Blog

Anëtari i Lëvizjes Vetëvendosje, Armend Muja, është deklaruar rreth pretendimeve që më 28 nëntor, Kosova importoi energji elektrike nga Serbia.

Në një konferencë për media, Muja ka shpalosur të dhënat përmes të cilave thotë se ardhja e NOA-s në tregun energjetik në Kosovë daton që nga viti 2017.

Pikë e parë është akuza se me 28 nëntor Kosova po importon energji elektrike nga Serbia. Qytetarë të nderuar, kjo është e pavërtetë. Në fakt, që nga koha kur kemi ardhë ne, nga 2008 deri diku kur ne kemi ardhë në pushtet është importi i energjisë elektrike nga Serbia.

Po, Kosova ka dominuar, importi i energjisë elektrike ka qenë privalent dhe furnitorët nga Serbia kanë qenë dominues deri në kohën kur ne kemi ardhë në pushtet, qoftë përmes kontratave të drejtpërdrejta që i kanë nënshkruar akterët e KEK-ut, akterë që sot dalin në intervista dhe akuzojnë për energji… dhe pastaj nga 2020 e këndej. Sllovenia, dhe në 3-4 vitet e fundit Shqipëria dhe Maqedonia e Veriut dhe Danimarka, përbëjnë 94-95 për qind të gjithë importit të energjisë elektrike.

Pra vendi kah po buron energjia elektrike është Shqipëria, Maqedonia e Veriut dhe Danimarka. Pjesëmarrja e Serbisë në tregun gjatë importit të energjisë elektrike më 2025 është më pak se 1 për qind. Këto janë të dhëna që i kemi marrë deri dje. Për ju që dëshironi ta verifikoni…ajo çka ju siguroj është se importi nga Serbia është më pak se 1 për qind”, tha Muja.

Ai tha se gjatë kohës së hulumtimit të kontratave u interesuan të dijnë se kush i nënshkroi ato.

“Ne na interesoi se kush nënshkroi kontratë me NOA-n. Kontrata u nënshkrua më 2019, nga KEK-u dhe NOA, teksa e dyta më 2021, nga kryeshefi ekzekutiv i KEK-ut, Përparim Kabashi, katër ditë para se të merrte këtë detyrë Nagip Krasniqi”, u shpreh Muja.

Ai thotë se Kabashi ka qenë i deleguar nga LDK-ja, si në bord të ZRRE-së, ashtu edhe në KEK.

“Në bazë të vështrimit tonë, faturë për faturë, kontratat e para me Vukhamoviç, me lejoni të pyes kolegen e LDK-së, për kontratat e nënshkruara gjatë shpalljes së pavarësisë së Kosovës”.

Muja thotë se nga viti 2008 e deri më 2013, është nënshkruar kontrata në vlerë prej 141 milionë eurosh, me kompaninë e Vuk Hamoviqit.

“Subjekti që nënshkroi kontratë në vitin 2019 me Vuk Hamoviqin vazhdon të jetë i njëjtë”, shtoi Muja.

Ai thotë se dëmi që i është shkaktuar Kosovës nga këto kontrata kap vlerën e afro 400 milionë eurove.

Të gjitha dokumentet që posedojnë për vendimet mbi blerje të energjisë, Muja thotë se LVV-ja do t’i publikojë menjëherë, duke lutur Prokurinë e Shtetit që t’i marrë në pyetje ish-përgjegjësit e KEK-ut, në kohën e pazareve me Vuk Hamoviqin.

Presidentja e Kosovës, Vjosa Osmani ka marrë sot urimet më të mira nga një person i moshuar i qytetit të Ferizajt.

Gjatë vizitës në “DownSyndrome” në këtë qytet me rastin e “Ditës Ndërkombëtare për Personat me Aftësi të Kufizuara”, ajo takoi këtë qytetar i cili u gëzua jashtëzakonisht kur e pa.

Ky i moshuar i tha Osmanit se nga sot, edhe nëse vdes nuk i mbetet merak më.

“Dukat të ka falë Zoti, në Kosovë ma të aftë tybe nuk ka. Kur po çohemi me ty hala ma mirë. Edhe sonte me ndërru jetë, nuk më jetë merak mo. Allahu 1 mijë vjet t’i dhashtë”, tha ai..

Këto fjalë e emocionuan presidenten e cila ia shtrëngoi dorën qytetarit të cilit më pas ia uroi më të mirat.

Ndiqni momentin në videon e mëposhtme:

Në Gjykatën Themelore në Prishtinë të mërkurën është mbajtur seanca fillestare ndaj të akuzuarit për krime lufte në fshatin Osek Hykë të Komunës së Gjakovës, Muharrem Ibraj. Ky gjykim po zhvillohet në mungesë.

Pas leximit të aktakuzës nga prokurorja Ajshe Ferati, të akuzuarit përmes avokates së tij, Sabrije Jashari i është njohur e drejta në paraqitje të kundërshtimeve ndaj provave dhe kërkesës për hudhje të aktakuzës në afat prej 30 ditësh, raporton “Betimi për Drejtësi“.

Avokatja Jashari deklaroi se heq dorë nga paraqitja e kundërshtimeve dhe kërkesës për hudhje të aktakuzës.

Më pas, seanca kaloi në shqyrtim gjyqësor. Seanca e radhës pritet të mbahet në muajt në vijim.

Ndryshe, Prokuroria Speciale e Republikës së Kosovës (PSRK) më 19 mars 2025 ka ngritur aktakuzë ndaj Muharrem Ibrajt, të cilin e ngarkon për krime lufte kundër popullsisë civile në fshatin Osek Hylë të Komunës së Gjakovës. Aktakuza ngarkon Ibrajn për vrasje të një civili, keqtrajtim të të tjerëve, si dhe dhunimin e një viktime bashkë me babanë dhe vëllanë e tij.

Në pikën e parë të aktakuzës, thuhet se më 28 shkurt 1998 rreth orës 14:30 në fshatin Osek Hylë, Komuna e Gjakovës, i pandehuri Muharrem Ibraj me dashje, i armatosur, i uniformuar në uniformë policore dhe në bashkëkryerje me pjesëtarë të tjerë të forcave policore serbe, ka marrë pjesë direkte në vrasjen dhe keqtrajtimin e qytetarëve civilë të nacionalitetit shqiptar që nuk ishin të përfshirë në luftë.

Aty thuhet se Ibraj, bashkë me forca të mëdha policore serbe rrethuan shtëpinë e viktimës S.B dhe pasi futen brenda në shtëpi, i pandehuri Ibraj i kërcënon dhe i fyen të pranishmit me fjalë të ndryshme dhe në ato momente e godet me shuplakë të dëmtuarin Q.C., dhe pasi ndërhyn viktima S.B., e urdhëron të dalë nga dhoma.

Po ashtu, sipas aktakuzës, derisa viktima ishte duke dalë jashtë, i pandehuri në prezencë të familjarëve dhe të afërmve të viktimës që ishin prezent aty, shtie disa herë në drejtim të viktimës me një pushkë automatike të llojit AK-47, ku në ato momente viktima S.B ndërron jetë si pasojë e plagëve vdekjeprurëse.

Dhe më pas, sipas aktakuzës, burrat e tjerë që ishin prezent u nxorën jashtë nga forcat policore, u rrahën dhe u transportuan në stacionin e policisë ku edhe më tej i sulmuan fizikisht dhe i morën në pyetje me pretekstin se ishin pjesëmarrës të Ushtrisë Çlirimtare të Kosovës (UÇK) dhe pastaj i liruan.

Gjithnjë sipas aktakuzës, më 10 nëntor 1998, në fshatin Osek Hylë, Komuna e Gjakovës, i pandehuri Ibraj në bashkëkryerje me babanë e tij dhe vëllanë e tij, të armatosur, të uniformuar në uniformë policore, duke përdorur forcën e detyrojnë të dëmtuarën NN që të kryejë marrëdhënie seksuale me ta pa pëlqimin e saj. Aty thuhet se pandehuri Ibraj bashkë me të lartcekurit e kanë ndaluar viktimën NN posa ka zbritur nga autobusi, dhe në ato momente me forcë dhe nën kërcënimin e armëve e kanë detyruar që të shkojë me ta tek mulliri i grurit, ku e dhunojnë me radhë, duke filluar nga babai i të akuzuarit, vëllai dhe pas tij vetë i pandehuri Ibraj, ku si pasojë e dëmtuara e humb vetëdijen.

Sipas aktakuzës, pasi i kthehet vetëdija, viktima NN e sheh vëllanë e të pandehurit me një cigare të ndezur në dorë, duke ia djegur dorën dhe krahun asaj, me qëllim që t’ia kthejë vetëdijen dhe që ajo edhe në të ardhmen t’i kujtojë këto ndodhi dhe në fund babai i të pandehurit i kishte thënë të dëmtuarës NN që të vishej dhe të shkojë në shtëpi duke e kërcënuar se nëse do i tregonte dikujt për këtë ngjarje do t’ia vrasin gjithë familjen.

Prandaj për këto veprime, Muharrem Ibraj po ngarkohet me veprën penale “Krim i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të ish-Republikës Socialiste Federative të Jugosllavisë (tutje ‘’LP i RSFJ-së’’) si ligj në fuqi në kohën e kryerjes së veprës penale.

Kërkimi për avionin e zhdukur të Malaysia Airlines, MH370, do të rifillojë këtë muaj, ka njoftuar ministria malajziane e transportit, më shumë se një dekadë pasi aeroplani u zhduk në një nga misteret më të mëdha të aviacionit.

Në një deklaratë të mërkurën, ministria e transportit konfirmoi se kërkimi do të rifillojë më 30 dhjetor, duke thënë se kompania amerikane e robotikës Ocean Infinity do të rinisë kërkimin e shtratit të detit për një periudhë prej 55 ditësh, të kryer me ndërprerje, raporton “The Guardian“

Ai tha se operacionet e reja të kërkimit do të synojnë zonat ku besohet se ka gjasa më të mëdha për të gjetur avionin e zhdukur, megjithëse detajet e vendndodhjeve të sakta nuk janë dhënë.

Fluturimi MH370 doli nga kursi dhe u zhduk nga radari i trafikut ajror më 8 mars 2014, gjatë një fluturimi rutinë nga Kuala Lumpuri për në Pekin. Në bord ishin 12 anëtarë të ekuipazhit malajzian dhe 227 pasagjerë, shumica prej të cilëve ishin shtetas kinezë. Tridhjetë e tetë pasagjerë ishin malajzianë, së bashku me shtatë shtetas dhe rezidentë australianë, si dhe shtetas nga Indonezia, India, Franca, SHBA-ja, Irani, Ukraina, Kanadaja, Zelanda e Re, Holanda, Rusia dhe Tajvani.

Danica Weeks, bashkëshorti i së cilës, Paul, një shtetas australian, ishte në bord, mirëpriti lajmin për rifillimin e kërkimit, duke thënë se ajo ishte “jashtëzakonisht mirënjohëse dhe e lehtësuar që qeveria malajziane është angazhuar të vazhdojë kërkimin”.

“Ne kurrë nuk kemi reshtur së kërkuari përgjigje, dhe të dish që kërkimi do të vazhdojë sjell një ndjenjë ngushëllimi. Sinqerisht shpresoj që kjo fazë e radhës të na japë qartësinë dhe paqen që e kemi kërkuar aq dëshpërimisht, për ne dhe të dashurit tanë, që prej 8 marsit 2014,” tha Weeks.

Në vitet që nga zhdukja, zona të mëdha të Oqeanit Indian janë kontrolluar për të gjetur mbetjet e avionit, si nga përpjekje shumëkombëshe ashtu edhe nga ato private, por pa sukses.

Vitin e kaluar, Malajzia tha se ishte e gatshme të rihapte hetimin mbi zhdukjen nëse do të kishte prova të reja bindëse. Ajo ra dakord për një kontratë “pa gjetje, pa pagesë” me Ocean Infinity për të rifilluar kërkimin në një zonë të re prej 15,000 km² (5,800 milje katrore) në oqean. Sipas marrëveshjes, Ocean Infinity do të paguhet 70 milionë dollarë vetëm nëse zbulohen mbetjet e avionit.

Megjithatë, aktivitetet më të fundit të kërkimit në pjesën jugore të Oqeanit Indian u pezulluan në prill të këtij viti për shkak të kushteve të pafavorshme të motit.