Blog

Ushtria e Ukrainës ka njoftuar këtë të martë, më 25 nëntor, se ka goditur një rafineri nafte ruse në rajonin Krasnodar si dhe një terminal nafte në portin e Novorossiysk.

Siç shkruan Reuters, forcat e Kievit kanë intensifikuar sulmet me rreze të gjatë ndaj objektivave ruse, veçanërisht ndaj objekteve të naftës, ndërsa lufta mes dy vendeve po i afrohet shënimit të katër viteve.

Në një deklaratë në Telegram, Shtabi i Përgjithshëm tha se pajisjet për ngarkimin dhe shkarkimin e naftës në cisternat u goditën. Po ashtu u raportua se një avion rus zbulues A-60 u godit gjatë një sulmi në uzinën ushtarake Beriev.

Ndërkohë, një zyrtar nga shërbimi i sigurisë së brendshme të Ukrainës (SBU) tha se sulmi dëmtoi një anije të madhe zbarkimi që ishte ankoruar pranë molit të një baze detare në Novorossiysk.

Ndërkohë edhe Rusia e ka sulmuar sërish Kievin, duke vrarë të paktën shtatë persona (lexo këtu), teksa zyrtarët amerikanë raportohet të jenë në Abu Dabi në takime të ndara me zyrtarë rusë dhe ukrainas, në përpjekje e sipër për të arritur një marrëveshje, bazuar në propozimin amerikan për paqe.

Propozimi fillestar është kritikuar nga Ukraina dhe Perëndimi, duke u përshkruar si tejet i favorshëm për Moskën.

Kryetari i Prishtinës Përparim Rama, pas përfundimit të konferencë për media ka dal jashtë dhe i është bashkuar protestuesve, punëtorëve të “Trafikut Urban” dhe operatorëve privatë.

Rama foli sërish para media ku theksoi se Ministria e Financave po i mban jashtëligjshëm 35 milionë euro, që janë të hyra vetanake të Komunës së Prishtinës.

I pari i kryeqytetit, iu bëri thirrje kryeministrit në detyrë, Albin Kurtit dhe ministrit në detyrë të Financave, Hekuran Murati që të reflektojnë e t’i lënë inatet politike dhe të bëhen bashkë për popullin, në këtë mënyrë që bëhet edhe zgjidhja për punëtorët të cilët presin zgjidhjen nga ta, njofton Klankosova.tv

“Qiti paret ministër, menjëherë”, ishte mesazhi i Ramës drejtuar ekzekutivit në detyrë.

“Ne kemi marrë dhe masa tjera, kemi thirrë dhe seancë të jashtëzakonshme për të enjten por edhe fondet prej 28 milionë tjera përveç 35 milionëve që janë bartje prej viteve të kaluar asamblistët që e bllokuan herën e kalume kanë tregu që janë për me votu dhe fondet me u marrë. Fakti është se 35 milionë euro vetanake mbahen në mënyrë jo ligjore nga ministri”, u shpreh Rama.

“35 milionë euro që mbahen jashtëligjshëm në Ministrinë e Financave, mundeni me u pagu sot, tash në këtë moment. Nuk ka asgjë që e ndalë pagesën e 35 milionëve tash, menjëherë e që me u pagu operatori publik dhe privatë dhe mos me i lënë këta njerëz në rrugë. Mos me i lënë qytetarët pa shërbime, mos me i lënë shkollat pa rrymë e asnjë qytetarë pa shërbime publike. këtë mundësi e ka ministri i Financave në detyrë dhe prapë refuzon ta bëjë. Dje në konferencë dje hynte në tema të tjera e që nuk kanë të bëjnë me problemin. Problemi është pagesa. Paguaji paratë e kryeqytetit dhe paguhen të gjithë operatorët dhe të gjitha rrogët, këtë mundësi e ka tash, dje dhe me muaj të tërë. I mban paratë jashtëligjshëm. Për këtë arsye kemi bërë edhe kallëzim penal ndaj tij dhe tre zyrtarëve. Çdo temë tjetër është me i qitë hi syve qytetarëve, juve, popullit”, u shpreh kryetari Përparim Rama njofton Klankosova.tv.

Edhe sot qytetarët e Prishtinës, nuk patën transport publik, shkaku i pezullimit të punës së “Trafikut Urban” dhe transportuesve privatë.

Arsyeja e këtij pezullimi është bllokimi i buxhetit të komunës së Prishtinës nga ana e Qeverisë në detyrë.

Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit B.G., për shkak të dyshimit të bazuar mirë se i njëjti ka kryer veprat penale “Vrasja e rëndë në tentativë” nga neni 173 par. 1 nënpar. 1.1, 1.3, 1.11, lidhur me nenin 28 dhe “Mbajtja në pronësi, kontroll ose posedim të pa autorizuar të armëve” nga neni 366 par.1 të Kodit Penal të Republikës së Kosovës (KPRK).

Sipas aktakuzës, më datë 17.10.2025, rreth orës 00:10 min, në banesën familjare në Prizren, pas një konflikti të çastit me motive xhelozie, i pandehuri B.G., e sulmon me thikë me gjatësi tehu prej 13 cm, bashkëshorten M.A., duke e goditur gjashtë herë dhe duke i shkaktuar dëmtime serioze të organeve të brendshme.

“Gjithashtu, i pandehuri e godet me thikë edhe vajzën e mitur të viktimës, e cila kishte tentuar të ndërhynte, duke i shkaktuar lëndime të rënda në zonën e krahërorit dhe barkut. Lëndimet e shkaktuara ndaj të dy viktimave janë konfirmuar nga ekspertiza mjeko-ligjore e datës 24.11.2025”, thuhet në njoftimin e Prokurorisë Themelore në Prizren.

Tutje, thuhet se prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartcekur për veprat penale për të cilat akuzohet të shpallet fajtor dhe të dënohet sipas ligjit.

Zyrtari i Aleancës për Ardhmërinë e Kosovës, Pal Lekaj, ka deklaruar se zgjedhjet e parakohshme të 28 dhjetorit do të kenë ndikim të rëndësishëm në drejtimin politik të vendit dhe se partia e tij është e gatshme për këtë proces. Ai tha se AAK do të garojë e vetme, me Ramush Haradinajn si kandidat kryesor, duke theksuar se partia ka “strukturë të konsoliduar, program të qartë dhe lidership të provuar”.

“Zgjedhjet e 28 dhjetorit do të jenë ndër më vendimtaret për vendin. Ne jemi të përgatitur plotësisht për këto zgjedhje”, deklaroi Lekaj për lajmi.net, duke shtuar se qytetarët do të vlerësojnë seriozitetin e forcave politike.

Ai komentoi edhe situatën e Lëvizjes Vetëvendosje, për të cilën tha se po përballet me “rënien më të ndjeshme të mbështetjes” që nga ardhja në pushtet. Sipas tij, qytetarët janë zhgënjyer nga “mungesa e rezultateve”, menaxhimi i dobët i sektorëve kyç dhe konfliktet e vazhdueshme politike.