Blog

Gazetari dhe shkrimtari serb Tomislav Markoviq ka reaguar ashpër ndaj deklaratave të ministres serbe për Administratën Shtetërore dhe Vetëqeverisjen Lokale, Snezhana Paunoviq, e cila tha se, po të ishte në vend të Sllobodan Millosheviqit, do ta kishte spastruar etnikisht Kosovën.

Në një tekst autorial të publikuar për Antena M, Markoviq vlerëson se deklarata e ministres nuk është thjesht një skandal verbal, por pasqyron një ideologji që, sipas tij, tashmë është zbatuar gjatë luftës në Kosovë.

“Keqardhja e ministres për mundësinë e humbur për të kryer spastrim etnik të shqiptarëve nga Kosova është krejtësisht e gabuar, sepse kjo tashmë ndodhi. Slobodan Millosheviqi dhe forcat e tij ushtarake, policore e paramilitare e kryen spastrimin etnik të shqiptarëve në vitin 1999”, shkruan Markoviq.

Ai rikujton se gjatë luftës, forcat serbe dëbuan rreth 900 mijë shqiptarë drejt Maqedonisë së Veriut, Shqipërisë dhe Malit të Zi, por shton se ky spastrim ishte i përkohshëm, pasi shqiptarët u kthyen në shtëpitë e tyre pas përfundimit të luftës dhe tërheqjes së forcave serbe nga Kosova.

Duke komentuar përpjekjen e Paunoviqit për ta zbutur deklaratën e saj, kur tha se ndoshta duhej të kishte përdorur termin “deportim” në vend të “spastrimit etnik”, Markoviq shkruan:

“Duhet të jesh vërtet idiot që të mendosh se është më mirë të përdorësh termin ‘deportim’ sesa ‘spastrim etnik’. Edhe deportimi është krim kundër njerëzimit.”

Në tekstin e tij, autori rikujton disa nga krimet e kryera nga forcat serbe në Kosovë, duke përmendur masakrat në Luginën e Rekës pranë Gjakovës, Landovicë dhe Lubeniq, si dhe zhvendosjen e trupave të viktimave në varrezat masive të Batajnicës, pranë Beogradit.

Ai kritikon ashpër shoqërinë dhe institucionet serbe për mohimin e krimeve të luftës.

“Dominon mohimi i plotë i së keqes që e kemi kryer si bashkësi politike, ikja nga përgjegjësia dhe fshehja e së vërtetës”, shkruan ai.

Markoviq thotë se problemi nuk qëndron vetëm te deklarata e ministres, por edhe te fakti që ajo është funksionare e Partisë Socialiste të Serbisë (SPS), të cilën ai e cilëson përgjegjëse për luftërat dhe krimet e viteve ’90.

Sipas tij, nuk mjafton vetëm shkarkimi i Paunoviqit, por nevojiten masa shumë më të thella.

“Nuk mjafton që ministrja të shkarkohet. Është e domosdoshme lustracioni, ndjekja penale e përgjegjësve për krimet dhe një politikë rrënjësisht ndryshe ndaj së kaluarës”, thekson ai.

Në fund të shkrimit, Markoviq argumenton se Serbia duhet të përballet me të kaluarën dhe të ndalojë ideologjinë që, sipas tij, çoi në luftëra, spastrime etnike, krime lufte dhe gjenocid.

“Ashtu siç nazizmi është i ndaluar në Gjermani, edhe nacionalizmi i madhserb duhet të ndalohet në Serbi. Përndryshe, herët a vonë do të kemi sërish politikanë që do të propagandojnë spastrimin etnik, e nëse u krijohen kushtet, do t’i kthejnë fjalët e tyre në vepra”, përfundon gazetari serb Tomislav Markoviq.

Zëvendëspresidenti i SHBA-së, JD Vance, dhe bashkëshortja e tij, Usha Vance, njoftuan të dielën lindjen e fëmijës së tyre të katërt, i pari që lind nga një zëvendëspresident amerikan në detyrë pas më shumë se 150 vjetësh.

Djali, Alec Neel Vance, lindi të dielën dhe i bashkohet tre fëmijëve të tjerë të familjes: Ewan (9 vjeç), Vivek (6 vjeç) dhe Mirabel (4 vjeçe).

Vance e bëri të ditur lajmin përmes një postimi në rrjetet sociale, me një deklaratë të nënshkruar nga ai dhe bashkëshortja e tij.

“Jemi të lumtur të njoftojmë se djali ynë, Alec Neel Vance, lindi këtë mëngjes. Usha dhe foshnja janë mirë dhe gëzojnë shëndet të plotë, ndërsa fëmijët tanë janë shumë të lumtur që takuan vëllain e tyre të vogël”, thuhet në deklaratë.

Çifti falënderoi mjekët dhe stafin e Qendrës Kombëtare Ushtarake Mjekësore Walter Reed, si edhe ekipin mjekësor të Shtëpisë së Bardhë.

Familja në rritje e zëvendëspresidentit republikan përputhet me qëndrimin e tij të kahershëm në mbështetje të rritjes së lindshmërisë në SHBA. Ai ka thënë gjithashtu se vrasja në vitin 2025 e aktivistit konservator Charlie Kirk, mikut të tij, ndikoi në vendimin për të pasur edhe një fëmijë.

Vance, ish-marins i SHBA-së, ka shprehur vazhdimisht shqetësimin për rënien e lindshmërisë në Amerikë që kur nisi karrierën e tij politike në vitin 2021, me kandidimin për Senatin nga shteti i Ohajos. Si zëvendëspresident, gjatë marshit kundër abortit March for Life në vitin 2025 në Uashington, ai deklaroi: “Unë dua më shumë foshnja në Shtetet e Bashkuara të Amerikës.”

Shtetasi turk Ibrahim Eser është nderuar me Medaljen Hero të Venezuelës për kontributin e tij në shpëtimin e 38 personave të bllokuar nën rrënoja pas tërmeteve të fuqishme që goditën vendin.

Medalja iu dorëzua nga presidentja në detyrë e Venezuelës, Delcy Rodriguez, gjatë një ceremonie të zhvilluar në stadiumin Jorge Luis Garcia Carneiro në La Guaira.

Në këtë aktivitet u vlerësuan gjithashtu edhe anëtarë të ekipeve të sigurisë dhe emergjencave që morën pjesë në operacionet e shpëtimit pas katastrofës.

Që në orët e para pas tërmeteve, Eser kontribuoi në operacionet e kërkim-shpëtimit, ndërsa siguroi edhe pamje dhe informacione për situatën në terren, duke ndihmuar në pasqyrimin ndërkombëtar të përmasave të tragjedisë.

Gjatë ceremonisë, Rodriguez vlerësoi punën e ekipeve të shpëtimit, duke theksuar përkushtimin dhe sakrificat e tyre në përpjekjet për të shpëtuar jetë.

Ajo tha se ata treguan solidaritet dhe rezistencë në një nga momentet më të vështira për vendin

Drejtori i Shërbimeve Publike, Leutrim Retkoceri ka njoftuar se pastrimi i hapësirave publike po vazhdon në lagjet e Prishtinës, ku ekipet në terren kanë realizuar ndërhyrje në zonat përreth kontejnerëve.

Sipas njoftimit të drejtorit të Shërbimeve Publike, Leutrim Retkoceri gjatë ditës së dytë të aksionit është kryer pastrimi, larja, dezinfektimi, deratizimi dhe dezinsektimi i hapësirave në lagjen Bregu i Diellit, me ndërhyrje edhe në lagjen Ulpianë.

Në këtë aksion, kanë marrë pjesë ekipet në terren së bashku me drejtorin e Shëndetësisë Bujar Gashi.

Retkoceri ka bërë të ditur se aksioni do të vazhdojë në të gjitha lagjet e kryeqytetit, me synim krijimin e hapësirave publike më të pastra, më të sigurta dhe më të shëndetshme për qytetarët.

“Qëllimi ynë është që çdo lagje të ketë kujdesin e nevojshëm dhe standarde më të mira të pastërtisë publike”, ka theksuar ai.

Mbreti Charles III ka pranuar e ka pranuar dorëheqjen e Keir Starmer si kryeministër i Britanisë së Madhe.

Pas mbajtjes së fjalimit të tij të fundit si kryeministër, Starmer shkoi për në Pallatin e Buckinghamit për t’u takuar me mbretin, duke ofruar dorëheqjen e tij.

Më vonë në fjalimin e tij, kryeministri I deritashëm i Mbretërisë së Bashkuar, Keir Starmer, i uroi sukses pasardhësit të tij, Andy Burnham.

“Ai ka mbështetjen time të plotë. Unë shkoj me mirësjellje, shkoj me buzëqeshje dhe jam krenar për gjithçka që kemi arritur.”, ka thënë Starmer, raporton CNN.

Pas kësaj, Andy Burnham pritet të marrë zyrtarisht postin e kryeministrit të Britanisë së Madhe dhe më pas të mbajë edhe fjalimin e tij të pare.

Njerëzit në vende të tjera shpesh habiten se si Mbretëria e Bashkuar mund të vazhdojë të ndryshojë kryeministra pa mbajtur zgjedhje të përgjithshme.

Në Mbretërinë e Bashkuar, kryeministri është thjesht udhëheqësi i partisë politike që ka shumicën e deputetëve në Dhomën e ulët të Parlamentit britanik.

Ata nuk zgjidhen drejtpërdrejt si presidentët e SHBA-së apo të Francës, edhe pse zgjedhjet e përgjithshme në Mbretërinë e Bashkuar shpesh mund të duken si zgjedhje presidenciale, për shkak të përqendrimit te liderët e partive.

Në fakt, të vetmit njerëz që votojnë për kryeministrin me emër janë zgjedhësit e zonës së tij elektorale.

Nëse një parti vendos të ndryshojë liderin para zgjedhjeve të radhës, siç ka ndodhur gjithnjë e më shpesh vitet e fundit, ajo mund ta bëjë këtë.

Andy Burnham mund të vendosë të shpallë zgjedhje kur të bëhet kryeministër, megjithëse nuk ka dhënë asnjë shenjë se do ta bëjë një gjë të tillë.

Ai do të duhet të përballet me elektoratin herët a vonë. Data e fundit e planifikuar për zgjedhjet e përgjithshme është 15 gushti i vitit 2029

Disa parti opozitare, por jo të gjitha, kërkojnë zgjedhje të menjëhershme, duke argumentuar se Burnham, i cili deri para një muaji nuk ishte as deputet, nuk ka mandat për të qenë kryeministër.

Ai argumenton se do t’u përmbahet në thelb politikave të përcaktuara në programin zgjedhor të Partisë Laburiste për vitin 2024 dhe se ka marrë mbështetjen e votuesve në Makerfield, të cilët e rikthyen në Parlament përmes zgjedhjeve të pjesshme.

Ushtria ruse sulmoi Ukrainën mbrëmë me dy raketa dhe 94 dronë, ndërsa ushtria ukrainase rrëzoi 81 dronë, njoftoi sot Forca Ajrore Ukrainase në Telegram.

“Sulme me raketa dhe nëntë dronë sulmi u regjistruan në nëntë vende,” tha i njëjti burim.

Gjatë 24 orëve të fundit, u regjistruan 235 përleshje midis ushtrisë ruse dhe ukrainase, njoftoi nga ana e tij Shtabi i Përgjithshëm i Forcave të Mbrojtjes së Ukrainës.

Ai shtoi se të dielën ndodhën 235 përleshje midis ushtrisë ruse dhe ukrainase.

Luftimet kryesore u zhvilluan në rajonin Slavyansk, ku rusët nisën 27 sulme.

Në Frontin Kostyantynovsky, ushtarët ukrainas zmbrapsën 24 sulme, ndërsa në Frontin Pokrovsky, forcat mbrojtëse ukrainase ndaluan 30 sulme ruse, shtoi Shtabi i Përgjithshëm në rrjetet sociale.

Kryetari i Organizatës së Veteranëve të Luftës së UÇK-së, Hysni Gucati, tha se do të vazhdojë të ndjekë rrugën ligjore ndaj të gjithë personave që fyejnë Ushtrinë Çlirimtare të Kosovës(UÇK) dhe veteranët e saj, pasi i akuzuari Eqrem Avdullahu e pranoi fajësinë për kanosjen ndaj tij, raporton Ekonomia Online.

Gucati tha se pretendimet se ka marrë pagë për vite me radhë pa shkuar në punë janë të pavërteta dhe se drejtësia do të merret me rastin.

“Ju e patë edhe vetë, për personin i cili më ka kërcënu edhe më fyen, po edhe më thotë që unë e marr pagën qe 9 vite pa punu fare në shkollë. Kjo gjë është e pavërtetë, është e paqëndrueshme. Unë ia kam lënë drejtësisë këtë rast edhe drejtësia do të merret me këtë personin. Ky s’është i pari, do të thotë unë kam ngrit shumë padi, edhe të tjera padi që në ditët në vijim, tash janë të ardhura ato prej Gjermanie, prej Austrie, prej vendeve të ndryshme, të cilët e kanë fyer Ushtrinë Çlirimtare të Kosovës edhe mu si person vetë, apo si kryetar i veteranëve të radhës së invalidëve të luftës. Kështu që, unë i kisha bo ftesë çdo veterani apo çdo invalidi, ata të cilët e ndjejnë veten të fyer nga këta persona të cilët quhen me na shantazhu dhe me shajt luftën e UÇK, të bëjnë padi. Nuk kemi nevojë ne mes veti të fjalosemi, po të bëjmë padi. Secili veteran apo secila familje e dëshmorit edhe invalidi të bëjnë padi dhe ne kemi me iu drejtu drejtësisë, edhe drejtësia është ajo e cila do të merr vendim për këta persona”, tha ai.

Ai bëri të ditur se ka iniciuar padi edhe në Gjermani e Zvicër ndaj personave të tjerë që, sipas tij, kanë fyer UÇK-në dhe atë personalisht.

“Unë i kam bo padi edhe në Zvicër, dy njerëzve i kam bo edhe në Gjermani në Dortmund. Njëri është nga Skënderaj, tjetri është nga Malisheva. Kështu që i kam bo padi edhe për ata dy personat. Me anë të avokatëve në Gjermani i kam informatat të cilat i kanë kap policia gjermane, kur do ta ekstradojnë nuk e di. Kështu që e presim atë sa më shpejt me ardhë këtu edhe mos t’i harroj çka i kam bo unë. Tash ky zotëria, e patë edhe ju, mu më vjen keq, një burrë i moshuar, shkrun në Facebook, shan, fyen edhe thotë që mbyllet me pushkatim. Unë sot jam gjallë, fatmirësisht kam familje edhe unë. Kemi familje të ngushtë secili prej juve që keni familje. Familja s’e ka ndjerë veten shumë mirë edhe në fund jam kryetar i veteranëve, nuk duhet ta fyejë integritetin tim. S’du t’i lejohet kërkujt që të merret me integritetin tim”, tha ai.

Avokati i Gucatit, Halim Shala, tha se qëllimi i tyre është që raste të tilla të marrin epilog ligjor dhe të mbrohet integriteti i Organizatës së Veteranëve të Luftës së UÇK-së.

“Jo, ne po pretendojmë që e vërteta me dalë në shesh për faktin se i njëjti e ka pranu qysh në fazat fillestare pranimin e fajësisë që e ka thënë sot zoti Gucati. Neve kërkesa jonë është që organizata e veteranëve të Ushtrisë Çlirimtare nuk mund të cenohet dhe nuk mund të fyet nga asnjë individ në Republikën e Kosovës të cilët kanë shtetësi të Republikës së Kosovës. Prandaj ne kemi kërkuar dhe do të kërkojmë me vazhdimësi edhe në rastet e tjera, siç ju njoftoi kryetari, janë të hapura nga persona të ndryshëm fizikë, disa me account falco ose fake, disa të tjerë, por që neve kemi iniciuar procedurat për faktin se nuk kanë të ndalur këto linçime publike dhe kanë për qëllim degradimin e institucionit si organizata e veteranëve të UÇK-së dhe çdo pjesëtari të Ushtrisë Çlirimtare të Kosovës”, tha ai.

Një aksident rrugor është regjistruar këtë të hënë në Rrugën e Kombit, në segmentin Rubik-Rrëshen.

Siç shkruan TvKlan, një automjet i tonazhit të rëndë është përplasur me një mjet tjetër, ku dyshohet se kanë mbetur të lënduar katër anëtarë të së njëjtës familje nga Kosova.

Në vendngjarje kanë ndërhyrë ekipet emergjente, ndërsa të lënduarit mësohet se janë jashtë rrezikut për jetë, transmeton Klankosova.tv