Papa Leoni ka nisur udhëtimin e tij të parë ndërkombëtar si udhëheqës i Kishës Katolike, një turne gjashtëditor në Turqi dhe Liban.
Arritja e Papës në Stamboll ka shkaktuar kaos total në trafik.
Gjatë vizitës, e cila do të zhvillohet nga 27 deri më 30 nëntor shumë rrugë të qytetit do të mbyllën për orë të caktuara për shkak të sigurisë.
Kjo ka bërë që mëngjesi të nis në Stamboll me një trafik të dendur dhe me kolona masive.
Tri dekada pas heqjes, Franca planifikon të rivendosë shërbimin e detyrueshëm ushtarak. Këtë fakt do ta bëjë publik presidenti Emmanuel Macron në vizitën që do të bëjë pranë Brigadës së 27-të të Këmbësorisë Malore në Alpet Franceze. Sipas raporteve të medias franceze, është planifikuar një shërbim ushtarak vullnetar dhjetëmujor për 18-vjeçarët. Ushtria franceze synon të rekrutojë 3,000 të rinj, burra dhe gra, në vitin e parë. Objektivi për vitin pasardhës është 10,000, me qëllim arritjen e 50,000 rekrutëve të secilës grupmoshë çdo vit deri në vitin 2035.
Qëllimi është të forcohet “pakti midis ushtrisë dhe kombit”, siç shpjegoi Macron në një intervistë radiofonike me transmetuesin privat RTL të martën. Duke pasur parasysh kërcënimin nga Rusia dhe “konfrontimin e saj strategjik”, i cili deri më tani ka marrë një “formë hibride”, Franca duhet të demonstrojë forcë. Rusia po përpiqet të destabilizojë Evropën dhe të dobësojë demokracitë e saj, tha Macron. Ai përmendi si shembuj migrantët që Moska kishte dërguar në kufirin e jashtëm evropian nëpërmjet Bjellorusisë, si dhe shkeljet e shumta të hapësirës ajrore evropiane.
Për më tepër, Rusia kryen sulme të përditshme informative dhe kibernetike kundër vendeve të BE-së, përfshirë Francën. “Nëse ne francezët duam të mbrojmë veten, nuk mund të tregojmë dobësi përballë fuqisë që na kërcënon më shumë”, tha Macron.
Ndryshe nga Gjermania, në Francë nuk pati muaj debatesh parlamentare për këtë çështje. Si kreu i forcave të armatosura, presidenti mund të vendosë vetë për rikthimin e shërbimit ushtarak, veçanërisht shërbimit vullnetar. Por një javë para njoftimit zyrtar për rivendosjen e rekrutimit ushtarak, Shefi i Shtabit të Macronit, Gjenerali Fabien Mandon, kishte marrë iniciativën. Me deklaratën e tij se Franca nuk duhet të “luhatet” dhe duhet të përgatitet mendërisht për të “humbur fëmijët e saj”, siç e tha në fjalimin e tij para Kongresit të Kryetarëve të Bashkive Franceze, Mandon tronditi shumë francezë.
Njoftimi i Macron nuk është surprizë. Në pritjen e Vitit të Ri të ushtrisë në fillim të këtij viti, ai kishte folur tashmë për nevojën për t’u ofruar të rinjve mundësi për të kontribuar, duke pasur parasysh peizazhin aktual të kërcënimit. Ai njoftoi se do t’i kërkonte propozime ushtrisë dhe Ministrisë së Mbrojtjes. Njëkohësisht, instituti kërkimor i Akademisë Ushtarake Franceze (IRSEM) porositi një studim. Sipas studimit, 62 përqind e të rinjve francezë janë të gatshëm të shërbejnë për të mbrojtur Francën. Dyzet e tetë përqind madje do të sakrifikonin jetën e tyre.
Kryetari i Partisë Demokratike të Kosovës, Bedri Hamza, ka uruar Ditën e Forcës, duke nderuar vajzat dhe djemtë e FSK-së, të cilët me atdhedashuri, disiplinë dhe përkushtim mbrojnë sovranitetin dhe dinjitetin e vendit.
Përmes një postimi në Facebook, Hamza tha se vendi është krenarë për ushtrinë e vet, e cila po rritet, profesionalizohet dhe po ecën drejt standardeve të NATO-s.
“Në Ditën e Forcës i nderojmë vajzat dhe djemtë e FSK-së, të cilët me atdhedashuri, disiplinë dhe përkushtim mbrojnë sovranitetin dhe dinjitetin e Republikës së Kosovës. Jemi krenarë për Forcën tonë që po rritet, profesionalizohet dhe po ecën drejt standardeve të NATO-s, duke na përfaqësuar me dinjitet kudo. FSK-ja e fortë, atdheu i sigurt! Ushtarë, urime Dita e Forcës!”, ka shkruar Hamza.
Në prag të festave të Nëntorit, Kryeministri Edi Rama ka ndarë mëngjesin e sotëm në rrjetet sociale një urim të veçantë, realizuar nga nxënësit e shkollës “Ndre Mjeda” në Shkodër.
Materiali artistik, i përgatitur në kuadër të programit “Art dhe Zeje”, sjell nxënësit me simbolet kombëtare, teksa interpretojnë këngën “Shqipëri o vendi im”.
“Mirëmëngjes dhe me këtë urim emocionues nga nxënësit e shkollës ‘Ndre Mjeda’, përgatitur përmes programit ‘Art dhe Zeje’, me shumë dashuri për Shkodrën dhe gjithë Shqipërinë, ju uroj një ditë të mbarë”, shkruan kryeministri Rama.
Ndërkohë, vendi po përgatitet për festat e 28-29 Nëntorit, Ditën e Pavarësisë dhe Ditën e Çlirimit.
Në kuadër të përgatitjes së zgjedhjeve të parakohshme për Kuvendin e Kosovës, Komisioni Qendror i Zgjedhjeve ka marrë vendim për miratimin e Qendrave të Votimit për votimin jashtë vendit, i cili do të mbahet më 27 dhjetor 2025, një ditë para ditës së zgjedhjeve në Kosovë.
Sipas vendimit të KQZ-së, procesi i votimit planifikohet të organizohet në 50 përfaqësi diplomatike me gjithsej 66 vendvotime të vendosura në 36 shtete të botës. Megjithatë, kjo listë u tha se do të mund të rishikohet nga KQZ, varësisht nga numri i votuesve që do të regjistrohen për të votuar në përfaqësi diplomatike.
Gjithashtu, KQZ ka caktuar numrin maksimal 950 votues që mund të regjistrohen për të votuar në një vendvotim në përfaqësi diplomatike. Sipas vendimit të KQZ-së, numri maksimal i votuesve që mund të regjistrohen për të votuar në këto përfaqësi diplomatike është 62,700 votues.
Po ashtu, sipas vendimit të KQZ-së, Qendra të Votimit do të hapen edhe në hapësira shtesë, jashtë përfaqësive diplomatike, sipas propozimit nga Ministria e Punëve të Jashtme dhe Diasporës.
“Lokacionet shtesë përfshijnë 10 Qendra të Votimit (Gjermani 5; Zvicër 3, Mbretëri e Bashkuar 1 dhe ShBA 1) me gjithsej 43 vendvotime dhe me numër maksimal të votuesve që mund të regjistrohen për të votuar 40,850 votues. Në përgjithësi, numri i Qendrave të Votimit për votimin jashtë Kosovës, të miratuara nga KQZ është 60, me gjithsej 109 vendvotime. Ndërkaq, numri maksimal i votuesve që mund të regjistrohen për të votuar në këto Qendra të Votimit është 103,550”, thuhet në njoftim.
KQZ sqaron se kufizimi i numrit maksimal të votuesve që mund të regjistrohen vlen vetëm për votimin në përfaqësi diplomatike, ndërkaq numri i votuesve që mund të regjistrohen për votim përmes postës është i pakufizuar.
Në rast të plotësimit të numrit maksimal të votuesve në përfaqësi diplomatike, sipas parimit të kohës së aplikimit, aplikuesi do të udhëzohet për regjistrim për mënyrat e tjera të votimit përmes postës.
Periudha e regjistrimit të votuesve jashtë Kosovës ka filluar më 26 nëntor dhe do të përfundojë më 6 dhjetor 2025.
Ministri në detyrë i Punëve të Brendshme, Xhelal Sveçla, ka uruar qytetarë për Ditën e Forcës të Ushtrisë së Kosovës.
Sveçla përmes një postimi në facebook është shprehur se , Forca e Sigurisë së Kosovës po rritet dhe po forcohet çdo ditë, duke i shërbyer sigurisë dhe mbrojtjes së Republikës sonë,=.
“Si vijimësi e Ushtrisë sonë Çlirimtare, Forca e Sigurisë së Kosovës po rritet dhe po forcohet çdo ditë, duke i shërbyer sigurisë dhe mbrojtjes së Republikës sonë.
Në prag të festës sonë kombëtare, Ditës së Pavarësisë së Shqipërisë, sot shënojmë edhe Ditën e Forcës sonë.
Urimet më të përzemërta për të gjithë pjesëtarët e Forcës së Sigurisë së Kosovës, që me përkushtim dhe guxim i japin kuptim uniformës dhe i shërbejnë pa u kursyer vendit tonë.
Gëzuar Dita e Forcës”, ka shkruar Sveçla.
Prishtina e Vushtrria në hendboll, kanë luajtur ndeshje shumë interesante të mërkurën mbrëma në Pallatin e Rinisë dhe Sportit.
Prishtina e nisi ndeshjen mirë dhe mbajti epërsi deri në minutën e 43-të kur rezultati u barazua në 29:29.
Më pas vushtrriasit krijuan epërsi prej një, dy e tre gola, 34:31. Prishtina barazoi në 34:34 e më pas u luajt për secilin gol.
Në minutën e 58-të, Bleon Gela shënoi për epërsinë 39:38 të Vushtrrisë. Në të njëjtën minutë Altin Cacaj shënoi për 39:39. Ndërkohë dhjetë sekonda para fundit, Enis Kuleta e shënoi golin e fitores 40:39 për Prishtinën.
Kuleta i kishte plot 15 gola për Prishtinën. 12 i shtoi Albi Gjuka, ndërsa Cacaj i realizoi gjashtë.
Egzon Ademi ishte më efikasi te Vushtrria me 12 gola. Dhjetë i realizoi Bleon Gela e pesë Amir Fazliu.
Ndeshja i takoi xhiros së dhjetë të Superligës së Kosovës.
Prishtina i ka gjashtë pikë në vendin e gjashtë, ndërsa ka luajtur nëntë ndeshje. Vushtrria mbetet e fundit dhe në kërkim të pikëve të para. /ATVLIVE.TV
Edhe pse Princi Andrew nuk mban më shumë nga titujt e tij mbretërorë dhe është larguar nga detyrat publike, ai mbetet ende në radhën e trashëgimisë së fronit britanik. Arsyeja nuk lidhet me titujt, por me ligjin.
Në monarkinë britanike, rendi i trashëgimisë përcaktohet nga lindja. Andrew është vëllai i mbretit Charles III, ndaj vendi i tij në listë nuk ndryshon, pavarësisht humbjes së rolit publik ose titujve ushtarakë. Andrew gjithsej humbi titujt ushtarakë, patronazhet mbretërore, përdorimin zyrtar të titullit “His Royal Highness” (“Lartmadhëria juaj”), detyrat si anëtar aktiv i familjes mbretërore, por këto nuk prekin ligjin e trashëgimisë.
Për të hequr dikë nga radha e trashëgimisë duhet ndërhyrje e Parlamentit, si dhe në disa raste miratim nga vendet e Commonwealth-it. Është një proces i ndërlikuar dhe shumë i rrallë, ndaj pallati nuk e ka ndërmarrë.
Si përfundim, Princi Andrew mund të humbasë tituj dhe role, por jo vendin në linjën e trashëgimisë. Në monarki, rolet ndryshojnë por gjaku dhe ligji jo.
Presidentja Vjosa Osmani, ka uruar Ditën e Forcës të Ushtrisë së Kosovës, ku sot është organizuar Dita e Hapur në të gjitha kazermat e FSK-së.
Gjatë vizitës në kazermën “Adem Jashari”, Osmani tha se Forca e Sigurisë së Kosovës është pasardhëse e denjë e Ushtrisë Çlirimtare të Kosovës.
“Sot është një ditë krenarie për gjithë popullin e Kosovës. Është ditë krenarie, sepse ushtria jonë e sotme, është pasardhëse e denjë e krenare e Ushtrisë Çlirimtare të Kosovës, e djemve, vajzave të cilët vunë themelet e lirisë sonë. Sot, këta djem e vajza na bëjnë krenarë , jo vetëm brenda vendit, por kudo që ata shërbejnë”, u shpreh Osmani.
Nga ana tjetër, ish-kryetari i Kuvendit të Kosovës, Dimal Basha, tha se janë të lumtur për punën e jashtëzakonshme të FSK-së, të cilën e quajti amanet të njerëzve që ranë për lirinë e Kosovës.
“Jemi jashtëzakonisht të lumtur për një punë të jashtëzakonshme të ushtrisë tonë, një vazhdimësi e një historie të lavdishme e popullit tonë, dhe trashëgimi e drejtpërdrejt e Ushtrisë Çlirimtare të Kosovës”, tha Basha.
E krejt në fund, një urim për Ditën e Forcës e pati edhe kryeministri në detyrë, Albin Kurti.
“Na bëjnë krenar, e ndihemi të sigurt si shtet”, tha ai për Forcën e Sigurisë të Kosovës.
Federata e Basketbollit e Kosovës (FBK) ka organizuar aktivitetin e radhës në kuadër të kampanjës “Her World, Her Rules”, që ka për qëllim masivizimin dhe promovimin e vajzave në basketboll.
Eventi shumë i rëndësishëm është mbajtur në Shkollën Fillore të Mesme të Ulët “Bajram Curri” në Istog.
Në këtë ngjarje kanë marrë pjesë edhe përfaqësues të KFOR-it.
Afër 100 vajza kanë marrë pjesë në këtë aktivitet, duke e masivizuar këtë event.
Para vajzave është folur për rëndësinë që ka basketbolli në jetën e tyre, fuqizimin dhe zhvillimin e tyre për të ardhmen.
Projekti ‘Her World, Her Rules’ synon të inkurajojë dhe të promovojë përfshirjen e vajzave dhe grave në basketboll, duke ofruar trajnime dhe mundësi të reja, FBK synon të krijojë një mjedis mbështetës dhe motivues për basketbollistet. /ATVLIVE.TV
