Blog

Para ndeshjes Genoa – Inter në stadiumin “Marassi”, u regjistruan përplasje të rënda jashtë impiantit, ku dy grupe tifozësh u përfshinë në konflikte, sulmuan policinë dhe vendosën zjarr në disa automjete.

Sipas raportimeve të Sky Sport Italia dhe Sportitalia, incidentet ndodhën më shumë se një orë para fillimit të ndeshjes. Një grup ultrasish të Genoas hodhi objekte, përfshirë fishekzjarre, drejt tifozëve të Interit që po përgatiteshin për të hyrë në sektorin e mysafirëve.

Tifozët e Interit reaguan duke tentuar të thyenin barrierën që i ndante, gjë që detyroi ndërhyrjen e policisë dhe përshkallëzoi situatën. Të paktën një makinë u përfshi nga flakët, ndërsa disa tifozë u përballën me efektet e gazit lotsjellës.

Pas rikthimit të qetësisë, disa automjete, motoçikleta dhe kosha mbeturinash mbetën të djegura plotësisht, duke lënë pas një pamje të zymtë jashtë stadiumit. /ATVLIVE.TV

Barcelona regjistroi fitoren e shtatë radhazi në La Liga, duke mposhtur Osasunën, por këtë herë pa sulmuesin veteran Robert Lewandowski në fushë.

Për të dytën ndeshje radhazi, trajneri Hansi Flick nuk e aktivizoi polakun, ndërsa Ferran Torres luajti të gjitha 90 minutat në “Spotify Camp Nou”. Ndërsa mungesa ndaj Real Betis kishte qenë një vendim taktik, këtë herë Lewandowski u la jashtë për arsye shëndetësore.

Sipas raportimeve të Catalunya Radio, sulmuesi polak kishte shqetësime në muskujt e kofshës dhe nuk rrezikohej: “Ai nuk luajti për shkak të problemeve në kofshë. Në rast urgjence mund të kishte marrë 15 minuta, por pas golit të parë u vendos që të mos rrezikohej.”

Flick nuk pritet ta rrezikojë Lewandowskin as për ndeshjen e së martës në Kupën e Mbretit ndaj Guadalajaras, ndërsa vendimi përfundimtar do të merret nga vetë lojtari, bazuar mbi gjendjen fizike.

Ky sezon ka qenë i vështirë për Lewandowskin, i cili tashmë ka humbur pesë ndeshje për shkak dëmtimi dhe ka humbur vendin e titullarit nga Ferran Torres. Kjo situatë e bën të paqartë rinovimin e kontratës, që skadon verën e ardhshme.

Barcelona po përgatitet për të ardhmen dhe kërkon një sulmues të ri, me emra si Julian Alvarez dhe Karl Etta Eyong në radar. Nga ana tjetër, Fisnik Asllani nuk konsiderohet një opsion serioz për ekipin katalanas. /ATVLIVE.TV

Baseli nuk arriti të fitonte në “St. Jakob Park”, duke mbetur në barazim 0-0 me Lausanne në javën e 17-të të Superligës zvicerane.

Lausanne mori një pikë të vlefshme edhe pse u përball me vështirësi: Lekoueiry u përjashtua me karton të kuq në minutën e 59-të dhe Soppy mori kartonin e dytë të verdhë në minutën e 90+6.

Te Baseli, Albian Ajeti u startua titullar dhe u ndëshkua me karton të verdhë në minutën e 65-të, ndërsa u zëvendësua në minutën e 82-të.

Xherdan Shaqiri u aktivizua në minutën e 63-të. Nga ana e Lausannes, Alban Ajdini hyri në lojë në minutën e 90+2.

Me këtë barazim, Baseli qëndron në vendin e katërt me 28 pikë, Lausanne renditet e 8-ta me 21 pikë, ndërsa Thun kryeson me 34 pikë. /ATVLIVE.TV

Kapiteni i Liverpoolit, Virgil van Dijk, ka vënë në pah rëndësinë e Mohamed Salah pas fitores 2-0 ndaj Brighton & Hove Albion në Premier League, të shtunën në “Anfield”, duke shprehur shpresën që sulmuesi egjiptian të vazhdojë të jetë pjesë e klubit edhe pas Kupës së Kombeve të Afrikës.

Salah u rikthye në skuadër të shtunën, pas një jave të tensionuar, gjatë së cilës kritikat e tij publike ndaj klubit kishin ngritur pikëpyetje për të ardhmen e tij në “Anfield”.

33-vjeçari u aktivizua në minutën e 26-të, duke zëvendësuar Joe Gomezin e dëmtuar dhe u prit me duartrokitje të fuqishme nga tifozët. Rikthimi i tij u shoqërua me një kontribut të menjëhershëm, pasi asistoi në golin e dytë të shënuar nga Hugo Ekitike.

“Mo do të shkojë në AFCON dhe të gjithë shpresojmë që të ketë sukses atje. Presim që të rikthehet dhe të jetë shumë i rëndësishëm për ne në pjesën e mbetur të sezonit”, deklaroi Van Dijk për gazetarët pas ndeshjes.

“Më pas, sigurisht që futbolli është i paparashikueshëm dhe askush nuk e di se çfarë do të ndodhë. Shpresoj që ai të qëndrojë, sepse është një nga liderët e ekipit dhe ende një lojtar jashtëzakonisht i rëndësishëm për klubin”, shtoi kapiteni holandez.

Tashmë, Mohamed Salah do t’i bashkohet kombëtares së Egjiptit për Kupën e Kombeve të Afrikës, e cila nis të dielën e ardhshme. /ATVLIVE.TV

Mesfushori kosovar Lindon Emërllahu do të vazhdojë karrierën në Ukrainë, pasi ka arritur marrëveshje për t’iu bashkuar skuadrës Polissya Zhytomyr, duke i dhënë fund spekulimeve rreth së ardhmes së tij.

Transferimi është mbyllur mes palëve, ndërsa CFR Cluj do të arkëtojë 1.5 milionë euro nga shitja e lojtarit. Emërllahu, nga ana e tij, ka pranuar një kontratë me pagë mujore mbi 30 mijë euro.

Sipas raportimeve të mediave rumune, përfshirë DigiSport, në garë për shërbimet e mesfushorit ishte edhe Werder Bremen, por oferta e klubit gjerman nuk u konkretizua në kohën e duhur. Kjo bëri që Cluj të vendoste të finalizojë marrëveshjen me klubin ukrainas.

Në raportim thuhet se Emërllahu do të preferonte një kampionat më konkurrues, si Bundesliga, por pasiguria rreth mbylljes së transferimit me Werder Bremen dhe nevoja e Cluj për ta përfunduar shitjen e çuan drejt pranimit të ofertës nga Polissya.

Në këto rrethana, klubi rumun e bëri të qartë se nuk do të priste më gjatë, duke i dhënë përparësi ofertës më konkrete dhe të garantuar financiarisht.

“Emërllahu do ta preferonte një kampionat tjetër, më të fortë dhe sigurt, duke ditur se ka luftë në Ukrainë. Sidoqoftë, Nelutu Varga ia bëri të qartë se do ta humbiste vendin e titullarit te
Cluj dhe sidomos premtimin prej 100 mijë eurove bonus, duke e detyruar futbollistin ta pranojë propozimin dhe të paketojë valixhet”.

“Lojtari po hezitonte sepse e dinte interesimin e Werder Bremen nga Gjermania dhe kuptohet do të preferonte të bënte hapin e madh për Bundesliga. Sidoqoftë, gjermanët nuk ishin më konkret se ukrainasit dhe kishte rrezik se në fund nuk do të finalizohej transferimi. CFR nuk mund ta pranonte si opsion me situatën aktuale”, thuhet ndër të tjera në raportim.

23 vjeçari pritet të udhëtojë së shpejti drejt Ukrainës për testet mjekësore dhe më pas të nënshkruajë kontratën zyrtare me Polissya Zhytomyr, duke hapur një kapitull të ri në karrierën e tij. /ATVLIVE.TV

Dymbëdhjetë duele, dymbëdhjetë fitore – Ardian Krasniqi vazhdon marshimin e tij perfekt në boksin profesionist, duke ndërtuar hap pas hapi një identitet të fortë dhe të pavarur, edhe pse mbiemri i tij lidhet me trashëgiminë e madhe të xhaxhait, Luan Krasniqi.

Boksieri shqiptar mbrojti me sukses titullin WBO Intercontinental në peshën gjysmë të rëndë, duke mposhtur me nokaut argjentinasin Gaspar Fernandez në mbrëmjen e së shtunës. Me këtë triumf, Krasniqi mbetet i pamposhtur dhe forcon gjithnjë e më shumë pozitat e tij në arenën ndërkombëtare.

Scharrena ishte e mbushur plot me rreth 2.500 tifozë, të cilët krijuan një atmosferë të zjarrtë gjatë eventit “Showdown for Legacy III”. Mbrëmja solli përballje të forta për tituj, emocione të mëdha dhe disa përfundime të hershme, ndërsa vëmendja kryesore u përqendrua te dueli kryesor.

Në ndeshjen kryesore të mbrëmjes, Krasniqi e mori gradualisht kontrollin e plotë të përballjes ndaj Fernandez, duke e dominuar dhe duke e mbyllur ndeshjen para kohe, në mënyrë bindëse.

Pas përfundimit të duelit, kampioni nuk e fshehu kënaqësinë për paraqitjen e tij dhe emocionet e forta të përjetuara përpara publikut vendas.

“E ndjeva peshën e përgjegjësisë që në fillim – për titullin, për ekipin dhe për veten time. Publiku ishte fantastik dhe më dha energji shtesë. U fokusova te forcat e mia dhe qëndrova i qetë deri në fund. Fitorja me nokaut më bën veçanërisht krenar”, deklaroi Krasniqi.

Me këtë fitore, Ardian Krasniqi konfirmon se është një nga emrat më në rritje në peshën gjysmë të rëndë dhe se karriera e tij po ecën me hapa të sigurt drejt niveleve më të larta të boksit profesionist. /ATVLIVE.TV

Pas nëntë vitesh mungesë, u rikthye derbi legjendar “Tyne-Wear”, një nga rivalitetet më të zjarrta dhe më të njohura në futbollin botëror, që vë përballë Sunderlandin me Newcastle United.

Dy klubet historike të veriut të Anglisë nuk kishin garuar në të njëjtën ligë që nga viti 2016. Në vitet që pasuan, Newcastle kaloi periudha të ndryshme konkurrimi, ndërsa Sunderland përjetoi momente të vështira, duke rënë deri në kategorinë e tretë të futbollit anglez.

Megjithatë, këtë sezon “Macet e Zeza” u rikthyen në elitë, duke e bërë të mundur ringjalljen e këtij derbi historik.

Rikthimi nuk ishte i veçantë vetëm për praninë e përballjes, por edhe për rezultatin, pasi Sunderland triumfoi në shtëpi me shifrat minimale 1-0 ndaj rivalit të përjetshëm.

Atmosfera në “Stadium of Light” ishte elektrizuese që nga minuta e parë. Goli i vetëm i ndeshjes u shënua në fillim të pjesës së dytë, pas një autogoli të Nick Woltemade, i cili në përpjekje për të larguar topin, e devijoi me kokë në portën e tij.

Granit Xhaka zhvilloi një paraqitje të plotë dhe bindëse, duke luajtur 90 minuta dhe duke u vlerësuar me notën 7.4 nga SofaScore, ndër më të mirët në fushë.

Ky ishte derbi i 157-të Tyne-Wear, një përballje me histori të pasur dhe rëndësi të madhe në futbollin anglez. Emërtimi “Tyne-Wear” rrjedh nga lumenjtë Tyne dhe Wear, pranë të cilëve ndodhen dy qytetet rivale në veri të Anglisë. /ATVLIVE.TV