Blog

Kandidati i Aleancës për Ardhmërinë e Kosovës për kryeministër, Ramush Haradinaj, ka deklaruar se hyrja në fuqi e Ligjit amerikan për Autorizimin e Mbrojtjes Kombëtare përbën “lajmin më të mirë të ditës” për Kosovën dhe Ballkanin Perëndimor.

Sipas Haradinajt, ligji rikonfirmon qartë politikën e Shteteve të Bashkuara të Amerikës ndaj rajonit, duke refuzuar çdo ide për ndarje, shkëmbim territoresh apo ndryshim kufijsh mbi baza etnike.

Ai ka theksuar se dokumenti amerikan mbështet perspektivën e anëtarësimit të Kosovës në NATO, si dhe integrimin euroatlantik të të gjithë Ballkanit Perëndimor.

Ky është postimi i tij i plotë:

Amerika krah Kosovës

Lajmi më i mirë i mundshëm i kësaj dite është rikonfirmimi i politikës amerikane ndaj Kosovës dhe Ballkanit në përgjithësi.

Ligji, tashmë në fuqi, për Autorizimin e Mbrojtjes Kombëtare, refuzon çdo ide për ndarje, shkëmbim territoresh apo ndryshim kufijsh mbi baza etnike.

E mbështetë perspektiven e anëtarësimit të Kosovës në NATO, si dhe të krejt Ballkanit Perëndimor, që përputhet në plotni më përcaktimin tonë të kahmotshëm se anëtarësimi i Kosovës në NATO, është themeli i sigurisë dhe zhvillimit tonë si Shtet e shoqëri.

Ky Ligj përcakton qartë politikën amerikane, për zbatimin e Marrëveshjes për Normalizimin e marëdhënieve Kosovë-Serbi, me qëllim final NJOHJEN RECIPROKE.

Kjo është rikonfirmim i mbështetjes amerikane për demokracitë në Ballkanin Perëndimor, dhe cilido zyrtar i lartë, që punon kundër integritetit territorial të cilitdo shtet, cenon rendin demokratik, shkelë të drejtat e njeriut apo është i perfshirë në afera korruptive, do të sanksionohet sipas këtij Ligji.

Prandaj miqësia e partneriteti ynë me SHBA, ka qenë jetik në të gjitha fazat, përfshirë edhe synimin tonë final, anëtarësimin në NATO dhe BE, që është edhe thelbi i Programit të Aleancës!

Mirënjohje përjetë Shteteve të Bashkuara të Amerikës!

Prokuroria Speciale e Republikës së Kosovës ka ngritur aktakuzë kundër katër personave për veprat penale “Pjesëmarrja ose organizimi i grupit kriminal të organizuar” dhe “Kontrabandimi me migrantë”.

Katër persona në bashkëkryerje me disa të tjerë të paidenfikuar, akzuohen se nga muaji janar i vitit 2023 deri në shtator të po atij viti kanë vepruar si grup i organizuar kriminal, me qëllim përfitimi të kundërligjshëm, duke kontrabanduar shtetas të huaj në territorin e Republikën së Kosovës.

Sipas aktakuzës, të pandehurit kanë marrë pjesë aktive në veprimtarit të kundërligjshme të kontrabandimit të migrantëve, të cilët vinin përmes Shqipërisë nga shtetet të ndryshme si Bangladeshi, Pakistani, Siria dhe vende të tjera, me destinacion shtetet e tjera të Evropës.

Këto veprime, katër të pandehurit i kanë kryer në këmbim të shumave monetare prej 100 (njëqind) deri në 300 euro për person.

Edhe një trajnim i radhës është përmbyllur me sukses nga Forcat e Sigurisë së Kosovës.

FSK ka përmbyllur me sukses trajnimin elitë “Simboli i Ujkut”, pas tri javësh intensive dhe të mbushura me sfida të vazhdueshme.

Qëllimi themelor ishte testimi dhe ngritja e kapaciteteve profesionale, fizike dhe mentale të pjesëmarrësve.

Ushtrimi final, që zgjati 72 orë pa ndërprerje, përfshiu patrullime mbi 70 kilometra me pajisje të plota ushtarake. Në këtë fazë përfundimtare, kursantët realizuan me sukses misionin e caktuar, duke ekzekutuar sulmin me profesionalizëm të lartë, vendosmëri dhe bashkëpunim të shkëlqyer ekipor.

Përfundimi i këtij trajnimi konfirmon nivelin e lartë të përgatitjes dhe gatishmërisë së pjesëtarëve të FSK-së, si dhe angazhimin e vazhdueshëm për ngritjen e kapaciteteve operative dhe profesionale.

Ka ndërruar jetë zyrtari policor i Policisë së Kosovës nga Vushtrria, Albion Maxhuni.

Lajmin të ditur e ka bërë edhe Sindikata e Policisë së Kosovës, të cilët kanë shprehur ngushëllimet më të sinqerta për familjen, miqtë dhe kolegët e të ndjerit.

Varrimi do të bëhet të premten, më 19.12.2025, pas namazit të xhumasë, në ora 13:00, në varrezat e Novosellës së Maxhunajve në Vushtrri.

Policia e Kosovës, përkatësisht Drejtoria për Hetimin e Trafikimit me Narkotikë (DHTN), në bashkëpunim ndërkombëtar me  shtetin suedez, pas një hetimi disamujor ka arrestuar një të dyshuar mashkull, shtetas suedez, nën dyshimin e bazuar për veprën penale blerje, posedim, shpërndarje dhe shitje e paautorizuar e narkotikëve.

Arrestimi është realizuar rreth orës 16:00 në rrugën “Petrit Bytyçi” në Prizren. Gjatë operacionit policor, nga i dyshuari janë konfiskuar para të gatshme, një veturë si dhe dokumente të ndryshme që dyshohet se lidhen me veprimtarinë kriminale.

Me vendim të prokurorit kompetent, i dyshuari është ndaluar dhe rasti është duke u hetuar më tej nga organet përkatëse.

“Rr. ‘Petrit Bytyçi’, Prizren 18.12.2025-16:00. Policia e Kosovës, respektivisht DHTN, në bashkëpunim ndërkombëtar me shtetin suedez, pas një hetimi disamujor ka grumbulluar dëshmi dhe ka arrestuar të dyshuarin mashkull shtetas suedez me dyshimin e bazuar në përfshirje të trafikimit me narkotik. Nga i dyshuari janë konfiskuar: para të gatshme, një veturë dhe dokumente të ndryshme”, thuhet në raportin e policisë.

Njësiti i hetimeve i stacionit policor në Gjilan, si rezultat i angazhimit të vazhdueshëm, veprimeve të mirë organizuara operative dhe punës intensive hetimore kanë arritur që të identifikonin dhe arrestonin dy të dyshuar meshkuj kosovarë.

Arrestimi i tyre është bërë si rezultat i zhvillimit të procedurave hetimore lidhur me disa raste të vjedhjeve të ndodhura në Gjilan, ku hetuesit policorë kanë arritur të siguruar prova të besueshme se dy të dyshuarit, dyshohet se në periudha të ndryshme kohore, me qëllim përfitimi material të kundërligjshëm, kanë kryer së paku tri raste të vjedhjeve të motoçikletave.

Pas arrestimit ata janë intervistuar në bazë të procedurave ligjore, ndërsa me vendim të prokurorit, rasti shkon në procedurë të rregullt gjyqësore me kallëzim penal ndaj të dy të dyshuarve për veprën penale “Vjedhje”.