ATV

Blog

  • Rashiq: Jam i gatshëm të jem nënkryetar i Kuvendit

    Rashiq: Jam i gatshëm të jem nënkryetar i Kuvendit

    Kryetari i Partisë për Liri, Drejtësi dhe Mbijetesë, Nenad Rashiq, në një përgjigje për RTV21 ka shfaqur gatishmëri të heqë dorë nga posti i ministrit për Komunitete dhe Kthim për t’u zgjedhur nënkryetar i Kuvendit, nëse këtë ia lejon Gjykata Kushtetuese.

    Ndërkohë, Lëvizja Vetëvendosje, e cila ka siguruar 57 ulëse në Kuvend, kishte deklaruar se nuk do ta votojë asnjë kandidat nga Lista Serbe për nënkryetar të Kuvendit, duke favorizuar rizgjedhjen e deputetit serb Nenad Rashiq në këtë post.

    “Gjykata Kushtetuese është afër fundit të një vendimi sa i përket ankesës që e ka paraqitur Lista Serbe. Unë po e pres atë vendim që të sqarohet saktë nëse Lista Serbe ka të drejtë ekskluzive që në mënyrë monopoliste të ketë kandidatin e saj, apo nëse mund të ketë edhe një kandidat tjetër, si në rastin tim. Nëse Gjykata Kushtetuese i jep të drejtë ekskluzive që vetëm Lista Serbe të propozojë, atëherë të gjithë ne do ta respektojmë këtë. Nëse mbetet ashtu siç është, unë jam i gatshëm të jem nënkryetar i Kuvendit, sepse Lista Serbe nuk ka pasur përfaqësim adekuat të serbëve.”, tha Rashiq.

  • Policia e Shtetit shpall në kërkim 42-vjeçarin nga Kosova, i sekuestron një BMW me vlerë 140 mijë euro

    Policia e Shtetit shpall në kërkim 42-vjeçarin nga Kosova, i sekuestron një BMW me vlerë 140 mijë euro

    Policia e Tiranës ka shpallur në kërkim një shtetas nga Kosova, pasi dyshohet se ka trafikuar një automjet me vlerë 140 mijë euro në Shqipëri.

    Sipas raportimeve nga policia, është proceduar penalisht blerësi i automjetit të trafikuar, njëkohësisht drejtues i tij, në momentin e ndalimit në Vorë. Në cilësinë e provës materiale është sekuestruar një automjet tip “BMW M-8”, me vlerë rreth 140 mijë euro, i dyshuar i vjedhur në Gjermani.

    Në njoftimin e saj, Policia ka bërë me dije: “Vijon operacioni policor i koduar ‘Stolen line’, kundër trafikimit në Shqipëri, të automjeteve luksoze të vjedhura jashtë shtetit. Shkon 5 numri i automjeteve të sekuestruara që nga nisja e operacionit. Sekuestrohet 1 automjet tip ‘BMW M-8’, me vlerë rreth 140 000 euro, i dyshuar i vjedhur në Gjermani. Procedohet penalisht blerësi i automjetit të trafikuar, njëkohësisht drejtues i tij, në momentin e ndalimit në Vorë. Identifikohet dhe shpallet shtetasi kosovar që dyshohet se ka trafikuar këtë automjet në Shqipëri.”

    Materiali shton se specialistët e Seksionit për Hetimin e Trafiqeve të Paligjshme, në kuadër të operacionit “Stolen line”, gjatë punës hetimore kanë konstatuar një rast tjetër të trafikut të automjeteve luksoze të vjedhura jashtë shtetit.

    Në vijim të veprimeve procedurale është sekuestruar një tjetër automjet tip “BMW M-8”, me vlerë rreth 140 mijë euro, i cili nga verifikimet rezultoi i vjedhur në Gjermani.

    Në lidhje me këtë rast, Policia ka identifikuar dhe shpallur në kërkim shtetasin që dyshohet se ka sjellë automjetin në Shqipëri me qëllim shitjen, F. H., 42 vjeç (shtetas kosovar). Ndërkohë, u procedua penalisht blerësi i automjetit, shtetasi E. D., 39 vjeç, i cili ishte drejtues i automjetit në momentin e ndalimit.

    Policia bën të ditur se vijon puna për kapjen e 42-vjeçarit. Materialet procedurale janë referuar Prokurorisë së Tiranës për veprime të mëtejshme lidhur me veprën penale “Trafikimi i mjeteve motorike”.

  • Mohamed Salah hero për Egjiptin, shkruan histori në Kupën e Kombeve të Afrikës

    Mohamed Salah hero për Egjiptin, shkruan histori në Kupën e Kombeve të Afrikës

    Mohamed Salah vazhdon të jetë vendimtar për Kombëtaren e Egjiptit dhe të shkruajë histori në futbollin afrikan. Më 5 janar 2026, ylli i Liverpoolit realizoi një gol vendimtar në vazhdime, duke i dhënë “Faraonëve” një fitore dramatike ndaj Beninit në fazën e 1/8-tës së finales së Kupës së Kombeve të Afrikës 2025.

    Ndeshja ishte tejet e luftuar dhe e mbushur me emocione, ndërsa gjithçka u vendos vetëm në minutat shtesë, kur Salah tregoi edhe një herë instinktin e tij prej lideri, duke shënuar golin që siguroi kualifikimin e Egjiptit në çerekfinale të turneut.

    Përveç rëndësisë së madhe për ekipin kombëtar, ky gol shënoi edhe një moment historik për vetë Salahun. Me këtë realizim, ai arriti kuotën e 66 golave me fanellën e Egjiptit, duke kaluar legjendën e futbollit afrikan, Didier Drogba, i cili mbetet i pesti në listën e golashënuesve më të mirë të të gjitha kohërave në kontinent me 65 gola.

    Salah tani ndodhet vetëm tre gola larg rekordit kombëtar, që mbahet nga Hossam Hassan, ish-sulmuesi legjendar dhe trajneri aktual i Kombëtares së Egjiptit. Me formën e tij aktuale dhe me Egjiptin ende në garë për trofeun kontinental, kapiteni i “Faraonëve” ka një mundësi reale për t’iu afruar edhe më shumë këtij rekordi historik.

    Në këtë edicion të Kupës së Afrikës, Salah ka realizuar tashmë tre gola, duke qenë një nga lojtarët më të spikatur të turneut. Nëse vazhdon me këtë ritëm, ai mund të ngjitet edhe më lart në renditjen e golashënuesve më të mirë afrikanë të të gjitha kohërave.

  • Thibaut Courtois është shpallur Lojtari i Muajit te Real Madridi për muajin dhjetor

    Thibaut Courtois është shpallur Lojtari i Muajit te Real Madridi për muajin dhjetor

    Portieri belg ka marrë këtë vlerësim pas një muaji të jashtëzakonshëm me fanellën e “Los Blancos”, ku u shqua për paraqitje të nivelit të lartë, pritje vendimtare dhe qetësi maksimale në momentet më të vështira të ndeshjeve. Courtois ishte një nga figurat kyçe të skuadrës gjatë dhjetorit, duke kontribuar drejtpërdrejt në rezultatet pozitive të Real Madridit në të gjitha garat.

    Me refleksin e tij të jashtëzakonshëm, pozicionimin perfekt dhe përvojën e madhe, ai arriti të mbajë portën të paprekur në disa takime dhe të shpëtojë skuadrën në raste kritike, duke konfirmuar edhe një herë pse konsiderohet si një nga portierët më të mirë në botë. Performancat e tij i dhanë siguri repartit defensiv dhe ndikuan pozitivisht në lojën e gjithë ekipit.

    Ky çmim vjen si një shpërblim i merituar për punën, përkushtimin dhe profesionalizmin e Courtois, i cili pas rikthimit në formë të plotë po dëshmon sërish rëndësinë e tij në projektin e Xabi Alonsos. Mbështetja e tifozëve dhe vlerësimi nga klubi tregojnë besimin e madh që Real Madridi ka te portieri belg.

    Thibaut Courtois vazhdon të jetë një shtyllë e padiskutueshme e Real Madridit dhe një lider i vërtetë në fushë, duke synuar të ndihmojë ekipin drejt sukseseve të reja në vazhdim të sezonit.

  • CNN raporton për vërshimet në Kosovë, publikon pamje nga situata në Drenas

    CNN raporton për vërshimet në Kosovë, publikon pamje nga situata në Drenas

    Reshjet e mëdha të shiut kanë shkaktuar vërshime në shumë qytete të Kosovës.

    Ndër më të prekurat ka qenë komuna e Drenasit.

    Për këto reshje e vërshime ka raportuar edhe CNN.

    Në raportimin e së cilës, është ndarë një video ku shihen pamjet nga vërshimet në këtë qytet.

  • Fan Noli, nxënës i veçantë e i përjetshëm me pesë diploma

    Fan Noli, nxënës i veçantë e i përjetshëm me pesë diploma

    Fan Noli është nga ato figura jo të zakonshme, që ngaherë të befason jo vetëm me veprën e gjithanshme, por edhe me jetën e tij. Mbi të gjitha, ai ishte njeri me germa të mëdha dhe si i tillë, shpërfaqet në tërë dimensionet njerëzore.

    Kështu, në historinë e kulturës sonë kombëtare, Fan Noli u takon atyre rasteve tepër të rralla, veçanërisht të kohës së tij, që në të katër stinët e jetës mbeti deri në fund nxënës. Nxënës në fëmini e në djalëri, në rini, në moshën e pjekurisë dhe në vitet e pleqërisë.

    Një nxënës krejt i veçantë, me një profil të dallueshëm nga të tjerët, me një mençuri natyrale dhe me një etje të pashuar për dituri, gjithë vullnet dhe ambicie, ngaherë i palodhur dhe i pakënaqur, në kërkim të më së mirës, i prirur drejt së vërtetës dhe së drejtës. Këto tipare të staturës, Theofan Mavromati djalosh, do të nisë t’i manifestojë fillimisht në gjimnazin grek të Adrianopojës, ku emri i tij ka mbetur në analet e shkollës dhe kujtimet e bashkëkohësve, si një nga nxënësit e shkëlqyer.

    Më pas, për mbi dhjetë vjet, ai do të kryente shkollën e jetës pa u shkëputur nga prirjet e brendshme, nga librat, arti, gjuhët, dijet, deri sa një ditë, kur ishte emigrant në SHBA, do të trokiste në dyert e Universitetit. Kështu, në moshën 30-vjeçare, pasi ishte dorëzuar prift, mbaron studimet në Harvard dhe merr diplomën “Bachelor of Arts”. Jeta e tij vijon më tej në shërbim të kauzës shqiptare dhe kulturës kombëtare, i ngarkuar me detyra historike sa në mërgim dhe në Shqipëri, duke bërë emër të nderuar si gazetar, historian, poet e veçanërisht si shqipërues. Bota shqiptare, ndërkaq, do ta njihte si kalorës të lirisë e të demokracisë, por prapë ai e ndjente veten nxënës. Në moshën 55-vjeçare mbaroi studimet në Konservatorin e Nju Englandit të Bostonit, duke u diplomuar për kompozicion me një varg veprash simfonike që i mungonin muzikës shqiptare. Dhe sikur të mos mjaftonte kjo, një vit më pas, 1938, merr dhe një diplomë tjetër për Muzikologji në Konservatorin e Bostonit me veprën monografike “Bethoveni dhe Revolucioni Francez”.

    Në vitet e Luftës së Dytë Botërore, ndonëse i qe kthyer politikës aktive, sepse ishte vënë në rrezik fati i Shqipërisë, Fan Noli kish mbetur përsëri nxënës, duke mos u ndarë nga studimet. Kësaj here ai u kish hyrë studimeve të shkallës më të lartë, për të marrë një gradë shkencore. Ekziston një dokumentacion i tërë, që i paraprin mbrojtjes së doktoraturës. Ai jep një varg provimesh pasuniversitare nga fusha të ndryshme të historisë, të arteve, të psikologjisë e deri të fizikës, provime me shkrim që ruhen akoma në arkivin e tij. Krahas kësaj pune të madhe nxënëse angazhuar për vite të tëra, është përgatitja e disertacionit, vepra shkencore që do të paraqiste. E pra, ky burrë gjashtëdhjetëvjeçar do të përjetonte si emocionet e nxënësit-student, ashtu edhe logjikën racionale të studiuesit. Më në fund, pas afro shtatë vjet përpjekjesh të mundimshme intelektuale dhe fizike, në vitin 1945, në moshën 63-vjeçare, Fan Noli do të mbronte me sukses në Universitetin e Bostonit studimin e tij monografik me temën “Gjergj Kastrioti – Skënderbeu”. Komisioni shkencor, përbërë nga personalitete të fushës, do ta vlerësonte duke i dhënë gradën shkencore të doktorit në Filozofi. Prej kësaj kohe, ai do të prezantohej në botën shkencore-kulturore Ph.D. Fan S. Noli.

  • Kryeministrja italiane refuzon të dërgojë trupa italiane në Ukrainë si pjesë e garancive të sigurisë

    Kryeministrja italiane refuzon të dërgojë trupa italiane në Ukrainë si pjesë e garancive të sigurisë

    Kryeministrja italiane Giorgia Meloni u ka thënë partnerëve evropianë dhe amerikanë, se Italia nuk do të vendosë trupa në Ukrainë si pjesë e garancive të ardhshme të sigurisë.

    Meloni mori pjesë në takimin e Parisit të përqendruar në nismat negociuese për të finalizuar garancitë e sigurisë për Ukrainën.

    Qeveria italiane tha se këto garanci janë “të frymëzuara nga Neni 5 i Aleancës Atlantike, siç është sugjeruar prej kohësh nga Italia”.

    Ato pritet të jenë pjesë e një pakete më të gjerë marrëveshjesh që do të miratohen në koordinim të ngushtë me SHBA-në, “përfshirë përmes një mekanizmi efektiv dhe të strukturuar mirë për të monitoruar armëpushimin e shpresuar dhe një forcim të forcave ushtarake ukrainase”.

    “Duke konfirmuar mbështetjen e Italisë për sigurinë e Ukrainës, në përputhje me atë që është bërë vazhdimisht, kryeministrja Meloni përsëriti një numër pikash të fiksuara të qëndrimit të qeverisë italiane mbi çështjen e garancive, në veçanti përjashtimin e trupave italiane që do të vendosen në terren”.

    Deklarata gjithashtu vuri në dukje se pjesëmarrja e vendeve të koalicionit në forcat shumëkombëshe do të jetë vullnetare, dhe se çdo vendim për mbështetjen e Ukrainës në rast të një sulmi të ri, duhet të merret në përputhje me procedurat kushtetuese kombëtare.

  • Dobitë shëndetësore nga ftoi

    Dobitë shëndetësore nga ftoi

    Përveç shijes së mirë, përdorimin për ëmbëlsira, përdorim gjen edhe në përbërje të pijeve alkoolike.

    Ftoi ka gjithashtu edhe disa dobi shëruese për organizmin tonë, transmeton Klan Kosova.

    Këto janë disa nga dobitë e ftoit:

    Shurup për bronkit

    Shtypni 5 gramë fara të ftoit dhe i përzieni me 100 ml ujë, kur të jetë krijuar një masë e trashë, shtoni 15 gram lëng nga luledielli dhe 100 gram mjaltë të sherbelës. Hani nga një lugë para shujtave dhe do ndihmojë në shërimin e bronkit.

    Kundër të thatit në organizëm për tretje

    Nga një lugë fara të lirit dhe të ftoit i përzien me një gotë çaj të ftohtë kamomili, përzieni mirë dhe pijeni pa e ëmbëltuar, hani nga një lugë para shujtave.

    Kundër inflamacionit të zorrës së trashë

    Përzieni nga 20 gram fara të lirit dhe të ftoit dhe fruta të boronicës dhe përzieni me ujë të ftohtë, e lini për 3 orë, pastaj e ngrohni dhe e konsumoni 3-4 herë në ditë, gjysmë orë para shujtave kryesore.

  • Këto janë bimët aromatike që luftojnë fryrjen e barkut

    Këto janë bimët aromatike që luftojnë fryrjen e barkut

    Ndjesia e pakëndshme e fryrjes së barkut shkakton parehati dhe njëkohësisht pothuajse dyfishon perimetrin e belit, duke e bërë barkun të duket më i madh dhe duke na detyruar shpesh në ndryshime të padëshiruara në garderobë.

    Fryrja është një nga shqetësimet më të shpeshta me të cilat shfaqet sindroma e zorrës së irrituar, çrregullimi më i zakonshëm tretës që prek të rriturit në botën perëndimore.

    Shumica e njerëzve e dinë se cilat ushqime u shkaktojnë fryrje dhe përpiqen t’i shmangin për të luftuar problemin. Nëse fryrja është e shpeshtë dhe ndikon në jetën e përditshme, rekomandohet vizita te mjeku dhe ndjekja e udhëzimeve që ai jep.

    Tradicionalisht, ekzistojnë disa bimë mjekësore që lehtësojnë simptomat dhe ndihmojnë në “çfryrjen” e barkut të fryrë.

    Si t’i konsumoni bimët

    Përdorini në formë çaji: hidhni një lugë çaji nga bima në një filxhan me ujë dhe ziejeni. Mos konsumoni më shumë se dy çajra në ditë.

    Mentja

    Mentja (Mentha piperita) ka veprim tretës dhe përdoret tradicionalisht për lehtësimin e problemeve të tretjes, përfshirë simptomat e sindromës së zorrës së irrituar. Ajo relakson zorrët, qetëson dhimbjen dhe redukton fryrjen. Në shumë vende lindore, çaji i mentës shërbehet pas vakteve, pasi ndihmon tretjen dhe freskon frymëmarrjen. Shpesh kombinohet me kamomil dhe anise në përzierje çajrash për tretjen.

    Melisa (Bari i limonit)

    Kjo bimë konsiderohet një zgjedhje e mirë për ata që vuajnë shpesh nga shqetësime tretëse, dhimbje stomaku dhe ndjesi shtrëngimi në stomak, veçanërisht në situata stresi dhe ankthi. Ka aromë limoni me nota menteje dhe rekomandohet gjithashtu për luftimin e stresit dhe pagjumësisë.

    Nenexhik

    Nenexhiku, ashtu si mentja, ka veprim relaksues, “zbut” stomakun dhe ndihmon kundër urthit dhe fryrjes.

    Farat e anises veprojnë si antispazmatik dhe si laksativ i lehtë. Ato ndihmojnë edhe në lehtësimin e dhimbjeve të stomakut.

    Kamomil

    Kamomili, një nga bimët mjekësore më të njohura dhe më të përdorura, ka veprim të butë dhe është i përshtatshëm për të gjithë. Pas një vakti që ka shkaktuar fryrje, çaji i kamomilit është ideal për qetësimin e barkut. Përveç kësaj, ka edhe veprim të lehtë diuretik.

    Ushqimet që duhen shmangur

    Ushqimet që shkaktojnë fryrje nuk janë të njëjta për të gjithë, megjithatë disa prej tyre dihet se favorizojnë përgjithësisht këtë problem. Mjafton të vëzhgojmë se cilat nga ushqimet e mëposhtme na shqetësojnë dhe t’i shmangim, sidomos kur planifikojmë të veshim rroba të ngushta që theksojnë barkun:

    Thjerrëza, fasule, qiqra

    Angjinare, shpargull, lakër Brukseli, brokoli, lulelakër, presh

    Speca, bizele, kastravecë, qepë

    Pije të gazuara

    Misër, produkte nga gruri integral

    Qumësht, djathëra të butë, akullore, ushqime të përpunuara që përmbajnë laktozë

  • Rrëshqitje dherash në Dardhas të Pogradecit, dëmtohen varrezat e fshatit

    Rrëshqitje dherash në Dardhas të Pogradecit, dëmtohen varrezat e fshatit

    Reshjet e dendura të shiut kanë shkaktuar rrëshqitje të mëdha të rrugës në aksin që lidh qendrën e Njësisë Dardhas me aksin nacional duke bllokuar kështu disa fshatra të Pogradecit në Shqipëri.

    Emergjencat Civile dhe forcat e bashkisë janë në terren për monitorimin e situatës.

    Sakaq, kësaj situate problematike të vështirë si kanë shpëtuar as disa varre, të cilët janë shkatërruar nga rrëshqitja e dherave.

    Rrëshqitje dherash në Dardhas të Pogradecit, dëmtohen varrezat e fshatit