Blog

Mosrespektimi i rregullave të komunikacionit është një ndër arsyet e aksidenteve të shumta që po ndodhin çdo ditë. E një prej mënyrave të zakonshme për parandalimin e këtyre aksidenteve, është gjobitja e atyre që shkelin rregullat në trafik, shkruan Gazeta Sinjali.

Statistikat tregojnë se mijëra gjoba shqiptohen çdo ditë në vendin tonë.

Policia ka bërë të ditur se 1231 gjoba janë shqiptuar vetëm gjatë 24 orëve të fundit në Kosovë.

Gjatë këtyre 24-orëve, janë raportuar gjithsejt 52 aksidente, 26 prej tyre me persona të lënduar dhe 26 vetëm me dëme materiale.

Po ashtu, Policia e Kosovës ka arrestuar 17 persona, 10 janë dërguar në mbajtje.

Agim Veliu, nga Lidhja Demokratike e Kosovës, ka komentuar diskutimet që janë bërë rreth emrit të tij për të qenë pjesë e listës së kësaj partie për deputet në zgjedhjet e 28 dhjetorit.

Për këtë, Veliu ka falënderuar ata që kanë ngritur zërin për kontributin e tij në LDK, si dhe, ‘’për kthimin e drejtësisë dhe meritokracisë brenda’’ kësaj partie.

Ai, nëpërmjet kësaj letre, ka shprehur gatishmërinë për t’u përfshirë në listën zgjedhore për deputet, duke theksuar se një gjë e tillë nuk është privilegj personal.

Postimi i plotë i Veliut:

Të dashur qëndrestarë, anëtarë dhe simpatizantë

Ditëve të fundit kam parë një debat të gjerë në media, nga anëtarësia dhe shumë aktivistë të LDK-së lidhur me përfaqësimin në listën zgjedhore të 28 dhjetorit.

Dua t’i falënderoj të gjithë ata që me sinqeritet e bindje kanë ngritur zërin për kontributin tim dhe për kthimin e drejtësisë dhe meritokracisë brenda Lidhjes Demokratike të Kosovës.

Është e vërtetë se edhe në zgjedhjet e kaluara ka ekzistuar pritja që të jem pjesë e listës. Por, pavarësisht vendimeve të padrejta e të dëmshme të asaj kohe, unë kam vazhduar të qëndroj aty ku kam qenë gjithmonë, në shërbim të LDK-së, të qytetarëve dhe të vlerave që kemi kultivuar për më shumë se tri dekada.

Dua ta theksoj qartë se përfshirja në listë nuk është favor dhe as privilegj personal. Për mua dhe për secilin që ka dhënë kontribut të gjatë në LDK, është vetëm përgjegjësi dhe vazhdimësi e punës së bërë me përkushtim, është respekt ndaj historisë sonë dhe ndaj qytetarëve që na kanë besuar për shumë vite.

LDK është shtëpia jonë e përbashkët. Ajo është ndërtuar me mund, sakrificë dhe besnikëri nga njerëzit që ishin aty kur ishte më së vështiri dhe që vazhdojnë të jenë aty edhe sot.

Prandaj, është e domosdoshme që dera të mos u hapet atyre që nuk kanë qenë pjesë e LDK-së, nëse kjo do të ishte arsyeja të lihen jashtë ata që e kanë themeluar, e kanë mbrojtur dhe e kanë mbajtur gjallë partinë për më shumë se 30 vite.

Respekti për bazën, për themeluesit dhe për kontribuesit afatgjatë nuk është vetëm parim, është detyrim moral dhe institucional ndaj LDK-së, ndaj anëtaresisë dhe ndaj qytetarëve që na besojnë.

Pavarësisht debateve të ditëve të fundit, unë mbetem i përkushtuar ndaj vlerave të LDK-së, i gatshëm ta jap kontributin tim dhe besnik ndaj secilit anëtar që e ka dashur dhe e do partinë si shtëpinë e vet.

Faleminderit për vlerësimin, mbështetjen dhe besimin që vazhdoni të ma jepni!

Zoti e bekoftë LDK-në!

Zoti e bekoftë Rugovën!

Zoti e bekoftë Kosovën!

Janina Ymeri do të jetë pjesë e listës së LDK-së për zgjedhjet e Kuvendit të Kosovës që do të mbahen me 28 dhjetor.

Këtë e ka bërë të ditur kryetari i LDK-së, Lumri Abdixhiku i cili teka fletë për vlerat e shumta të saj thekson faktin që ajo shpalosi së fundmi një skandal energjetik.

Postimi i plotë i Abdixhikut:

Janina në listë për Kuvend!

Janina Ymeri këto ditë është shndërruar në pasqyrimin më të denjë të aktivistes politike. Si veprimtare e LDK-së, ajo shpalosi skandalin e madh të mafias energjetike dhe milionat e qytetarëve të Kosovës që përfunduan në llogaritë e Vuk Hamovićit – të birit të ish-shefit të Armatës Jugosllave Rade Hamović.

Vukvendosje – siç i dha epitet me të drejtë ajo, shërfaqë më së miri mashtrimin popullist që ndodhë sot. Njërën dorë të shtrirë tek mafia energjetike dhe milionat e popullit të Kosovës që shkojnë aty( tjetrën me gisht ndaj patriotëvë të vendit për tradhëti. Trushpëlarja kështu duket.

Janina, e vetme, ngriti zërin, kërkoi llogari dhe artikuloi me fakte se si rrjetet korruptive në sektorin energjetik po kapnin institucionet e vendit tonë. Pa frikë. Pa hezitim. Pa kalkulim.

Janina Ymeri përfaqëson më së miri aktivisten politike të kohës sonë: atë që nuk e tremb pushteti; atë që nuk e blen propaganda; atë që nuk e hesht padrejtësia. Ajo vjen në politikë nga beteja e së vërtetës. Nga përballja me korrupsionin.Nga përkushtimi i sinqertë për interesin publik.

LDK është shtëpia e njerëzve të tillë; të drejtë, të guximshëm, profesionalë. Njerëzve që nuk e përdorin politikën për vete, por për vendin.

Prandaj jam i lumtur t’ju njoftoj se Janina Ymeri do të jetë pjesë e listës sonë për zgjedhjet e 28 dhjetorit. Ajo ka treguar se si duket aktivisti i vërtetë: me fakte, me integritet dhe me vizion për një shtet ligjor.

E tani është koha që ky integritet të përfaqësohet në Kuvend.

Moldavia, që gjendet në kufi me Ukrainën, mbylli hapësirën e saj ajrore për një orë gjatë natës, pas inkursionit të dronëve të rinj, tha Ministria e Mbrojtjes më 29 nëntor.

Ky shtet i vogël që gjendet në kufi me Ukrainën e shkatërruar nga lufta dhe me Rumaninë, vend anëtar të NATO-s, vazhdimisht është përballur me shkelje të hapësirës ajrore që kur Moska nisi pushtimin e Ukrainës në shkurt të vitit 2022.

Incidenti i fundit vjen pasi Moldavia raportoi më herët këtë javë se një dron ishte rrëzuar në territorin e saj, teksa gjithsej gjashtë dronë që kishin kaluar hapësirën e saj ajrore.

Hapësira ajrore e Moldavisë “u mbyll përkohësisht për rreth një orë e 10 minuta, mes orës 22:43 dhe 23:53, si masë emergjente, pasi dy dronë të paidentifikuar fluturuan ilegalisht mbi territorin kombëtar, duke krijuar një kërcënim të drejtpërdrejtë për sigurinë e aviacionit”, tha Ministria e Mbrojtjes në një komunikatë për media të shtunën.

Ajo shtoi se dronët e tipit Gerbera nuk ishin zbuluar nga radarët e Moldavisë, por inkursioni i tyre ishte “konfirmuar nga autoritetet kufitare ukrainase”.

“Nuk janë identifikuar objekte, copëza apo elemente që paraqesin rrezik për popullsinë dhe të dy dronët janë larguar nga hapësira ajrore kombëtare, duke u futur thellë në territorin ukrainas”, tha Ministria e Brendshme, njofton rel.

Megjithatë, tha ajo, dy avionë që po vinin drejt Kishinievit nga Parisi dhe Barcelona gjatë mbylljes së hapësirës ajrore devijuan fluturimet drejt Rumanisë.

Një tjetër aeroplan që po përgatitej të nisej nga Kishinievi u ndalua përkohësisht.

“Moldavia i dënon fuqishëm këto veprime të paligjshme dhe të rrezikshme, të cilat vunë në rrezik sigurinë e fluturimeve civile dhe jetët njerëzore”, tha Ministria e Mbrojtjes, duke i cilësuar shkeljet si “akte armiqësore të frikësimit dhe destabilizimit”.

Të mërkurën, Moldavia thirri ambasadorin rus në bisedë për shkak të rrëzimit të një droni, ndërsa vendosi dronin e rrëzuar para Ministrisë së Jashtme dhe i dorëzoi atij një notë proteste.

Një sulm rus me dronë dhe raketa në kryeqytetin e Ukrainës, Kiev, ka vrarë të paktën një person dhe ka plagosur shtatë të tjerë, kanë bërë të ditur zyrtarët e qytetit.

Herët në mëngjesin e së shtunës, ndërtesa banimi në disa lagje u goditën dhe shpërthime të fuqishme u dëgjuan në mbarë qytetin.

Kryetari i Kievit, Vitaly Klitschko, tha se një fëmijë 13-vjeçar është në mesin e të plagosurve, ndërsa katër persona janë dërguar në spital, njofton BBC, transmeton Sinjali.

Më herët këtë javë, një sulm i ngjashëm në Kiev kishte vrarë shtatë persona, kanë thënë zyrtarët ukrainas. Bombardimi i fundit ndodhi teksa negociatorët ukrainas po përgatiteshin për bisedime me zyrtarë amerikanë këtë fundjavë për një plan të modifikuar paqeje të SHBA-së. Shefi i administratës ushtarake të Kievit, Tymur Tkachenko, konfirmoi se sulmi i së shtunës goditi “shënjestra të shumta në periferi të kryeqytetit”.

“Dronët e armikut janë mbi qytet dhe mbrojtja ajrore po reagon,” shkroi ai në Telegram.

“Aktualisht, në Kiev ka gjithsej një të vdekur dhe shtatë të plagosur, përfshirë një fëmijë.”

Trupi i një burri u gjet nga ekipet e kërkim-shpëtimit në distriktin Sviatoshynskyi, në perëndim të qytetit, konfirmoi Tkachenko.

Dy gra janë mes të plagosurve në qytetin Brovary, në lindje të Kievit, me guvernatorin rajonal që tha se “raketa dhe dronë” kishin shënjestruar zonat banimore.

Klitschko tha se sulmi kishte shkaktuar zjarr në katet e poshtme të një ndërtese të lartë banimi në perëndim të qendrës së qytetit, ndërsa një zjarr tjetër u vu nën kontroll në një distrikt qendror.

Më herët këtë javë, Rusia dhe Ukraina shkëmbyen sulme vdekjeprurëse gjatë natës, të cilat shkaktuan zjarre në ndërtesa banimi dhe vranë shtatë persona në Kiev, ndërsa rajoni Rostov i Rusisë raportoi tre viktima.

Sulmi i së shtunës vjen në kohën kur Presidenti Donald Trump po shtyn që të dyja palët të pranojnë një draft-plan paqeje, i cili fillimisht ishte i anuar ndjeshëm drejt kërkesave të Moskës. Ai u rishikua gjatë bisedimeve midis negociatorëve ukrainas dhe amerikanë në Gjenevë.