ATV

Blog

  • KPK merr vendim për pesë prokurorët serbë, refuzon kthimin e tyre në detyrë

    KPK merr vendim për pesë prokurorët serbë, refuzon kthimin e tyre në detyrë

    Këshilli Prokurorial i Kosovës (KPK) në mbledhjen e së hënës, vendosi për refuzimin e kërkesave për tërheqjen e dorëheqjeve të pesë prokurorëve dhe 15 anëtarëve të stafit mbështetës të komunitetit serb në Prokurorinë e Mitrovicës.

    KPK-ja dërgoi tek ushtruesja e detyrës së Presidentes, Albulena Haxhiu, emrat e pesë prokurorëve për lirim nga detyra.

    Po ashtu, në këtë takim, Këshilli shfuqizoi vendimin për pezullimin e pagave për prokurorët dhe stafin mbështetës serb.

    Për refuzimin e tërheqjes së dorëheqjeve të ofruara nga prokurorët dhe stafi mbështetës serb, votuan katër anëtarët: Dardan Vuniqi, Visar Krasniqi, Elza Bajrami-Kastrati dhe Arlinda Muqa. Ndërkaq kundër votuan: kryesuesi Arian Gashi, Kryeprokurori i Shtetit- Zejnullah Gahsi dhe anëtari Milot Krasniqi.

    Deri te ky vendim erdhi me propozim të zëvendëskryesuesit të KPK-së, Dardan Vuniqi, raporton Betimi për Drejtësi.

    Kryesuesi Arian Gashi propozoi që për këtë çështje të diskutohet në takimet e radhës, me arsyetimin se duhet konsultim me Këshillin Gjyqësor.

    Ai shtoi se po ashtu duhet të përgatiten edhe materialet. Propozimi i tij u përkrah nga Kryeprokurori i Shtetit, Zejnullah Gashi dhe anëtari Milot Krasniqi.

    Në anën tjetër, anëtarja Arlinda Muqa tha se kthimi i prokurorëve dhe stafit mbështetës serb, mund të ndodh vetëm nëse i nënshtrohen procedurave të rekrutimit. Propozoi që të mbështetet propozimi i Vuniqit që të refuzohen tërheqjet e dorëheqjeve dhe të dërgohen te Presidentja për lirim nga detyra.

    Gjithashtu, edhe anëtarja Elza Bajrami-Kastrati tha se nuk vlerëson se ka dicka për t’u diskutuar, duke shtuar se secili dha mendimin e vet, andaj propozoi që të vazhdohet me votim.

    Propozimin e Vuniqit e përkrahu edhe anëtari Visar Krasniqi.

    Më pas, me katër vota për, u miratua propozimi që të refuzohen tërheqjet e dorëheqjeve të pesë prokurorëve dhe stafit mbështetës, si dhe të dërgohen tek Presidentja për lirim nga detyra.

    Po ashtu, u shfuqizua vendimi për pezullimin e pagave të tyre, vendim i cili ishte marrë nga KPK-ja kur të njëjtit kishin ofruar dorëheqjet.

  • Për një javë në rajonin e Prishtinës u realizuan 191 urdhëresa të gjykatës – prej tyre 48 urdhëresa për vepra penale

    Për një javë në rajonin e Prishtinës u realizuan 191 urdhëresa të gjykatës – prej tyre 48 urdhëresa për vepra penale

    Nga zyrtarët policor të rajonit Prishtinës, gjatë javës së kaluar në lokacione të ndryshme dhe aksione të ndara, janë realizuar 191 urdhëresa të gjykatës, prej tyre 48 urdhëresa për vepra penale, ndërsa të tjerat për kundërvajtje, seanca, verifikime etj.

    Sipas një njoftimi për media thuhet se në përputhje me urdhëresat, pas përfundimit të procedurave policore, personat e dënuar me burgim janë dërguar për vuajtje të dënimit, ndërsa personat e dënuar me gjobë, janë liruar, pasi të njëjtit kanë kryer obligimet e caktuara në urdhëresa.

    “Aktivitetet policore janë shtrirë edhe në segmente të tjera të sigurisë. Kësisoj në harkun e njëjtë kohor janë sekuestruar 17 armë zjarri, të llojeve dhe kalibrave të ndryshëm, si dhe municione të llojeve dhe kalibrave të ndryshëm”, thuhet në njoftim.

    Po ashtu siç bëhet e ditur në njoftim në po të njëjtën periudhë kohore, kanë rezultuar me shqiptimin e 4.721 masave administrative me gjobë për lloje të ndryshme të kundërvajtjeve dhe shkeljeve të kodit rrugor, prej tyre 953 të evidentuara nga vetura inteligjente dhe vetura me radar mobil.

  • Scaloni shpërthen në lot pas humbjes në finalen e Botërorit: “Kjo më dhemb në shpirt”

    Scaloni shpërthen në lot pas humbjes në finalen e Botërorit: “Kjo më dhemb në shpirt”

    Përzgjedhësi i Argjentinës, Lionel Scaloni, nuk arriti t’i fshehë emocionet pas humbjes minimale 1-0 ndaj Spanjës në finalen e Kupës së Botës 2026. I prekur thellë nga rezultati, ai u shfaq me lot në sy gjatë konferencës për shtyp, të cilën e ndërpreu para kohe.

    Tekniku argjentinas foli me sinqeritet për fundin e një cikli të suksesshëm dhe sfidën e madhe që e pret në ndërtimin e një skuadre të re.

    “Ne në stafin teknik e kemi menduar shpesh këtë moment. Por për të vazhduar përpara duhet të rifillosh gjithçka nga e para. Të ndërtosh sërish një grup si ky është jashtëzakonisht e vështirë… dhe kjo më dhemb në shpirt”, u shpreh Scaloni.

    Menjëherë pas këtyre fjalëve, ai u ngrit nga karrigia, kërkoi ndjesë me një “Më falni” dhe u largua nga salla e konferencës, pa mundur t’i përmbante emocionet.

    Edhe pse mbeti pa trofe, Argjentina zhvilloi një finale të madhe, duke e çuar Spanjën në kohën shtesë pavarësisht se luajti me një futbollist më pak. Scaloni la të kuptohej se rrjedha e takimit mund të kishte qenë krejtësisht ndryshe nëse skuadra e tij do të kishte mbetur me 11 lojtarë në fushë.

    Pas finales, trajneri i Spanjës, Luis de la Fuente, i doli në mbështetje homologut të tij, duke e vlerësuar për gjithçka ka arritur në krye të Argjentinës.

    “Më vjen shumë keq për atë që po kalon. Megjithatë, ai duhet të jetë krenar dhe i lumtur. Ka thyer çdo rekord, është ende i ri dhe ka shumë futboll përpara. Madje i thashë se është shumë më i ri se unë dhe ka ende shumë për të dhënë”, deklaroi De la Fuente.

    Kontrata e Scalonit me Federatën Argjentinase të Futbollit skadon në muajin dhjetor, ndërsa trajneri ka bërë të ditur se do ta respektojë marrëveshjen deri në ditën e fundit.

  • John Ford mban rekordin, këta janë regjisorët me më shumë Oscar në histori

    John Ford mban rekordin, këta janë regjisorët me më shumë Oscar në histori

    Çmimet Oscar konsiderohen vlerësimi më prestigjioz në botën e kinemasë dhe për shumë regjisorë përfaqësojnë kulmin e një karriere artistike. Megjithatë, emrat më të famshëm të industrisë së filmit nuk janë gjithmonë ata që kanë fituar më shumë statuja të arta.

    Rekordin historik për Oscarin e Regjisorit më të Mirë (Best Director) vazhdon ta mbajë regjisori amerikan John Ford, i cili ka fituar katër herë këtë çmim – më shumë se çdo regjisor tjetër në historinë e Akademisë së Filmit.

    Nëse merren parasysh të gjithë Oscarët e fituar personalisht nga regjisorët, përfshirë çmimet si regjisor, producent apo skenarist, lista përfshin disa nga figurat më të rëndësishme të kinemasë botërore.

    Regjisorët me më shumë Oscar personalë:

    John Ford 4
    Steven Spielberg 4
    Clint Eastwood 4
    Alejandro G. Iñárritu 4
    Frank Capra 3
    William Wyler 3
    Frank Borzage 3
    Francis Ford Coppola 3
    Billy Wilder 3
    James Cameron 3
    Peter Jackson 3
    Alfonso Cuarón 3
    Chloé Zhao 2
    Ang Lee 2
    Oliver Stone 2
    Miloš Forman 2
    Robert Wise 2
    Elia Kazan 2
    Christopher Nolan 2

    *Përfshihen Oscarët e fituar personalisht si regjisor, producent ose skenarist, jo numri total i Oscarëve që kanë fituar filmat e tyre.

    Christopher Nolan më në fund në majën e Oscarëve

    Edhe pse prej vitesh konsiderohet një nga regjisorët më të mëdhenj të shekullit XXI, Christopher Nolan e fitoi Oscarin e tij të parë vetëm në vitin 2024, me filmin “Oppenheimer”.

    Nolan u shpërblye me:

    Oscarin për Regjinë më të Mirë;
    Oscarin për Filmin më të Mirë, si producent i “Oppenheimer”.

    Filmi fitoi gjithsej shtatë Oscarë, por vetëm dy prej tyre iu atribuuan drejtpërdrejt Nolanit.

    Pavarësisht suksesit të regjisorëve si Steven Spielberg, Christopher Nolan, James Cameron dhe Peter Jackson, rekordi i John Ford vazhdon të mbetet i pathyer.

    Katër çmimet e tij për Regjinë më të Mirë janë një arritje që asnjë regjisor tjetër nuk ka arritur ta barazojë, duke e vendosur Fordin në historinë e kinemasë si regjisorin më të suksesshëm në këtë kategori të çmimeve Oscar.

  • Albion Rrahmani debuton me gol te Venezia, lë menjëherë gjurmë në fanellën e re

    Albion Rrahmani debuton me gol te Venezia, lë menjëherë gjurmë në fanellën e re

    Sulmuesi i Kosovës, Albion Rrahmani, ka nisur në mënyrën më të mirë aventurën e tij te Venezia, duke realizuar gol në paraqitjen e parë me skuadrën italiane.

    Rrahmani gjeti rrugën e rrjetës në ndeshjen miqësore ndaj Dolomiti Bellunesi, ku Venezia triumfoi me rezultatin 4-2.

    Në minutën e 88-të, pas një kundërsulmi të shpejtë, sulmuesi kosovar u tregua i saktë para portës, duke goditur fuqishëm me këmbën e djathtë dhe duke vulosur fitoren e ekipit të tij.

    Ky është një sinjal premtues për Rrahmanin, i cili tashmë ka shijuar emocionin e golit me fanellën e Venezias dhe synon ta vazhdojë këtë formë edhe në garat zyrtare. Muajin e ardhshëm ai pritet të debutojë në Serie A, një prej kampionateve më të forta në botë.

    Venezia do ta nisë sezonin e ri me përballjen ndaj Modenas në Kupën e Italisë, ndërsa ndeshjen e parë në Serie A do ta zhvillojë kundër Lecces.

  • Vajza kërkon nga ndërkombëtarët dëshmi se babai i burgosur në Serbi ishte refugjat në luftë

    Vajza kërkon nga ndërkombëtarët dëshmi se babai i burgosur në Serbi ishte refugjat në luftë

    Florie Selmani, vajza e shtetasit kosovar Osman Selmani, ka kërkuar ndihmën e organizatave ndërkombëtare që kanë monitoruar refugjatët gjatë luftës në Kosovë, për të siguruar dëshmi që, sipas saj, mund të vërtetojnë se babai i saj nuk ka kryer krime lufte.

    Osmani Selmani, 74-vjeçar, ishte arrestuar më 1 korrik nga autoritetet serbe në pikën kufitare Mutivodë, gjatë kthimit nga Medvegja në Prishtinë, nën dyshimet për krime lufte.

    Sipas vajzës së tij, gjatë luftës në Kosovë, familja Selmani ishte larguar nga shtëpia dhe kishte qëndruar si refugjate në Maqedoninë e atëhershme.

    Ajo ka kërkuar nga organizatat që kanë qenë të përfshira në menaxhimin dhe monitorimin e refugjatëve që të ofrojnë çdo dokument, regjistrim apo informacion që mund të dëshmojë qëndrimin e Osman Selmanit në kampin e refugjatëve në Çegran, Gostivar, gjatë periudhës së luftës.

    Ajo u është drejtuar organizatave si UNHCR, Komitetit Ndërkombëtar të Kryqit të Kuq dhe organizatave të tjera humanitare, duke kërkuar ndihmë për dokumentimin e së vërtetës lidhur me rastin e babait të saj.

    “Sot u drejtohemi të gjithë personave, organizatave dhe institucioneve që kanë qenë të përfshira në menaxhimin dhe monitorimin e refugjatëve gjatë vitit 1999. Çdo dëshmi, dokument, regjistrim apo informacion që mund të na ofroni do të jetë një ndihmë e madhe për zbardhjen e së vërtetës dhe dokumentimin e historisë së familjes sonë, veçanërisht lidhur me babain tonë, Osman Selmani.

    Organizatat të cilave u drejtohemi:

    UNHCR – Agjencia e OKB-së për Refugjatë (regjistrimi, mbrojtja dhe koordinimi i ndihmës për refugjatët)

    ICRC – Komiteti Ndërkombëtar i Kryqit të Kuq (ndihmë humanitare dhe lidhje familjare)

    IFRC dhe Kryqi i Kuq i Maqedonisë

    CARE (përfshirë në operacione humanitare gjatë krizës së refugjatëve)

    IOM – Organizata Ndërkombëtare për Migrim (transporti dhe kthimi i refugjatëve)

    UNICEF, WHO, OCHA dhe organizata të tjera të Kombeve të Bashkuara

    CRS, Norwegian Refugee Council, Oxfam, Mercy Corps, International Medical Corps dhe organizata të tjera humanitare. Ju lutemi ta shpërndani këtë apel me këdo që mund të ketë informacione, dokumente apo dëshmi nga kampi i refugjatëve në Çegran gjatë vitit 1999. Çdo informacion mund të jetë një pjesë e rëndësishme për të vërtetën”, shkroi Florie Selmani.

  • Pjesë të raketës së SpaceX mund të godasin Hënën në gusht, sipas NASA-s

    Pjesë të raketës së SpaceX mund të godasin Hënën në gusht, sipas NASA-s

    Në gusht, një pjesë e raketës së kompanisë SpaceX pritet të përplaset me Hënën. Përplasja nuk ishte e planifikuar, por ekspertët po e monitorojnë nga afër situatën. Ende mbetet e paqartë nëse kjo ngjarje do të mund të vërehet nga Toka.

    Eksplorimi i hapësirës ndonjëherë sjell pasoja të papritura. Sipas shkencëtarëve të NASA-s, një pjesë e një rakete mund të përplaset me sipërfaqen e Hënës në fillim të muajit gusht.

    Në janar të vitit 2025, kompania e Elon Musk, SpaceX, lëshoi raketën Falcon 9, e cila dërgoi dy mjete ulëse drejt Hënës. Tani, astronomi amerikan Bill Gray dhe NASA kanë paralajmëruar se pjesa e sipërme e kësaj rakete mund të godasë aksidentalisht Hënën. Sipas llogaritjeve, përplasja pritet të ndodhë më 5 gusht.

    Ekspertët kanë diskutuar për këtë përplasje të mundshme gjatë një takimi të organizuar nga Instituti Virtual i Kërkimeve për Eksplorimin e Sistemit Diellor i NASA-s (SSERVI). Ata theksojnë se Hëna është një mjedis ku përplasjet ndodhin natyrshëm.

    Pjesa e sipërme e raketës Falcon 9 peshon rreth katër tonë dhe po lëviz me një shpejtësi prej më shumë se dy kilometra në sekondë.

    Ekspertët po shqyrtojnë nëse përplasja do të jetë e dukshme nga Toka. Megjithatë, NASA vlerëson se mundësia për ta parë është shumë e ulët. Sipas një zyrtari të NASA-s, do të jetë “shumë e vështirë, nëse jo e pamundur” të vëzhgohet kjo ngjarje.

    Astronomi Bill Gray publikoi llogaritjet për përplasjen që në shtator. Programi i tij astronomik parashikoi se pjesa e raketës do të godasë Hënën më 5 gusht 2026. Ai thekson se kjo përplasje nuk paraqet rrezik.

    Shkencëtarët paralajmërojnë se me rritjen e numrit të mbeturinave hapësinore, raste të tilla mund të bëhen më të shpeshta. Një ngjarje e ngjashme ndodhi edhe katër vite më parë, kur një objekt hapësinor goditi Hënën. NASA dyshoi se bëhej fjalë për një pjesë të një rakete të vjetër kineze, por Kina i mohoi këto pretendime, shkruan Euronews.

  • Shtrenjtohet nafta pas sulmeve të reja amerikane në Iran

    Shtrenjtohet nafta pas sulmeve të reja amerikane në Iran

    Çmimet e naftës u rritën me rreth 3% të dielën, pasi Shtetet e Bashkuara dhe Irani shkëmbyen sulme për më shumë se një javë.

    Nafta e papërpunuar Brent, çmimi ndërkombëtar referues, u rrit me 3% në rreth 90.78 dollarë për fuçi, dhe nafta e papërpunuar amerikane u rrit me pothuajse 3% në 84.85 dollarë për fuçi.

    Trafiku në Ngushticën e Hormuzit, ku rrjedh 20% e furnizimit global me naftë, ka qenë në rënie pas përshkallëzimit të tensioneve javën e kaluar.

    Të mërkurën, SHBA-të rivendosën bllokadën detare të porteve iraniane.

    Disa anije kanë përdorur rrugë alternative, duke përfshirë edhe përgjatë vijës bregdetare të Omanit, të cilat nuk janë miratuar nga Teherani.

    Çmimet e benzinës kanë qenë gjithashtu në rritje, por mesatarja kombëtare e SHBA-së mbetet pak nën 4 dollarë për galon.

    Me 3.992 dollarë për galon, shoferët amerikanë po paguajnë rreth 34% më shumë sesa paguanin para fillimit të luftës.

  • Aksidenti tragjik në Bllacë, ambasadori Qehaja jep detaje për kthimin e trupave

    Aksidenti tragjik në Bllacë, ambasadori Qehaja jep detaje për kthimin e trupave

    Tre persona nga Kosova, Ejup Tërnava, Cennet Tërnava dhe Fatmire Shabani, kanë humbur jetën tragjikisht në një aksident trafiku të ndodhur mbrëmë në afërsi të pikëkalimit kufitar Hani i Elezit–Bllacë, në territorin e Republikës së Maqedonisë së Veriut.

    Ambasadori i Kosovës, Florian Qehaja, ka shprehur ngushëllimet për familjarët, të afërmit dhe miqtë e viktimave, duke konfirmuar angazhimin e institucioneve për trajtimin e rastit.

    “U shpreh ngushëllimet e mia më të sinqerta familjarëve, të afërmve dhe miqve të Ejup Tërnavës, Cennet Tërnavës dhe Fatmire Shabanit, të cilët humbën jetën tragjikisht në aksidentin e ndodhur në afërsi të pikëkalimit kufitar Hani i Elezit–Bllacë”, ka shkruar Qehaja.

    Sipas tij, që nga marrja e informacionit për rastin, Ambasada e Republikës së Kosovës ka qenë në kontakt të vazhdueshëm me autoritetet kompetente të Maqedonisë së Veriut, Ministrinë e Punëve të Brendshme dhe Policinë e Kosovës, si dhe me familjarët e të ndjerëve, për të ofruar ndihmën e nevojshme.

    “Që nga marrja e informacionit për rastin, Ambasada e Republikës së Kosovës ka qenë në kontakt të vazhdueshëm me autoritetet kompetente të Republikës së Maqedonisë së Veriut, Ministrinë e Punëve të Brendshme dhe Policinë e Kosovës, si dhe me familjarët e të ndjerëve”, është shprehur ambasadori.

    Pas përfundimit të procedurave përkatëse nga autoritetet kompetente, trupat e pajetë pritet të transportohen në Republikën e Kosovës.

    “Në këto çaste të rënda shpreh ngushëllimet e mia më të sinqerta dhe ndaj dhimbjen me familjet dhe të dashurit e të ndjerëve. U prehshin në paqe!”, ka deklaruar Florian Qehaja.

  • Një test i thjeshtë me lotët mund të zbulojë më herët sëmundjen e Parkinsonit

    Një test i thjeshtë me lotët mund të zbulojë më herët sëmundjen e Parkinsonit

    Shkencëtarët kanë zhvilluar një sensor të vogël që mund të zbulojë nivelet e dopaminës, një lëndë kimike e trurit që ndihmon në kontrollin e lëvizjeve dhe humorit, nga një mostër e vogël lotësh.

    Testet laboratorike treguan se pajisja mund të dallojë nivelet e ulëta të dopaminës që lidhen me sëmundjen e Parkinsonit. Aktualisht, matja e kësaj substance bëhet përmes analizave të gjakut, urinës ose pajisjeve të vendosura në tru, metoda që janë më të ngadalta, më të kushtueshme ose më invazive.

    Një test me lot mund t’u japë mjekëve mundësinë të zbulojnë ndryshimet e para kimike të Parkinsonit shumë kohë përpara shfaqjes së dridhjeve dhe ngurtësimit të muskujve.

    Dopamina transmeton sinjale mes qelizave nervore dhe ndihmon në ruajtjen e lëvizjeve të kontrolluara. Kur qelizat e trurit që prodhojnë dopaminë fillojnë të vdesin, nivelet e saj bien dhe shfaqen simptomat kryesore të Parkinsonit. Ajo gjithashtu ndikon në humor, motivim dhe mënyrën se si mësojmë.

    Sensori u krijua nga një ekip studiuesish të udhëhequr nga Neftalí Lênin Villarreal Carreño në Universitetin Federal të Pelotas në Brazil. Ata përdorën një rreze lazer mbi një fletë të hollë plastike për të krijuar grafen, një material që përçon elektricitetin. Më pas e veshën atë me nikel dhe përbërje të pasura me azot, duke rritur aftësinë për të kapur molekulat e dopaminës.

    Testet me lot artificialë treguan se sensori jepte sinjale të sakta: sa më shumë dopaminë të kishte, aq më i madh ishte rryma elektrike e matur. Pajisja zbuloi edhe sasi shumë të vogla të substancës, në nivele që përputhen me ato të raportuara te personat me Parkinson.

    Sensori mbeti i saktë edhe kur u përball me përbërës të tjerë që gjenden normalisht në lot, duke treguar se mund të funksionojë në kushte reale.

    Studiuesit synojnë që në të ardhmen të krijojnë një pajisje të vogël dore që mund të përdoret në klinika për një analizë të shpejtë nga një pikë loti. Megjithatë, pajisja është testuar deri tani vetëm në lot artificialë dhe nevojiten prova me mostra reale njerëzore.

    Nëse rezultatet konfirmohen, ky sensor i lirë dhe pa dhimbje mund të ndihmojë në zbulimin e hershëm të Parkinsonit dhe në monitorimin më të lehtë të ndryshimeve në trurin e pacientëve. / Earth