ATV

Blog

  • Elon Musk, më i pasuri i globit për 2025, në listë edhe Samir Mane

    Elon Musk, më i pasuri i globit për 2025, në listë edhe Samir Mane

    Elon Musk shpallet zyrtarisht njeriu më i pasur në planet.

    Sipas listës së fundit të revistës prestigjioze Forbes për vitin 2025, pasuria e tij ka arritur vlerën e paprecedentë prej 342 miliardë dollarësh, e nxitur nga rritja e hovshme e kompanive SpaceX, Tesla dhe xAI.

    Pas dy vitesh në vendin e dytë, Musk ka zbritur nga froni francezin Bernard Arnault, i cili tashmë renditet i pesti.

    Mark Zuckerberg mban vendin e dytë, i ndjekur nga Jeff Bezos në të tretin.

    Në listën e miliarderëve, këtë vit u përfshi edhe Samir Mane, shqiptari i parë me një pasuri prej 1.4 miliardë dollarësh, i ndodhur në vendin e 2356.

    Lista e këtij viti ka 3,028 miliarderë, 247 më shumë se një vit më parë.

    Amerikanët kanë numrin më të lartë të miliarderëve në botë, 902. Pasuria e përgjithshme është 16.1 trilionë dollarë, 2 trilionë më shumë se viti i kaluar.

     

  • Golden Eagle Ylli ndahet me Larry Thomas, klubi falënderon basketbollistin për kontributin

    Golden Eagle Ylli ndahet me Larry Thomas, klubi falënderon basketbollistin për kontributin

    Basketbollisti Larry Thomas nuk do të jetë më pjesë e Golden Eagle Yllit, pasi palët kanë vendosur të ndërpresin bashkëpunimin me marrëveshje të dyanshme.

    Lajmi është konfirmuar përmes një njoftimi zyrtar të klubit nga Theranda, i cili ka shprehur mirënjohje për kontributin e lojtarit gjatë periudhës së qëndrimit të tij në skuadër.

    “Me marrëveshje të dyanshme kemi vendosur të shkëpusim bashkëpunimin me lojtarin Larry Thomas. E falënderojmë për kontributin dhe i urojmë shumë suksese në vazhdimin e karrierës së tij”, thuhet në komunikatën e klubit.

    Ndarja vjen në një periudhë jo të lehtë për Golden Eagle Yllin, i cili po kalon një edicion të vështirë në elitën e basketbollit të Kosovës. Pas 13 ndeshjeve të zhvilluara, skuadra renditet në vendin e shtatë në tabelë me 17 pikë dhe po kërkon stabilitet për pjesën e mbetur të sezonit.

    Klubi pritet të analizojë situatën dhe të ndërmarrë hapa të rinj për të përmirësuar rezultatet në vazhdim të kampionatit.

  • Vuçiqi konfirmon bisedimet për t’ia shitur NIS-in një kompanie hungareze

    Vuçiqi konfirmon bisedimet për t’ia shitur NIS-in një kompanie hungareze

    Gjiganti rus i energjisë, Gazprom, është në bisedime me kompaninë hungareze, MOL, për një shitje të mundshme të aksioneve të tij shumicë në NIS, rafinerinw e vetme tw naftës në Serbi, tha të martën presidenti serb, Aleksandar Vuçiq.

    Shtetet e Bashkuara shpallën sanksione të gjera që synonin sektorin e naftës të Rusisë në janar, për shkak të luftës së Moskës në Ukrainë, por për NIS-in zbatimi i tyre u shty disa herë përpara se të hynte përfundimisht në fuqi më 8 tetor, transmeton Radio Evropa e Lirë.

    “Ne kemi informacione se përfaqësuesit e Gazpromit po bisedojnë, mes të tjerash, me kompaninë hungareze MOL, dhe ne nuk kemi asgjë kundër kësaj. Hungarezët janë miqtë tanë”, u tha Vuçiq gazetarëve të martën.

    “Ne duhet ta përfundojmë këtë sa më shpejt të jetë e mundur, deri më 15 janar”, shtoi ai.

    Bankat kanë ndalur përpunimin e pagesave të NIS-it për shkak të sanksioneve. Ndërkohë, tubacioni kroat, JANAF, ka ndaluar furnizimin e rafinerisë me naftë bruto.

    Gazprom zotëron 11.3 për qind të aksioneve në NIS, ndërsa dega e tij e sanksionuar, Gazprom Neft, ka 44.9 për qind. Qeveria e Serbisë zotëron 29.9 për qind, ndërsa pjesa e mbetur u përket aksionarëve të vegjël dhe punonjësve.

    Vuçiq tha gjithashtu se marrëveshja e furnizimit me gaz të Serbisë me Rusinë do të zgjatet edhe për tre muaj të tjerë.

    Logoja e Industrisë së Naftës së Serbisë (NIS), e cila është nën sanksione amerikane.
    SHIKONI EDHE:
    Putin thotë se Rusia “ka ide” si të zgjidhet çështja e NIS-it të sanksionuar serb
    Ky shtet ballkanik mbetet një nga blerësit e paktë të mbetur në Evropë të gazit natyror rus.

    Qeveria serbe, e cila synon anëtarësimin e Serbisë në Bashkimin Evropian, është përballur me presion nga vendet perëndimore për t’u harmonizuar me sanksionet e BE-së ndaj Rusisë, por ende nuk ka ndërmarrë veprime në këtë drejtim./REL

  • Zelensky: Janë përgatitur dokumente për garancitë e sigurisë dhe fundin e luftës në Ukrainë

    Zelensky: Janë përgatitur dokumente për garancitë e sigurisë dhe fundin e luftës në Ukrainë

    Presidenti i Ukrainës, Volodymyr Zelensky, ka deklaruar se pas bisedimeve që i ka cilësuar si produktive mes zyrtarëve ukrainas dhe emisarëve të presidentit amerikan, Donald Trump, janë përgatitur disa dokumente draft, përfshirë ato për garancitë e sigurisë për Ukrainën, rindërtimin e vendit dhe një kornizë bazë për t’i dhënë fund luftës me Rusinë.

    Sipas një postimi të Zelensky-t në rrjetin social X, pas informimit nga negociatorët ukrainas Rustem Umerov dhe Andrii Hnatov, bisedimet janë zhvilluar gjatë fundjavës në Majemi të Floridës, me pjesëmarrjen e delegacioneve nga Ukraina, Evropa dhe Shtetet e Bashkuara të Amerikës.

    Po ashtu, janë mbajtur edhe bisedime të veçanta me përfaqësues rusë.

    Zelensky ka theksuar se në këto takime janë vendosur pikat kryesore për të arritur një fund real të luftës dhe për të parandaluar një invazion të tretë rus, pas atij të vitit 2014 në Krime dhe Donbas.

    Megjithatë, Kremlini ka shprehur rezerva lidhur me këto zhvillime. Zëdhënësi i tij, Dmitry Peskov, ka deklaruar se bisedimet nuk duhet të shihen si një përparim i madh, por si një proces pune që do të vazhdojë.

    Ndërkohë, në të njëjtën kohë me këto zhvillime diplomatike, Rusia ka kryer një sulm masiv ajror mbi sistemin energjetik të Ukrainës.

    Si pasojë e sulmeve, të paktën tre persona kanë humbur jetën, përfshirë edhe një fëmijë, ndërsa janë shkaktuar ndërprerje të gjera të energjisë elektrike në disa rajone të vendit, vetëm pak ditë para festave të Krishtlindjeve.

  • Numërimi i votave ndalet natën e Vitit të Ri, rifillon më 1 janar

    Numërimi i votave ndalet natën e Vitit të Ri, rifillon më 1 janar

    Komisioni Qendror i Zgjedhjeve ka diskutuar në mbledhjen e radhës orarin e numërimit të votave gjatë natës së ndërrimit të moteve, duke vendosur që më 31 dhjetor procesi të zhvillohet deri në ora 12:00 dhe më pas të ndërpritet, ndërsa të rifillojë më 1 janar nga ora 16:00.

    Çështja ka nxitur diskutime mes anëtarëve të KQZ-së lidhur me angazhimin e ekipeve gjatë festave të fundvitit dhe nevojën për vazhdimësi të procesit zgjedhor, në mënyrë që rezultatet të publikohen sa më shpejt dhe të ruhet integriteti i procesit.

    Anëtari i KQZ-së nga AAK-ja, Muharrem Nitaj, tha se vendimi është marrë në Këshillin për Operacione Zgjedhore, por hapi dilemë lidhur me punën më 1 janar.

    “Ne në mbledhjen e Këshillit të Operacioneve kemi vendosur që dita e punës në raport me procesin zgjedhor të vazhdojë edhe me datën 1 janar pas orës 16:00, ndërkaq me datën 31 dhjetor të vazhdojë deri në orën 12:00, nuk e di nëse është vendimi më i mirë i mundshëm, nëse ja vlen të angazhojmë ekipet e ndryshme me datën 1 janar në kohën kur 31 dhjetori është festë edhe eventualisht njerëzit mund të kenë telashe që të jenë plotësisht të angazhuar në ditën e nesërme. Po e hapi si dilemë nëse është mirë që me datën 1 janar të mos punohet, ndërkaq të vazhdojë numërimi me datën 2 janar prej orës 10:00”, ka thënë Nitaj.

    Ndërkaq, anëtari i KQZ-së nga Lëvizja Vetëvendosje, Alban Krasniqi, tha se procesi zgjedhor nuk duhet të ndalet për shkak të festave.

    “Duhet ta kuptojmë që jemi në proces zgjedhor dhe pjesë e përgjegjësive tona është që puna jonë të mos ndalet në mënyrë që ne një kohë sa më të shkurtër t’i bëjmë publike rezultatet e procesit zgjedhor edhe për kandidatët gjithashtu por pastaj edhe faza tjera të ankimimimit e deri te certifikimi i rezultatit të zgjedhjeve kërkon nga gjitha subjektet, nga gjithë akterët të përfshirë në proces zgjedhor që ta kryejnë punën e tyre me përkushtim. Ne nuk guxojmë që të ndalim aktivitetin tonë që të ju nënshtrohemi festave, sepse është një proces i cili nuk guxon me pas ndërprerje për shkak edhe të aspektit sensitiv por edhe integritetit të vet procesit”, shtoi ai.

    Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala, tha se për këtë orar tashmë janë njoftuar të gjitha komisionet komunale zgjedhore.

    “Çështja e orarit është diskutuar edhe në Këshillin për Operacione Zgjedhore dhe është në pajtim që orari me 31 dhjetor të jetë deri në orën 12 edhe me 1 janar 2026 të vazhdojë prej orës 16:00. Lidhur me këtë dakordim, këtë pajtim të Këshillit të Operacioneve Zgjedhore, Sekretariati i KQZ-së i ka njoftuar të gjitha komisionet komunale zgjedhore, i kemi njoftuar përmes email-it, i kemi njoftuar edhe përmes platformës ëhatssup me datat 31 dhjetor dhe 1 janar. Njoftimin vetëm e kanë pranuar”, ka njoftuar ai.

  • Roony Bardghji refuzon ofertat nga Premier League dhe vendos të qëndrojë te Barcelona

    Roony Bardghji refuzon ofertat nga Premier League dhe vendos të qëndrojë te Barcelona

    Barcelona ka siguruar vazhdimësinë e një prej talenteve më premtuese të saj, pasi Roony Bardghji ka vendosur të qëndrojë në klub dhe të luftojë për një vend në ekipin e parë, pavarësisht interesimit konkret nga disa klube të Ligës Premier.

    Në një periudhë intensive të merkatos, anësori ka qenë i vendosur në qëndrimin e tij, duke refuzuar ofertat që do ta largonin nga objektivi kryesor, të ketë sukses me fanellën e Barcelonës.

    Bardghji beson se ky është momenti i duhur për të bërë hapin e radhës në karrierë brenda klubit katalanas, duke konkurruar në nivelin më të lartë dhe duke u zhvilluar përmes punës dhe disiplinës së përditshme.

    Gjatë javëve të fundit, ai ka marrë oferta nga disa klube angleze, përfshirë Crystal Palace, Everton, Nottingham Forest dhe Sunderland, të cilat i garantonin më shumë minuta dhe një rol më të madh afatshkurtër. Megjithatë, lojtari ka zgjedhur të vazhdojë projektin e tij në “Camp Nou”.

    Nga ana e Barcelonës, vendimi është pritur shumë pozitivisht. Drejtoria sportive dhe stafi teknik e shohin këtë si një sinjal të rëndësishëm besimi ndaj projektit të klubit dhe strategjisë për zhvillimin e talenteve të rinj nga brenda.

    Në këtë fazë, një transferim nuk është pjesë e planeve të lojtarit dhe rrethit të tij, ndërsa klubi do të ndjekë nga afër progresin e Bardghjit, me performancën, përshtatjen taktike dhe profesionalizmin që do të jenë vendimtare për rolin e tij gjatë sezonit.

    Vendimi i tij dërgon një mesazh të qartë në treg, Barcelona mbetet një destinacion shumë tërheqës për talentet e rinj, edhe përballë ofertave të mëdha nga jashtë. Për momentin, e ardhmja e Bardghjit është e lidhur ngushtë me “Camp Nou”. /ATVLIVE.TV

  • Albion Rrahmani në radarët e West Ham, “Çekanët” kërkojnë sulmues të ri

    Albion Rrahmani në radarët e West Ham, “Çekanët” kërkojnë sulmues të ri

    Sulmuesi kosovar, Albion Rrahmani vazhdon të jetë në qendër të vëmendjes në merkato, teksa ekipi aglez West Ham United po kërkon përforcime në repartin ofensiv për afatin kalimtar të janarit.

    “Çekanët” nuk janë të kënaqur me rendimentin aktual në sulm dhe trajneri Nuno Espírito Santo po shqyrton alternativa të reja. Edhe pse Callum Wilson mbetet sulmuesi kryesor në skuadër, ai nuk ka qenë zgjedhje titullare në tri ndeshjet e fundit, çka ka shtuar spekulimet për afrime të reja.

    Situata e vështirë në Ligën Premier ka bërë që West Ham të synojë me prioritet një sulmues të ri, në përpjekje për të shmangur rënien nga elita e futbollit anglez.

    Sipas raportimeve të thewesthamway.com, klubi londinez po monitoron nga afër Albion Rrahmanin, me synimin për ta transferuar në “London Stadium” gjatë kësaj vere dimërore.

    Sulmuesi i Kombëtares së Kosovës po kalon një sezon pozitiv me Spartën e Pragës, ku ka shënuar 12 gola në 32 paraqitje në të gjitha garat. 25-vjeçari iu bashkua klubit çek verën e kaluar nga Rapid Bukureshti dhe tashmë ka tërhequr interesin e disa klubeve.

    Edhe pse West Ham e vlerëson lart Rrahmanin, ende nuk ka pasur një ofertë konkrete për shërbimet e tij. /ATVLIVE.TV

  • Prokuroria Speciale ngre aktakuzë ndaj Shpend Ahmetit

    Prokuroria Speciale ngre aktakuzë ndaj Shpend Ahmetit

    Prishtinë, 23 dhjetor 2025 – Prokuroria Speciale e Republikës së Kosovës ka ngritur aktakuzë ndaj ish-kryetarit të Komunës së Prishtinës, Shpend Ahmeti, për veprën penale “mosraportimi ose raportimi i rremë i pasurisë, të ardhurave, dhuratave, i dobisë tjetër materiale ose i detyrimeve financiare”.

    Sipas komunikatës zyrtare, i akuzuari, në periudhën 2018–2022, në cilësinë e kryetarit të Komunës së Prishtinës, dyshohet se me dashje ka paraqitur deklarata të pasakta të pasurisë, përkatësisht duke mos deklaruar depozitime në para të gatshme, të realizuara personalisht gjatë viteve përkatëse.

    Prokuroria bën të ditur se shuma e përgjithshme e mjeteve të padeklaruara arrin në 172,600 euro.

    Rasti është dërguar për shqyrtim në Gjykatën Themelore në Prishtinë – Departamenti Special. Prokuroria thekson se procesi do të zhvillohet sipas procedurave ligjore, ndërsa i pandehuri gëzon prezumimin e pafajësisë deri në një vendim të formës së prerë.

  • Shemi varroset të mërkurën

    Shemi varroset të mërkurën

    Shemsi Krasniqi – Shemi ka ndërruar jetë ditën e djeshme (e hënë) në moshën 64-vjeçare.

    Ai u gjet pa shenja jete në banesën e tij në Prishtinë, ku u tha se pësoi një sulm në zemër.

    I njëjti ka lënë një boshllëk të madh në komunitetin artistik, fansat por edhe te miqtë e tij të ngushtë.

    Artisti Gold AG ka njoftuar se varrimi i të ndjerit do të bëhet të mërkurën (24 dhjetor).

    “Kolegë e dashamirë, varrimi i Shemit bëhet nesër me 24 Dhjetor , në ora 14:00 me namazin e Ikindisë në varrezat e qytetit në Arbëri (Dragodan) Prishtinë”, ka shkruar ai.

    Krasniqi ishte një nga zërat më të dashur dhe më ikonikë të muzikës shqiptare, njeriu që i dha shpirt dhe jetë këngës që u bë simbol kombëtar, “Xhamadani vija vija”.

    Me zërin e tij karakteristik dhe interpretimin e thellë, ai arriti të lidhte gjenerata të tëra me traditën dhe kulturën shqiptare, duke lënë një gjurmë të paharrueshme në muzikë. /Telegrafi/

  • Ekipi i meçit Joshua–Paul paralajmëron padi: Akuza për ndeshje të kurdisur do të ndiqen ligjërisht

    Ekipi i meçit Joshua–Paul paralajmëron padi: Akuza për ndeshje të kurdisur do të ndiqen ligjërisht

    Ekipi promovues që qëndron pas meçit të shumëpërfolur mes Anthony Joshua dhe Jake Paul ka reaguar ashpër ndaj pretendimeve se ndeshja ishte e kurdisur, duke paralajmëruar veprime ligjore kundër çdo personi që vazhdon të përhapë akuza të tilla.

    Nakisa Bidarian, partner biznesi i Jake Paul dhe bashkëthemeluese e kompanisë Most Valuable Promotions, ka konfirmuar se janë angazhuar avokatë për të ndërhyrë ndaj pretendimeve që u shpërndanë gjerësisht në rrjetet sociale pas përfundimit të përballjes.

    Edhe pse akuzat për trukim kanë shoqëruar pothuajse çdo ndeshje të Jake Paul, me përjashtim të humbjes ndaj Tommy Fury, kjo është hera e parë që ekipi i tij njofton publikisht se do të ndërmarrë hapa konkretë ligjorë për t’i ndalur këto spekulime.

    Bidarian, gjatë një paraqitjeje në emisionin “The Ariel Helwani Show”, u shpreh qartë se pretendimet nuk do të tolerohen më. I pyetur nëse performanca e Paul, pavarësisht nokautit, mjaftonte për të heshtur teoritë konspirative, ai u përgjigj prerë:

    “Jo, jo tamam. Avokatët tanë po ndjekin në mënyrë aktive një numër njerëzish.”

    Jake Paul edhe më herët i ka hedhur poshtë këto akuza, duke theksuar se manipulimi i ngjarjeve sportive profesionale në Shtetet e Bashkuara konsiderohet krim federal dhe ndëshkohet rëndë nga ligji.

    Kujtojmë se në meçin e zhvilluar të premten në Miami, dy herë ish-kampioni i botës në peshat e rënda, Anthony Joshua, e nokautoi Jake Paul në raundin e gjashtë. Si pasojë e goditjeve, Paul pësoi thyerje të nofullës në dy vende dhe u desh të merrte trajtim mjekësor pas ndeshjes.