Blog

Kryeprokurori i Prokurorisë Themelore në Prizren, Petrit Kryeziu së bashku me Policinë e Kosovës, do të mbajë sot konferencë për media lidhur me aksionin e Prokurorisë Themelore të Prizrenit, që ka të bëjë me keqpërdorimet në Byronë Kosovare të Sigurimeve.

Konferenca do të mbahet në ora 14:00.

“Ju njoftojmë se Prokuroria Themelore në Prizren, përkatësisht Kryeprokurori z. Petrit Kryeziu së bashku me Policinë e Kosovës, do të mbajë sot (08 Janar 2026) konferencë për media lidhur me aksionin e Prokurorisë Themelore të Prizrenit, që ka të bëjë me keqpërdorimet në Byronë Kosovare të Sigurimeve. Konferenca do të mbahet në orën 14:00, në objektin e Prokurorisë Themelore në Prizren, kati tretë, Salla e Takimeve”, thuhet në njoftim.

Kompania Rajonale e Ujësjellësit “Prishtina” ka njoftuar për turbullira të larta në kanalin e Ibër-Lepencit, me ç’rast ITU-ja Shkabaj vazhdon të jetë jashtë funksionit.

Gjithashtu thuhet se reduktime në furnizimin me ujë pritet të ketë edhe në Fushë Kosovë, Obiliq dhe në lagjen Kalabria në Prishtinë.

“Zonat e lartcekura do të furnizohen me ujë nga ora 17:00 deri në 22:00”, thuhet në njoftimin e KRU-së.

Nga kompania bëjnë me dije se mund të ketë ndikime edhe në zona të tjera të kryeqytetit.

Njoftimi:

NJOFTIM PËR FURNIZIM ME UJË

Të nderuar konsumatorë,

Për shkak të turbullirave të larta në kanalin Ibër-Lepenc, si pasojë e reshjeve të dendura, ITU Shkabaj është jashtë funksionit.

Si rrjedhojë, priten reduktime në furnizimin me ujë nga ora 11:00 – 17:00 në këto zona:

▪️ Fushë Kosovë
▪️ Obiliq
▪️ Një pjesë e lagjes Kalabria – Prishtinë
🔹 Zonat e lartcekura do të furnizohen me ujë nga ora 17:00 deri në 22:00.
🔹 Ndikime mund të ketë edhe në zona të tjera të kryeqytetit.

Ekipet tona janë në terren dhe po monitorojnë situatën vazhdimisht. Furnizimi do të rikthehet sapo të stabilizohen parametrat.

Me ITU Albanik dhe Badoc po trajtohet ujë me kapacitet maksimal.

Shtetet e Bashkuara të Amerikës kanë njoftuar zyrtarisht tërheqjen nga një numër i madh i organizatave të ndryshme. Prej tyre, janë edhe Regional Cooperation Council (RCC) dhe Komisioni i Venecias i Këshillit të Evropës.

Kosova është anëtare e RCC-së që nga viti 2013 dhe në vazhdimësi ka bashkëpunime me këtë organizatë.

Ndërkohë pavarësisht se nuk është anëtare e Këshillit të Evropës, prej vitesh Kosova ka adresuar lëndë në Komisionin e Venecias, organizatë prej të cilës SHBA është tërhequr gjithashtu.

Njoftimi për tërheqjen e SHBA-së nga përkrahja e këtyre organizatave është publikuar në faqen zyrtare të Shtëpisë së Bardhë.

Presidenti ukrainas Volodymyr Zelensky tha më 7 janar se beson që lufta në shkallë të plotë e Rusisë kundër Ukrainës, mund të përfundojë në gjysmën e parë të vitit 2026.

Duke folur në ceremoninë e hapjes që shënoi fillimin e presidencës së Qipros në BE, Zelensky vuri në dukje atë që e përshkroi si një fazë të re në negociatat me partnerët evropianë dhe Shtetet e Bashkuara.

Ai gjithashtu theksoi se Bashkimi Evropian duhet të luajë një rol qendror në procesin e negociatave.

“Ndërsa Qiproja fillon presidencën e saj të Këshillit të BE-së, ne vërejmë se negociatat kanë arritur një moment të ri së bashku me partnerët tanë evropianë dhe, natyrisht, Shtetet e Bashkuara dhe të gjithë anëtarët e Koalicionit të të Gatshmëve”, tha Zelensky.

“Ne besojmë sinqerisht se kjo luftë mund të përfundojë gjatë presidencës suaj të Këshillit të BE-së”, shtoi presidenti ukrainas.

Presidenca e Qipros në Këshillin e Bashkimit Evropian do të vazhdojë gjatë gjysmës së parë të vitit, deri në fund të qershorit 2026.

Komentet e Zelensky vijnë pas disa raundeve të bisedimeve të fundit midis delegacioneve ukrainase, evropiane dhe amerikane në Paris.

Samiti i “Koalicionit të Gatshmëve”, i organizuar nga presidenti francez Emmanuel Macron, zhvillohet ndërsa Kievi sinjalizon se një marrëveshje për t’i dhënë fund pushtimit pothuajse katërvjeçar në shkallë të plotë të Rusisë është “90% gati”.

Takimi mbledh së bashku përfaqësues nga 35 vende, përfshirë 27 krerë shtetesh dhe qeverish, zyrtarë të lartë të BE-së dhe Sekretarin e Përgjithshëm të NATO-s Mark Rutte.

Sipas një draft-deklarate të përbashkët të raportuar, ende subjekt i ndryshimeve dhe një miratimi përfundimtar nga udhëheqësit, garancitë e sigurisë së Koalicionit do të përfshijnë një forcë të mbështetur nga SHBA-të dhe të udhëhequr nga Evropa të vendosur në Ukrainën e pasluftës, si dhe monitorimin e armëpushimit nga Uashingtoni.

Ministria e Mbrojtjes e Shqipërisë ka urdhëruar evakuimin e menjëhershëm të banorëve në Njësinë Administrative Ferras në Fier për shkak të përmbytjeve dhe rrezikut të lartë për jetën dhe shëndetin e qytetarëve.

Bazuar në njoftimin e lëshuar të ministrisë, evakuimi do të kryhet në koordinim me Agjencinë Kombëtare të Mbrojtjes Civile, Prefektin e Qarkut dhe strukturat vendore të emergjencave.

Prioritet do t’i jepet fëmijëve, të moshuarve, personave me aftësi të kufizuara dhe familjeve në zona të izoluara.

Sipas njoftimit, transporti do të sigurohet nga mjetet e bashkisë, Shërbimi i Mbrojtjes nga Zjarri dhe Shpëtimi dhe Forcat e Armatosura.

Qytetarët e evakuuar do të strehohen dhe asistohen nga bashkia, policia, njësitë shëndetësore dhe strukturat sociale, ku do të sigurohet regjistrimi, ushqimi, veshmbathja, ndihma mjekësore dhe informacioni i rregullt mbi situatën.

Ky njoftim ka karakter urgjent dhe hyn menjëherë në fuqi.

Ushtruesi i detyrës së ministrit në detyrë të Infrastrukturës, Hysen Durmishi, tha se aktualisht të gjitha rrugët janë të kalueshme, por se duhet kujdes i shtuar në qarkullim.

Durmishi tha se kanë intervenuar në shumicën e rrugëve për të cilat është kompetente Ministria dhe se me pastrim e hedhje të kripës po vazhdojnë edhe sot.

“Ashtu siç kemi paralajmëruar edhe mbrëmë, për shkak të kontrastit të temperaturave, rrugët tona janë të mbuluara me ngrica. Gjatë gjithë natës kemi intervenuar në shumicën e rrugëve që janë në kompetencë të ministrisë. Edhe sot në mëngjes kemi vazhduar punën në pastrimin e rrugëve dhe hedhjen e kripës. Aktualisht, të gjitha rrugët janë të kalueshme, por kërkohet kujdes i shtuar gjatë qarkullimit. Ju lutemi t’i përshtateni kushteve të rrugës”, tha ai.

Më 31 mars të vitit 2023, Prokuroria Themelore në Prishtinë kishte ngritur aktakuzë ndaj hoxhës Behar Mjekiqi. Ai akuzohej për kryerjen e veprës penale dhunë në familje.

Në aktakuzë thuhej se Mjekiqi kishte ushtruar dhunë, kërcënime dhe kishte cenuar lirinë e gruas së tij të dytë, me të cilën kishte lidhur kurorë sipas fesë islame. Sipas Prokurorisë, ata kohë pas kohe bashkëjetonin, ndonëse edhe para incidentit kishin pasur probleme serioze në marrëdhënie.

Prokuroria sqaron se rreth dy vite më parë, në ditën kritike, Mjekiqi kishte filluar t’ia mbledhë gruas gjërat personale me qëllim që ta largonte nga shtëpia. Kur ajo kishte marrë telefonin për t’i kontaktuar familjarët e saj, i njëjti ia kishte tërhequr atë me dhunë, duke ia pamundësuar komunikimin shkruan Insajder. org.

Situata kishte eskaluar deri në dhunë fizike. Përveç goditjeve, sipas aktakuzës, ai e kishte kapur viktimën për flokësh dhe për krahu, e kishte tërhequr nga dhoma e gjumit drejt korridorit dhe më pas e kishte përplasur në dysheme.

Sipas deklarimeve të gruas, ajo vazhdimisht kishte kërkuar dhe kishte tentuar të largohej nga shtëpia, por ishte penguar me forcë. Pas daljes nga shtëpia, E.J. ka thënë se ka kontaktuar menjëherë Policinë e Kosovës dhe ka kërkuar ndihmë. Ajo është dërguar për ekzaminim mjekësor, ku janë konstatuar lëndime trupore.

Ndërkaq, i pandehuri Mjekiqi në deklarimet e tij kishte mohuar përdorimin e dhunës fizike, duke pretenduar se kishte vepruar vetëm për ta “qetësuar” situatën.

Mbrëmë, në një paraqitje televizive në emisionin “Libero” në ATV, Mjekiqi ka prezantuar një dokument, për të cilin ka deklaruar se është Aktgjykim i Gjykatës Themelore në Prishtinë, i datës 06.01.2025, në bazë të të cilit ai është liruar nga akuza.

Lidhur me këtë rast, Mjekiqi ka deklaruar se publikimi i pretendimeve të E.J. nuk e kanë penguar.

“Në raport me Zotin jam i pastër. Në raport me nanën, gruan, djalin, familjen dhe shoqërinë jam i pastër”, ka deklaruar ai.

Rasti i Behar Mjekiqit nuk ka përfunduar, reagon avokatja e palës së dëmtuar