Blog

Faruk Manxhuni, pronari i shtëpisë që parashihet të rrënohet për shkak të punimeve në rrugën A në Prishtinë, ka kundërshtuar të martën ekzekutimin e vendimit të Inspektoratit.

Në shenjë kundërshtimi, ai ka qëndruar brenda objektit, duke refuzuar të largohet pavarësisht pranisë së inspektorëve, të cilët kishin dalë në terren për të realizuar rrënimin.

Manxhuni ka deklaruar se nuk do të largohet nga shtëpia derisa të kompensohet për dëmin që, sipas tij, i është shkaktuar.

Pas rezistencës së pronarit, zyrtarët e Inspektoratit, së bashku me Policinë e Kosovës, janë tërhequr nga vendi i ngjarjes, ndërsa procesi i rrënimit nuk është realizuar.

Ish-kreu i Gjykatës Kushtetuese, Enver Hasani, thotë se vendimi i ushtrueses së detyrës së presidentes së Kosovës, Albulena Haxhiu, për të nënshkruar dekretet për shkarkimin e shtatë prokurorëve serbë përbën një çështje politike, e jo juridike.

“Nëse dikush donte të vepronte sipas ligjit, duhej të vendoste atëherë. Jo katër vjet më vonë”, thotë ai.

“Tani po krijohet përshtypja sikur ligji po zbatohet, kur në fakt po zgjidhet një çështje politike.”, shton Hasani.

Hasani në një intervistë për KoSSev konsideron se si Këshilli Prokurorial i Kosovës, ashtu edhe Haxhiu, kanë vendosur për një çështje për të cilën, sipas tij, as nuk kanë pasur kompetencë të vendosin, duke paralajmëruar se “nën petkun e ligjshmërisë po demonstrohet pushteti”.

“Ky është një demonstrim pushteti nën maskën e ligjshmërisë. Ushtrim pushteti”, thotë ai.

Komenetet e Hasanit vijnë pasi Haxhiu këtë mëngjes nënshkroi dekretet për shkarkimin e shtatë prokurorëve nga komuniteti serb, vetëm një ditë pasi Këshilli Prokurorial i Kosovës refuzoi kërkesat e tyre për tërheqjen e dorëheqjeve të paraqitura në nëntor të vitit 2022 dhe propozoi shkarkimin e tyre.

Deputeti i LVV-së, Vigan Qorrolli, tha se synimi i partisë është të arrijë një marrëveshje politike me LDK-në për formimin e institucioneve të reja, përfshirë edhe zgjedhjen e presidentit. Sipas tij, po presin që LDK-ja t’i zgjidhë çështjet e brendshme lidhur me kërkesën për shkarkimin e Lumir Abdixhikut, në mënyrë që të vazhdojnë bisedimet.

Në një bisedë për RTV21, deputeti Qorrolli tha se u.d presidentja Haxhiu pritet ta thërras seancën për konstituimin e Kuvendit jo më vonë se deri më 5 gusht.

“Ne jemi në pritje që të thirret seanca konstituive. Afati i fundit është 7 gushti dhe besojmë se jo më vonë se 5 gushti do të thirret seanca konstituive. Besoj se gjatë kësaj jave zonja Haxhiu do ta nxjerrë dekretin për thirrjen e seancës konstituive. Kanë mbetur edhe tri javë në mënyrë që LDK-ja të arrijë një konsensus të brendshëm. Ne duam dhe e kemi bërë të qartë se duam një marrëveshje politike për të gjitha institucionet. Kjo ka qenë edhe kërkesa e LDK-së. Në muajt mars dhe prill, LDK-ja kërkonte një marrëveshje klasike politike. Negociatat kanë qenë në rrugë të duhur për të arritur një marrëveshje të tillë politike, në mënyrë që të hyhet në seancë, të zgjidhet kryetari i Kuvendit, kryeministri Kurti të rikonfirmohet në detyrë dhe më pas të zgjidhet edhe çështja e presidentit, duke i dhënë Kosovës institucione stabile”, tha Qorolli.

Deputeti Qorrolli tha se vendi mund të shkojë në zgjedhje nëse partitë politike nuk arrijnë një marrëveshje, nga e cila do të propozohej një kandidat jopartiak për president.

“Nëse nuk arrihet kompromis për një emër të veçantë, që do t’i kënaqte të gjitha partitë politike, pra për një emër konsensual, natyrisht zgjedhjet mund të duken të pashmangshme. Por ne nuk duam zgjedhje, sepse nuk është zgjidhja më e mirë. Në rast se partitë nuk bien dakord për një emër konsensual, në gjykimin tonë, në këtë moment mendojmë se figura e presidentit duhet të jetë jopartiake, një figurë mbi palët politike. Atëherë vendi mund të shkojë në zgjedhje, por jo me dëshirën tonë.”, u shpreh ai.

Një lëvizje nacionaliste serbe ka bërë thirrje publike për arrestimin e ish-pjesëtarëve të Ushtrisë Çlirimtare të Kosovës (UÇK), duke publikuar lista me emra dhe të dhëna personale të personave që pretendon se kanë qenë pjesë e brigadave të UÇK-së.

Këto thirrje vijnë në një kohë kur vazhdojnë arrestimet e shqiptarëve nga autoritetet serbe në pikat kufitare, kinse nën dyshime për krime lufte.

Lidhur me këtë, Fatmir Sopi, nënkryetar i Organizatës së Veteranëve të Luftës së Ushtrisë Çlirimtare të Kosovës (OVL-UÇK), në një intervistë për Ekonomia Online u shpreh se në Serbi gjithmonë ka pasur lista për arrestimin e pjesëtarëve të Ushtrisë Çlirimtare të Kosovës.

“Kjo nuk është risi, Serbia gjithmonë ka pasur lista për arrestimin e ish-pjesëtarëve të Ushtrisë Çlirimtare të Kosovës, duke pasur parasysh se në Interpol ekziston një listë e përbërë nga pjesëtarët e Ushtrisë Çlirimtare të Kosovës, sidomos nga udhëheqësit e saj, që Serbia vazhdimisht i ka kërkuar për arrestim dhe për dënim. Ne kemi qenë palë në konflikt më të, palë në luftë me të dhe e kemi zhvilluar një luftë çlirimtare, ndërsa ajo e ka zhvilluar një luftë pushtuese ndaj vendit tonë”, tha ai.

Sopi konsideron se publikimi i listave është i panevojshëm.

“Mirëpo, në këtë kohë kur flitet për marrëveshje, jemi në paqe, kur Serbia e ka pranuar humbjen dhe Serbia është tërhjekur me turp pas gati një shekulli pushtim mbi Kosovën, ne konsiderojmë se ato lista dhe ato kërkesa janë të panevojshme, kur kemi parasysh poashtu edhe kërkesat e prononcimet e pushtetarëve, kur ministrja e Serbisë që para disa kohe, kërkon dhe thotë se po të isha në vendin e Millosheviqit do t’a zbrazja Kosovën, do t’a spastroja etnikisht Kosovën dhe ajo do të ishte tokë serbe”, tha ai.

Ai u bëri apel të gjithë ish-pjestarëve të UÇK-së dhe të gjithë qytetarëve që të mos kalojnë në asnjë rrethanë, në territorin e Serbisë, sepse do të ballafaqohen më kërcënime, arrestime, apo edhe vrasje.

“Ne kemi pasë punën tonë në luftë për çlirimin e vendit tonë, mirëpo shumë herë ne u kemi bërë apel pjesëtarëve të Ushtrisë Çlirimtare të Kosovës, që në asnjë mënyrë, në asnjë rrethanë, të mos kalojnë nëpër territorin e Republikës së Serbisë, sepse do të ballafaqohen me arrestime, me kërcënime, mund të ndodhë edhe me vrasje, prandaj shumë herë apeli ynë ka qenë, edhe pse një pjesë, dikush dikush nuk është duke e përfillur, mirëpo po përballen me pasoja, e sidomos po përballen me pasoja familjarët e tyre, se duhet të merren më punën e tyre edhe me lirimin e tyre. Bëjmë prapë apel, që jo vetëm pjestarët e Ushtrisë Çlirimtare të Kosovës, por edhe qytetarët e thjeshtë të rezervohen gjatë udhëtimeve dhe qëndrimeve në Serbi, sepse janë të disponuar armiqësisht ndaj nesh. Prandaj, duhet të kemi kujdes të gjithë, sepse akuza edhe për qytetarëve të thjeshtë është je pjesëtar i Ushtrisë Çlirimtare të Kosovës, më së lehti për t’i dënuar ata”, shtoi ai, për Ekonomia Online.

Nënkryetari i OVL-UÇK tha se shteti duhet të ankohet pranë organizatave ndërkombëtare, në mënyrë që situata të tilla mos të ndodhin.

“Shteti ynë duhet të jetë në nivel të detyrës, duhet të ankohet për këto gjëra pranë organizmave ndërkombëtarë, si shtet i cili duhet t’i mbrojë qytetarët e vet dhe të ketë kujdes, edhe diplomacia jonë të angazhohet që me shtetet mike të bënë presion mbi Serbinë, që këto gjëra të mos ndodhin dhe të ekzistojë një liri e lëvizjes së të gjithë qytetarëve, pa marrë parasysh përkatësinë e tyre, për shembull politike, apo të kaluarën e tyre, në qoftë se, normal Serbia të kaluarën tonë si pjesëtarë të Ushtrisë Çlirimtare të Kosovës e konsideron armiqësore”, përfundoi ai.

Me ardhjen e diasporës në Kosovë janë rritur edhe pritjet në pikat kufitare për të hyrë në Kosovë.

aktualisht mërgimtarët po presin më së shumti në Jarinje, ku kolona aty është deri në 500 metra. Te Dheu i Bardhë, në hyrje të kësaj pike kufitare pritjet janë deri në 20 minuta, ndërsa në dalje të saj deri në gjysmë ore.

Në Muçibabë, për të hyrë në Kosovë kolona është deri në 100 metra, me pritje deri në 20 minuta.

Pikat tjera kufitare raportohet të jenë më qetë me pritje të zakonshme 3-5 minuta.

Ministria e Punëve të Brendshme e Maqedonisë së Veriut në një reagim për media kanë thënë se s’është e vërtetë që dikush ka qenë duke i ndjekur tre kosovarët të cilët vdiqën në një aksident trafiku në rrugën Bllacë-Shkup.

“MBP hedh poshtë të pavërtetat dhe spekulimet e publikuara në një pjesë të mediave lidhur me aksidentin rrugor në autostradën PKK Bllacë–Shkup, në të cilin humbën jetën tre persona, sipas të cilave pretendohet se viktimat janë ndjekur nga një automjet tjetër që është paraqitur rrejshëm si polici dhe se një dukuri e tillë është vërejtur edhe më parë”, thuhet në reagimin e tyre.

MPB maqedonase thotë se organet hetimore po punojnë për të zbardhur shkakun që ka çuar te aksidenti tragjik.

“Apelojmë që të mos përhapen dezinformata. As nuk është evidentuar një dukuri e tillë dhe as nuk ka ndonjë denoncim për të ashtuquajturën “polici e rreme”. Organet hetimore do ta zbardhin shkakun që ka çuar në këtë aksident trafiku”, përfundon reagimi.

Daniele Compatangelo, korrespondent i La7 në Uashington dhe president i Shoqatës së Korrespondentëve të Jashtëm të Shtëpisë së Bardhë (WHFCA), ka vdekur papritur në moshën 50 vjeçare pas një sëmundjeje të papritur, sipas agjencisë italiane të lajmeve ANSA.

Compatangelo, i cili mbuloi politikën amerikane për më shumë se dy dekada dhe së fundmi siguroi një intervistë ekskluzive telefonike me Donald Trump, drejtoi shoqatën që përfaqësonte gazetarët e huaj të akredituar në Shtëpinë e Bardhë dhe institucione të tjera qeveritare të SHBA-së.

Intervista ekskluzive e Compatangelos me Trump u bë një nga momentet përcaktuese të karrierës së tij. Komentet e presidentit amerikan në lidhje me marrëdhënien e tij me kryeministren italiane Giorgia Meloni shkaktuan polemika politike në Itali pasi u transmetuan në programin L’aria che tira të La7.

Intervista bëri bujë ndërkombëtare pasi Trump pretendoi se Meloni i ishte “lutur” atij për një fotografi në samitin e G7, vërejtje që ajo i hodhi poshtë si “plotësisht të fabrikuara” dhe që shkaktuan një debat diplomatik midis Romës dhe Uashingtonit.

Intervista nxori në pah aftësinë e Compatangelos për të siguruar qasje të nivelit të lartë ndërsa raportonte mbi politikën amerikane nga brenda korridoreve të pushtetit në Uashington.

Gjatë gjithë kohës së tij në SHBA, ai ofroi rregullisht analiza të politikës së brendshme dhe të jashtme, duke përfshirë zhvillimet rreth konfliktit që përfshinte Iranin, duke u mbështetur në rrjetin e tij të gjerë të kontakteve në Shtëpinë e Bardhë.

Sipas korrespondentit, SHBA-të kishin një strategji shumë të qartë për të siguruar mbështetje: çdo kritikë ndaj Evropës ishte në fakt një kërkesë për ndihmë në lidhje me Iranin.

Compatangelo kaloi 25 vjet duke mbuluar lajmet ndërkombëtare, duke punuar për një gamë transmetuesish dhe botimesh, duke përfshirë Sky dhe Il Secolo XIX, ndërsa drejtoi gjithashtu disa zyra shtypi të profilit të lartë.

Ai mbuloi tetë Lojëra Olimpike verore dhe dimërore, nga Sidnei në vitin 2000 deri në Londër në vitin 2012, duke kombinuar raportimin sportiv me gazetarinë politike dhe prodhimin e dokumentarëve dhe raporteve të gjata.

Në qershor 2011, dokumentari i tij investigativ The Los Angeles Breakdown mori një Përmendje Nderi në Southern California Journalism Awards në Los Angeles.

Puna e tij u transmetua gjithashtu nga RSI, transmetuesi publik zviceran në gjuhën italiane, si dhe Rai dhe Mediaset.

Krahas punës së tij si korrespondent i La7 në Uashington, Compatangelo shërbeu si president i WHFCA-së, duke përfaqësuar komunitetin e gazetarëve të huaj të akredituar në Shtëpinë e Bardhë dhe duke forcuar lidhjet midis medias ndërkombëtare dhe institucioneve amerikane.

I lindur në Savona dhe i rritur në Torino, Compatangelo jetoi në Romë përpara se të zhvendosej përgjithmonë në Shtetet e Bashkuara, ku u vendos si një nga gazetarët më të njohur të Italisë që mbulonte politikën amerikane.

Vdekja e tij shkaktoi një mori homazhesh nga kolegët, përfshirë ata në La7.

“Jemi të tronditur. Të gjithë në La7 qëndrojnë pranë të dashurve të tij”, tha drejtori i transmetuesit Andrea Salerno.

“Daniele ishte një bashkëpunëtor i çmuar dhe i pazakontë, i nxitur nga një dëshirë e vazhdueshme për të treguar histori me saktësi dhe gëzim. Ai ishte një gazetar i shkëlqyer. Do të na mungojë”, shtoi ai.

Compatangelo u respektua gjerësisht midis kolegëve që mbulonin politikën amerikane dhe mbeti një prani aktive në korpusin e shtypit të Shtëpisë së Bardhë deri pak para vdekjes së tij.

Sot u jepet lamtumira e fundit tre mërgimtarëve nga Vushtrria që humbën jetën nga aksidenti në Maqedoninë e Veriut.

Kjo është bërë e ditur përmes njoftimit mortor të familjarëve.

“Sot, pas namazit të ikindisë, do t’i jepet lamtumira e fundit tre mërgimtarëve nga Vushtrria, Ejup Tërnava, Cennet Tërnava dhe Fatmire Shabani, të cilët humbën jetën tragjikisht në aksidentin e ndodhur në Maqedoninë e Veriut”, thuhet në njoftim.

Sipas njoftimit ceremonia e varrimit do të zhvillohet në varrezat e fshatit Studime, në Vushtrri.