Instituti Kombëtar i Shëndetësisë Publike të Kosovës (IKSHPK) ka njoftuar se si pasojë e rritjes së vlerave të turbullirës në ujin e prodhuar nga fabrika për trajtimin e ujit “Badoc”, nuk rekomandohet për pije, deri në njoftimin e radhës.
IKShPK tha se në bashkëpunim me KRU “Prishtina” po e përcjellin nga afër situatën me ujë të pijshëm.
Për shkak të reshjeve, ditëve të fundit në vend pati përmbytje nëpër shumë zona.
Shefi i Zyrës së Bashkimit Evropian në Kosovë, Aivo Orav, është takuar të martën me ministrin në Detyrë të Administrimit të Pushtetit Lokal, Elbert Krasniqi.
Sipas njoftimit, në takim është diskutuar për rolin e qeverisjes vendore të fortë dhe të përgjegjshme në zbatimin e reformave.
“Zgjedhjet e fundit në Kosovë tregojnë se si demokracia vendore angazhon njerëzit dhe formëson politikat që pasqyrojnë nevojat e komunitetit përmes vendimmarrjes pranë tyre”, ka thënë Orav.
Një shtetas i huaj, i kërkuar me urdhërarrest ndërkombëtar, është arrestuar sot në Prishtinë nga Policia e Kosovës.
Sipas njoftimit zyrtar, arrestimi është realizuar më 13.01.2026 rreth orës 11:45 nga zyrtarë policorë të Drejtorisë për Bashkëpunim Ndërkombëtar Policor, përkatësisht ekipi FAST, në bashkëpunim dhe koordinim me institucionet tjera relevante.
Pas identifikimit dhe lokalizimit të të dyshuarit, autoritetet kanë ndërmarrë veprimet e nevojshme për arrestimin e tij. Me urdhër të prokurorit kujdestar, i arrestuari është dërguar në ndalim policor për 48 orë, gjatë të cilave do të vazhdojnë procedurat e mëtejme ligjore.
Policia e Kosovës ka theksuar se mbetet e përkushtuar në bashkëpunimin ndërkombëtar për kapjen e personave të kërkuar nga drejtësia.
Mesfushori i njohur Arber Prekazi ka njoftuar sot përmes një postimi në Facebook se ka vendosur të largohet nga FC Feronikeli, pas një marrëveshjeje të dyanshme me klubin.
“Ky nuk ishte një vendim i lehtë, por ndonjëherë gjërat nuk shkojnë ashtu siç i planifikojmë ne. Vetëm Zoti e di të ardhmen,” shkroi Prekazi.
Ai u shpreh i kënaqur me rrugëtimin e tij në klub, duke theksuar se ka ardhur për sfidën dhe për ta ndihmuar Feronikelin të arrijë aty ku i takon. “Po largohem duke e lënë ekipin në vendin e dytë, një pozicion që dërgon direkt në Superligën e Kosovës, pas një rrugëtimi plot sakrificë, djersë dhe punë të ndershme,” shtoi ai.
Prekazi falenderoi të gjithë bashkëpunëtorët e tij në klub: lojtarët, trajnerët, stafin dhe kryesinë, për respektin dhe ambientin pozitiv që kanë ndërtuar së bashku. “Edhe dy jetë po t’i kisha, nuk do ta zhbëja kurrë vendimin për të qenë pjesë e këtij klubi të madh. Faleminderit për gjithçka! Deri herën tjetër,” përfundoi ai.
Largimi i Prekazit shënon një kapitull të rëndësishëm për Feronikelin, i cili vazhdon të synojë rikthimin e plotë në Superligë dhe stabilitetin në elitën e futbollit kosovar.
Bashkimi Evropian ka paralajmëruar se do të vendosë shumë shpejt sanksione të reja ndaj autoriteteve përgjegjëse për “shtypjen” e protestave antiqeveritare në Iran, ka deklaruar presidentja e Komisionit Evropian.
Në një deklaratë të publikuar në platformën X, Ursula von der Leyen e ka cilësuar si tronditës numrin e viktimave në Iran gjatë protestave antiqeveritare dhe ka dënuar “përdorimin e tepruar të forcës dhe kufizimin e vazhdueshëm të të drejtave të qytetarëve atje”.
Ajo shtoi se në koordinim me zëvendëspresidenten e Komisionit Evropian, Kaja Kallas, “do të propozohet me shpejtësi vendosja e sanksioneve të tjera ndaj atyre që janë përgjegjës për represionin”.
“Ne qëndrojmë përkrah popullit të Iranit, i cili po marshon me guxim për lirinë e tij”, ka thënë Von der Leyen.
Rusia e ka kryer një sulm të madh gjatë natës kundër Ukrainës, duke goditur objekte jetike të energjisë, përfshirë një termocentral, në një kohë kur temperaturat në gjithë vendin ranë deri në minus 15 gradë.
Presidenti i Ukrainës, Volodymyr Zelensky, theksoi se Rusia i përdori gati 300 dronë sulmues, si dhe 18 raketa balistike dhe shtatë raketa lundruese.
“Gjendja në rajonin e Kievit është e rëndë. Disa qindra mijëra familje janë pa energji elektrike tani”, tha Zelensky në një postim në X.
Ministria e Mbrojtjes e Rusisë konfirmoi se kishte kryer një “sulm të madh” ndaj objekteve energjetike të Ukrainës, duke pretenduar se ato përdoreshin nga ushtria e Ukrainës dhe kompleksi i saj ushtarako-industrial.
Ministri i Jashtëm i Ukrainës, Andriy Sybiha, e akuzoi Rusinë se po godet qëllimisht infrastrukturën energjetike për t’i privuar civilët nga energjia elektrike, uji dhe ngrohja në kushtet e motit acar.
“Rusia po përpiqet qëllimisht të krijojë kushte jetese, të llogaritura për të sjellë shkatërrimin fizik të popullit ukrainas”, shkroi ai në X, duke shtuar se një veprim i tillë hyn në përkufizimin e Nenit II (c) të Konventës për Gjenocidin.
Furnizuesi kryesor privat i energjisë në Ukrainë, DTEK, raportoi se raketat ruse goditën gjatë natës një termocentral. Ky ishte sulmi i tetë madhor ndaj objekteve të tij që nga tetori i vitit 2025.
Operatori shtetëror i energjisë, Ukrenergo, njoftoi më 13 janar se sulmi rus me raketa dhe dronë kishte në shënjestër objekte energjetike në disa rajone, duke lënë shumë konsumatorë pa energji elektrike në Kiev dhe rajonin e Kievit, si dhe në rajonet Çernihiv, Dnipropetrovsk, Zaporizhja, Zhitomir, Harkiv dhe Donjeck.
Ai shtoi se puna për riparimin dhe rikthimin e furnizimit ka nisur kudo që kushtet e sigurisë mundësuan.
Guvernatori rajonal raportoi se një sulm rus në rajonin e Harkivit vrau katër njerëz dhe plagosi disa të tjerë.
“Numri i njerëzve të vrarë nga sulmi i armikut në periferi të Harkivit ka arritur në katër”, shkroi Oleh Syniehubov në Telegram.
Kryetari i bashkisë së Harkivit, Ihor Terekhov, tha se një dron rus goditi një institucion mjekësor për fëmijë, duke shkaktuar zjarr.
Sulmet gjatë natës goditën gjithashtu rajone të tjera ukrainase, përfshirë qytetin jugor të Odesës.
Guvernatori rajonal, Serhiy Lysak, deklaroi se ndërtesa banimi, një spital, një shkollë dhe një kopsht fëmijësh u dëmtuan — dhe të paktën pesë persona u plagosën në dy valë sulmesh.
Moska ka pretenduar vazhdimisht se nuk synon infrastrukturën civile të Ukrainës, pavarësisht provave gjithnjë e më të mëdha që tregojnë të kundërtën.
Të dhënat tregojnë se forcat ruse intensifikuan sulmet ndaj infrastrukturës energjetike dhe të gazit të Ukrainës në fillim të vjeshtës së vitit 2025, duke ndërprerë furnizimet gjatë sezonit të ngrohjes./REL
Florent Hadërgjonaj ka kaluar një mbrëmje të veçantë në futbollin turk, duke qenë protagonisti kryesor i Alanyasporit në ndeshjen e Kupës së Turqisë ndaj Karagumrukut.
Mbrojtësi i Kombëtares së Kosovës realizoi dy gola në barazimin 2:2, duke konfirmuar formën e tij të mirë dhe rolin e rëndësishëm që ka në skuadrën e tij. Hadërgjonaj hapi serinë e golave në minutën e 16-të, ndërsa golin e dytë e shënoi në minutën e 74-t nga pika e bardhë e penalltisë.
Karagumruku reagoi dy herë, me Fofanan që barazoi rezultatin në minutën e 29-të, ndërsa në minutën e 58-të realizoi edhe golin e dytë, gjithashtu nga penalltia.
Hadërgjonaj u aktivizua si titullar dhe qëndroi në fushë gjatë gjithë ndeshjes, ndërsa nga minuta e parë luajti edhe Fidan Aliti. Ky i fundit u ndëshkua me karton të verdhë në fund të pjesës së parë.
Pas këtij barazimi, Alanyaspor kryeson Grupin A me katër pikë pas dy xhirove të zhvilluara, ndërsa Karagumruk renditet në vendin e tretë me dy pikë në grupin me tetë skuadra.
Paraqitja e Hadërgjonajt konfirmon edhe një herë rëndësinë e tij si për klubin ashtu edhe për Kombëtaren e Kosovës.
ProCredit Superliga e Kosovës në basketboll vazhdon me ritëm të lartë edhe gjatë mesjavës, ku tifozët do të kenë mundësinë të ndjekin disa përballje mjaft interesante në kuadër të javës së 15-të të kampionatit.
Programi i së mërkurës ofron dy ndeshje me rëndësi të veçantë. Bora do të presë Rahoveci 029 në një duel që vjen vetëm pak ditë pas përballjes së tyre në çerekfinalen e Kupës së Kosovës. Prishtinasit hyjnë në këtë takim të motivuar pas triumfit të madh ndaj Bashkimit në Prizren, ndërsa rahovecasit kërkojnë rikthimin te fitoret pas humbjes nga Golden Eagle Ylli. Aktualisht, Bora ka gjashtë fitore dhe tetë humbje, ndërsa Rahoveci 029 numëron pesë fitore dhe nëntë humbje.
Në ndeshjen tjetër të së mërkurës, Vëllaznimi do të përballet me Bashkimin. Kuqezinjtë vijnë pas një fitoreje të rëndësishme ndaj GO+ Pejës dhe synojnë vazhdimësinë, ndërsa prizrenasit kërkojnë të reagojnë pas rezultateve jo të dëshiruara. Vëllaznimi ka pesë fitore dhe nëntë humbje, ndërsa Bashkimi nëntë fitore dhe pesë humbje.
Vëmendja kryesore e javës do të jetë të enjten në Mitrovicë, ku Trepça do të përballet me GO+ Pejën në palestrën “Minatori”. Ky duel konsiderohet si derbi i xhiros, duke pasur parasysh historinë e rivalitetit dhe pozicionin e skuadrave në tabelë. Trepça kryeson renditjen me 11 fitore dhe tri humbje, ndërsa Peja mban vendin e tretë me tetë fitore dhe gjashtë humbje.
Një tjetër përballje interesante do të zhvillohet po të enjten, ku Golden Eagle Ylli do të ndeshet me Sigal Prishtinën. Therandasit janë në formë të mirë me dy fitore radhazi në vitin 2026, ndërsa prishtinasit synojnë pikë të rëndësishme për t’u afruar me kreun e tabelës. Pas 14 xhirove, Ylli ka pesë fitore dhe nëntë humbje, ndërsa Sigal Prishtina shtatë fitore dhe shtatë humbje.
Prokuroria Themelore në Mitrovicë ka ngritur aktakuzë ndaj mjekut nga Vushtrria, A.V., pasi dyshohet se ka lëshuar raporte mjekësore të rrejshme, për të cilat ka marrë para nga 5 deri në 50 euro.
“I pandehuri akuzohet se nga data 20.07.2025 deri me datë 28.10.2025 në Qendrën e Mjekësisë Familjare në Vushtrri, me dashje në cilësinë e personit zyrtar si specialist i mjekësisë familjare, me qëllim që të përfitojë dobi pasurore për vete në atë mënyrë që ka lëshuar raporte mjekësore sipas kërkesës së pacientëve duke e ditur se personat në fjalë – pacientët nuk vuajnë nga sëmundje të tilla, duke i pyetur se çfarë diagnoze t’ua shënojnë me qëllim që të njëjtit këto raporte mjekësore t’i përdorin për hapjen e pushimeve mjekësore në kundërshtim me Ligjin Nr.03/L-212 e Punës, po ashtu ka përshkruar barna pacientëve sipas rekomandimeve të agjentëve farmaceutik, ku pas lëshimit të raporteve mjekësore ka pranuar dobi pasurore – para nga pesë (5) deri në pesëdhjetë (50) euro.”
Prokuroria i ka kërkuar gjykatës që të pandehurin ta shpall fajtor për veprën penale që i vihet në barrë me këtë aktakuzë dhe të njëjtit t’i shqiptojë sanksion penal të paraparë me Kodin Penal të Republikës së Kosovës.
Xabi Alonso ka reaguar për herë të parë pas ndarjes së tij me Real Madridin, duke i dhënë fund heshtjes vetëm një ditë pasi u shkarkua nga posti i trajnerit të ekipit të parë.
Tekniku spanjoll, i cili qëndroi në krye të madrilenëve për vetëm gjashtë muaj, zgjodhi rrjetet sociale për t’u drejtuar tifozëve, duke reflektuar mbi një periudhë që, sipas tij, nuk përfundoi ashtu siç ishte planifikuar.
Në një postim në Instagram, Alonso shprehu mirënjohje për klubin, lojtarët dhe tifozët, duke theksuar se drejtimi i Real Madridit ishte një përgjegjësi e madhe dhe një sfidë e përditshme. Ai theksoi se largohet me ndërgjegje të pastër, duke nënvizuar se ka dhënë maksimumin gjatë qëndrimit të tij në “Santiago Bernabeu”.
Alonso u emërua trajner i Real Madridit në fillim të këtij sezoni, pas suksesit të tij me Bayer Leverkusen. Gjatë 28 ndeshjeve në krye të skuadrës, ai regjistroi 20 fitore, tri barazime dhe pesë humbje – një bilanc pozitiv, por që nuk mjaftoi për të qetësuar pritshmëritë e larta të klubit.
Diferenca prej katër pikësh nga Barcelona në La Liga, së bashku me paraqitjet e paqëndrueshme në Ligën e Kampionëve, ndikuan në vendimin e drejtuesve për një ndarje të parakohshme.
Pas largimit të Alonsos, Real Madridi ka emëruar Alvaro Arbeloan si trajner të ri, duke i besuar drejtimin e skuadrës ish-trajnerit të Real Castilla, i cili më parë garonte në ligën e tretë spanjolle.