të përfundojmë me takimin që kemi sot me presidenten e Komisionit Evropian, zonjën Ursula von der Leyen, menjëherë do të fillojmë komunikimet për takime me krerët e opozitës, në mënyrë që të mos jemi pa Kuvend më 7 tetor, por më së largu deri më 6 tetor ta kemi presidentin apo presidenten e re”, tha Kurti.

Ndryshe dje, pas mbledhjes së Qeverisë, Kurti tha se janë të domosdoshme takimet e reja dhe bisedimet me partitë, duke theksuar se Kosova nuk ka nevojë për destabilitet të mëtejshëm institucional.

“Duhet të ketë takime, bisedime e pajtime. Unë e kam parë që është e mundshme, ekziston rruga në të cilën mund të ecim bashkë”, deklaroi ai.

Sa i përket kandidatit për president, Kurti bëri të qartë se LVV-ja vazhdon t’i qëndrojë marrëveshjes politike dhe kandidaturës së Bekim Sejdiut.

Sipas Kurtit, Sejdiu është tërhequr pasi gjashtë deputetë të LDK-së e kanë shkelur marrëveshjen.

Afati kushtetues për zgjedhjen e presidentit të ri përfundon më 6 tetor. Në rast të dështimit të zgjedhjes së kreut të shtetit brenda këtij afati, vendi përballet me zgjedhje të reja. /Telegrafi/

Policia e Kosovës ka bërë të ditur se ka ndërmarrë masat e nevojshme për sigurimin e protestës së paralajmëruar për sot në orën 16:00 në sheshin “Skënderbeu” në Prishtinë, e organizuar nga platforma “Liria ka emër”.

Protesta synon të shprehë vazhdimin e pakënaqësive lidhur me aktgjykimin e Gjykatës Speciale në Hagë ndaj ish-krerëve të UÇK-së. Sipas Policisë, masat do të zbatohen para, gjatë dhe deri në përfundimin e protestës, me qëllim të ruajtjes së rendit e qetësisë publike.

Policia ka theksuar se në pajtim me Ligjin mbi tubimet publike, e njeh të drejtën e qytetarëve për të shprehur lirisht qëndrimet përmes tubimeve dhe protestave të qeta. Sipas saj, angazhimi i oficerëve synon që protesta të zhvillohet pa incidente dhe që pjesëmarrësit të shprehin qëllimin e tyre në mënyrë demokratike dhe brenda kornizës ligjore.

Për shkak të lëvizjes së pjesëmarrësve, do të ketë kufizime ose ndërprerje të përkohshme të qarkullimit. Prej orës 15:00 do të mbyllen përkohësisht rrugët “Luan Haradinaj” dhe “Enver Zymeri”. Policia ka paralajmëruar se, varësisht nga nevoja operative, mund të mbyllen edhe rrugë të tjera.

Për këtë qëllim, janë angazhuar edhe njësitë patrulluese të trafikut, të cilat do të riorientojnë qarkullimin nëpër rrugë alternative sipas nevojës.

Policia ka garantuar praninë e zyrtarëve policorë në terren dhe ka thënë se siguria e qytetarëve, ruajtja e rendit kushtetues dhe e sigurisë publike mbeten prioritet i saj.

Në fund, Policia e Kosovës ka falënderuar organizatorët dhe qytetarët për bashkëpunimin dhe mirëkuptimin e vazhdueshëm, duke apeluar për kujdes të shtuar dhe respektim të rregullave të trafikut rrugor në interes të sigurisë së përgjithshme.

Presidenti amerikan Donald Trump ka fajësuar sërish sulmet ukrainase ndaj rafinerive ruse për rritjen e fortë të çmimeve të karburanteve në SHBA, duke argumentuar se dëmtimi i kapaciteteve ruse të përpunimit po ndikon më shumë në treg sesa lufta në Lindjen e Mesme.

Duke folur në Shtëpinë e Bardhë më 30 shtator, Trump tha se administrata po shqyrton edhe ndalimin e eksporteve amerikane të naftës dizel, me synimin për të rritur furnizimin në tregun vendas dhe për të ulur çmimet. Megjithatë, ai paralajmëroi se një masë e tillë mund të ketë efekt negativ edhe mbi çmimin e benzinës.

Trump argumentoi se sulmet ukrainase ndaj rafinerive ruse kanë reduktuar prodhimin e karburanteve dhe kanë krijuar presion mbi furnizimet globale.

“Nafta është dëmtuar shumë më tepër nga ajo që po ndodh në Rusi sesa nga Lindja e Mesme”, tha Trump, duke iu referuar sulmeve ndaj rafinerive ruse.

Por sekretari amerikan i Energjisë, Chris Wright, dha një tablo më të gjerë. Ai tha se tregu po përballet me humbje të eksporteve nga disa zona të rëndësishme, përfshirë Lindjen e Mesme dhe Kinën, duke e bërë furnizimin global më të ngushtë.

Presioni mbi tregun amerikan është bërë veçanërisht i madh. Çmimi i naftës dizel në SHBA ka arritur rekord prej rreth 6.53 dollarësh për gallon, ndërsa çmimet e karburanteve janë rritur ndjeshëm gjatë vitit të fundit. Sipas Reuters, çmimi i dizelit është rritur me më shumë se 40 për qind gjatë vitit të fundit.

Rritja e çmimeve lidhet me një kombinim faktorësh, përfshirë ndërprerjet e furnizimeve në Lindjen e Mesme, dëmtimin e kapaciteteve të rafinerive ruse nga sulmet ukrainase, reduktimin e eksporteve kineze dhe nivelet e ulëta të rezervave të karburanteve.

Trump kishte bërë të njëjtin argument edhe më herët, kur i kërkoi presidentit ukrainas Volodymyr Zelensky të ndalonte sulmet ndaj infrastrukturës ruse të naftës. Më 13 shtator, Trump tha se sulmet ukrainase ndaj infrastrukturës ruse të dizelit po shkaktonin mungesa të karburantit dhe po “dëmtonin botën”.

Dy shtetas të Kosovës, 58 dhe 37 vjeç, janë arrestuar në Gjermani dhe ndodhen në paraburgim, nën dyshimin se janë përfshirë në dy raste të rënda zjarrvënieje në ndërtesa banimi. Në njërin prej rasteve, autoritetet po hetojnë edhe dyshimin për tentativë vrasjeje.

Sipas Policisë së Ludwigsburgut dhe Prokurorisë së Stuttgartit, hetimet kanë lidhur dy burrat me dy raste të ndara, të ndodhura në nëntor të vitit 2025 dhe mars të vitit 2026.

Rasti i parë ka ndodhur më 11 nëntor 2025, në një apartament në katin përdhes të një ndërtese shumëfamiljare në Brunnenstraße, në Böblingen. Sipas hetuesve, një shpërthim i fortë i shkaktuar nga zjarri bëri që banorët të kuptonin se kishte rënë zjarr dhe të largoheshin nga ndërtesa.

Hetimet e mëtejshme përqendruan dyshimet te 58-vjeçari nga Kosova, i cili dyshohet se ishte i përfshirë në zjarrvënien e banesës.

Më pas, hetimi çoi edhe te një 37-vjeçar, po ashtu shtetas i Kosovës. Autoritetet dyshojnë se 58-vjeçari e kishte angazhuar atë kundrejt pagesës për t’i vënë flakën një shtëpie në Jägerholzweg, në Weil im Schönbuch, më 29 mars 2026.

Në momentin e zjarrit, në shtëpi ndodhej një grua 86-vjeçare. Ajo u alarmua nga detektori i tymit dhe arriti të largohej nga banesa pa pësuar lëndime.

Për shkak të rrethanave të rastit dhe faktit se gruaja ndodhej brenda banesës kur ajo u përfshi nga zjarri, autoritetet e kanë klasifikuar rastin edhe si dyshim për tentativë vrasjeje.

Pas hetimeve të përbashkëta me Inspektoratin e Policisë Kriminale të Kielit, të dyshuarit u arrestuan në fillim të shtatorit.

Më 3 dhe 4 shtator 2026, ata u paraqitën para një gjyqtari në Gjykatën e Qarkut të Stuttgartit, me kërkesë të Prokurorisë së Stuttgartit.

Gjykata lëshoi urdhër-arreste ndaj të dyve për dyshimin e bazuar për zjarrvënie të rëndë dhe tentativë vrasjeje, ndërsa ata u dërguan në institucionet e paraburgimit.

Hetimet për rrethanat dhe motivin e mundshëm të rasteve janë ende në vazhdim.

Të dy shtetasit konsiderohen të pafajshëm deri në një vendim përfundimtar gjyqësor.

Kuvendi Komunal i Prizrenit ka miratuar unanimisht një deklaratë lidhur me aktgjykimin e shkallës së parë të Dhomave të Specializuara të Kosovës ndaj ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Në deklaratë, Kuvendi thotë se respekton pavarësinë e gjyqësorit, por shpreh “mospajtimin e tij të thellë” me aktgjykimin e shpallur më 16 shtator 2026.

Kuvendi thekson se përgjegjësia penale është individuale dhe, sipas tij, nuk mund të shtrihet apo interpretohet si përgjegjësi kolektive e UÇK-së dhe e luftës së saj.

Po ashtu, Kuvendi i Prizrenit shpreh solidaritet me ish-drejtuesit e UÇK-së dhe familjet e tyre, ndërsa u bën thirrje qytetarëve që, pavarësisht dhimbjes dhe emocioneve, të ruajnë qetësinë, dinjitetin dhe unitetin.

Në fund të deklaratës, Kuvendi i Prizrenit përcjell edhe mesazhin “JO NË EMRIN TIM!”, duke iu referuar formulimit “Në emër të popullit të Kosovës”, me të cilin është shpallur aktgjykimi.

Deklarata plotë:

DEKLARATË LIDHUR ME AKTGJYKIMIN NDAJ ISH-DREJTUESVE TË USHTRISË ÇLIRIMTARE TË KOSOVËS

Kuvendi i Komunës së Prizrenit, duke respektuar pavarësinë e gjyqësorit, shpreh mospajtimin e tij të thellë me aktgjykimin e shkallës së parë të Dhomave të Specializuara të Kosovës, të datës 16 shtator 2026, ndaj ish-drejtuesve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit.

Kuvendi i Komunës së Prizrenit, rithekson se lufta e Ushtrisë Çlirimtare të Kosovës ishte vazhdimësi e luftës për liri dhe çlirim, e lindur nga rrethanat e rënda të represionit, dhunës, vrasjeve dhe dëbimit të popullsisë shqiptare të Kosovës.

Kuvendi i Komunës së Prizrenit, konsideron se, për një dënim penal të kësaj peshe, përgjegjësia personale e secilit të akuzuar duhet të provohet me prova të qarta, konkrete, bindëse dhe përtej çdo dyshimi të arsyeshëm. Përgjegjësia penale është individuale dhe nuk mund të shtrihet apo të interpretohet si përgjegjësi kolektive e Ushtrisë Çlirimtare të Kosovës dhe e luftës së saj.

Kuvendi i Komunës së Prizrenit shpreh solidaritet me Hashim Thaçin, Kadri Veselin, Jakup Krasniqin dhe Rexhep Selimin, me familjet e tyre, si dhe me të gjithë ata që këtë proces e kanë përjetuar me dhimbje dhe shqetësim.

Kuvendi i Komunës së Prizrenit, nderon sakrificën e dëshmorëve, martirëve, veteranëve, invalidëve të luftës dhe të gjithë qytetarëve të Prizrenit dhe Kosovës që kontribuan për lirinë e vendit, duke vlerësuar ruajtjen e kujtesës historike dhe të vlerave të luftës së UÇK-së si përgjegjësi institucionale dhe shoqërore.

U bëhet thirrje qytetarëve të Prizrenit dhe të gjithë Kosovës që, përkundër dhimbjes dhe emocioneve të forta, ta ruajnë qetësinë, dinjitetin dhe unitetin, duke shprehur qëndrimet e tyre në mënyrë paqësore dhe institucionale.

Duke pasur parasysh se aktgjykimi u shpall me formulimin “Në emër të popullit të Kosovës”, Kuvendi i Komunës së Prizrenit përcjell qartë mesazhin e qytetarëve të tij: “JO NË EMRIN TIM!”

Në Qendrën Korrektuese në Smrekonicë ka nisur vjelja e mollëve dhe nxjerrja e patateve nga sipërfaqet bujqësore të kësaj qendre.

Aktiviteti po zhvillohet në kuadër të punës së Njësisë Ekonomike të Shërbimit Korrektues të Kosovës, ndërsa punët bujqësore po realizohen nga të burgosurit, nën mbikëqyrjen dhe mbështetjen e zyrtarëve përgjegjës.

Sipas SHKK-së, angazhimi i të burgosurve në punët bujqësore është pjesë e programeve të punës dhe aftësimit profesional. Përmes këtyre aktiviteteve, atyre u mundësohet të fitojnë shkathtësi praktike, të zhvillojnë ndjenjën e përgjegjësisë dhe të kontribuojnë në aktivitetet prodhuese të Njësisë Ekonomike.

Puna në bujqësi dhe aktivitetet e tjera prodhuese synojnë të ofrojnë një angazhim konstruktiv për të burgosurit dhe të kontribuojnë në përgatitjen e tyre për riintegrim në shoqëri pas përfundimit të vuajtjes së dënimit.