ATV

Blog

  • Polonia ndalon zyrtarisht Partinë Komuniste: Gjykata Kushtetuese mbyll një kapitull 22-vjeçar

    Polonia ndalon zyrtarisht Partinë Komuniste: Gjykata Kushtetuese mbyll një kapitull 22-vjeçar

    Sipas trupës gjykuese, “nuk ka vend në rendin juridik polak për një parti që glorifikon krimet e regjimeve komuniste”

    Polonia ka shpallur zyrtarisht të ndaluar Partinë Komuniste të Republikës së Polonisë, pas një vendimi të Gjykatës Kushtetuese që konfirmon se programi dhe ideologjia e saj janë në kundërshtim të drejtpërdrejtë me Kushtetutën polake.

    Ky vendim shënon fundin juridik të një force politike të vogël, por simbolikisht të rëndësishme, që prej vitesh konsiderohej problematike nga institucionet shtetërore.

    Në vendimin e publikuar, Gjykata Kushtetuese theksoi se ideologjia e Partisë Komuniste shkel parimet kushtetuese të shtetit demokratik, duke argumentuar se promovimi i komunizmit bie ndesh me sistemin ligjor të Polonisë dhe me kujtesën historike të vendit.

    Sipas trupës gjykuese, “nuk ka vend në rendin juridik polak për një parti që glorifikon krimet e regjimeve komuniste”.
    Ky qëndrim reflekton linjën e fortë antikomuniste të shtetit polak, e cila është intensifikuar sidomos në vitet e fundit.

    Një proces që nisi vite më parë
    Edhe pse vendimi u mor tani, procesi për ndalimin e partisë ka nisur që në vitin 2020, kur Prokurori i Përgjithshëm paraqiti kërkesën e parë për likuidim.

    Çështja u rikthye në qendër të vëmendjes në nëntor të këtij viti, kur presidenti polak Karol Nawrocki paraqiti sërish një kërkesë të re në Gjykatën Kushtetuese.

    Sipas ekspertëve, ritmi i ngadaltë procedural ishte rezultat i kompleksitetit ligjor, por edhe i debatit të brendshëm mbi kufijtë e lirisë politike.

    Një parti e vogël, por simbolike

    E themeluar në vitin 2002, Partia Komuniste e Polonisë kishte një bazë të kufizuar anëtarësh, nga disa qindra deri në rreth një mijë sipas vlerësimeve të ndryshme.

    Megjithatë, pavarësisht peshës së vogël elektorale, partia mbante një simbolikë të fortë historike, e lidhur me trashëgiminë e regjimit komunist që udhëhoqi Poloninë për gati gjysmë shekulli.

    Kjo e ka bërë objekt debatesh të vazhdueshme: nga njëra anë mbrojtësit e lirisë së shprehjes politike, dhe nga ana tjetër forcat konservatore e kombëtariste që kërkonin ndalimin e çdo forme të apologjisë së komunizmit.

    Një epilog politik në një klimë të polarizuar

    Vendimi i Gjykatës Kushtetuese pritet të forcojë debatin mbi kufijtë e lirisë politike në Poloni. Për mbështetësit e tij, është një hap i domosdoshëm drejt pastrimit të hapësirës publike nga ideologjitë totalitare.

    Për kritikët, është një precedent që mund të përdoret për të zgjeruar kontrollin e shtetit ndaj partive të vogla apo të pakëndshme politikisht.

    Megjithatë, në aspekt praktik, vendimi mbyll një kapitull politik të së kaluarës – ndërsa Polonia përqendrohet te sfidat më të gjera gjeopolitike dhe të sigurisë që po përballon sot.

  • Lista Serbe ka paraqitur ankesë ndaj vendimit të KQZ-së

    Lista Serbe ka paraqitur ankesë ndaj vendimit të KQZ-së

    Lista Serbe ka paraqitur ankesë në Panelin Zgjedhor për Ankesa dhe Parashtresa ndaj vendimit të KQZ-së që kjo parti të mos certifikohet për pjesëmarrje në zgjedhjet e 28 dhjetorit, ka njoftuar kryetari i këtij subjekti politik, Zllatan Ellek në një konferencë për media.

    Elek e ka quajtur vendimin e KQZ-së ilegal, jo legjitim dhe antiserb. “Presim që ai të anulohet dhe subjekti ynë politik të konfirmohet”, ka thënë Ellek.

    Ai ka thënë se Paneli Zgjedhor për Ankesa dhe Parashtresa do të vendosë për ankesën e tyre brenda 72 orëve të ardhshme, pra brenda afatit të paraparë ligjor.

    “Presim patjetër një vendim pozitiv,” ka përsëritur Ellek.

    Ai, “në emër të popullit serb”, u falënderua faktorëve ndërkombëtarë dhe ambasadorëve të vendeve të huaja në Kosovë të cilët, sipas fjalëve të tij, reaguan ndaj vendimit të KQZ-së.

    Elek është i bindur se Lista Serbe do të marrë pjesë në zgjedhje dhe se do t’i fitojë të gjitha dhjetë mandatet

  • “Trafiku Urban” do të kompensojë biletat për ditët e humbura gjatë grevës

    “Trafiku Urban” do të kompensojë biletat për ditët e humbura gjatë grevës

    “Trafiku Urban” në Prishtinë ka njoftuar qytetarët se do të kompensojë biletat mujore që kanë mbetur pa u shfrytëzuar gjatë 8 ditëve të grevës.

    Përmes një njoftimi, nga kjo ndërmarrje apelojnë qytetarët të paraqiten në ndonjërën prej kioskave të “Trafikut Urban”, duke prezantuar biletën mujore aktuale.

    Ky është njoftimi i plotë:

    Të nderuar qytetarë,

    Ju njoftojmë se për shkak të protestës së ndërmarrjes sonë, e cila është zhvilluar nga data 24.11.2025 deri më 02.12.2025, janë humbur gjithsej 9 ditë të shfrytëzimit të biletave mujore. Për t’ju kompensuar, ditët e humbura do të shtohen dhe vlefshmëria e biletës suaj mujore do të zgjatet automatikisht pas procesit të vulosjes.

    Për të realizuar zgjatjen e vlefshmërisë së biletës, ju lutemi të ndiqni këto hapa:

    1. Paraqituni në cilëndo nga kioskat e Trafikut Urban.

    2. Prezantojeni biletën tuaj mujore aktuale.

    3. Punëtori në kioskë do të vendosë vulën zyrtare të zgjatjes, e cila është e domosdoshme që kompensimi të hyjë në fuqi.

    4. Pas vulosjes, bileta juaj do të ketë zgjatjen automatike të ditëve të humbura.

    Kioskat ku mund të bëhet vulosja:

    1. Kioska prapa Objektit të Komunës (Tek “Plepat”)

    Orari i punës:

    E hënë – E shtunë: 07:00 – 21:00

    E diel: 08:00 – 16:00

    2. Kioska në lagjen “Kodra e Diellit” (Tek “Banesat e Bardha”)

    Orari i punës:

    E hënë – E premte: 07:00 – 21:00

    E shtunë: 07:00 – 14:00

    3. Kioska në Bulevardin “Bill Kllinton” (Afër nënkalimit)

    Orari i punës:

    E hënë – E shtunë: 07:00 – 21:00

    E diel: 08:00 – 16:00

    Kompensimi aplikohet vetëm pas vulosjes së biletës!

  • Krasniqi i LVV-së shpjegon pse nuk mund të certifikohet Lista Serbe

    Krasniqi i LVV-së shpjegon pse nuk mund të certifikohet Lista Serbe

    Anëtari i Komisionit Qendror të Zgjedhjeve (KQZ) nga radhët e Lëvizjes Vetëvendosje (LVV), Alban Krasniqi i është përgjigjur zërave se nuk ka bazë ligjore që Lista Serbe mos të certifikohet për zgjedhjet e parakohshme të 28 dhjetorit të 2025-ës.

    “Keqleximi i kompetencave të KQZ nga disa : një parti mundet me organizu akte terroriste e me cenu rendin kushtetues ama KQZ duhet me e çertifiku, por nëse si parti ke harru me pagu borxhin prej 200 eurosh rrezikon mos me marr pjesë në zgjedhje, sepse KQZ nuk të çertifikon. Por, neni 14, i Ligjit për Zgjedhjet e Përgjithshme shkruan qartë në pikën 1 .1: Ndalohet regjistrimi i një partie kur është e domosdoshme për të siguruar rendin publik, shëndetin publik, sigurinë kombëtare, parandalimin e çrregullimeve, dhunës dhe krimit, ose mbrojtjen e të drejtave të të tjerëve”, ka shkruar Krasniqi.

  • Si shpëtohen pasagjerët përmes derës emergjente në aeroplan?

    Si shpëtohen pasagjerët përmes derës emergjente në aeroplan?

    Përveç hyrjeve të zakonshme, çdo aeroplan është i pajisur me derë ose dyer emergjente, të dizajnuara për evakuim të shpejtë dhe të sigurt të pasagjerëve në raste rreziku. Këto dyer aktivizohen në situata si zjarr në kabinë, aksidente gjatë uljes apo ngritjes, humbje kontrolli gjatë fluturimit, apo incidente të tjera të papritura.

    Dera emergjente funksionon përmes një mekanizmi të veçantë, i cili nuk duhet të aktivizohet asnjëherë pa urdhër të ekuipazhit. Në rast uljeje emergjente, bordi jep komandën “evakuohuni”, dhe vetëm atëherë hapet dera për të nisur procesin e shpëtimit.

    Zakonisht pranë derës emergjente ulet një person i përzgjedhur nga stafi – fizikisht dhe mendërisht i aftë, i cili në rast rreziku udhëzon pasagjerët drejt daljes së sigurt.

    Evakuimi kryhet gjithmonë sipas udhëzimeve të ekuipazhit. Dera emergjente nuk shërben që pasagjerët të hidhen nga lartësia, por për t’i drejtuar ata në rrëshqitëset speciale të evakuimit. I gjithë procesi parashihet të përfundojë brenda 90 sekondave.

  • Kim shpërthen në lot: Kanye më akuzoi se kam gënjyer për grabitjen në Paris

    Kim shpërthen në lot: Kanye më akuzoi se kam gënjyer për grabitjen në Paris

    Kim Kardashian e ka rijetuar grabitjen traumatike të vitit 2016, duke zbuluar në episodin e fundit të reality show-t “Keeping Up with the Kardashians” se ish-bashkëshorti i saj Kanye West e akuzoi atë se e kishte sajuar gjithçka.

    Ylli i reality show-t është rikthyer në kohë kur ishte në Paris, gati një dekadë pas incidentit, për të dëshmuar në gjyq, raporton Just Jared.

    Gjatë një rrëfimi emocional në emision, Kim kujtoi akuzën e Kanye-t. “Ish-burri im tha, ‘Ti falsifikove një grabitje për një emision televiziv’, para të gjithëve”, tha Kim mes lotësh. “Ishte një thikë në zemër.”

    “Vetëm mendimi se dikush nuk do të të besonte – dikush që është kaq afër teje, që duhet të të njohë dhe të dijë sa shumë ka ndikuar kjo në jetën tënde – më shqetësoi vërtet. Ti nuk e di kush jam unë”, shtoi ajo.

    Kim dhe Kanye ishin të martuar në kohën e grabitjes në tetor 2016. Edhe pse ai nuk ishte me të në Paris, lajmi e zuri në mes të një performance në New York. Reperi ndërpreu papritur koncertin për shkak të asaj që i tha audiencës se ishte një “emergjencë familjare” dhe nxitoi te gruaja e tij sapo ajo u kthye në Shtetet e Bashkuara.

    Gjatë grabitjes, Kimit i morën bizhuteri me vlerë më shumë se 10 milionë dollarë.

  • Brokoli mund të zhbëjë të gjitha dëmet që i shkakton cigarja mushkërive

    Brokoli mund të zhbëjë të gjitha dëmet që i shkakton cigarja mushkërive

    Tymi i duhanit përmban kimikate të cilat dobësojnë sistemin tonë imunitar, duke e bërë atë më të ndjeshëm ndaj sëmundjeve dhe duke dëmtuar aftësinë e tij për të shkatërruar qelizat kancerogjene.

    Në të njëjtën kohë, tymi i duhanit mund të dëmtojë ADN-në e qelizave, duke rritur mundësinë e formimit dhe lulëzimit të qelizave kancerogjene.

    Për të testuar fuqinë e ndërhyrjeve dietike në parandalimin e dëmtimit të ADN-së, shkencëtarët studiojnë zakonisht duhanpirësit kronikë.

    Studiuesit grumbulluan një grup duhanpirësish të rregullt dhe u kërkuan atyre të konsumonin 25 herë më shumë brokoli, sesa konsumi mesatar amerikan.

    Krahasuar me duhanpirësit që e shmangnin ngrënien e brokolit, vetëm brenda dhjetë ditësh, duhanpirësit që po e konsumonin atë, kishin 41 për qind më pak mutacione të ADN-së në gjakun e tyre.

    A ndodhi kjo vetëm ngaqë brokoli rriti aktivitetin e enzimave detoksifikuese në mëlçinë e tyre, të cilat ndihmuan në pastrimin e qelizave kancerogjene përpara se këto të mbërrinin te qelizat e duhanpirësve?

    Jo, edhe kur ADN-ja nxirret nga trupat e subjekteve dhe ekspozohet ndaj një kimikati që dëmton ADN-në, materiali gjenetik nga konsumatorët e brokolit tregoi dukshëm më pak dëme.

    Kjo tregon se ngrënia e perimeve, si brokoli, mund t’ju bëjë më të qëndrueshëm për sa i përket nivelit ndërqelizor.

    Ndërkohë që përpiqeni të lini duhanin, perime, si brokoli, lakra dhe lulelakra mund të ndihmojnë në parandalimin e dëmeve të mëtejshme.

  • Sezoni i ri i serialit “Stranger Things” po thyen rekorde, arriti 59.6 milionë shikime në pesë ditë

    Sezoni i ri i serialit “Stranger Things” po thyen rekorde, arriti 59.6 milionë shikime në pesë ditë

    Sezoni i pestë i “Stranger Things” ka hapur kapitullin e tij të fundit me shifra rekord.

    Në pesë ditët e para në Netflix, sezoni arriti 59.6 milionë shikime, java më e madhe e premierës së çdo seriali në gjuhën angleze të Netflix.

    Kjo e bëri atë gjithashtu debutimin e tretë më të mirë të të gjitha kohërave, menjëherë pas sezonit të dytë dhe të tretë të fenomenit global “Squid Game”.

    Ky rezultat përfaqëson një rritje të ndjeshme nga sezoni i mëparshëm, i katërt.

    Ai kishte grumbulluar 287 milionë orë shikimi në vitin 2022, që ishte afërsisht 22 milionë shikime sipas metodës së matjes së Netflix në atë kohë.

    Sipas metrikave të reja, kjo do të thotë që debutimi i sezonit të pestë pati një rritje mbresëlënëse prej 171 përqind.

    Vlen të përmendet se sezoni i pestë kishte pesë ditë për të mbledhur të dhëna, ndërsa sezoni i katërt u mat gjatë tre ditëve, por ndryshimi është ende i madh.

  • Haradinaj në 113-vjetorin e Ushtrisë Shqiptare: Krenari kombëtare

    Haradinaj në 113-vjetorin e Ushtrisë Shqiptare: Krenari kombëtare

    Në 113-vjetorin e themelimit të Forcave të Armatosura Shqiptare, kryetari i Aleancës për Ardhmërinë e Kosovës, Ramush Haradinaj ka shprehur mirënjohjen dhe respektin e tij të thellë për të gjithë atdhetarët që, me guxim dhe dashuri për vendin, kontribuuan në ngritjen dhe fuqizimin e Ushtrisë Shqiptare.

    Haradinaj theksoi se “Forcat e Armatosura Shqiptare, sot pjesë e NATO-s, vazhdojnë me krenari të nderojnë trashëgiminë e lavdishme të paraardhësve, duke shkëlqyer në misione të ndryshme për mbrojtjen e paqes dhe sigurisë në botë, përfshirë edhe angazhimin e tyre në Kosovë si pjesë e KFOR-it”.

    “Faleminderit për shërbimin ndaj atdheut,” u shpreh ai.

  • LDK në Lipjan propozon tre kandidatë për zgjedhjet e jashtëzakonshme parlamentare

    LDK në Lipjan propozon tre kandidatë për zgjedhjet e jashtëzakonshme parlamentare

    Kryesia e Degës së Lidhjes Demokratike të Kosovës në Lipjan ka vendosur njëzëri që të propozojë kandidatët për deputet nga kjo degë për zgjedhjet e jashtëzakonshme parlamentare.

    Kandidatët e propozuar janë: Anila Deliu, Latif Ramadani dhe Naser Osmani, ish-deputet dhe figurë e njohur e LDK-së

    Nga Dega e Lipjanit pritet që në ditët në vijim të nominohet edhe një kandidat tjetër për listën zgjedhore.

    LDK Lipjan ka bërë të ditur se do të vazhdojë punën me përgjegjësi dhe unitet, me qëllim që të përfaqësojë sa më denjësisht qytetarët e komunës.