Blog

Komuna e Obiliqit ka njoftuar qytetarët për situatën e vështirë në rrugën që lidh fshatin Graboc i Epërm me Drenasin, për shkak të daljes nga shtrati të lumit Drenica në segmentin rrugor Guri i Plakës.

“Rruga është e pakalueshme dhe qarkullimi është i rrezikuar”, thuhet në njoftimin e komunës, ku qytetarët ftohen të përdorin rrugë alternative deri në përmirësimin e gjendjes.

Institucionet përkatëse janë në terren dhe po e monitorojnë situatën, duke ndërmarrë të gjitha masat për të mbajtur nën kontroll rrezikun për qytetarët.

“Luten qytetarët të shfrytëzojnë rrugë alternative deri në përmirësimin e gjendjes”, theksohet në njoftim.

Komuna falënderon qytetarët për mirëkuptimin dhe bashkëpunimin në këtë situatë.

Në faqen zyrtare të Komisionit Qendror të Zgjedhjeve, nga përditësimin i fundit i bërë për zgjedhjet e 28 dhjetorit, del se Partia Demokratike e Kosovës ka siguruar 23 ulëse në Kuvendin e Kosovës.

Nga legjislatura e kaluar, Abelard Tahiri është një nga kandidatët që nuk arriti të siguronte votat e mjaftueshme për deputet. Një emër tjetër është edhe ai i Eliza Hoxhës, e cila ka marrë 14,178 vota.

Me vetëm 18 mijë e 602 vota, as kandidati Rashit Qalaj nuk do të jetë deputet në legjislaturën e re.

Në këtë legjislaturë të dhjetë, kësaj partie i janë shtuar deputetë të rinj, Arian Tahiri, Arben Mustafa, Eman Rrahmani, Xhavit Haliti e Besa Kabashi-Ramaj.

Votat me kusht ishin ato që bënë ndryshimin te kjo parti. Deputeti tashmë, Bekim Haxhiu ishte i fundit në listën e kësaj partie që arriti të siguronte ulëse në Kuvend.

Partia Demokratike e Kosovës nga zgjedhjet e 28 dhjetorit ka dalë të jetë e dyta, aktualisht me 20.43% apo 189,632 vota.

Një pjesë e rrugës në Veterrnik të Prishtinës është shembur, fillimisht duke u menduar se shkaku ishte reshjet e dendura që kanë kapluar Kosovën.

Telegrafi ka kontaktuar me Drejtorin për Siguri dhe Emergjenca në Komunën e Prishtinës, Lulzim Fushtica, i cili ka dhënë detaje mbi situatën.

“Shembja e dheut nuk ka ndodhur në rrugën kryesore, por në një rrugë dytësore. Na duhet të hapet edhe rast penal për shkak të rrezikimit të sigurisë publike”, tha Fushtica për Telegrafin.

Ai shtoi se shkaku është një operator privat që po kryen punime në atë zonë dhe nuk ka respektuar rregulloren.

“Inspektorët ia kanë ndërprerë realisht punën. Dje e kemi ndërprerë, e kemi mbyllë atë vendpunishte, i kemi vendosur shiritat”, tha ai.

“Inspektorët e ndërtimit do të marrin masa konform ligjit, domethënë do të pasojë dënimi për palën, në këtë rast për ndërtuesin”, shtoi Fushtica.

Drejtori për Siguri dhe Emergjenca paralajmëroi se, nëse vërtetohet se kompania nuk ka përmbushur kriteret, mund t’i revokohet edhe leja.

“Tutje, do të vazhdojmë edhe me procedura tjera. Nëse vërtetohet që nuk i ka përmbushur kushtet e ndërtimit, atëherë mund edhe t’i revokohet leja”, deklaroi ai.

Fushtica theksoi gjithashtu: “Është duke u ndërtuar një objekt banesor dhe aty ka pasur rrëshqitje të dheut, në gropën punuese”.

Pas reshjeve të dendura të shiut, kryetari i Komunës së Mitrovicës, Faton Peci, ka qenë në terren për të vlerësuar gjendjen aktuale së bashku me zyrtarë nga Drejtoria për Menaxhimin e Emergjencave.

“Ne si komunë do të jemi pranë qytetarëve dhe me gjithë mekanizmin në dispozicion. Pas vlerësimit të situatës nga terreni, po marrim të gjitha masat e nevojshme për intervenim”, tha Peci në një postim në Facebook.

Ai theksoi se në të ardhmen, çdo projekt i investuar nga Komuna do të planifikohet në mënyrë adekuate për të minimizuar në maksimum rreziqet e tilla potenciale.

“Qytetarët të jenë të qetë, gjendja është nën kontroll dhe drejt përmirësimit”, shtoi kryetari i Mitrovicës.

Komuna e Mitrovicës paralajmëron se do të vazhdojë të monitorojë situatën dhe të ndërhyjë në kohë reale për të garantuar sigurinë e qytetarëve dhe të pronave.

Presidenti i Venezuelës, Nicolás Maduro, është transferuar në Metropolitan Detention Center në Brooklyn, Nju Jork, një qendër paraburgimi federale që është përshkruar nga ish- të burgosurit, avokatët dhe vetë gjykatës si një vend me kushte shumë të vështira, dhunë të përhapur dhe mungesë stafi.

Maduro dhe bashkëshortja e tij Cilia Flores po mbahen aty ndërsa përgatiten të dalin para gjykatës për akuza të rënda që lidhen me konspiracion për narkotrafik dhe terrorizëm me narkotikë

Kujtojmë se ata u kapën në Venezuelë gjatë një operacioni të forcat e SHBA-së dhe u transferuan në Nju Jork për t’u përballur me drejtësinë amerikane.

Burgu federal në Brooklyn ka një reputacion të keq për shkak të kushteve të vështira. Aty janë strehuar edhe figura të tjera të profilit të lartë si Sean “Diddy”.

Maduro ka mohuar akuzat dhe është paraqitur në gjykatë në Nju Jork duke u deklaruar i pafajshëm, ndërsa rasti pritet të zhvillohet në ditët në vijim.

Kryetari i Drenasit, Ramiz Lladrovci thotë se ajo komunë po përjeton vërshime për t’u mbajtur mend.

Përmes një shkrimi në Facebook, Lladrovci thekson se nga mëngjesi, niveli i ujit është rritur vazhdimisht, me ç’rast, ka vërshuar dhjetëra shtëpi, biznese dhe hapësira publike.

“Rrugët janë ndërprerë për qarkullim në drejtim të Komoranit, te Trafoja dhe te ura e Bucollëve, vështirësi po paraqiten edhe te ura e Shtrubullovës. Dalja në magjistrale po bëhet me rrugë alternative”.

Ai deklaron se qindra hektarë tokë janë të vërshuara, derisa rryma është ndërprerë për shkak se po rrezikohet trafoja kryesore e komunës.

“Priten vështirësi edhe për furnizimin me ujë. Falënderoj Presidentën, Osmani-Sadriu për gatishmërinë e përkrahjes, ministrat në detyrë të linjës, z. Elbert Krasniqi dhe z. Hysen Durmishi, AME-në, qytetarët për solidaritetin për ndihmën me mjete personale, zyrtarët e komunës dhe institucionet tjera që janë të angazhuara për tejkalimin e gjendjes. Falënderoj të gjithë ata që më telefonuan dhe me mesazhe po shfaqin brengosje për qytetarët dhe pronën e vërshuar në komunën e Drenasit. Mbesim të angazhuar me të gjitha mundësitë për të qenë në nivel të detyrës. Ftoj qytetarët për kujdes të shtuar dhe të respektojnë ndalesat e organeve kompetente për qarkullim në disa rrugë”, shkruan ai.

Duda Balje ka arritur të sigurojë ulëse në Kuvendin e Kosovës.

Kjo u konfirmua nga rezultatet e fundit të përditësuara nga Komisioni Qendror i Zgjedhjeve.

Sipas KQZ-së, Balje është zgjedhur deputete për këtë legjislaturë në Parlament.

Procesi i numërimit të votave po shkon drejt fundit.

Teksa ka përfunduar numërimi i votave nga përfaqësitë diplomatike dhe ato me postë, numërimi i votave me kusht është drejt përmbylljes ku deri tani janë procesuar rezultatet e numërimit të mbi 73% të këtyre votave në platformën e KQZ-së.

Komisioni Qendror i Zgjedhjeve ka filluar publikimin e listës së kandidatëve për deputetë të cilët kanë arritur të fitojnë ulëse në legjislaturën e 10-të të Kuvendit të Kosovës.

Nga Aleanca për Ardhmërinë e Kosovës e cila ka fituar 6 mandate sipas KQZ-së, ulëse kanë arritur të fitojnë: Ramush Haradinaj, Daut Haradinaj, Besnik Tahiri, Bekë Berisha, Time Kadrijaj dhe Albana Bytyqi.

Kujtojmë që procesit të numërimit do t’i nënshtrohen edhe votat e personave me nevoja të veçanta.