Blog

Presidenti palestinez Mahmoud Abbas deklaroi se ata refuzojnë ndarjen e Gazës dhe se Izraeli nuk ka legjitimitet në asnjë pjesë të Gazës.

Duke folur në hapjen e sesionit të 13-të të Këshillit Revolucionar të Lëvizjes Fatah, Abbas tha se shteti palestinez është entitet i vetëm dhe i pandashëm gjeografik dhe politik që përfshin Gazën, Bregun Perëndimor dhe Kudsin Lindor.

Ai tha se prioritetet e tyre janë ta bëjnë armëpushimin në Gaza të përhershëm dhe të sigurojnë hyrjen e menjëhershme të ndihmës humanitare.

“Faza e dytë e planit të presidentit të SHBA-së Donald Trump duhet të zbatohet në Rripin e Gazës. Kjo parashikon tërheqjen e plotë të Izraelit nga Gaza, dorëzimin e pushtetit nga Hamasi dhe krijimin e një komiteti administrativ kalimtar nën qeverinë palestineze”, theksoi Abbas.

Ai shtoi se procesi në fjalë synon rindërtimin pa “zhvendosje të detyruar” dhe fillimin e një procesi politik të bazuar në legjitimitetin ndërkombëtar dhe Iniciativën Arabe për Paqen.

“Ky vit do të jetë viti i demokracisë palestineze”, tha Abbas duke shtuar se zgjedhjet lokale do të mbahen në prill dhe se kongresi i 8-të i Fatahut dhe zgjedhjet për Këshillin Kombëtar Palestinez janë planifikuar për këtë vit.

Abbas tha se zgjedhjet e përgjithshme do të mbahen njëkohësisht në Gaza, Bregun Perëndimor dhe Kudsin Lindor kur të krijohen kushtet e përshtatshme.

Ai potencoi se veprimet e Izraelit në Bregun Perëndimor dhe Kudsin Lindor janë po aq të rrezikshme sa ato në Gaza dhe i bëri thirrje komunitetit ndërkombëtar të ushtrojë presion mbi Izraelin. /AA/

Instituti Hidrometeorologjik i Kosovës (IHK) ka bërë të ditur se gjatë periudhës 03–08 janar 2026, shumica e lumenjve në vend shkaktuan vërshime dhe përmbytje, disa prej të cilave me përmasë që ndodh një herë në 50 vjet.

Sipas IHK-së, në disa segmente lumenjtë dolën nga shtrati i tyre, duke shkaktuar dëme në zonat përreth.

“Aktualisht shumicën e lumenjve të vendit, janë në rënie të lehtë, pos lumenjve: Drini Bardhë rrjedha e poshtme, Sitnica, Morava e Binçës, Lepenci, të cilët kanë ngritje të lehtë”, thuhet në njoftim.

Gjatë këtyre ditëve, reshjet mesatare në territorin e Kosovës arritën 97.1 mm (l/m²), duke kontribuar në situatën e përmbytjeve dhe vërshimeve. Instituti vazhdon të monitorojë situatën hidrometeorologjike dhe paralajmëron qytetarët të tregojnë kujdes pranë lumenjve dhe zonave të përmbytura.

Komuna e Pejës ka filluar me procesin e aplikimit për vlerësimin e dëmeve nga vërshimet që përfshinë shumë zona në vend si shkak i reshjeve të dendura të shiut, e të cilat lanë prapa dëme në shtëpi, biznese e në bujqësi.

Kërkesën për vlerësim të dëmit qytetarët duhet ta paraqesin pranë Komisionit Komunal për Vlerësimin e Dëmeve, derisa komuna e Pejës thotë se afati për aplikim është deri më 16 janar.

Të dëmtuarit duhet të paraqesin pranë kësaj zyre fotografi që dëshmojnë dëmin që i është shkaktuar nga vërshimet.

Komuna e Pejës thotë se kërkesat duhet ët dorëzohen personalisht pranë Komisionit Komunal për Vlerësimin e Dëmeve që gjendet në objektin e komunal në Qendrën për Shërbime me Qytetarë.

Lëvizja Vetëvendosje ka falënderuar qytetarët që e kanë votuar këtë parti në zgjedhjet e 28 dhjetorit.

Përmes një postimi në rrjetin social Facebook, Vetëvendosje ka theksuar se është konfirmuar si subjekti politik më i votuar në historinë e Kosovës, përcjell Insajderi.

Postimi i plotë:

Lëvizja VETËVENDOSJE! u konfirmua fuqishëm si subjekti politik më i votuar në historinë e Republikën e Kosovës.

486,994 vota – 51.11% të vullnetit qytetar.

Faleminderit të gjithë qytetarëve të Republikës së Kosovës që nuk lëshuan pe dhe votuan për siguri dhe begati.

Faleminderit secilit për mbështetjen e jashtëzakonshme dhe për fitoren tonë të fuqishme në zgjedhjet e 28 dhjetorit!

Gjykata e Apelit e Firences ka urdhëruar Spitalin Universitar të Pizës t’i paguajë mbi 460 mijë euro dëmshpërblim një gruaje 47-vjeçare, e cila iu nënshtrua për vite me radhë trajtimeve të rënda kundër kancerit, pa pasur në të vërtetë asnjë tumor.

Në vitin 2006, gruaja u diagnostikua me kancer të zorrëve, çka e çoi drejt një terapie të gjerë dhe të panevojshme. Nga janari 2007 deri në maj 2011, ajo iu nënshtrua cikleve të përsëritura kimioterapie, si edhe trajtimeve me kortizon dhe steroide. Vetëm pas një biopsie të re të kryer në Xhenova u përjashtua përfundimisht prania e kancerit.

Gjykata e Apelit rriti ndjeshëm shumën e dëmshpërblimit krahasuar me vendimin e shkallës së parë të Gjykatës së Pizës, e cila kishte caktuar 295 mijë euro. Rasti nisi kur gruaja u paraqit në spital për një ndërhyrje ortopedike: analizat para shtrimit zbuluan një anomali në numrin e qelizave të bardha të gjakut, duke çuar në shtyrjen e operacionit dhe dërgimin e rezultateve në spital.

Pas një biopsie të palcës së kockave dhe të zorrëve, mjekët e spitalit universitar diagnostikuan limfomë jo-Hodgkin.

Sipas mediave vendase, pas një përpjekjeje të pasuksesshme për pajtim, pacientja paditi AOUP-in në gjykatën civile të Pizës. Spitali u mbrojt duke argumentuar se tabloja klinike ishte komplekse dhe e vështirë për t’u diagnostikuar, si dhe se trajtimi i ndjekur ishte i përshtatshëm.

Megjithatë, ekspertiza mjeko-ligjore e urdhëruar nga gjykata konkludoi se trajtimi nuk ishte i nevojshëm, pasi hipoteza e limfomës nuk mbështetej nga analizat, ekzaminimet apo simptomat e raportuara nga pacientja.

Gjykata e Apelit përcaktoi një paaftësi të përhershme prej 60%, kundrejt 40% të njohur nga shkalla e parë, dhe pranoi edhe “dëme të personalizuara”, duke marrë parasysh pasojat e rënda psikologjike dhe ndikimin në jetën e përditshme të gruas.

47-vjeçarja, e cila punonte si shitëse sigurimesh, u detyrua të reduktonte ndjeshëm aktivitetin profesional dhe madje iu hoq edhe leja e drejtimit të automjetit, pasi u konsiderua e papërshtatshme për të drejtuar makinën.

Një 19-vjeçar është vënë në pranga nga policia, pasi dyshohet se plagosi me mjet prerës një 18-vjeçar gjatë një konflikti për motive të dobëta.

Sipas njoftimit të Komisariatit të Policisë Nr. 2, operacioni i koduar “Catch” u organizua në vijim të punës për parandalimin e veprimtarive kriminale dhe kapjen e personave në kërkim.

Shtetasi E. R., 19 vjeç, ishte shpallur në kërkim që prej 23 nëntorit 2025.

Materialet procedurale i janë kaluar Prokurorisë për veprime të mëtejshme.