Blog

Prokuroria Themelore në Prizren ka ngritur aktakuzë ndaj zyrtarit doganor me inicialet I.K. për veprën penale “Keqpërdorim i pozitës apo autoritetit zyrtar”.

Ai dyshohet se më 16 korrik të këtij viti, në pikën kufitare në Vërmicë, duke shkelur procedurat, i ka shkaktuar buxhetit të shtetit dëm material mbi tre mijë euro.

Sipas aktakuzës, i pandehuri e regjistroi në sistem si të zbrazët një automjet komercial, duke shmangur qëllimisht kontrollin e detyrueshëm ligjor.

Pas verifikimit nga njësia antikontrabandë, u konstatua se mjeti transportonte mallra me vlerë mbi 11 mijë euro, duke iu shmangur kështu taksave doganore. Prokurori i çështjes i ka propozuar gjykatës që i pandehuri të shpallet fajtor dhe të dënohet konform ligjit në fuqi.

Gjykata Themelore në Prishtinë ka dënuar me 10 vjet burgim Sllagjan Trajkoviqin, i akuzuar për krime lufte kundër popullatës civile në Kosovë.

Trupi gjykues konstatoi se ish-pjesëtari i forcave serbe është fajtor për veprime të dhunshme të kryera gjatë periudhës 1998-1999 në rajonin e Vushtrrisë.

Sipas aktgjykimit, Trajkoviq mbart përgjegjësi penale për kontributin e tij në maltretimin, dëbimin dhe cenimin e integritetit të civilëve shqiptarë në fshatin Reznik dhe rrethinë.

Megjithatë, për disa pika të tjera të aktakuzës që përfshinin veprime të ngjashme inkriminuese, gjykata vendosi ta lirojë atë për shkak të mungesës së provave.

Qytetarët e Kosovës po përballen me kosto të lartë jetese dhe fatura të rënduara të energjisë elektrike për muajin dhjetor. Për këtë situatë, Kryetari i Organizatës “Konsumatori”, Selatin Kaçaniku, ka kritikuar ashpër ekzekutivin, duke deklaruar se qeveritarët po vazhdojnë t’i mbajnë duart në xhepat e qytetarëve.

Në një intervistë, Kaçaniku ka deklaruar se me energjinë elektrike “janë luajtur lojëra të shumta” dhe ka përmendur dy raste konkrete që, sipas tij, dëshmojnë mungesë profesionalizmi dhe vendimmarrje të padrejtë ndaj konsumatorit.

Sipas Kaçanikut, njëra çështje lidhet me vonesat në aktivizimin e interkoneksionit me Shqipërinë, për të cilin ai thotë se është arsyetuar me pengesa nga Serbia. Ai ka ngritur pyetjen pse çështjet e brendshme të Kosovës duhet të varen nga faktorë të jashtëm, nëse vendimet janë në interes të qytetarëve.

Rasti i dytë, sipas tij, ka të bëjë me rritjen e përkohshme prej 5.8% që u vendos pas një eksplodimi në KEK para rreth 10 vitesh. Kaçaniku thotë se kjo rritje u prezantua si masë e përkohshme, por po vazhdon edhe sot, megjithëse, siç u shpreh ai, masat e përkohshme nuk mund të zgjasin një dekadë.

Këshilli Gjyqësor i Kosovës ka emëruar sot gjyqtarin Ngadhnjim Arrni kryetar të Gjykatës Themelore në Prishtinë.

Në mbledhjen e 357-të, Arrni siguroi tetë vota PËR dhe një abstenim.

Deri më tani, ai ka udhëhequr Departamentin Special pranë këtij institucioni të rëndësishëm të drejtësisë.

Krahas këtij emërimi, Këshilli miratoi tri rregullore për funksionimin e sistemit gjyqësor, përfshirë atë për Sistemin Qendror të Evidencës Penale dhe për Pagesën e Shpenzimeve të Procedurës Penale.

Mbledhja u përmbyll me miratimin e Udhëzimit Administrativ për përmbajtjen e ueb-faqes së institucioneve gjyqësore, veprim ky që sipas zyrtarëve synon rritjen e transparencës publike.

Një stuhi e fortë dimërore do të sjellë borë dhe shi të ngrirë në pjesë të Midwest-it të sipërm sot, ndërsa sistemi do të lëvizë në verilindje të premten dhe do të dobësohet deri të shtunën në mëngjes, tha shërbimi meteorologjik.

Shi i ngrirë parashikohet për pjesët veriore të shteteve amerikane të Minesotës dhe Uiskonsinit, dhe gjatë së premtes reshjet do të prekin Michiganin dhe më pas Pensilvaninë perëndimore dhe qendrore, sipas ABC News.

Në New York City, reshjet e para të borës janë të mundshme të premten rreth mesditës sipas orës lokale, ndërsa reshjet kryesore të borës priten pas orës 16:00.

Bora mund të bjerë gjatë natës dhe të prekë veriun e shtetit të Nju Jorkut, Nju Xhersin, Pensilvaninë lindore, si dhe pjesë të Connecticut, Rhode Island dhe Massachusetts.

Në Pensilvaninë qendrore, akulli mund të arrijë më shumë se gjashtë milimetra, prandaj shoferëve u këshillohet të tregojnë kujdes shtesë, pasi ndërprerjet e energjisë elektrike janë të mundshme.

Shërbimi Kombëtar i Motit i SHBA-së paralajmëroi se një kombinim i shiut të ngrirë dhe breshërve do ta vështirësojë udhëtimin nga Michigani, nëpër pjesën më të madhe të Pensilvanisë dhe në rajonin e Atlantikut të Mesëm, duke përfshirë qytetet e Uashingtonit dhe Baltimorit.

Presidentja e Republikës së Kosovës, Vjosa Osmani, ka uruar presidentin e zgjedhur të Hondurasit, Tito Asfura, me rastin e fitores së tij në zgjedhje.

Përmes një postimi në platformën X, Osmani ka shprehur urimet më të përzemërta Asfurës, duke i dëshiruar suksese në marrjen e kësaj përgjegjësie të rëndësishme shtetërore.

Ajo theksoi se Kosova pret me interes bashkëpunimin me presidentin e zgjedhur dhe administratën e tij, me synim forcimin e marrëdhënieve dypalëshe dhe avancimin e bashkëpunimit në fusha me interes të ndërsjellë.