Blog

Komuna e Junikut ka njoftuar se në Bjeshkët e Junikut u përurua sot lapidari memorial te “Rrasa e Zogut”, në nderim të dëshmorëve dhe luftëtarëve të Ushtrisë Çlirimtare të Kosovës, në përkujtim të ngjarjeve të 17 korrikut 1998.

Sipas organizatorëve, në këtë vend kaluan mbi 1.400 ushtarë të UÇK-së duke transportuar armatim, ndërsa kolona u përball me një pritë të forcave serbe, ku ranë dëshmorë dhe u plagosën shumë luftëtarë.

Në ceremoni morën pjesë përfaqësues institucionesh, shoqatash të dala nga lufta dhe qytetarë. Kryetari i Komunës së Junikut, Ruzhdi Shehu, vlerësoi rëndësinë e memorialit për ruajtjen e kujtesës historike, ndërsa lapidari u zbulua në praninë e pjesëmarrësve të betejës, familjarëve të dëshmorëve dhe përfaqësuesve institucionalë.

Lapidari do të shërbejë si simbol i përhershëm i sakrificës së luftëtarëve të UÇK-së dhe i rrugës së Kosovës drejt lirisë.

Ministria e Infrastrukturës dhe Transportit ka njoftuar se të premten do të zbatohet kufizimi i përkohshëm i qarkullimit për automjetet e transportit të mallrave me masë totale mbi 20 tonë në autoudhët e Kosovës, për shkak të temperaturave të larta të parashikuara.

Sipas ministrisë, bazuar në parashikimin zyrtar të temperaturave, janë plotësuar kushtet për zbatimin e vendimit që parasheh kufizimin e qarkullimit të këtyre automjeteve.

Kufizimi do të vlejë në autoudhë nga ora 11:00 deri në 17:30, pasi temperaturat e parashikuara pritet të arrijnë 32 gradë Celsius ose më shumë.

Ndërkaq, në rrugët nacionale, rajonale dhe lidhëse nuk do të ketë kufizime të qarkullimit, pasi sipas ministrisë nuk janë plotësuar kushtet e përcaktuara me vendim për zbatimin e kësaj mase.

Ministria e Infrastrukturës dhe Transportit bëri të ditur se do të vazhdojë monitorimin e përditshëm të temperaturave dhe do t’i njoftojë me kohë qytetarët dhe operatorët ekonomikë për çdo ndryshim që lidhet me zbatimin e këtij vendimi.

Instituti Hidrometeorologjik i Kosovës (IHMK) ka publikuar parashikimin e motit për fundjavën e 18 dhe 19 korrikut.

Sipas IHMK-së, të shtunën në vendin tonë pritet të mbajë mot me diell dhe vranësira.

Temperaturat minimale do të lëvizin nga 12 deri në 16 gradë Celsius, ndërsa temperaturat maksimale pritet të arrijnë nga 31 deri në 35 gradë Celsius. Do të fryjë erë e lehtë deri mesatare nga drejtimet veriore dhe veriperëndimore.

Ndërkaq, të dielën parashihet mot kryesisht i vranët me intervale me diell. Vranësirat, në disa zona, mund të sjellin edhe riga të dobëta shiu.

Temperaturat minimale do të jenë nga 13 deri në 17 gradë Celsius, ndërsa ato maksimale do të lëvizin ndërmjet 30 dhe 34 gradë Celsius.

Sipas IHMK-së, era do të fryjë nga drejtimi i veriperëndimit me shpejtësi prej 1 deri në 11 metra për sekondë.

Me 9 vota pro dhe asnjë abstenim, Zana Spahiu është zgjedhur Drejtoreshë e Përgjithshme e RTK-së.

Ky votim u mbajt gjatë mbledhjes së sotme të Bordit të RTK-së.

Spahiu do të qëndrojë në këtë post për 3 vjet.

Ish-kryenegociatorja e Kosovës, Edita Tahiri, tha se nëse SHBA e kushtëzon Dialogun Strategjik me Kosovën me përmbushjen e zotimeve ndaj serbëve të Kosovës, atëherë sipas Tahirit, Uashingtoni duhet të kushtëzojë Dialogun Strategjik me Serbinë me njohjen e Kosovës.

Sipas saj, diplomacia e Kosovës duhet të punojë në këtë drejtim.

“Amerika e ka kushtezuar Dialogun Strategjik me Kosovën kur të përmbushen kushtet dhe zotimet ndaj serbëve, ky kusht nenkupton asociacionin – mirepo Amerika duhet ta kushtezoj dialogun strategjik edhe me Serbine kur Serbia ta njeh shtetin e Kosoves – diplomacia e Kosoves duhet te punoj ne kete drejtim..”, ka shkruar Tahiri.

Ministria e Infrastrukturës dhe Transportit ka njoftuar se segmenti rrugor Brezovicë-Prevallë (R115) do të mbyllet përkohësisht gjatë fundjavës, për shkak të zhvillimit të Garës Automobilistike Malore “Brezovica 2026”.

Sipas komunikatës për media, kufizimi i qarkullimit do të jetë në fuqi më 18 dhe 19 korrik 2026, në intervalin kohor nga ora 10:30 deri në 18:00.

Më 18 korrik do të zhvillohen stërvitjet zyrtare, ndërsa më 19 korrik gara zyrtare, e organizuar nga Federata e Auto Sporteve të Kosovës.

“Për mbarëvajtjen e aktivitetit dhe sigurinë e pjesëmarrësve, organizatorët do të bashkëpunojnë me Policinë e Kosovës dhe institucionet përgjegjëse. Lusim qytetarët dhe të gjithë pjesëmarrësit në trafik që gjatë këtyre intervaleve kohore të planifikojnë lëvizjet e tyre, të respektojnë sinjalizimin e përkohshëm rrugor dhe udhëzimet e Policisë së Kosovës dhe zyrtarëve të angazhuar në terren”, thuhet në komunikatën për media.

Një paralajmërim për cunami është lëshuar për pjesë të Oqeanit Paqësor, pasi një tërmet i fuqishëm me magnitudë 7.3 goditi të premten brigjet jugore të Meksikës.

Sistemi Amerikan i Paralajmërimit për Cunami njoftoi se përgjatë brigjeve të afërta të Meksikës dhe Guatemalës mund të shfaqen valë të rrezikshme cunami, me lartësi nga 0.3 deri në 1 metër mbi nivelin normal të baticës, raporton BBC.

Guvernatori i shtetit jugor meksikan të Oaxacës, Salomón Jara Cruz, tha se tërmeti u ndje me “intensitet mesatar”, por deri më tani nuk është raportuar për dëme të konsiderueshme.

Lëkundjet u ndjenë edhe në Guatemalë dhe El Salvador, ku, sipas agjencisë Reuters, banorët e Guatemala City dolën me nxitim nga shtëpitë e tyre.

Sipas Shërbimit Gjeologjik të Shteteve të Bashkuara (USGS), epiqendra e tërmetit ishte pranë qytetit bregdetar të peshkimit Puerto Madero në Meksikë, në një thellësi prej 15.2 kilometrash.

Sistemi Amerikan i Paralajmërimit për Cunami bëri të ditur gjithashtu se përgjatë brigjeve të Kolumbisë, Kosta Rikës, Ekuadorit, El Salvadorit, Nikaraguas, Panamasë, Perusë dhe Hondurasit priten valë më të vogla se 0.3 metra mbi nivelin e baticës.

Autoritetet u kanë bërë thirrje institucioneve përgjegjëse në zonat bregdetare të rrezikuara që të njoftojnë popullsinë dhe të ndërmarrin masat e nevojshme, ndërsa qytetarëve u është kërkuar të qëndrojnë vigjilentë dhe të ndjekin udhëzimet e autoriteteve kombëtare dhe lokale.

Kryeministri në detyrë i Republikës së Kosovës, Albin Kurti, po vazhdon emërimet e zëvendësministrave nëpër ministri të ndryshme.

Sot e ka emëruar Enver Dugollin në pozitën e zëvendësministrit të parë në Ministrinë e Punëve të Brendshme që e drejton Xhelal Sveçla.

Enver Dugolli në zgjedhjet e fundit ka dështuar që të futet në Kuvendin e Kosovës duke u renditur në vendin e 73-të me vetëm 12 mijë e 81 vota.