Blog

Ka vdekur ish-ushtarja dhe mjekja e Ushtrisë Çlirimtare e Kosovës, Ajete Bashota.

Për vdekjen e saj, ka shkruar kryetari i Podujevës, Shpejtim Bulliqi, i cili shprehu ngushëllimet e tij.

“Ajete Bashota do të kujtohet gjithmonë për humanizmin, profesionalizmin dhe kontributin e saj të çmuar, si në shërbim të pacientëve poashtu edhe në shërbim të lirisë së vendit si luftëtare e mjeke e lirisë. Në emër të Komunës së Podujevës shpreh ngushëllimet më të sinqerta për familjen, kolegët dhe të gjithë ata që e kanë njohur”, ka shkruar ai.

Të paktën katër persona raportohen të vdekur ndërsa një zjarr përfshiu disa ndërtesa banimi shumëkatëshe në Hong Kong.

Pamjet tregojnë flakë dhe tym që ngrihen nga kullat, ku besohet se janë bllokuar edhe disa persona.

Besohet se zjarri është përhapur përmes skelave prej bambuje në pjesën e jashtme të ndërtesave, dhe shërbimet e emergjencës janë në vendngjarje.

Fotografitë nga kompleksi i banesave Wang Fuk Court, në Tai Po, Hong Kong tregojnë tymin që ngrihet nga blloqet e kullave.

Zjarri shpërtheu në orën 14:51 sipas kohës lokale, sipas një deklarate nga qeveria e Hong Kongut.

Në orën 17:00, shtatë persona u dërguan në dy spitale për trajtim, thuhet në të.

Nga këta, “katër persona u shpallën të vdekur, dy persona janë në gjendje kritike dhe një person është në gjendje të qëndrueshme”.

Inxhinieri Ermal Sadiku i është bashkuar Lidhjes Demokratike të Kosovës.

Kryetari i partisë, Lumir Abdixhiku, lavdëroi karrierën e tij profesionale dhe tha se

“Si themelues i disa prej kompanive më të suksesshme të sektorit ICT, ai ka kontribuar drejtpërdrejt në rritjen e industrisë vendore të teknologjisë, duke krijuar vende pune me standarde ndërkombëtare dhe duke dëshmuar se edhe nga Kosova mund të ndërtohen produkte që konkurrojnë denjësisht në tregun global”, ka shkruar Abdixhiku.

Abdixhiku tha se aderimi i tij në LDK është forcim i ekipit meqë “ai vjen me profesionalizëm, integritet e përvojë”.

“Ai vjen si një adresë e tashme politike dhe e ardhme e sektorit më me potencial në Kosovë”.

Sadiku, i cili është edhe bashkëthemeluesi i LinkPlus, ka shërbyer si ligjërues në fakultet, si kryetar i Bordit të STIKK dhe vazhdon të jetë mentor dhe trajner i shumë të rinjve që synojnë karrierë në teknologji.

Postimi i plotë i Abdixhikut:

Mirë se vjen, Ermal!

Ermal Sadiku, një prej emrave më të shquar të inxhinierisë, inovacionit dhe sipërmarrjes teknologjike në Kosovë, nga sot i bashkohet Lidhjes Demokratike të Kosovës.

I lindur dhe rritur në Prishtinë, Ermal Sadiku që në hapat e parë të karrierës së tij akademike ishte një prej studentëve më të përgatitur të gjeneratës. Studimet e avancuara në Gjermani i dhanë jo vetëm ekspertizë të thellë teknike, por edhe një perspektivë ndërkombëtare mbi inovacionin, standardet moderne të industrisë dhe mënyrat se si ndërtohen ekosistemet e qëndrueshme teknologjike. Pikërisht këto përvoja formësuan vizionin e tij profesional, që sot përbën një vlerë të çmuar për vendin.

Pas kthimit në Kosovë, Ermal Sadiku u bë një nga zërat udhëheqës të transformimit digjital.

Si themelues i disa prej kompanive më të suksesshme të sektorit ICT, ai ka kontribuar drejtpërdrejt në rritjen e industrisë vendore të teknologjisë, duke krijuar vende pune me standarde ndërkombëtare dhe duke dëshmuar se edhe nga Kosova mund të ndërtohen produkte që konkurrojnë denjësisht në tregun global.

Ai ka shërbyer si ligjërues universitar, duke ndarë dije me gjenerata të tëra studentësh. Si kryetar i Bordit të STIKK, ai ka ndikuar në hartimin e politikave dhe strategjive që kanë ndërtuar ekosistemin e sotëm të fortë të teknologjisë në vend. Përmes mentorimit dhe trajnimeve, ai vazhdon të jetë inspirim për qindra të rinj që ëndërrojnë një karrierë në fushën e inovacionit.

Sot, Ermal Sadiku njihet si një prej figurave kryesore të inovacionit dhe sipërmarrjes në Kosovë; një profesionist me vizion, një lider me përvojë dhe një kontribues i palodhur në zhvillimin e digjitalizmit.

Aderimi i tij në LDK është forcim i ekipit tonë. Ai vjen me profesionalizëm, integritet e përvojë. Ai vjen si një adresë e tashme politike dhe e ardhme e sektorit më me potencial në Kosovë.

Ne na udhëheqë besimi në potencialin e të rinjve kosovarë; se ata janë çelësi për të ndërtuar një të ardhme më të mirë; një të ardhme ku Kosova qëndron denjësisht në hartën e inovacionit global.

Ardhja e tij, dhe e shumë të tjerëve që po na bashkohen, është një thirrje e qartë për bashkim të secilit që beson se vendi meriton më shumë; që dëshiron ndryshim dhe angazhohet për të.

Dyert tona janë të hapura.

Mirë se vjen, Ermal Sadiku! Paç shëndet e përkushtim në këtë rrugëtim të ri.

Kreu i AAK-së, Ramush Haradinaj, ka shpërndarë një mesazh drejtuar diasporës kosovare, në prag të nisjes së periudhës së aplikimit për regjistrimin e votuesve jashtë Kosovës për zgjedhjet e parakohshme.

Nga 26 nëntori deri më 6 dhjetor 2025, mërgimtarët kanë mundësi të regjistrohen për të ushtruar të drejtën e tyre të votës.

Në postimin e tij, Haradinaj vë në pah rolin historik të diasporës.

“Atdheu ju mban me vete, kudo që shkoni. E kam ndjerë gjithmonë peshën e mallit tuaj dhe forcën e dashurisë suaj për Kosovën”, ka shkruar Haradinaj.

Ai kujton sakrificat e brezave të mërgimtarëve, që nga koha e hershme e mërgimit e deri te angazhimi në luftën për liri.

“Mërgimi juaj nuk është thjesht histori largimi. Është histori sakrifice, për jetën, për lirinë…Rrugëtimi ishte i atyre që luftuan e u angazhuan, i dëshmorëve e i heronjëve të cilët Kosova e shqiptaria gjithmonë i nderoi”, ka shkruar tutje ai.

Haradinaj thekson se çdo brez i diasporës e ka mbajtur gjallë lidhjen me vendlindjen.

“Rrugëtimi juaj fillon te gjyshi, kalon te babai, te i biri, e sot te nipi që po rritet për ta dashur Kosovën si familja e tij”

Duke falënderuar mërgatën për kontributin e vazhdueshëm, ai nënvizon se vendi ka nevojë për zërin e tyre në procesin zgjedhor.

“Ju e doni Kosovën më shumë se sa fjalët mund ta tregojnë. Prandaj, zëri juaj, besimi juaj dhe angazhimi juaj na duhen gjithmonë. Kosova ka nevojë për ju, siç edhe ju e keni mbajtur Kosovën gjallë në zemrat tuaja”, ka shkruar Haradinaj. /TelegraFI