Blog

Presidenti i SHBA-së, Donald Trump, ka diskutuar “një gamë opsionesh” për të përvetësuar Grenlandën, përfshirë përdorimin e ushtrisë, tha Shtëpia e Bardhë.

Shtëpia e Bardhë i tha BBC-së se përvetësimi i Grenlandës – një rajon gjysmë-autonom i një vendi aleat të NATO-s, Danimarkës – ishte një “prioritet i sigurisë kombëtare”.

Deklarata erdhi disa orë pasi liderët evropianë nxorën një deklaratë të përbashkët duke mbështetur Danimarkën, e cila ka kundërshtuar ambiciet e Trumpit për ishullin Arktik.

Trump përsëriti gjatë fundjavës se SHBA “kishte nevojë” për Grenlandën për arsye sigurie, duke nxitur kryeministren daneze Mette Frederiksen të paralajmërojë se çdo sulm nga SHBA do të shënonte fundin e NATO-s.

Shtëpia e Bardhë tha të martën: “Presidenti dhe ekipi i tij po diskutojnë një gamë opsionesh për të ndjekur këtë objektiv të rëndësishëm të politikës së jashtme, dhe sigurisht, përdorimi i ushtrisë amerikane është gjithmonë një opsion në dispozicion të Komandantit të Përgjithshëm.”

NATO është një aleancë ushtarake transatlantike ku aleatët pritet të ndihmojnë njëri-tjetrin në rast sulmesh të jashtme.

Të martën, gjashtë aleatë evropianë shprehën mbështetje për Danimarkën.

“Grenlanda i përket popullit të saj, dhe vetëm Danimarka dhe Grenlanda mund të vendosin për çështje që lidhen me marrëdhëniet e tyre,” thanë në një deklaratë të përbashkët liderët e Mbretërisë së Bashkuar, Francës, Gjermanisë, Italisë, Polonisë, Spanjës dhe Danimarkës.

Duke theksuar se janë po aq të interesuar sa SHBA për sigurinë në Arktik, nënshkruesit evropianë të deklaratës së përbashkët thanë se kjo duhet të arrihet nga aleatët e NATO-s, përfshirë SHBA-në, “kolektivisht”.

Ata gjithashtu bënë thirrje për “respektimin e parimeve të Kartës së OKB-së, përfshirë sovranitetin, integritetin territorial dhe paprekshmërinë e kufijve”.

Sot në Kosovë pritet të mbajë mot plotësisht i vranët dhe me reshje të shpeshta shiu. Në mëngjes dhe paradite ende do të jemi nën ndikimin e masave të ngrohta ajrore, por cikloni nga Italia do të zhvendoset në lindje të Evropës dhe si pasojë do ti hapet rrugë masave të ftohta polare që të vinë në viset tona.

Gjatë ditës ose pasdite priten reshje lokale shiu, vende-vende intensive me mundësi edhe për rrebeshe të fuqishme lokale shiu me vetëtima dhe bubullimë. Pasdite vonë do të fillojnë të fryjnë erëra nga veriu së pari në veri dhe verilindje të vendit (në mesditë) me ulje të ndjeshme të temperaturave. Shiu mund të ngrihet në tokë fillimisht, pastaj do të shndërrohet në reshje bore me depërtimin e frontit të ftohtë polar. Më vonë reshje bore pritet të përfshijnë të gjithë vendit dhe do të krijohen edhe shtresa të shpejta në shumë rajone.

Temperatura maksimale deri në 12 gradë Celsius, pastaj në mbrëmje ulje e tyre në të gjithë vendin me erëra të ftohta veriore.

Në Shqipëri po ashtu nesër pritet të mbajë mot i vranët dhe me reshje shiu e rrebeshe intensive. Fillimisht gjatë dites priten reshje të lokalizuara, kurse në mbrëmje në tërë vendin reshje të dendura dhe rrebeshe lokalisht intensive shiu me vetëtima dhe bubullimë. Vonë në mbrëmje në veri, lindje dhe juglindje të vendit do të fillojnë reshje bore, filimisht në viset kodrinore-malore, pastaj edhe në viset e ulëta.

Reshje të fuqishme të mërkurën priten edhe në Mal të Zi, në jug shi e në veri borë.

Rrebeshe shiu pasdite do të përfshijnë edhe pjesën më të madhe të Maqedonisë së Veriut e gjatë natës dhe mëngjesin e së Enjtes vende-vende edhe reshje bore.

Të enjten na pret ditë e vërtetë dimërore në Kosovë herë pas here me reshje bore dhe temperatura polare. Priten shtresa bore por jo sikurse në vendet e rajonit në Ballkanin verior.

Reshjet vazhdojnë edhe të Enjten edhe në Shqipëri. Në perëndim shi, kurse në lindje borë. Në shumë pjesë të vendit në veri, lindje, dhe juglindje do të krijohen shtresa madje edhe në ultësira, vende-vende edhe në pjesët qendrore në Shqipëri.

Në mbrëmje vonë kthjellim i motit në gati tërë rajonin dhe mëngjesi i së Premtes do të jetë me acar.

Të premten shtim gradual i vranësirave dhe pasdite vonë dhe në mbrëmje reshje të reja lokale do të përfshijnë vendet tona diku shi e diku borë.

Fundjava vjen me ciklon dhe front të ri dhe reshje të reja të përziera, pastaj edhe reshje bore./MeteoBallkan

Policia e Shtetit ka nisur një operacion kërkimi për gjetjen e një 14-vjeçari nga Hasi, i cili është larguar nga shtëpia me automjetin e babait të tij pa leje. Ngjarja është denoncuar zyrtarisht më datë 5 janar 2026 nga familjarët e të miturit.

Sipas kallëzimit të bërë në Komisariatin e Policisë Has, i mituri i identifikuar me emrin Mariglen, ka marrë mjetin në pronësi të babait të tij, shtetasit Dirtan Dauti, dhe është drejtuar drejt kufirit me Kosovën.

Gjurmët e para të 14-vjeçarit janë konstatuar në territorin e Kosovës. Raportohet se i mituri ka ndaluar në një pikë karburanti (“Petrol”) në dalje të qytetit të Pejës, në drejtim të Prishtinës, ku ka furnizuar mjetin me benzinë në vlerën e 79 eurove.

Babai i të miturit u ka bërë apel publik dhe zyrtar strukturave të Policisë në Shqipëri dhe Kosovë për të mundësuar ndalimin dhe kthimin e sigurt të djalit në shtëpi.

Si rezultat, shërbimet e Policisë kanë bërë shpalljen në kërkim të 14-vjeçarit dhe po vijojnë kontrollet për gjetjen e tij.

Materialet proceduriale janë dërguar pranë Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.

Situata me vërshimet dhe përmbytjet në Kosovë po rëndohet, ndërsa disa komuna kanë shpallur gjendje të jashtëzakonshme.

Komuna e Junikut ka njoftuar se ka formuar shtabin emergjent dhe ka vendosur masa të veçanta për qytetarët. Në një njoftim zyrtar thuhet se fillimi i gjysmëvjetorit të dytë të vitit shkollor 2025/2026 shtyhet deri më 12 janar 2026.

“I lusim qytetarët për kujdes të shtuar dhe të ndjekin njoftimet zyrtare. Ditët e humbura të mësimit do të kompensohen”, thuhet në njoftim.

Pak më parë, edhe Komuna e Malishevës shpalli gjendje të jashtëzakonshme për shkak të reshjeve të dendura të shiut dhe përmbytjeve që kanë shkaktuar dëme të konsiderueshme në disa zona të territorit të saj.

“Që nga orët e mesnatës, Komuna jonë po përballet me një situatë të rënduar si pasojë e reshjeve të dendura të shiut dhe përmbytjeve që kanë shkaktuar dëme të konsiderueshme në disa zona të territorit tonë. Si Kryetar i komunës, që nga momentet e para jam në terren bashkë me ekipet emergjente të shpëtimit, strukturat komunale, zjarrfikësit dhe Policinë e Kosovës, duke monitoruar nga afër situatën dhe duke koordinuar veprimet për mbrojtjen e jetës së qytetarëve dhe minimizimin e dëmeve”, ka deklaruar kryetari i Malishevës, Ekrem Kastrati.

Brendi “Nestle”, ka tërhequr nga tregu disa nga produktet e qumështit formulë për bebe, për shkak të shqetësimeve se përmbajnë toksina që mund të shkaktojnë helmim.

Gjigandi i ushqimit e pijeve ka bërë të ditur se specifikisht bëhet fjale për produktet SMA të qumështit formulë për bebe, që nuk janë të sigurta për t’i ushqyer bebet, ka raportuar BBC.

Sipas “Nestle”, këto produkte janë shitur nëpër gjithë botën dhe potencialisht përmbajnë cereulide, toksinë që prodhohet nga një baktere helmuese e ushqimit, e cila mund të shkaktojë simptoma të tilla si, të vjellat dhe dhimbje stomaku.

Kompania ka deklaruar se nuk ka pasur asnjë raportim të problemeve ne lidhje me produktet, por i ka tërhequr nga tregu si masë parandalimi.

“Siguria dhe mirëqenia e bebeve është prioritet absolut i yni. Sinqerisht kërkojmë falje për çdo shqetësim e pakënaqësi që u shkaktuar prindërve, kujdestarëve dhe klientëve”, thuhet në deklaratën e “Nestle”.

Kompania ka konfirmuar për BBC-në se tërheqja e produkteve si masë parandaluese është bërë në mbarë botën. Produktet e prekura janë shitur në disa shtete evropiane, si Franca, Gjermania, Austria, Danimarka, Italia dhe Suedia.

“Nestle” ka premtuar rimbursim të mjeteve për klientët e prekur nga kjo çështje dhe ka deklaruar gjithashtu se problemi është shkaktuar nga një përbërës që sigurohet nga furnitorët.

Përfaqësuesit e selisë së “Nestles” në Francë, kanë deklaruar gjithashtu se kanë ndërmarrë hapat e nevojshëm për tërheqjen e produkteve të caktuara  nga tregu si masë parandalimi, përfshirë formulat “Guigoz” dhe “Nidal”.

Në Gjermani, këto formula quhen “Beba” dhe “Alfamino”.