Blog

Një 44-vjeçar është arrestuar në Shijak, pas dyshimeve se dhunoi seksualisht një 18-vjeçare.

Policia në Shqipëri ka njoftuar se gjatë kontrollit të banesës së të dyshuar, u gjet dhe sekuestrua në cilësinë e provës materiale një shkop gome dhe një armë gjahu, të cilën e mbante pa leje të organeve kompetente.

Materialet procedurale i kaluan Prokurorisë së Rrethit Gjyqësor Juridiksionit të Përgjithshëm Durrës, për veprat penale “Kryerja e marrëdhënieve seksuale me dhunë me të rritura, me persona të paaftë për t’u mbrojtur”, “Mbajtje pa leje të organeve kompetente të armëve të gjahut” dhe “Mbajtje pa leje të organeve kompetente të armëve të ftohta”.

Kanali i Ibër-Lepencit është dëmtuar sërish.

Policia e Kosovës ka bërë me dije se persona të panjohur me mjete të forta kanë dëmtuar një pjesë të kanalit.

Rasti fillimisht është bërë i ditur në raporton 24 orësh. Sipas policisë, kjo ka ndodhur mes datave 22 dhe 25 mars.

E shefi i operativës rajonale për Mitrovicën e Veriut, Petrit Fejza, ka bërë të ditur për gazetën online Reporteri.net se se vlera e dëmit është rreth 3000-4000 euro.

“Më datë 25.11.2025 rreth orës 12:15 ankuesi, punëkryesi në kanalin e Ibër-Lepencit ka raportuar se cerada-najloni i cili ka qenë i shtrirë në bajpas, i është dëmtuar.

Vlera e dëmit, sipas ankuesit është rreth 3000-4000 euro. Në vend të ngjarjes kanë dalë njësite policore dhe kanë shikuar vendin. Në lidhje me rastin është njoftuar prokurori i shtetit dhe rasti është hapur si ‘asgjësim apo dëmtim i pasurisë’. Rasti është nën hetime”, ka thënë Fejza.

Kujtojmë se më 29 nëntor, 2024 kishte ndodhur një shpërthim në këtë kanal. Kosova e cilësoi atë si një akt terrorist dhe akuzoi Serbinë për organizimin e tij.

Ka përfunduar protesta e punëtorëve të “Trafikut Urban” dhe përfaqësuesve të operatorëve privatë, të cilët tash e tre ditë kanë ndërpre qarkullimin e autobusëve për shkak se nuk kanë marrë pagat e tyre.

Ndryshe nga ditët e tjera, sot askush nga Komuna e Prishtinës nuk i takoi, megjithatë, Ilim Gashi, përfaqësues i sindikatës së “Trafikut Urban” paralajmëroi se protestë do të mbajnë dhe nesër.

“Sindikata e trafikut urban edhe ditën e tret sot vazhduam me protestën deri në ora 13:00 që e kemi pasur të caktuar. Ora 13:00 po e përfundojmë protestë por nuk doli askush nga organet e komunës. Nesër protesta vazhdon me të njëjtin ritëm, për orën e kohën informoheni me vonë”, tha ai.

E kryetari i sindikatës së re të “Trafikut Urban”, Shaip Selmani kërkoi mbështetje për ta futur punën në binar.

“Në veçanti i falënderojmë qytetarët, ju bëjë thirrje qytetarëve që brenda mundësive që i kanë, të na përkrahim edhe të na bashkëngjiten në këtë protestë që njëherë e përgjithmonë të qesim punën në binar”, tha ai.

Edhe sot protestuesit kanë vendosur autobusët tek objekti i Komunës së Prishtinës.

Gjenerali amerikan Wesley Clark, ish-Komandant Suprem i Forcave Aleate të NATO-s në Evropë, ka folur për Klix.ba rreth operacioneve të fundit ushtarake në Bosnje dhe Hercegovinë në vitin 1995 dhe negociatave të Dejtonit. Ai ka komentuar mundësinë e avancimit të forcave të Armatës së Bosnjës e Hercegovinës, HVO-s dhe Ushtrisë Kroate drejt Prijedorit e Banjallukës, si dhe rolin e SHBA-ve në frenimin e operacioneve.

Duke folur për ofensivën e vjeshtës 1995, Clark deklaroi se parandalimi i avancimit të forcave të Bosnjës dhe Kroacisë ndryshoi rrjedhën e luftës.

“Po të mos ishin ndalur, ndoshta do ta merrnin Banjallukën, por në luftë momenti është vendimtar. Kur e humbën, nuk mundën ta rikthenin”, tha ai.

Clark mohoi pretendimet se NATO apo SHBA kishin planifikuar bombardime ndaj ARBiH dhe HV-së në rast se do të hynin në Banjallukë.

“Jo, nuk do t’i bombardonim ato njësi, dhe sipas mendimit tim marrëveshja e Dejtonit do të ishte edhe më e fortë. Por vendimi për ndalimin e avancimit u mor sepse Federata në atë moment kontrollonte rreth 51 për qind të territorit, ashtu siç ishte paraparë. Ekzistonte edhe frika se forcat serbe do të nisnin një kundërofensivë nga Serbia”, theksoi Clark.

I pyetur për pretendimet se operacioni kroat “Una-95” u nis me kërkesë të Uashingtonit, Clark mohoi një gjë të tillë.

“Historia zyrtare është se morën vetëm ‘dritë të verdhë’ nga Shtëpia e Bardhë. Në Pentagon, në korrik 1995, i thamë ministrit Šušak: ‘Jo, mos e bëni’”, u shpreh ai.

Clark sqaroi se një ndërhyrje tokësore e SHBA-ve nën komandon e OKB-së do të kishte qenë e papranueshme.

“Do të ishte e pakuptimtë të ndërhynim me forca tokësore para Dejtonit nën mandat të OKB-së. SHBA nuk do të lejonte që trupat amerikane të ishin nën kontrollin e OKB-së”, tha ai.

Sipas Clark, edhe përdorimi i kufizuar i forcës ajrore në shtator 1995 ndikoi direkt te Miloševiqi.

“Edhe ajo fushatë e kufizuar ajrore e shtatorit e shtyu Milosheviqin drejt negociatave – e di, sepse kam qenë dy herë me të dhe kemi folur për këtë.”

Clark rrëfen se në negociatat e Dejtonit ishte “anëtari i dytë më i lartë i ekipit amerikan”, duke punuar në aneksin ushtarak, hartat dhe koordinimin me ushtritë serbe e kroate.

“Izetbegoviqi ishte negociatori më i ashpër, sepse kishte më shumë për të humbur – duhej të dorëzonte pjesë të territorit të vendit”, tha Clark.

Ai shtoi se Tuxhmani nuk kishte çështje të hapura të mëdha

“Milosheviqi e donte marrëveshjen sepse kishte arritur kulmin e tij ushtarak dhe diplomatik, ndaj i detyroi serbët e Bosnjës që të pranonin.”

Clark kujtoi se rreziku më i madh për prishjen e negociatave ishte territori i Brçkos.

“Pika më kritike ishte ndarja e Brçkos – të dyja palët e donin. Por u shpall zonë e përbashkët e okupuar dhe vendimi u shty, gjë që bëri të mundur marrëveshjen përfundimtare”, tha ai.

Sipas tij, kishte edhe tensione të tjera – për praninë e NATO-s, aneksin ushtarak dhe statusin e Sarajevës – por vetëm çështja e Brçkos “seriozisht e rrezikoi” arritjen e marrëveshjes.

Banorët e fshatit Çabër të komunës së Zubin Potokut, në pjesën veriore të Mitrovicës, janë ankuar se po përballen me ndërprerje të shpeshta të energjisë elektrike nga ana e operatorit të energjisë, ndërsa sipas tyre, familjet serbe në zonë po furnizohen pa ndërprerje, edhe pse shumë prej tyre nuk posedojnë as matës të rrymës.

Sipas banorëve, prej disa ditësh situata është bërë e paqëndrueshme, duke shkaktuar shqetësime në jetën e përditshme.

“Tash e disa ditë, zyrtarë të elektro-serbëve janë duke ardhur për t’i shkëputur shqiptarët nga rryma në fshatin Çabër. Mua personalisht më është ndërprerë rryma sepse nuk kam pasur mundësi ta paguaj menjëherë, dhe pa paralajmërim më kanë shkëputur furnizimin,” ka deklaruar një qytetar për Tëvë1.

Ai thotë se ndërsa shqiptarët po përballen me masa strikte, në anën tjetër familjet serbe nuk po përjetojnë të njëjtën situatë.

“Në pjesën ku qëndrojnë serbët, rryma nuk po ndërpritet fare, pavarësisht se shumë prej tyre nuk kanë të regjistruar as orë të rrymës. Kjo është një padrejtësi që po e shohim çdo ditë,” është shprehur ai.

Banorët kërkojnë trajtim të barabartë dhe ndërhyrje nga institucionet përgjegjëse për të garantuar furnizim të njëjtë me energji elektrike për të gjithë qytetarët, pa dallime etnike.