Blog

Papa Leoni mbërriti këtë mëngjes në Ankara për të nisur udhëtimin e tij të parë apostolik jashtë vendit që nga fillimi i papatit të tij, duke vizituar Turqinë dhe Libanin. Ndalesa e parë ishte Mauzoleu i Atatürk-ut për të nderuar themeluesin e Turqisë moderne.

Presidenti turk Recep Tayip Erdogan e mirëpriti Papa Leonin XIV në Pallatin Presidencial, dhe ceremonia u transmetua nga televizioni shtetëror TRT.

Papa u nis nga Aeroporti Fiumicino në orën 7:58 me një Airbus A320neo të ITA Airways dhe do të kthehet në Romë pasditen e së martës, më 2 dhjetor, shkruan ANSA.

Gjatë fluturimit, Papa Leo theksoi rëndësinë e dërgimit të një mesazhi të së vërtetës, harmonisë dhe paqes. Duke përkujtuar përvjetorin e 1,700-të të Nikaia, ai tha se udhëtimi promovon unitetin mes krishterëve dhe një mesazh më të gjerë paqeje për botën. Ai ftoi të gjithë njerëzit, pavarësisht nga dallimet apo feja, të kërkojnë unitet dhe vëllazëri.

Ai gjithashtu uroi gazetarët për Ditën e Falenderimeve, duke i falënderuar për shërbimin e tyre ndaj Vatikanit dhe botës.

Papa Leon XIV u shoqërua në aeroplan nga sigurimi i Vatikanit dhe policia, dhe u prit nga drejtues të ITA Airways dhe autoritete italiane të aviacionit dhe aeroporteve. Ai iu përshëndet të pranishmëve para se të hipte në aeroplan, transmeton KosovaPress.

Presidenti italian Sergio Mattarella i dërgoi një mesazh Papës, duke i uruar sukses dhe duke lavdëruar misionin e tij për të promovuar “harmoninë ndërfetare, pluralizmin kulturor dhe vëllazërinë njerëzore në Turqi dhe Liban”.

Ish-ambasadori i Kosovës në Kroaci, Gëzim Kasapolli ka aderuar në Lidhjen Demokratike të Kosovës.

Kryetari i LDK-së, Lumir Abdixhiku ka njoftuar se Kasapolli i është bashkuar LDK-së, ndërsa ka deklaruar se ai është një prej emrave më të njohur të diplomacisë, integrimit evropian dhe analizës politike në vend.

“Me më shumë se dy dekada përvojë të qëndrueshme në institucione vendore e ndërkombëtare, Gëzimi ka ndërtuar një profil unik profesional, nga shërbimi diplomatik, tek proceset kyçe shtetformuese dhe zhvillimi i politikave evropiane. Si Ambasador i Republikës së Kosovës në Kroaci, ai ka përfaqësuar vendin me dinjitet, duke forcuar marrëdhëniet bilaterale dhe duke promovuar interesat strategjike të Kosovës në një prej kryeqyteteve më të rëndësishme të BE-së”, ka deklaruar ai.

Mes tjerash, ai ka shtuar se “Përpara kësaj, Gëzimi ka mbajtur pozitat më të larta në procesin e integrimit evropian: si Zëvendësministër dhe më pas si Ministër në detyrë i Integrimit Evropian”.

“Ai ishte njeriu kyç në nisjen dhe negociimin e Marrëveshjes së Stabilizim-Asociimit (MSA), akti juridik më i rëndësishëm kontraktual mes Kosovës dhe Bashkimit Evropian”.

Ministrja në detyrë e Arsimit, Shkencës, Teknologjisë dhe Inovacionit, Arbëria Nagavci, së bashku me zëvendësministrin në detyrë të Arsimit, Arsim Ademi, morën pjesë në prezantimin e Kurrikulës së re për Edukimin në Fëmijërinë e Hershme (EFH) për fëmijët e moshës 0–6 vjeç, në kuadër të Konferencës Kombëtare “Së bashku për edukim cilësor në fëmijërinë e hershme”.

Ministrja Arbërie Nagavci theksoi se Kurrikula e re paraqet një vizion modern dhe gjithëpërfshirës, i cili e vendos fëmijën në qendër të procesit mësimor.

“E mbështetur në filozofinë e të nxënit përmes lojës, mirëqenies, zhvillimit holistik dhe kompetencat e shekullit XXI, kurrikula është hartuar në përputhje me udhëzuesin e IBE-UNESCO-s”, u shpreh Nagavci.

Ministrja rikujtoi po ashtu se edukimi në fëmijërinë e hershme mbetet prioritet kombëtar, i konsoliduar përmes Ligjit të ri për EFH dhe Strategjisë së Arsimit të Kosovës.

Duke prezantuar investimet e realizuara, ministrja njoftoi se MAShTI ka ndërtuar 14 çerdhe të reja, Bashkimi Evropian përmes BE-IPA ka mbështetur 6 të tjera, ndërsa 31 çerdhe janë aktualisht në ndërtim dhe 2 në proces kontraktimi, ndërsa për vitin 2025 janë planifikuar edhe 19 çerdhe të reja.

Ajo theksoi edhe qasjen inovative të adaptimit të objekteve shkollore në çerdhe, deri tani 11 objekte janë shndërruar me sukses, 6 janë në proces dhe 4 të tjera janë planifikuar.

Shefja e UNICEF-it në Kosovë, Veronika Vashchenko, e cilësoi lansimin e Kurrikulës si një moment historik për Kosovën, duke theksuar bazën e saj shkencore dhe rëndësinë kritike që kanë vitet e para të jetës për zhvillimin e trurit.

Ajo u shpreh se kurrikula trajton fëmijët si individë kureshtarë, aktivë dhe kreativë, dhe përfaqëson një investim të mençur me përfitime të mëdha arsimore, sociale dhe ekonomike.

Ndërsa, Ambasadori i Luksemburgut në Kosovë, Eric Dietz, vuri në pah rëndësinë e arsimit duke cituar Kofi Annan dhe theksoi partneritetin e fuqishëm mes Luksemburgut, UNICEF-it dhe institucioneve të Kosovës që nga viti 2014.

Ai nënvizoi se përkrahja për fëmijët më të cenueshëm ka qenë gjithmonë në qendër të bashkëpunimit dhe e quajti lansimin e kurrikulës së re një hap transformues që pritet të sjellë rezultate më të mira në të nxënë, zhvillim socio-emocional dhe shëndet afatgjatë.

Ministri në detyrë i Mbrojtjes, Ejup Maqedonci, ka komentuar arrestimet e ish-pjesëtarëve të Ushtrisë Çlirimtare të Kosovës nga autoritetet serbe, duke thënë se Serbia po vazhdon ta mbajë një qasje hegjemoniste ndaj shtetit të Kosovës.

Në konferencën për media pas mbledhjes së Qeverisë, Maqedonci theksoi se problemi i Serbisë nuk lidhet vetëm me individë të caktuar, por me qasjen e saj ndaj Kosovës si shtet.

“Ne si Ministri e Mbrojtjes që përfaqësojmë trashëgiminë ushtarake të popullit tonë, në këtë rast të Ushtrisë Çlirimtarë të Kosovës, jemi të angazhuar sa herë që kemi mundësi që ta bëjmë këtë me partnerët tanë për të ngritur çështjen e arrestimeve të pjesëtarëve të UÇK. Por përtej arrestimeve të pjesëtarëve të UÇK, Serbia vazhdon të zbatojë qasje hegjemoniste në raport me vetë ekzistencën e shtetit tonë. Nuk është problem vetëm një pjesëtar i UÇK, nuk është problem vetëm një polic, është problem që Serbia vazhdon të ketë qasje hegjemoniste në raport të vendit tonë duke mos njohur asnjë arritje të vendit tonë dhe duke e trajtuar Kosovën si pjesë të saj. Problematike në thelb është te qasja hegjemoniste e Serbisë, kurse të tjerat pastaj janë vetëm pasoja”, tha Maqedonci.

Kryeministri në detyrë, Albin Kurti, në mbledhjen e Qeverisë ka njoftuar se do të ndahen mjete për RTK-në, mjete që, sipas tij, vijnë nga kategoria e kursimeve.

Lidhur me këtë ka reaguar ish-deputetja e Lidhjes Demokratike të Kosovës, Hykmete Bajrami, e cila e ka quajtur vendimin e Qeverisë në detyrë për ndarjen e mjeteve për pagat e punëtorëve të RTK-së si të vonuar dhe të inskenuar nga vetë ekzekutivi.

Në një reagim në Facebook, Bajrami ka thënë se punëtorët e RTK-së u lanë pa paga për një muaj të tërë, duke u detyruar të hyjnë në protesta e greva, ndërsa në fund – sipas saj – Qeveria po paraqitet si shpëtimtare.

Ajo ka akuzuar kryeministrin në detyrë Albin Kurti për, siç tha, krijim artificial të krizave me qëllim që të shfaqet më pas si shpëtimtar. Bajrami kërkoi që Qeveria të ndërpresë, siç i quajti ajo, bllokadat dhe të gjejë zgjidhje edhe për Komunën e Prishtinës.

Postimi i plotë:

I paskan nda mjetet për RTK.

E kemi thënë prej ditës së parë: këta vetë janë prodhues të krizave. I lanë një muaj pa paga punëtorët e RTK-së, me protesta e greva dhe në fund jo Kuvendi po këta uzurpatorët e Qeverisë paskan gjetë zgjidhje, me 28 ditë vonesë.

Albin Kurti me klikën e tij jeton duke shkaktuar kriza, duke i bë njerëzit me vuajtë, duke i mbajtur qytetarët të varur nga vendimet e tij, e pastaj me dalë si shpëtimtar, por ranë maskat.

Ndalni bllokadat, tash uluni me Komunën e Prishtinës dhe gjeni zgjdhje!

Qytetarët paguajnë taksa për me marrë shërbime, jo për me u maltretu nga inskenimet e mashtrimet tuaja.

28 dhjetori do të jetë dita kur do të merrni përgjgijen për krejt këtë keqtrajtimin që po u bëni qytetarëve!

Punëtorët e operatorëve privatë po presin një reflektim nga seanca e jashtëzakonshme që do të mbahet në ora 15:00 në Kuvendin Komunal të Prishtinës.

Kryetari i Sindikatës së Linjave Private, Avdyl Brajshori, theksoi se transportuesit urban presin hapa konkretë nga institucionet lokale dhe qendrore.

“Siç e dini, jemi duke pritur ndonjë veprim nga institucionet e nivelit lokal dhe qendror. Sot është thirrë një seancë e jashtëzakonshme dhe presim që ajo të kalojë me sukses. Ne do të jemi pjesëmarrës në seancë, duke marrë parasysh rëndësinë që ka për transportuesit urban. Aktualisht nuk ka diçka konkrete; pas seancës mund të prononcohemi dhe t’ju ofrojmë informacione më të detajuara. Besoj se të gjithë asamblistët do të reflektojnë pozitivisht, sepse situata pa transport e ka vështirësuar jetesën e qytetarëve. Qytetarët po detyrohen të marrin taksi, që kushton më shumë, ndërsa transporti publik ka ofruar gjithmonë shërbime cilësore. Me kalimin e buxhetit, besoj që do të ketë reflektim pozitiv”, u shpreh Brajshori.

Ministri në detyrë i Mbrojtjes, Ejup Maqedonci, është deklaruar për rastin e një ushtari të FSK-së i cili akuzohet për dhunim seksual në Britani të Madhe, duke thënë se janë ngritur të gjitha komisionet dhe strukturat që merren me këto raste.

Maqedonci, ka shtuar edhe se, meqë ende s’ka verdikt final, ai s’mund të jap më shumë informacion.

‘’Për pjesëtarin që dyshohet për sulm seksual në Britani të Madhe, në kemi ngritur të gjitha komisionet edhe ato strukturat të cilat merren me këto rastesh. Ende nuk kemi një vërdikt final, dhe derisa nuk kemi verdikt final e kam të pamundur të jap më shumë informacion’’, ka thënë ai.